Zukama Kua Nzambi

O Kuila Jihova Uala ni Muxima?

SE kiki kiene, o kibhuidisu kia mukuá kiki: Kiebhi ki divua Nzambi mu ima i tu bhanga? O kuila o ima i tu bhanga, i sangulukisa Nzambi mba i mu bhangesa ku divua kia iibha? Saí jingijiie m’ukulu, ambele kuila, kana. Ene ambe kuila se-ku muthu u tena ku bhangesa Nzambi ku divua kia iibha, mukonda Nzambi kale ni muxima. Maji o Bibidia, i tu kuatekesa ku tendela o maka enhá, izuela kuila Jihova uala ni muxima, u mona o ima ioso i tu bhanga. Xinganeka mu izuelu i tu sanga mu divulu dia Jisálamu 78:40, 41.

O divulu dia Jisálamu 78, dizuela kiebhi Nzambi kia di bhanene ni Izalaiele m’ukulu. Kioso kia bhulula o mundu uê ku ubhika mu Ijitu, Jihova ua a bhingi phala ene ku kala makamba mê a kidi. Nzambi ua a kanene, se ene a tumakene o itumu iê, ene eji kala ‘athu a Nzambi,’ ni ku a kuatekesa ku kumbidila o vondadi ia Nzambi. O mundu ua xikana, ia a bhangele o Kikutu kiki. O kuila ene a tumaka muene o kikutu kia bhangele?—Makatukilu 19:3-8.

O mukua jisalamu uixi: “Lukuxi luos’ulu lua mu kitukila mu kikangalakata.” (Velusu 40) O velusu ia mukuá iambe: “A tona dingi kulokalala Nzambi.” (Velusu 41) O musoneki u tanga o ukexilu ua ku bhukumuka kua mundu. O ukexilu iú ua ku bhukumuka, ua mateka—mu kikangalakata kioso kia a bhulula ku ubhika mu Ijitu. O mundu ua kuata o ku longolola Nzambi, se muéne ueji tena muene ku a langa. (Dialuilu 14:1-4) Saí divulu dia alombolodi a Bibidia, dizuela kuila o izuelu ia kuila ene eji “mu kitukila” a tena ku ijimbulula kála, ‘ene a kolesa o mixima iâ kua Nzambi’ mba ‘ene ambe, “ki kuene” Nzambi.’” Maji mu henda iê, Jihova ueji loloka o mundu uê, se ene a dielele o ituxi iâ. Maji ene eji vutuka dingi ku ukexilu uâ uokulu ni ku bhukumukina dingi o Nzambi iâ, ia a kolokota mu ku bhukumuka.—Jisálamu 78:10-19, 38.

Kiebhi Jihova kia kexile mu divua kioso o mundu uê, kia kexile mu bhukumuka? O velusu 40, iambe: ‘A mu bhangesa ku divua kia iibha’. O izuelu íii, mu Bibidia ia mukuá iambe: “Ene eji mu luualesa.” Saí divulu dia mukuá dia Bibidia, diambe: “Kiki kilombolola kuila o ukexilu ua iibha ua akua Jihebeleu ua kexile ku mu luualesa,—kála o ukexilu ua iibha ua mona kubhata, u bhukumuka.” O mona u bhukumuka, u bheka ndolo iavulu ku muxima ua jitata jê, o akua Izalaiele “a tobhesa o Dilemba Diangene dia Izalaiele.”—Velusu 41.

Ihi i tu longa o jisalamu jiji? O jisalamu jiji, ji tu kuatekesa ku mona kuma Jihova, uala ni ukamba ua kidi ni jiselevende jê, muéne ka a eha, né muene kioso kia mu bhukumukina. Kienhiki, tua tokala ué kuijiia kuila Jihova uala ni muxima, o ima i tu bhanga i tena ku mu luualesa. Kiebhi o kuijiia o kidi kiki, ki tena ku ku kuatekesa? O kuila kiki, ki ku suínisa o ku bhanga o kima kia tokala?

Kienhiki, mu veji dia ku kaiela o njila ia iibha ni ku bhekela ndolo kua Jihova, tua tokala ku sola ku bhanga o kima kia tokala, ni ku sangulukisa o muxima uê. Íii iene ia bhingi ku abhezi’ê, kioso kiambe: “Dimuka mon’ami, u tanese o muxima uami.” (Jisabhu 27:11) Mu kiki, se-ku dingi kima kia mukuá kia beta-kota, ki tu tena ku bhana kua Jihova, kála o ku sangulukisa o muxi uê.

[Kilombuelelu ku bandu 32]

Se-ku dingi kima kia mukuá kia beta-kota, ki tu tena ku bhana kua Jihova, kála o ku sangulukisa o muxima uê