2 Nzambi Kene mu tu Suua o Kuila Kidi?
2 Nzambi Kene mu tu Suua o Kuila Kidi?
Ihi i uene mu kuívua: “Se Nzambi u suua o ibhindamu ia athu, muéne ueji zubha o kuiibha kuoso kuene mu ngongo. Se kidi muene u suua o ibhindamu ia athu oso, muéne kene mu suua o ibhindamu iami.”
Ihi i longa o Bibidia: Jihova Nzambi ki muéne uene mu bheka o hadi, mba o kuiibha mu ngongo. (Tiiaku 1:13) Sumbala muéne uala ni kutena kua ku zubha o hadi ioso íii, muéne uehela o kuiibha mu ngongo, phala ku batula o maka a moneka ku dimatekenu dia musoso. Maji ku hádia, muéne ua-nda zubha o hadi ioso mu ngongo, ene mu i bhanga ku athu ene mu dituna o unguvulu uê.—Dimatekenu 3:1-6; Izaia 65:17. *
Nzambi kene ngó mu suua o ibhindamu ia athu oso, maji u suua ué o ibhindamu ia muthu ni muthu. O divulu dia Matesu 10:29-31, dilondekesa kuila muéne u tu tonginina kiambote, etu ndenge, kioso kiambe: “Manhi, tudièdie tuiadi, kala ku tu sumbisa mu mulambongo? Ni kamoxi-ku-phe ngó ki ka laúka bhoxi sé Tat’enu ku ki andala. Kuambe dingi enu-phe katé ni jindemba ku mítue ienu a ji’aleka. Uila kiki, ki mu kale ni uôma. Tudièdie né tua ndumba, enu mua beta ukota.”
Kiebhi o kuijiia o kidi ki ku kuatekesa: Ki tu bhonza ku zukama ku muthu u thathamana kiavulu, mba ka suu muthu. Mukonda dia makutu alungu ni Nzambi, kuila muéne kene mu suua athu, kuene mu fidisa athu avulu ku mu ijiia mba ku mu zukama kioso ene kia bhindamena. O kuijiia kuila Jihova Nzambi u tu suua, ku tena ku tu suínisa ku di longa dingi ia lungu ni muéne, ni ku kolesa dingi o ukamba uetu ni muéne.
Mu kifika, nange eie u samba kua Nzambi, maji né kiki, u dibhudisa se muéne uene mu kuívua o musambu uê, mba ua-nda ku tambuijila. O Bibidia i tu longa kuma muéne, ‘mukua kuívua o misambu,’ uala polondo phala kuívua o misambu ia athu a mesena ku mu zukama ithangana ioso.—Jisálamu 65:2.
Nzambi ua mesena kuila ‘o hele iê ioso mu xila-iu kua muéne, kuma muéne mukua ku kuatela muanhu.’ (1 Phetele 5:7) Né muene mu ithangana ia ibhidi tu tena ku dielela kuila muéne u tu suua, mukonda o Maka mê a zuela: “Jihova ua zukama kua iá a toloka mixima, u bhulula oso a talamana mu nzumbi.”—Jisálamu 34:18.
[Tanga mu luji]
^ kax. 3 Phala kuijiia dingi, se mukonda diahi Nzambi uehela o kuiibha, tanga o kibatulu 11 kia divulu, Mu Kidi Ihi i Longa o Bibidia?
[Kilombuelelu ku bandu 5]
Se Nzambi kene mu tu suua, mukonda diahi muéne ua mesena kuila tu mu sambela?
