Zukama Kua Nzambi

“Jihova, Eie . . . ua Ng’ijiia”

“O KIMA kia beta o kota mu ku bhonza ku muthu, o kuijiia kuila se-ku muthu u suua o maka-mê, mba ka mu tendela.” * O kuila kiene ué ki u banza? O kuila ua divu kiá kuila se-ku muthu u ku suua, mba u ku tendela? Se kiene, u tena ku sanga kikuatekesu mu milongi íii: Jihova u suua kiavulu o jiselevende jê, u mona o ima ioso iene mu bhita ku muenhu uâ izuua ioso. O izuelu ia Davidi iala mu Jisálamu 139, tu sanga-mu o kidi kiki.

Davidi ua dielele kuila Nzambi u mu suua, muéne uambe: “U Jihova, eie ua ngi solokota, ua ng’ijiia.” (Velusu 1) Mu izuelu íii Davidi ua tumbula kizuelu kiambote. Mu Hebalaiku o kizuelu ku “solokota,” kilombolola ku kanda ku ditadi dia dikota. (Jobe 28:3;) Ku londa ixi, (Afundixi 18:2) mba ku tonguesa kiambote o maka (Matendelelu 13:14). Jihova ua tuijiia kiambote, muéne u tonginina o ukexilu uoso ua muenhu uetu. Mu ku tumbula o kizuelu ua “ng’ijiia,” Davidi u tu longa kuila Nzambi, u suua o jiselevende jê. Muéne u a tonginina kiambote, uejiia muthu, ni muthu.

Davidi ua ximana o ku tena kua Nzambi kua ku tokuesa, kioso kiambe: “Ua ng’ijiia ni ku xikama kuami ni kubalumuka, o ilunji iami ni mu kanga muná ia ku jimbulukila kiá.” (Velusu 2) O ku kala “mu kanga muná” kilombolola kuila Jihova uala ku diulu. Maji né kiki, muéne uejiia kioso ki tu xikama, nange mu dimatekenu, mba ku disukilu dia kizuua, kioso ki tu balumuka mu kamene, ni ima ioso i tu bhanga ku muenhu uetu. Muéne uejiia ué o ibanzelu ietu, ni jihanji jetu, ni ima i tu mesena. O kuila Davidi ua kexile ni uôma mukonda dia ku mu tonginina kiambote? Kana, muéne ua sangulukile kiavulu. (Velusu 23, 24) Mukonda diahi?

Davidi uejidile kuila Jihova u tonginina o jiselevende Jê, mukonda muéne ua mesena o mbote iâ. Davidi ua londekesa o kidi kiki, kioso kia soneka: “Ua tungula uendelu uami ni uzekelu, jinjila jami joso ja di monekena ko kué.” (Velusu 3) Izuua ioso Jihova u mona ‘o jinjila jetu joso,’ o iluezu ietu, ni ima iambote i tu bhanga. O kuila Nzambi u mona ngó o iluezu ietu, anga o ima iambote? Mu Hebalaiku o kizuelu ku “tungula,” kilombolola ku “tonginina,” mba “ku sola,” kála o kidimakaji u sola o jimbutu ja iangu, mu tiliku ia uabha. Mu Hebalaiku o kizuelu ku “di monekena,” kilombolola “ku bhana valolo.” Kioso Jihova kia tonginina o jiselevende jê, ku disukilu dia kizuua muéne u mona o ima iambote. Mukonda diahi? Mukonda muéne u bhana valolo, ku ngunzu ioso ia bhanga phala ku mu sangulukisa.

Mu Jisálamu 139, a tu longa kuila Jihova u suua o jiselevende jê. Muéne u a tonginina, u mona o ukexilu ua muenhu uâ izuua ioso. Muéne uejiia o maka a bhita nau, uejiia o ndolo iene mu kala na-iu ku muxima mukonda dia jiphaxi jiji. O kuila ua mesena ku bheza o Nzambi u suua o athu? Se ua mesena, ejiia kuila: Jihova, nuka ua-nda ‘jimba o sidivisu i ua bhange, mba o henda i uedikisa o dijina diê.’​—Jihebeleu 6:10.

[Tanga mu luji]