O Mulangidi ua Ubhe mu Kingileji ki ki Bhonzo

TUA sanguluka kiavulu mu ku mi bhana o ngolokela, kuila ku muvu iú, tua-nda tambula O Mulangidi ua ubhe mu Kingileji ki ki bhonzo, kumoxi ni Mulangidi u tuene mu tambula kiá. Ua-nda kuíza ni jimbandu ja ku di longa mu iônge, ku hádia ia-nda kuíza ué ni jimbandu jengi. Tuejiia kuila O Mulangidi iú, ua-nda kuatekesa o Jimbangi ja Jihova mu ukexilu ua nzumbi. Kiebhi-phe?

O dízui dia Kingileji ene mu dizuela kiavulu ku jiphange jetu mu jixi ja Fiji, Gana, Quénia, Libéria, Nigéria, Papua-Nova Guiné, ni Ilhas Salomão. Sumbala o jiphange jiji, ala ni dízui diâ, dia uvualukilu, ene a zuela o Kingileji kioso kiaia mu iônge, ni mu sidivisu ia kuboka. Maji o Kingileji kiene mu zuela, ki ki bhonzo, ki kia sokela ni Kingileji kiene mu kuíza mu madivulu metu. Saí uê mundu ua Jihova ene múia mu jixi jengi muene mu zuela ngó o Kingileji, ene a zuela ué o Kingileji phala ku di tendela ni akua, sumbala ene kejiia kiavulu o dízui didi. Mu kiki, ene kene múia mu iônge ia dízui dia uvualukilu.

O mbandu ia ku di longa ia Mulangidi, mu semana joso, iene mu tu suínisa mu nzumbi. Mu kiki, phala ku kuatekesa o jiphange joso ku katula mbote mu milongi íii, O Mulangidi uala ni Kingileji ki ki bhonzo, muala izuelu ki ia bhonzo ku i tendela. O kapa ia Mulangidi ua ubhe, ki ia-nda difua ni Mulangidi u tuene mu tambula kiá. Maji o jimbandu ja ku di longa ia-nda difua, kála o jifoto, ni ibhuidisu ia ku bhitulula. Mu kiki, o jiphange joso a-nda tena ku kaiela, ni ku bhana o itambuijilu iâ, kioso ki tua-nda di longa O Mulangidi. Phala kulondekesa se kiebhi o izuelu ia Mulangidi mu Kingileji ki ki bhonzo ki ia difu ni Mulangidi u tuene mu tambula kiá, tala o kifika kiala ku luiji kia tundu ku milongi ia dianga bhu kaxi 2, ka Mulangidi iú.

Tua kingila kuila O Mulangidi ua ubhe, u tambuijila o misambu ia jiphange ene mu bhinga kua Jihova: “Ngi bhane kilunji kia ku di longa o itumu ié” (Jisá. 119:73) Tua dielela kuila ió kejiia luua kiavulu o Kingileji, ni minzangala, ni ana-ndenge ene mu zuela o Kingileji, a-nda tena ku pelepalala kiambote o milongi ioso ia Mulangidi ua semana. Tua sakidila kiavulu Jihova ni ‘jiphange joso mu nzumbi’ mu ku tu bhana o ‘kimbadi kia fiiele,’ uene mu tu bhana kudia kuavulu mu nzumbi.—1 Phe. 2:17; Mat. 24:45.

Kibuka kia Utuminu kia Jimbangi ja Jihova