Ihi ia Tokala ku di Longa o Tuana?

“Kuma Mikanda ioso ia bhusu Nzambi, mikanda ia kubhandulula, ni mu kulonga o kidi, ni mu kubazela itondalu, ni mu kuiukisa iabhengalala, ni mu kuijidisa uendelu uambote.”—2 TIMOTE 3:16.

O TUANA a tokala ku a longa o kidi kia lungu ni Nzambi. Kuebhi kua tena ku di longa o kidi kiki? A tokala ku di longa mu divulu diene mu xila kiavulu ku mundu, o Bibidia.

O Bibidia iala kála mukanda ua Nzambi. Ku mukanda iú, Nzambi ua soneka-mu o ídifua iê, ni itendelesu ia tokala phala o tuana tuê, ki kale o an’a-ndenge, mba adiakimi. Xinganeka mu milongi i tu sanga mu Bibidia ni phangu iahi ia tena ku di longa o an’a-ndenge.

Ihi ia mesena Nzambi i tua tokala o kuijiia ia lungu ni muéne?

▪ Ihi i longa o Bibidia: “Phala a k’ijiie kuma eie ngó uavu o dijina dié dia Jihova, ku moneka luiadi; eie muène ngó Suke-ku mu ngongo ioso.”—Jisálamu 83:18.

Ihi i tu di longa: Nzambi ki nguzu ia tenena, muéne Muthu ua kidi, uala ni dijina.

▪ Ihi i longa o Bibidia: “Kuma o Jihova [mixima] ioso uene ku i solokota, o mabanzelu moso ma ixinganeku ua [ijiia]. Eie se u mu sota, uanda ku mu sanga.”—1 Malunda 28:9.

Ihi i tu di longa: Jihova Nzambi u langa etu enioso, katé muene ni an’a-ndenge. (Jisálamu 10:14; 146:9) Muéne ua mesena kuila tu di longa ia lungu ni muéne.

▪ Ihi i longa o Bibidia: “Kana kutatesa mutudi . . . mba [mon’a kitungu]. O ki kala-phe u ki bhanga o ku a tatesa, anga ene a di kola kokuami, eme-phe ng’a evua muene o kudikola kuâ.”—Makatukilu 22:22-24.

Ihi i tu di longa: Jihova uivua o misambu, katé muene ni ia an’a-ndenge. Tu tena kuzuela ni Nzambi izuua ioso, ni ku zuelela o ibhindamu ietu kua muéne.

▪ Ihi i longa o Bibidia: “A tona dingi kulokalala Nzambi, a tobhesa o Dilemba Diangene dia Izalaiele.”—Jisálamu 78:41.

Ihi i tu di longa: O izuelu ietu, ni ima i tu bhanga, i tena ku bhangesa Jihova ku divua kia iibha, mba kiambote, kienhiki tua tokala ku banza hanji ande dia kuzuela, ni ku bhanga o ima i tua mesena.

 Kiebhi ki tua tokala ku dibhana ni athu ka sokela n’tu?

▪Ihi i longa o Bibidia: “Nzambi kene ni kathombo ka athu. Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.”—Ikalakalu 10:34, 35.

Ihi i tu di longa: Se Nzambi u tambulula athu a jixi joso, ki tu tokala ku kala ni kathombo ku akuetu, mukonda dia kikonda, ni ukexilu uâ, ka sokela ni etu.

▪ Ihi i longa o Bibidia: “Mu kale polondo kuvutuila muthu uoso ua m’ibula o kudielela ku muala na-ku.”—1 Phetele 3:15.

Ihi i tu di longa: Kioso ki tu zuela ia lungu ni ubhezelu, tua tokala kuzuela ni kidi kioso, maji mu ukexilu uambote. Tua tokala ué ku xila ió kala ni ukexilu umoxi ni etu mu ubhezelu.

Kiebhi ki tua tokala ku dibhana ni jindandu jetu?

▪ Ihi i longa o Bibidia: “Enu ana, tumakenu adi enu mu ima ioso, kuma kiene kia mi fuama mu ukidistá, o Ngana ue ki mu uabhela kiambote.”—Kolose 3:20.

Ihi i tu di longa: O ana a belesela kene mu londekesa ngó kuila a zolo jitata jâ, maji alondekesa uâ kuila a mesena ku belesela uê Nzambi.

▪ Ihi i longa o Bibidia: “Mu di lendukile ni kudikuatekesa mudienu, mu di loloka, se bhuala muthu ua di kuata ni mukuá. Kala muthu a loloke mukuá kala kioso Nzambi kia mi loloka enu, kiene ue ki mu bhanga jinga.”—Kolose 3:13.

Ihi i tu di longa: Saí athu, katé muene ni jindandu jetu, saí ithangana a tena ku tu luualesa. Maji se tua mesena o muloloki ua Nzambi, tua tokala ku loloka akuetu.—Matesu 6:14, 15.

 Mukonda diahi tua tokala ku kala tu athu a kidi ni ku kala ni henda?

▪ Ihi i longa o Bibidia: “Ki mu tange jinge dingi makutu. Maji mu di tangela jinga o kidi kala muthu ni mukuâ.”—Efezo 4:25.

Ihi i tu di longa: Kioso ki tu zuela o kidi, tu kaiela o phangu ia Nzambi, tu mu sangulukisa. Se tu kala ni kifua kia ku tanga makutu, tua-nda difua ni nguma ia Nzambi, o Diabhu, o “tata ia makutu.”—Nzuá 8:44; Tito 1:2.

▪ Ihi i longa o Bibidia: “Ima ioso i mua mesena kuila athu a mi bhanga-iu, enu uenu iene ué i mua tokala ku a bhanga.”—Matesu 7:12, “Contemporary English Version.”

Ihi i tu di longa: Tua tokala ku xila o ibanzelu ni ibhindamu ia jindandu jetu ni ia akuetu mu sanzala ietu. Kioso ki tu kala ni “kixinganeku kimoxi,” a mukuá a-nda tu xila ni henda ioso.—1 Phetele 3:8; Luka 6:38.