Dielela Jihova, ‘O Nzambi i Kuatekesa’
Dielela Jihova, ‘O Nzambi i Kuatekesa’
“A ximane Nzambi, Tata ia Ngana ietu Jezú Kristu, Tata ia jihenda, Nzambi ió athu oso kuene mú tambula o dikuatekesu!”—2 KOL. 1:3.
1. Kima kiahi kia bhindamena athu, ki kale adiakimi ni ana-ndenge?
TUNDÉ mu uvualukilu uetu, tua uabhela ku tambula kikuatekesu. O kabuetele u dila phala kulondekesa kuila ua mesena ku mu kuatekesa. Nange ua mesena ku mu ambata, mba uala ni nzala. Né muene mu ukota uetu, tu bhindamena kikuatekesu. Bhenge-bhenge kioso ki tu dibhana ni ibhidi.
2. Kikanenu kiahi kia bhana Jihova kua ió a dielela kua muéne?
2 O jindandu jetu, ni makamba metu, ene mu tu bhana kikuatekesu. Saí ibhidi i tu dibhana na-iu, i bhonzesa o athu enhá ku tu kuatekesa. Maji Nzambi muéne ngó u tena ku tu bhana kikuatekesu kioso ki tu dibhana ni ibhidi. O Maka mê, a zuela: ‘Jihova ua zukama kua ió u dikola kua muéne, . . . muéne u muivua o ku dikola, n’a mu kuatekesa.’ (Jisá. 145:18, 19) Kienhiki, o “mesu ma Jihova a lûngu kua iá aiuka, o mátui mê mala kuividila kioso kia dikola.” (Jisá. 34:15) Se tua mesena ku tambula o kikuatekesu kia Nzambi, tua tokala ku mu dielela ni muxima uoso. O mukua jisalamu Davidi, ua londekesa o kidi kiki, kioso kimbi: “Jihova muene o mbonge ia matala, mu lengela io oso a a tatesa; muene kididi kiakondama mu thembu ia jiphaxi. Oso a ku ijiia o dijina, eie muene u Jihova a ku dielela; kuma, eie Jihova, ku muthu a kukakula oso a ku kana.”—Jisá. 9:9, 10.
3. Kiebhi Jezú kia londekesa o henda ia Jihova ku mundu Uê?
3 Jihova ua zolo kiavulu o abhezi’ê. Jezú ua londekesa o kidi kiki, kioso kiambe: “Abha, jimbodio kala ku jisumbisa jitanu mu mbènde jiiadi? Ni kamoxi-phe ngó ki ka jimbi ku mesu ma Nzambi. Enu-phe, katé ni jindemba jenu mu mítue, a ji kuata konda! Ki mu kale ni uôma; mukonda jimbódio né ji kala javulu, enu kota!” (Luk. 12:6, 7) Bhu kaxi ka polofeta Jelemiia, Jihova uambela o mundu uê m’ukulu: “Nga ku zolo ni henda ki i moneka dizubhilu, nga ku sungu ue ni jihenda ja kulenduka, kokuami.”—Jel. 31:3.
4. Mukonda diahi tu tena ku dielela mu ikanenu ia Jihova?
4 O ku dielela kua Jihova, ni mu ikanenu iê, ku tena ku tu kuatekesa mu ithangana ia ibhidi. Tua tokala ku dielela Nzambi, kala kia dielele Josuué, kioso kiambe: “Ima ioso ia mi dielelesele Jihova Nzambi ienu, ki kua sonoka kima; iene ioso ia mi bhiti muene, ki bhuala kizuelu kia mi sukamena.” (Josu. 23:14) Né muene se tu dibhana ni ibhidi o ‘Nzambi ia fiiele,’ nuka ua-nda kueha o jiselevende jê, ja fiiele ubheka uâ.—Tanga 1 Kolindo 10:13.
5. Kiebhi ki tu tena ku kuatekesa akuetu?
5 O poxolo Phaulu uambe kuila Jihova, “Nzambi ió athu oso kuene mú tambula o dikuatekesu.” O kizuelu “dikuatekesu,” kilombolola ku tululukisa muthu uala mu ibhidi, mba uala ni mukôndo. Kioso o muthu kia mu bhita mu uadiama ua dikota. Jihova uene mu kuatekesa o athu mu ithangana íii. (Tanga 2 Kolindo 1:3, 4.) Se-ku muthu u tena ku fidisa o Tata ietu ia diulu, mba kima kioso-kioso, muéne u tena ku bhanga ioso phala ku kuatekesa athu oso a zolo muéne. Tu tena ku kuatekesa oso “ala mù tala hadi” kála etu. Tu tena ku bhanga kiki, bhu kaxi dia “dikuatekesu dioso di tualù tambula etu kua Nzambi.” Maji Jihova muene uejiia kiambote ku kuatekesa o muthu ua kondama, ua kambe o kidielelu!
Mukonda Diahi Kuene Jiphaxi
6. Ima iahi i tu bhangesa ku kala ni mukôndo?
6 Tua bhindamena kikuatekesu mu ukexilu uoso ua muenhu uetu. O kima ki bheka o mukôndo o ufuilu ua muthu ua kazola, bhenge-bhenge ua dikaza, mba ua mona. Kioso o muthu kia mu bhanga phoko, mba athu a kala ni kathombo, u bhindamena uê kikuatekesu. Kioso o muthu kia dibhana ni uhaxi, ku kuka, uadiama, maka mu ukaza, ni ibhidi iene ku mundu, u bhindamena uê kikuatekesu.
7. (a) Kikuatekesu kiahi ki tu bhindamena kioso ki tu dibhana ni ibhidi? (b) Ihi i tena ku bhanga Jihova phala ku tululukisa o muxima ua ‘toloka?’
7 Mu ithangana ia ibhidi, tu mesena kikuatekesu phala ku tu tululukisa o muxima uetu, o kilunji kietu, o ibanzelu ietu, ni sauidi ietu mu xitu, ni mu nzumbi. Mu kifika, xinganeka ia lungu ni muxima. O Mak’â Nzambi a tu tangela kuila o muxima uetu a tena ku u ‘toloka.’ (Jisá. 51:17) Jihova muene ngó u tena ku tu kuatekesa, mukonda “akexe ni kikote kia muxima u a saka, hé u a tumba o italákanha ia malamba mâ.” (Jisá. 147:3) Né muene mu ithangana ia ibhidi, Nzambi u tena ku tu kuatekesa, ni ku tululukisa o muxima uetu, se tu mu bhinga ni kixikanu kioso, ni ku belesela o itumu iê.—Tanga 1 Nzuá 3:19-22; 5:14, 15.
8. Kiebhi Jihova kia tena ku tu kuatekesa, kioso ki tu kala ni maka mu kilunji kietu?
8 O ibanzelu ietu ia bhingi ku i tululukisa, mukonda dia ibhidi iavulu i tena ku tu luualesa. Nange mu ngunzu ietu, ki tu tena ku dibhana ni jipolova jiji. Kienhiki o mukua jisalamu uimbi: “Hele jivula jandekele ku ngi kuata mu muxima, maji mu ukamba ué, muxima uami ua batama dingi.” (Jisá. 94:19) Phaulu ua soneka: “Ki mu kale ni hele ia kima, ki mu ile bhidibhidi, maji ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena. Bheniobho o kutululuka kua Nzambi kua somboka o kitongoluelu kioso kia muthu, kuanda ku mi bateka mixima ni ilunji, mu ukamba ni Kristu Jezú.” (Fil. 4:6, 7) O ku tanga, ni ku xinganeka mu milongi ia Bibidia, ku tena ku tu kuatekesa ku dibhana ni maka u tu kala nau mu kilunji.—2 Tim. 3:15-17.
9. Kiebhi ki tu tena ku dibhana ni ibanzelu ia iibha?
9 Sai ithangana, nange tu luuala kiavulu, o ukexilu iú u tu bhangesa ku di ta mu kiluezu mu ku kala ni ixinganeku ia iibha. Nange tu banza kuila saí kitumu kia Bibidia, mba sidivisu mu kilunga, i tu bhonza ku i kumbidila, mba ku i bhanga. Jihova u tena ué ku tu kuatekesa mu maka enhá. Mu kifika: Kioso Josuué kia mu solo phala ku kala ku pholo dia akua Izalaiele mu ku bhânga ni jinguma jâ, Mozé ua tendelesa Josuué: “Kala u kindanda, kola maku! Mukonda eie-muène ua-nda ku bokona ni mundu iú m’oxi ia lokela Jihova ku i bhana ku jitata jenu; eie muene-phe ua-nda lunduisa-iu. Jihova muene ua-nda ku ku tuamenena ku pholo, muene ua-nda ku ku banda; muene ka-nda ku ku xa, kana; ka-nda ku ku ehelela. Kana kukala-phe ni uoma, mba u kala ni hele.” (Mate. 31:7, 8) Ni kikuatekesu kia Jihova, Josuué ua tena kuendesa o mundu ua Nzambi, ku Ixi ia Kanana, ua tena ué ku tolola o jinguma jê joso. Mu ku zukama ku Kalunga ka Kusuka, Mozé ua tambula ué o kikuatekesu kia Nzambi.—Mak. 14:13, 14, 29-31.
10. Se o ima ia iibha i tu bhangesa ku kata, kikuatekesu kiahi ki tu tena ku tambula?
10 O ima ia iibha i tena ku tu bhangesa ku kamba sauidi mu mukutu. O kudia kiambote, o ku nhoha, ni ku bhanga itonokenu ku tena ku tu bhekesa sauidi. O milongi ia Bibidia i tena ku tu kuatekesa ku divua kiambote. Mu kiki, kioso ki tu bhita ni ibhidi, tua tokala ku lembalala kuila Phaulu ua bhiti ué ni ibhidi, ni ku xinganeka mu izuelu iê: “A tu xina mbandu ni mbandu, maji ka tu tolola. Sai ithangana tu kala mu jiphata, maji ki tu kala ni kikote. Nguma ji tu vula, maji ki tu kambe dikamba. Sai ni bhabha a tu kuama maji ki tu jimi o mbutu.”—2 Kol. 4:8, 9.
11. Ihi i tua tokala ku bhanga se tu mona kuila tua mu zoza mu nzumbi?
11 Saí ibhidi i tena ku tu bhangesa ku kamba sauidi mu nzumbi. Jihova u tena ué ku tu kuatekesa mu ibhidi íii. O Maka Mê a tu kanena, “Jihova u balumuna oso a dibhale hé u bhetula oso a zeka bhoxi.” (Jisá. 145:14) Se tu mona kuila tua mu zoza mu nzumbi tua tokala ku bhinga o kikuatekesu ku tufunga. (Tiia. 5:14, 15) Tua tokala ué ku xinganeka mu kidielelu kia muenhu ua kalelaku, phala ku kolokota kioso kia polovala o kixikanu kietu.—Nzu. 17:3.
Athu a a Kuatekesa Kua Nzambi
12. Jimbulula kiebhi Jihova kia tululukisa Mbalahamu.
12 O mukua jisalamu uambe: “Lembalala, Ngana, o kikutu ki ua ta ni selevende ié, kuma eie ua ngi dielelesa. Kiene kia ngi bhetula o muxima mu kubhita mu jiphaxi, mukonda o maka mé, ene a ngi bhana o muenhu.” (Jisá. 119:49, 50) Lelu, mu Mak’â Jihova, o Bibidia, muene phangu iavulu ilondekesa o kikuatekesu kia bhana Nzambi ku athu. Mu kifika, Mbalahamu ua thandanganhele kiavulu, kioso kiévu kuila Jihova ua-nda buika o mbanza ia Sodoma, ni ia Ngomola. Muéne uebhula kua Nzambi: “Kifua ni iá a kumbidila, ni iá a bhukumuka, u a buikixila kumoxi?” Jihova ua tululukisa Mbalahamu, mu ku mu kanena kuila se mu kala 50 a athu a iuka, Muéne keji buika o mbanza ia Sodoma. Né kiki, Mbalahamu uebhula kua Jihova veji jitanu: Se mu kala ngó 45? 40? 30? 20? 10 dia athu a iuka? Mu ithangana ioso, Jihova ua londekesa muanhu ni henda, mu ku kanena Mbalahamu kuila keji buika o mbanza ia Sodoma. Sumbala ki mu kexile dikuinhi dia athu mu mbanza, Jihova ua bhulula Lote, ni an’ê.—Dim. 18:22-32; 19:15, 16, 26.
13. Kiebhi Hana kia londekesa kuila ua dielele kua Jihova?
13 O muhatu ua Elikana, Hana, ua mesenene kiavulu ku kala ni mona. Maji muéne uexile mbaku, kiki kia kexile ku mu luualesa kiavulu. Muéne ua sambe kua Jihova, o Mukunji ua Dikota, Eli ua mu ambela: “Nzambi ia Izalaiele a ku bhane ujitu uoso u ua mu bhingi.” O izuelu íii ia tululukisa Hana, ‘pholo iê ki ia di suuatele dingi ni malamba.’ (1 Sam. 1:8, 17, 18) Hana ua dielele kua Jihova, iu ua xisa o malamba mê moso bhu maku a Nzambi. Hana ua kexile ni kutululuka kua muxima, sumbala muéne kejidile se ihi ieji bhita. Jihova ua tambuijila o musambu uê, mu kithangana kia tokala. Muéne uemita, iu ua vuala ka diiala, iu ua mu luku o dijina dia Samuuele.—1 Sam. 1:20.
14. Mukonda diahi Davidi ua bhindamene kikuatekesu, iu ua bhingi kua nanhi?
14 O Sobha Davidi, ua tambula ué o kikuatekesu kia Nzambi. Jihova “u tala ku muxima,” kioso muéne kia solo Davidi phala ku kala sobha ia Izalaiele, muéne uejidile kuila Davidi ua kexile mu bhanga o ubhezelu ua kidi. (1 Sam. 16:7; 2 Sam. 5:10) Mu ku bhita thembu, Davidi ua te phánda ni Bete-seba, iu ua mesenene ku sueka o kituxi kiê mu ku jibha o diiala dia Bete-seba. Kioso Davidi kia mono kuila ua te kituxi kia dikota, muéne ua sambe kua Jihova: “Mu kulenduka kué ku uene na-ku; kaiela ki ku tuma o jihenda jé javulu, u ngi jimuine o itondalu iami ioso. Ngi sukule, u ngi zelese ku ikuma iami, mukonda nga xidi; ngi bonze, phala kituxi kiami ki bhue-ku. Nga xikina kuma nga ku bhukumukina; mbata o ikuma nga ijiia muene kiambote, o kituxi kiami, izuua ioso, kia ngi vulumuka muene ku mesu.” (Jisá. 51:1-3) Davidi ua diela ni muxima uoso, Jihova iu ua mu loloka. Maji Davidi, ua bhiti mu ibhidi mukonda dia ituxi iê. (2 Sam. 12:9-12) O henda ia Jihova, iene ia kuatekesa o selevende iê.
15. Kikuatekesu kiahi kia bhana Jihova kua Jezú, ande dia ufuilu uê?
15 Kioso Jezú kia kexile mu ixi, ua di bhanene ni ibhidi iavulu. Nzambi uehela o jipolova jiji ku bhita, Jezú ua kolokota mu kixikanu kiê, ua dielela kua Jihova, iu ua zokela o ungana Uê. Kioso kia mu sumbisa, ni ku mu jibha, Jezú ua sambe kua Jihova: “Ki ngindi kuamba o vondadi iami iene i bhita, ki kale ngó o vondadi ié.” Anga bhu mu tukulukila anju i mu suínisa. (Luk. 22:42, 43) Nzambi ua kuatekesa Jezú, ni kikolokotesu kia bhindamene mu kithangana kieniókio.
16. Kiebhi Jihova kia tena ku tu kuatekesa, se o muenhu uetu u kala mu iluezu mukonda dia kixikanu kietu?
16 Né muene se a mesena ku tu jibha mukonda dia kixikanu kietu, Jihova u tena ku tu kuatekesa ku kolokota mu kixikanu kietu. Tuene mu tambula ué o kikuatekesu bhu kaxi ka difukunukinu. Tua mu kingila o kizuua kioso o nguma i sukidila ku i bhuisa-ku, “o kalunga.” (1 Kol. 15:26) O jiselevende ja fiiele ja Nzambi afú ukulu, ni athu a mukua, a-nda ku a fukununa, mukonda Jihova ka a jimbi kana. (Nzu. 5:28, 29; Ika. 24:15) O kikanenu kia difukunukinu ki tu tululukisa, ki tu bhana ué kidielelu mu ithangana ia izukutisu.
17. Kiebhi Jihova kia tena ku tu kuatekesa, kioso ki tu funda ndandu ietu ia kazola?
17 Kima kiambote, kuijiia kuila o jindandu jetu ja kazola ala mu mbila, a-nda vutuka ku muenhu ku mundu uobhe, ki bhua-nda kala dingi ima ia iibha i tuene mu mona lelu! O “mundu uavulu,” a-nda bhuluka mu dizubhilu dia mundu iú ua iibha, a-nda kala ni ujitu ua dikota ua ku sangesa, ni ku longa o athu a-nda vutuka ku muenhu mu ixi!—Dij. 7:9, 10.
Bhoxi Dia Maku a Nzambi ia Kazola
18, 19. Kiebhi o jiselevende ja Nzambi kiene mu a kuatekesa kioso kia a zukutisa?
18 Mozé ua kanena o mundu ua Izalaiele kuma: “Nzambi kene mbambe, a kale muene o disuamenu dié. Bhoxi dié, maku manangenena ma ku fikidila.” (Mate. 33:27) Mu ku bhita thembu o polofeta Samuuele uambela o akua Izalaiele: “Kana-phe dingi kuabhuka mu kukaiela Jihova, bhikilenu kiá Jihova ni muxima uenu uoso. . . . Jihova ka xikina ku ambudisa o mundu uê, mukonda dia dijina diê dikôla.” (1 Sam. 12:20-22) Se tu kolokota mu ku zukama kua Jihova mu ubhezelu uê, muéne nuka ua-nda tu xisa ubheka uetu. Muéne ua-nda tu bhana o kikuatekesu ki tua bhindamena mu ithangana ioso.
19 Nzambi kene ku kamba ku bhana o kikuatekesu ku mundu uê mu izuua íii i sukidila-ku. Tundé ukulu, mazunda a jiphange jetu ku mundu uoso, ene mu a zukutisa, ni ku a ta mu kaleia, mukonda dia ku sidivila Jihova. O misoso iâ, ilondekesa kuila mu ithangana ia ibhidi Jihova u kuatekesa o jiselevende jê. Mu kifika saí phang’etu mu ixi ia União Soviética, a mu balakala 23 a mivu mu kaleia, mukonda dia kixikanu kiê. Maji né kiki, muéne ua kexile mu tambula o kudia mu nzumbi, phala ku mu suínisa, ni ku mu kuatekesa. Muéne uambe: “Mu mivu ioso íii, nga di longo o ku dielela kua Jihova, ni ku tambula o kikuatekesu kiê.”—Tanga 1 Phetele 5:6, 7.
20. Mukonda diahi tu tena ku dielela kuila Jihova nuka ua-nda tu xisa ubheka uetu?
20 Né muene se tu dibhana ni ibhidi ku hádia, tua tokala ku lembalala o izuelu ia mukua jisalamu: “Jihova ka tena kusenga o mundu uê.” (Jisá. 94:14) Sumbala tua bhindamena kikuatekesu, maji né kiki etu tuala ué ni ujitu ua ku kuatekesa akuetu. Kála ki tua-nda di longa mu milongi ia-nda kaiela, etu tu tena ku kuatekesa o athu a mu tala hadi ku mundu iú.
Kiebhi ki Ueji Tambuijila?
• Ima iahi i tena ku tu bhekela o ibhidi?
• Kiebhi Jihova kiene mu kuatekesa o jiselevende jê?
• Se tu dibhana ni maka a ku funda, ihi i tena ku tu kuatekesa?
[Ibhuidisu ia ku dilonga]
[Kidikisu/Jifoto ku mbandu 23]
KIEBHI KI TU TENA KU DIBHANA NI IBHIDI IA . . .
▪ muxima Jisá. 147:3; 1 Nzu. 3:19-22; 5:14, 15
▪ ibanzelu Jisá. 94:19; Fil. 4:6, 7
▪ ixinganeku Mak. 14:13, 14; Mate. 31:6
▪ sauidi ia mukutu 2 Kol. 4:8, 9
▪ sauidi mu nzumbi Jisá. 145:14; Tiia. 5:14, 15
