O Kuila Jihova Undundu uê?
O Kuila Jihova Undundu uê?
“Diangenu-phe kusota o Utuminu ua Nzambi ni uiukilu uê, nda ima ioso iii a mi kuiila-iu.”—MAT. 6:33.
1, 2. (a) A nanhi o “mundu ua Nzambi,” a u tange mu divulu dia Ngalásia 6:16? (b) Kála kia ki tange mu divulu dia Matesu 19:28, a nanhi o “kuinhi dia miji ni’iadi ia Izalaiele?”
KIOSO ki u tanga o dijina dia Izalaiele mu Bibidia, ihi i u banza? O kuila eie u banza kua Jakobo, mon’â Izake, a mu ixanene Izalaiele? Anga u banza o mundu ua Izalaiele m’ukulu? Anga Izalaiele mu nzumbi? Kioso kia tumbula o kizuelu Izalaiele, a mu zuela o “mundu ua Nzambi,” o 144.000, a a undu ni nzumbi ikôla phala ku kala jisobha, ni akunji ku diulu. (Nga. 6:16; Dij. 7:4; 21:12) Maji saí 12 dia miji ia Izalaiele a i tange mu divulu dia Matesu 19:28.
2 Jezú uixi: “Mu kikexilu kióbhe, Mon’a Muthu kia kà xikama ku kialu kia ungana uê, enu uenu mua ngi kaiela, mua kà xikama ku kuinhi dia ialu ni‘iadi, mu fundisa kuinhi dia miji ni’iadi ia Izalaiele.” Mu velusu íii, o “kuinhi dia miji ni’iadi ia Izalaiele,” ió a-nda ku a fundisa ku maxibulu a a undu a Jezú, a-nda tambula o muenhu ua kalelaku mu Palaízu mu ixi. Ene a-nda katula mbote mu sidivisu ia-nda bhanga o 144.000 ia akunji.
3, 4. Phangu iahi iambote ene mu bhana o Jikidistá a undu?
3 Kála o akunji ni Jilevita m’ukulu, o athu a a undu, a mona o kikalakalu kia tambula kála ujitu ua dikota. (Dia. 18:20) O athu a a undu, ka kingila ku tambula mbandu ia ixi, phala ene. Mu veji dia kiki, ene a kingila ku kala jisobha, ni akunji ku diulu kumoxi ni Jezú Kristu. Ene a-nda kolokota o ku sidivila Jihova mu kikalakalu kiki kia tambula kála ki tua tange mu divulu dia Dijingunuinu 4:10, 11, kia lungu ni athu a a undu phala kuia ku diulu.—Ize. 44:28.
4 O athu a a undu mu ixi, ala ni ukexilu ulondekesa kuila Jihova undundu uâ. O ujitu ua tambula ua ku sidivila Nzambi, kiene o kima kia beta-kota phala ene. Ene a xikana mu sata ia ku kula kua Kristu, ni ku mu kaiela izuua ioso, kuma ua ‘a exana, a a solo.’ (2 Phe. 1:10) Kala muthu uala ni uhete uê, ni ibhidi iê. Né kiki, ene kene mu ta o ibhidi iâ ku pholo phala ku kalakala ngó bhofele mu sidivisu ia Nzambi. Maji ene a bhanga ioso ia tena phala ku ta ku pholo o sidivisu ia Nzambi. Ene a bhana phangu iambote phala ió a kingila ku kala ku muenhu mu palaízu mu ixi.
5. Kiebhi o Jikidistá a tena ku bhanga Jihova o undundu uâ, ni mukonda diahi kiki ki tena ku bhonza kiavulu?
5 Ki kala tuala ni kidielelu kia kuia ku diulu, mba ku kala mu ixi, tua tokala ‘ku difula o ku di banza muene mudietu ni ku zangula o taka ia Kristu, ni ku mu kaiela.’ (Mat. 16:24) Mazunda a athu, a kingila o muenhu mu Palaízu mu ixi, ene mu bheza Nzambi, ni ku kaiela Kristu mu ukexilu iú. Ene ka sanguluka mu ku kalakala ngó bhofele, mu kuijiia kuila a tena ku bhanga dingi. Saí iá ene mu sosola o ukexilu ua muenhu uâ phala ku kala aboki a thembu ioso. A mukuá ene mu kalakala kála aboki a ithangana ni ithangana ku muvu. Saí jiphange ene mu kalakala kala aboki a thembu ioso, a bhakula o muenhu uâ mu sidivisu íii. O athu enhá, a bhanga kála kia bhangele Madiia ua lundulula o máji ma dizumba dia uabha ku mutué ua Jezú. Jezú uambe: “Ua ngi bhange kima kiambote . . . . Muhatu iú ua bhange kioso kia tena.” (Mar. 14:6-8) Ki tu tena ku bhanga ioso i tua mesena, mukonda tuala ku mundu ua Satanaji. Maji né kiki, tu tena ku bhanga ioso ni ku dielela kua Jihova. Tua-nda di longa kiebhi ki tu tena ku bhanga kiki mu maukexilu auana.
Dianga ku Sota o Utuminu ua Nzambi
6. (a) Kiebhi kiene mu londekesa o athu lelu, kuila o undundu uâ o muenhu iú? (b) Mukonda diahi kima kiambote ku banza kála Davidi?
6 Jezú ua tendelesa o akaiedi’ê ku dianga ku sota o Utuminu ua Nzambi, ni kuika kuê. O athu ku mundu lelu, ene mu dianga ku bhanga o vondadi iâ kála o “athu ejiia ngó o ima ia mu ngongo mumu.” (Tanga Jisálamu 17:1, 13-15.) Athu avulu ka bhana valolo ku Mubhangi uâ, a thandanganha ngó ni ibhindamu iâ, ni ia muiji uâ, ni ku xa undundu phala o muiji. Phala ene, o undundu uâ o muenhu ngó. Davidi ka bhange kiki, muéne ua bhange ‘dijina diambote’ bhu pholo ia Jihova, o mon’ê ua tu tendelesa ku bhanga kiki. (Ndo. 7:1.) Kála Azafo, Davidi uejidile kuila o ku kala ni Ukamba uambote ni Jihova, kiexile kima kia beta-kota, o ku bhanga ngó o vondadi iê ndenge. Muéne ua sangulukile mu kuenda ni Nzambi. Mu izuua ietu Jikidistá javulu ene mu dianga ku sota o utuminu ua Nzambi, o ikalakalu iâ ndenge.
7. Mabesá ahi a tambula o phangi’etu, mu ku dianga ku sota o Utuminu?
7 Xinganeka o phangu ia Jean-Claude mu República Centro Africana. Muéne kafunga uala ni ana kitatu. Mu ixi íii, kiene mu bhonza ku sanga ikalakalu, o athu a bhanga ioso phala ku kala mu sidivisu iâ. Saí kizuua o xefe iê uambe kuila o Jean-Claude, ua tokalele ku kalakala mu usuku—ueji mateka mu 18:30 mu semana ioso. Jean-Claude ua mu ambela kuila, muéne kene ngó mu dikila o ibhindamu ia muiji uê, maji uene uê mu u dikila mu nzumbi. Muéne uambe ué kuila, uala ni ikalakalu mu kilunga. Ihi iambe o xefe iê? “Se ua zediua ni sidivisu iê, ua tokala ku jimba o ima ia mukua, katé muéne ni muhatu’ê, ni an’ê, ni ibhidi’ê. Ua tokala ku di bhakula ngó mu sidivisu iê. Sola se o ngeleja iê, mba o kikalakalu kiê.” Ihi i ueji sola? Jean-Claude uejidile kuila se a mu katula ku sidivisu, Nzambi ueji mu dikila. Muéne ueji kalakala kiavulu mu sidivisu ia Nzambi, Jihova ueji mu kuatekesa ku dikila o muiji uê. Kienhiki muéne ka fongo mu kiônge kia semana. Mu kusukáku muéne ua kexile polondo phala kuia mu kalakala, se kuijiia se ueji sanga kikalakalu. Kienhiki muéne a mu ixana mu mutelembe ua kafuetele. O xefe a mu katuile ku sidivisu, maji o phang’etu ua kolokota mu salu iê.
8, 9. Kiebhi ki tu tena ku kaiela o phangu ia akunji, ni Jilevita, mu ku dielela kua Jihova o undundu uetu?
8 Saí jiphange ene mu kala ué ni maka enhá, ene a di bhuidisa, ‘Kiebhi ki nga-nda tena ku kumbidila o kikalakalu kia ku dikila o muiji uami?’ (1 Tim. 5:8) Né muéne se uala ni maka enhá, mba kana, o maka a mukuá u uene mu bhita nau, a ku bhana kidielelu kuila ki ua-nda diela se Nzambi u kala undundu uê, ni ku bhana valolo ku ujitu ua ku mu sidivila. Kioso kiambe Jezú ku maxibulu mê, diangenu-phe ku sota o utuminu, muéne ua a kanena: “Nda ima ioso íii a mi kuiila-iu”—o kudia, o ku zuata, ni kúnua—‘eji ku a kuiila-iu.’—Mat. 6:33.
9 Xinganeka, o Jilevita ka tambuile undundu ua ixi. O ubhezelu ua kidi, uene ua diangele ku muenhu uâ, mukonda dia kiki, ene a tokalele ku dielela kua Jihova, phala ku a dikila, muéne ua a kanena: “Emi’eme ngi undundu ué.” (Dia. 18:20) Sumbala ki tua mu kalakala mu tembulu kála o akunji, ni Jilevita, tu tena ku kaiela o phangu iâ, ni kudielela kuila Jihova ua-nda dikila o ibhindamu ietu. O ku dielela kuila Nzambi u tena ku tu dikila, kima kiambote, mukonda tuala mu izuua isukidila-ku.—Dij. 13:17.
Dianga ku Sota o Kuiuka Kua Nzambi
10, 11. Kiebhi o jiphange, kiene mu dielela kua Jihova mu maka a sidivisu? Bhana phangu.
10 Jezú ua suínisa ué o maxibulu mê ‘ku dianga ku sota o kuiuka kua Nzambi.’ (Mat. 6:33) Kiki kilombolola ku dianga ku belesela o itumu ia Nzambi, kana o itumu ia iibha ia athu. (Tanga Izaia 55:8, 9.) Nange ua lembalala kuila, m’ukulu saí athu, akexile mu dima makanha, mba ku a sumbisa, ku longa akuâ ku bhanga ita, ku bhanga mauta, mba ku a sumbisa. Maji kioso kia di longo o maka a Nzambi, a solo ku lungulula o sidivisu iâ, phala ku kala polondo phala ku di batizala.—Iza. 2:4; 2 Kol. 7:1; Nga. 5:14.
11 Andrew, phangu iambote. Kioso kia di longo ia lungu ni Jihova, muéne ni muhatu’ê, a solo ku mu sidivila. Andrew, ua zolele kiavulu o sidivisu iê, maji ua i xisa. Mukonda diahi? Mukonda muéne ua kexile mu kalakala mu kisangela, ki bhanga ima ki i lungu ni vondadi ia Nzambi, maji muéne ua mesenene ku dianga ku sota o kuiuka kua Nzambi. Kioso kia xisa o sidivisu, Andrew ua kexile ni ana kiiadi, ka kexile ni kitadi phala ku futa o lenda ia inzo. Uexile kála o Jilevita a kambele ‘undundu.’ Muéne ua soto kikalakalu iu ua dielela kua Nzambi. Lelu kia xinganeka, muéne ni muiji uê, ejiia kuila o lukuaku lua Nzambi ki lua butu kana. (Iza. 59:1) Andrew, ni muhatu’ê, a sosola o ukexilu ua muenhu uâ, a mu kalakala mu sidivisu ia thembu ioso. Muéne uambe: “Saí ithangana tu kala ni hele mukonda dia ku kamba o kitadi, inzo, sauidi, ni ku kuka. Maji Jihova uene mu tu dikila . . . tu tena kuzuela kuila ki tu diela mu ku sidivila Jihova, se phata ku sidivila Jihova, kiene o kima kia beta-kota ki tena ku bhanga o muthu.” *—Ndo. 12:13.
12. Kídifua kiahi kia bhingi phala ku belesela o itumu ia Nzambi? Tanga musoso ua diembu diê.
12 Jezú uambela o maxibulu mê: “Se mu kala ni kuxikana né kua soko’é ngó ni lumbundu lua mbutu ia mustarda, mua k’àmbela mulundu iú, muixi: Sondoloka Bhabha, uie bhaná! Uene ua kà sondoloka. Enu mu kala ni kutena, kana kima ki mu lémbua.” (Mat. 17:20) O kuila ueji dianga ku belesela o itumu ia Nzambi, se ku bhanga kiki kieji ku bhekela ibhidi? Se kuijiia ihi i ua tokala ku bhanga, zuela ni jiphange mu kilunga. Se phata ua-nda uabhela kiavulu kuívua o misoso iâ.
Sakidila o Kudia mu Nzumbi ku ku Bhana Jihova
13. Se tu di bhakula mu sidivisu ia Jihova, ihi ia-nda tu bhangela mu ukexilu ua nzumbi?
13 Se u bhana valolo ku ujitu uê ua ku sidivila Jihova, u tena ku dielela kuila muéne ua-nda dikila o ibhindamu iê mu xitu, ni mu nzumbi, kála kia bhangele ku Jilevita. Xinganeka Davidi. Sumbala muéne ua kexile mu dibanda, muéne uejidile kuila Nzambi ueji mu dikila. Etu uê tu tena ku dielela kua Jihova kuila muéne u tu dikila, se tu mona kuila ki tuijiia dingi i tua-nda bhanga. Lembalala kuila Azafo, kioso kia “bokona mu tembulu ia Nzambi,” muéne ka banzele dingi mu ima ia kexile ku mu thandanganhesa. (Jisá. 73:17) Kiene kimoxi ué, etu tua bhindamena o milongi ia Nzambi, phala ku tu kuatekesa mu nzumbi. Mukonda dia kiki tu sakidila o ujitu ua ku sidivila Nzambi, ki kala mu ibhidi, mba kana. Se tu bhanga kiki, Jihova ua-nda kala undundu uetu.
14, 15. Ihi i tua tokala ku bhanga kioso kia tu kuatekesa ku tendela milongi ia Bibidia, ni mukonda diahi?
14 Ihi i u bhanga kioso Jihova, kia tu kuatekesa ku tendela “ima ia zongo ia sueka Nzambi,” iala mu Bibidia? (1 Kol. 2:10-13) Tuala ni phangu ia poxolo Phetele kioso kiambe Jezú ku maxibulu Mê: “Se mu kamba kúdia xitu ia Mon’a Muthu, se mu kamba kùnua manhinga mê, ki mu tena kukala ni muenhu moxi dienu.” Kia zubha ku muivua kiki, ene exi: “Mak’ama mala kulonga, ma bhonzo! Im’iíi nanhi u tena ku i xikina?” Ene “a vutuka ku dima.” Maji Phetele uambe: “Ngana, tuia kua nanhi? Eie-eie uala ni maka ma muenhu ki uâbhua.”—Nzu. 6:53, 60, 66, 68.
15 Phetele kejidile kiambote ia kexile mu zuela Jezú ia lungu ni kudia o xitu Iê, ni kúnua manhinga Mê. Maji o poxolo ua dielele kuila Nzambi, bhu kaxi ka Jezú, ueji kuatekesa athu kuijiia o kidi. Kioso kia tu kuatekesa ku tendela o milongi ia Bibidia mu ukexilu uéngi, eie uene mu banza se mukonda diahi a bhange kiki? (Jisa. 4:18) O akua Beleia ku hama ia dianga, “a tambula o maka ni kutetuluka kuoso. Izuua ioso anga a kala mù tekula o Madivulu ma Nzambi.” (Ika. 17:11) Se u kaiela o phangu iâ, ua-nda beta ku sanguluka ni ujitu ua ku sidivila Jihova, ni kuila muéne undundu uê.
Ku Kazala Ngó Mua Ngana
16. Kiebhi Nzambi, kia tena ku kala undundu uetu, ia lungu ni kitumu ki tu sanga mu divulu dia 1 Kolindo 7:39?
16 O Jikidistá a tokala ué ku ta o kikanenu kia Nzambi ku muxima uâ, mu ku belesela o milongi ia Bibidia ia lungu ni ku kazala “ngó mua Ngana.” (1 Kol. 7:39) Phange javulu a solo o ukudi, mu veji dia ku bhukumukina o kitumu kiki. Nzambi ua zolo o jiphange jiji. Ihi ia bhange Davidi kioso kia kexile ubheka uê, se kikuatekesu? Muéne uambe: “Nga lundulula muene o ku di tenda kuami bhu pholo iê; nga mu tangela muene o dilamba diami dioso. Kioso o muxima uami moxi ki ua ngi bhondalala.” (Jisá. 142:1-3) O polofeta Jelemiia ua kexile ué mu divua kiki, muéne ua sidivile Nzambi ni ufiiele uoso mu mivu iavulu, ni ukudi. Eie u tena ku di longa o phangu iê, mu kibatulu 8 mu divulu; Jeremias e a Mensagem de Deus para Nós, mu phutu.
17. Kiebhi kia tena o phang’etu ku kolokota mu ukudi?
17 Saí phange ia muhatu mu ixi ia Estado Unidos uambe: “Eme ki nga solo ku kala dikudi. Saí kizuua nga-nda kazala se ku moneka o muthu ua tokala. O mam’etu ki mbangi ia Jihova, uene mu ngi suínisa ku kazala kabasa muthu, uíza ku ngi bhinga. Eme nga mu ibhuidisa se muéne ua mesena ku kala ni kikuma, se eme ki ngi zediua mu ukaza. Muéne uejiia kuila nga zediua, ngala ni sidivisu iambote, ngi tena ué ku dikila o ibhindamu iami. Kienhiki muéne, kene dingi ku ngi jijidika.” Saí ithangana o phange iú, u divua ubheka. Muéne uambe: “Ngi bhanga Jihova kidielelu kiami. Muéne nuka u ngehela.” Ihi ia kuatekesa o phange íii, ku dielela kua Jihova? “O musambu ua ngi kuatekesa ku mona kuila Nzambi muthu ua kidi, ni kuila eme ki ngala ubheka uami. O Suke-ku, ua mu ngi ívua, kiebhi ki ngeji kamba ku zediua?” O kuijiia kuila “o kubhana kota mu kuzediuisa, o kutambula ndenge,” muéne uambe ué: “Ngi bhanga ioso phala ku kuatekesa akuetu, maji ki ngi kingila ku ngi bhana uami. Ngi xinganeka, ‘kiebhi ki ngi tena ku kuatekesa o muthu iú?’ Ngi sanguluka ku muxima.” (Ika. 20:35) Kienhiki, muéne uala ni undundu ua Jihova, ua sanguluka ué kiavulu ni ujitu ua ku mu sidivila.
18. Kiebhi Jihova kia tena ku kala undundu uê?
18 Kabasa maka u kala nau, Nzambi u tena ku kala undundu uê. Se u bhanga kiki, eie ua-nda kala bhu kaxi ka mundu uê ua zediua. (2 Kol. 6:16, 17) Kiki, ki bhangesa kuila Jihova u kala undundu uê kála kia kexile phala o athu m’ukulu. (Tanga Matendelelu 32:9, 10.) O akua Izalaiele akexile ni undundu ua Jihova, bhu kaxi ka ifuxi iéngi, muéne u tena ué ku ku langa ni henda ioso. —Jisá. 17:8.
[Tanga mu luji]
^ kax. 11 Tanga o Despertai! ia Novembro ia 2009 mu jimbandu ja 12-24, mu phutu.
Kiebhi ki Ueji Tambuijila?
Kiebhi Jihova kia tena ku kala undundu uê
• se u dianga ku sota o Utuminu ua Nzambi, ni kuiuka?
• se u sakidila o kudia kuene mu bhana mu nzumbi?
• se tu belesela o kitumu kia Nzambi, kia lungu ni ku kazala ngó mua Ngana?
[Ibhuidisu ia ku dilonga]
[Kilombuelelu ku bandu 16]
Jihova u kala undundu uetu, se tu dianga ku bhanga o sidivisu iê
[Foto ku bandu 18]
O phangu ia Jelemiia i tu suínisa
