Atangi A Madivulu Metu Ebhula . . .

O kuila o Jikidistá joso ja fiiele ja-ndaia ku diulu?

▪ Athu avulu ene mu tanga o izuelu ia Jezú i tululukisa o muxima: “Nzambi ua zolo o mundu, katé kia suku ku bhana Mon’ê umoxi-èlele, phala oso u mu xikana muène, káfue, maji a kale ni muenhu ki uábhua.” (Nzuá 3:16) O kuila Jezú ua kexile mu zuela kuila oso ala ni kixikanu kua Tata iê Jihova Nzambi, a-ndaia ku diulu, phala ku kala ni muenhu ua kalelaku, ni ku zediua?

Tua tokala ku xinganeka mu izuelu ia Jezú: “Kana-ku dingi muthu ua bandele bhulu, ki kale ngó ió ua tundu bhulu, muène Mon’a muthu, mukua diulu.” (Nzuá 3:13) Kiki kilondekesa kuila o abhezi a dianga a Nzambi, kála Noué, Mbalahamu, ni Davidi, ka bandele ku diulu kioso kiafu. (Ikalakalu 2:34) Ene-phe ai kuebhi? O abhezi oso a dianga ala mu mbila, a mu kingila o difukunukinu, a zeka ku’alunga, kejiia dingi kima.—Ndongixi 9:5, 6; Ikalakalu 24:15.

O Bibidia izuela kuila o muthu ua dianga ku tambula o muenhu ku diulu, kioso kiafu, Jezú. Muéne ua kanena o maxibulu-me kuila ueji ku a iudikila kididi ku diulu. (Nzuá 14:2, 3) O mundu ua Nzambi, ki uejidile o kidi kiki. O poxolo Phaulu, ua jimbulula kuila kioso kiafu Jezú, ni kia mu fukununa phala kuia ku diulu, Jezú ‘ua jikula njila ia ubhe i bheka ku muenhu phala o maxibulu-mê’—O njila íii, se-ku muthu mu xitu uendela-mu kiá.—Jihebeleu 10:19, 20.

O kuila kiki kilombolola kuma, o jikidistá joso ja fiiele a-ndaia ku diulu? Kana, mukonda o difukunukinu ku diulu dia tokala ngó ku athu a a solo. Mu usuku uê ua sukina mu ixi, Jezú uambela o jipoxolo jê kuila, ene eji ‘xikama uê ku kiandu, phala kufundisa’ ku Utuminu uê ua diulu. O ku tumina ni Jezú ku diulu, ujitu ua a bhana.—Luka 22:28-30.

Ko jipoxolo ngó a-nda tumina ni jezú ku diulu, saí a mukuá a-nda tumina ué ni Jezú ku diulu. O poxolo Nzuá, ua mono Jezú mu kisuma ni athu a fukunuka ku diulu, amba kuila ene ‘akunji, jisobha, a-nda tumina o ixi.’ (Dijingunuinu 3:21; 5:10) Ihi ia kexile mu bhanga-ku? Kála o jinguvulu mu ixi, kibuka kófele ngó ki tumina. Kiene kimoxi ué ni Utuminu ua diulu. Jezú, muéne o Kambudi ua-nda tumina ni 144.000, “a a sumbu mu’axaxe ka mundu ua athu mu ngongo.”—Dijingunuinu 14:1, 4, 5.

Mu kidi o muxinda ua 144.000, kibuka kiofele, se tu ki sokesa ni abhezi oso a dianga, ni a lelu. Maji ki ki bhonza ku ki tendela, mukonda o 144.000, a a solo phala kuia mu bhanga kikalakalu kia dikota. Se ua mesena ku tunga inzo, o kuila ueji bhinga o ji hete joso ji tunga, phala ku tunga o inzo iê? Kana. Mukonda eie ueji bhinga a soko, phala ku bhanga o kikalakalu. Kiene kimoxi ué, ko jifiiele joso a a solo phala ku tumina ni Kristu ku diulu.

O jinguvulu jiji, a-nda bhangesa kuila o vondadi ia Nzambi ia lungu ni ixi, i dikumbidila. Jezú ni 144.000 a jisobha, ene a-nda kala ku pholo mu ku iudika o ixi phala ku kala palaízu, mua-nda tunga nzungule dia athu a zediua. (Izaia 45:18; Dijingunuinu 21:3, 4) Mu’axaxi ka athu enhá, kua-nda kala ué ió a-nda fukunuka ala mu lembalasa ia Nzambi.—Nzuá 5:28, 29.

O abhezi oso a fiiele a Jihova—a dianga, ni a lelu—a-nda tambula o mabesá a muenhu ua kalelaku. (Loma 6:23) Kibuka kiofele ngó kia-nda tambula o kikalakalu ku diulu, o mundu uavulu ua-nda tambula o muenhu ua kalelaku mu ixi, mu palaízu.