Atangi A Madivulu Metu Ebhula . .

O kuila o muenhu ua kalelaku mu Palaízu ua-nda tu kuma?

▪ O Bibidia i tu bhana kidielelu kuila ku hádia, tua-nda kala mu Palaízu mu ixi. (Jisálamu 37:29; Luka 23:43) O kuila o ku kala bhu kididi kiki, kia iuka kia-nda tu kuma?

Kiki kibhuidisu kia dikota. O jingijiie amba kuila, o ku dikuma ni ima, ki tena ku bhangesa o muthu ku kala ni hele, ku kondama, ni ku bhangesa o muenhu ua muthu ku kala mu iluezu. O athu a banza kuila se-ku dingi kidielelu ku muenhu, mba a dikuma ni ima ia bhanga izuua ioso, a kala ni mukôndo. O kuila o athu a-nda kala mu Palaízu, a-nda kala ngó sé ku bhanga kima? O kuila o ima i tua-nda bhanga mu palaízu ia-nda tu kuma?

Kia dianga, xinganeka mu ima ia bhange Jihova Nzambi, ua Bhange o Bibidia, phala ku bhana o muenhu ua kalelaku. (Nzuá 3:16; 2 Timote 3:16) O kídifua kia dianga kia Nzambi, o henda. (1 Nzuá 4:8) Jihova ua tu zolo kiavulu, ua tu bhana o ima ioso i tuala na-iu lelu.—Tiiaku 1:17.

O Mubhangi uetu, uejiia o kima ki bhangesa o muthu ku zediua, tua tokala ku suína phala ku kumbidila o vondadi iê. (Jisálamu 139:14-16; Ndongixi 3:12) Mu Palaízu o akalakadi ka-nda kalakala kála, ji makina. Ki kale o akalakadi, ni athu a zola, a-nda katula mbote ku kikalakalu kia bhanga. (Izaia 65:22-24) O kuila o muenhu ua-nda ku kuma mu ku bhanga kikalakalu ki bhana kisangusangu?

Lua kamúkua Jihova Nzambi, ka-nda kuehela muthu uoso-uoso ku kala mu Palaízu. Muéne u bhana ngó o ujitu ua muenhu ua kalelaku ku athu a kaiela o phangu ia Mon’ê, Jezú. (Nzuá 17:3) Kioso kia kexile mu ixi, Jezú ua sangulukile mu ku bhanga o vondadi ia Tat’ê. Muéne ua longo o akaiedi’ê mu izuelu ni mu ima ia bhange, ia lungu ni mabesá ejila mu ku bhana, o ku tambula ndenge. (Ikalakalu 20:35) Mu Palaízu ia ubhe, athu oso, a-nda belesela itumu iiadi ia dikota—ku zola Nzambi, ni ku zola akuâ. (Matesu 22:36-40) Xinganeka eie mu kaxi ka athu a uabhela o ku bhana, a ku zola, a zola ué o ikalakalu iâ! O kuila ua-nda dikuma mu ku kala ni athu enhá?

Ihi i tua-nda bhanga dingi mu Palaízu? Kizuua ni kizuua, tua-nda di longa dingi ima ia ubhe ia lungu ni Mubhangi uetu. O jingijiie ene hanji mu sanga ima iavulu ia lungu ni ibhangelu ia Jihova. (Loma 1:20) Maji katé lelu, ki tuejiia ioso ia lungu ni ibhangelu ia Jihova. jimidi ni jimidi ja mivu ku dima, o muthu ua fiiele, Jobe ua xinganekene mu ima ioso iejidile ia lungu ni ibhangelu ia Nzambi, mu ioso ia xinganeka Jobe, iene mu londekesa kuila kidi. Jobe uambe, “kífua o [mbambe] ia jinjila jê [ja Nzambi] i tuene mu kuívua kua muene [iofele-fele ngó!] Nanhi-phe u tena kutongolola kibazu kia nzaji ia kutena kuê?”—Jobe 26:14.

Né muene se tu kala ku muenhu ua kalelaku, ki tua-nda tena kuijiia ioso ia lungu ni Jihova Nzambi ni ibhangelu iê. O Bibidia izuela kuila, Nzambi ua te ku muxima uetu o vondadi ia ku kala ku muenhu ua kalelaku. Izuela ué kuila, “o muthu ua lèmbua kuijiia o kikalakalu kioso kia bhange Nzambi, tundé ku dimatekenu katé ku dizubhilu.” (Ndongixi 3:10, 11) O kuila kia-nda ku kuma ku di longa o ima ia ubhe ia lungu ni Mubhangi uê?

Né muene lelu, o athu a mu bhanga o kikalakalu ki bhana muenhu ku athu, ki bhana kijingu kua Nzambi, kene mu dikuma mu kikalakalu kiki. Se tu kolokota o ku bhanga o kikalakalu kiki, ki kia-nda tu kuma—né muene se tu kala ku muenhu ua kalelaku.

[Muxinda ua tokala ku foto ku bandu 14]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/​STScI/NASA)