O Muenhu ni Kutululuka Kuijila mu ku Kaiela o Nzumbi ia Nzambi
O Muenhu ni Kutululuka Kuijila mu ku Kaiela o Nzumbi ia Nzambi
‘Tua kambe o ku kaiela o xitu mu kuenda kuetu, maji tu kaiela o Nzumbi ia Nzambi.’—LOM. 8:4.
1, 2. (a) Se o muendexi ua dikalu u landuka, ihi i tena ku bhita? (b) Kiluezu kiahi kijila mu ku zeka mu ukexilu ua nzumbi?
“OKUENDESA o dikalu ni ku landuka, kiluezu kia dikota, maji o ukexilu iú uene mu dimendala dingi mivu ioso.” O maka enhá a a tange ku seketa ia makalu ku ixi ia Estados Unidos. Mu ima ioso i tena ku landukisa o muendexi ua dikalu, o mutelembe ua kafuetele uene ua beta-kota mu ku landukisa. Telêsu imoxi ia athu ndenge, a a ebhuidisa ambe kuila, a tele kiá kiluezu, mukonda dia kuendesa o dikalu ni kuzuela mu mutelembe ua kafuetele. O kuzuela mu mutelembe ni kuendesa, nange kima kiambote, maji ki bhangesa ku ta o muenhu mu kiluezu.
2 Kiki ki tena ku bhita ué mu ukexilu ua nzumbi. O muendexi ua dikalu u landuka, ka tena ku mona o kiluezu, o muthu u zeka mu nzumbi ka tena ué ku mona o kiluezu. Se tu xa o njila ia kidi, ni kueha o sidivisu i tu bhanga mu kilunga, o kixikanu kietu ki zoza. (1 Tim. 1:18, 19) O poxolo Phaulu ua dimuna o Jiphange jê mu Loma ku kiluezu kiki, kioso kiambe: “Kuma o kukala ni kilunji kia mu tumina kuala o hanji ia xitu, kubhekela kalunga. O kukala-phe ni kilunji kia mu tumina kuala o Nzumbi, ki bhekela muenhu ni kutululuka.” (Lom. 8:6) Ihi ia kexile mu zuela Phaulu? Kiebhi ki tu tena kueha o ‘jihanji ja xitu,’ ni ku kaiela o ‘nzumbi ia Nzambi?’
Ene ‘ka-nda ku a Fundisa’
3, 4. (a) Jihanji jahi ja soneka Phaulu? (b) Mukonda diahi o maka a Phaulu, a tu tokala ué?
3 Mu mukanda ua sonekena akua Loma, Phaulu ua soneka o kibhidi kia kexile na-kiu—o jihanji ja xitu, ni ku kaiela o nzumbi ia Nzambi. (Tanga Loma 7:21-23.) Phaulu ka kexile mu dizangeleka, mba ku di kuatela henda, sumbala muéne ua kexile ué ni kituxi, kieji tena ku di kuatekesa muene mudiê. Muéne ua kudile kiambote mu nzumbi, a mu undile ni nzumbi ia Nzambi, phala ku kala “poxolo ia akua jixi jengi.” (Lom. 1:1; 11:13) Mukonda diahi Phaulu ua soneka o kibhidi kia kexile na-kiu?
4 Phaulu uejidile kuila keji tena ku bhanga o vondadi ia Nzambi, mu ngunzu iê. Mukonda diahi? Muéne uambe: ‘Etu enioso tu ati ituxi, tua bhondalala, o bhu fuma ia Nzambi, i bhulula, ki tu tena-bhu.’ (Lom. 3:23) Mukonda dia ku lundula o kituxi kia Adá, Phaulu uexile mukua ituxi. Tu tena ku disokesa ni muéne, mukonda etu enioso tu akua ituxi, tuene mu dibhana ué ni jihanji ja xitu izuua ioso. Saí ué ima iavulu i tu landukisa, i tena ku tu fidisa ku kala ‘mu njila iambata ku muenhu.’ (Mat. 7:14) Maji Phaulu ua kexile hanji ni kidielelu, kála etu ué.
5. Kuebhi kua sange Phaulu o kikuatekesu?
5 Phaulu ua soneka: “Nanhi u ngi kudila ku mukutu iú ua mu ngi bheka mu kalunga. Nga sakidila-phe Nzambi, kuma sai-ku kubhanduluka mua Jezú Kristu, Ngana ietu!” (Lom. 7:24, 25) Mu izuelu íii, muéne ua kexile mu zuela “ió ala mua Kristu Jezú”—o Jikidistá a undu. (Tanga Loma 8:1, 2.) Bhu kaxi ka nzumbi ikôla, Jihova ua a solo kala an’ê, phala ku ‘tumina kumoxi ni Kristu.’ (Lom. 8:14-17) O nzumbi ia Nzambi, ni kixikanu kiâ mu kukula kua Kristu, kia a kuatekesa ku tambula o ujitu iú, mukonda dia ku suína kuâ, Phaulu uambe kuila ene ‘ka-nda ku a fundisa.’ Ene a a bhana ufôlo “ku kitumu kia ituxi ni kalunga.”
6. Mukonda diahi o jiselevende joso ja Nzambi a tokala ku xinganeka mu maka a tange Phaulu?
6 Sumbala o izuelu ia Phaulu ia tokala ku Jikidistá a a undu, o maka a tange muéne alungu ni nzumbi ia Nzambi, ni kukula kua Kristu, a tena ku kuatekesa ué o jiselevende joso ja Jihova, mu kidielelu kiala na-kiu. Nzambi ua tumu Phaulu phala ku dimuna o Jikidistá a a undu, mu kiki o jiselevende joso ja Nzambi a tokala ku xinganeka kiambote o maka enhá, ni ku di suínisa phala ku tambula o mabesá.
Kiebhi Nzambi Kia ‘Zubha o Kituxi’
7, 8. (a) Mu ukexilu uahi o Kitumu kia ‘bhuila mu xitu?’ (b) Ihi iene mu bhanga Nzambi bhu kaxi ka nzumbi iê, ni kukula?
7 Mu kibatulu 7, mu divulu dia Loma, Phaulu ua londekesa kuila o kituxi kiene ni kutena. Mu kibatulu 8, ua tange o kutena kua nzumbi ikôla. O poxolo Phaulu ua jimbulula kiebhi o nzumbi ia Nzambi i tena ku fidisa o Jikidistá ku ta o kituxi, phala ku bhanga o vondadi ia Jihova, ni ku kala ni ukamba ni muéne. Phaulu ua londekesa kuila bhu kaxi ka nzumbi ia Nzambi, ni kukula kua Mon’ê, Nzambi uene mu bhanga kima, o kima kiki ki ki sokela ni Kitumu kia bhanene Nzambi kua Mozé.
8 O Kitumu, kia kexile mu fundisa o ati a ituxi. Maji o Akunji mu Izalaiele exile akua ituxi, keji tena ku bhana sata ia tokala phala o ituxi. Mu kiki, o Kitumu kia ‘bhuila mu xitu.’ Maji mu “kutumikisa Mon’ê muène, mu kidifua kia xitu, ia ituxi” mu ku mu bhana kála sata ia Nzambi, “ituxi na tene ku i zubha-ku,” mu “kima kia lèmbua o Kitumu.” Mukonda dia ku kala ni kixikanu mu sata ia Jezú, o Jikidistá a undu, a a solo kála athu a iuka. Maji ene a a tendelesa phala ‘ka kaiele o xitu mu kuenda, maji a kaiela o nzumbi ia Nzambi.’ (Tanga Loma 8:3, 4.) Ene a tokala ué ku kala athu a fiiele, kate mu disukilu dia muenhu uâ mu ixi, phala ku tambula “o kitundu kia muenhu.”—Dij. 2:10.
9. O kizuelu “kitumu,” mu divulu dia Loma 8:2, kilombolola ihi?
9 Phaulu ka tange ngó “o Kitumu,” ua tange ué “o Kitumu kia Nzumbi ia Nzambi.” ni “kitumu kia ituxi ni kalunga.” (Lom. 8:2) O itumu íii ilombolola ihi? O kizuelu “kitumu,” ki kilombolola ijila, kála o ijila ia Kitumu ia bhanene Nzambi kua Mozé. Saí divulu dizuela kuila: Mu Ngeleku o kizuelu kitumu, kilombolola o vondadi ia ku bhanga kima—kia uabha mba kia iibha—kála o ku belesela o kitumu. O kizuelu kiki, kilombolola ué o ukexilu ua muenhu ua muthu.”
10. Kiebhi ki tua lundula o kituxi, ni kufuá?
10 O poxolo Phaulu ua soneka: “Mukonda dia muthu umoxi, o kituxi kia bokona mu ngongo, o kufuá kuejila mu ituxi; kiene ué kia bhiti o kufuá ku thandu dia athu oso, kuma ene oso ituxi a i te.” (Lom. 5:12, NW) Mukonda tu an’a Adá, athu oso a lundula o kituxi ni kufuá. O ukexilu iú u tu suínisa ku bhanga ima ia iibhila Nzambi, i tu bhekela o kufuá. Mu mukanda ua sonekena ku akua Ngalásia, Phaulu uambe o ima íii kála ‘imbamba i bhanga o xitu.’ Mu kusuka-ku muéne uambe dingi: “Kuma oso [akua] kubhanga ima kala iii, kà tena kubhingana mu Utuminu ua Nzambi.” (Nga. 5:19-21) O athu enhá, athu a bhanga o imbamba i bhanga o xitu. (Lom. 8:4) O “kitumu kiendesa o mienhu iâ,” kia lungu ni imbamba i bhanga o xitu. O kuila o athu a bhanga o undumbu, o ubhezelu ua iteka, ni uanga, mba ituxi ia mukua, ene ngó a bhanga o imbamba ia xitu? Kana, o imbamba ia xitu, ia lungu ué ni ku kala ni difuba, njinda, ku zoka, ni luímbi. Nanhi u tena kuzuela kuila kene mu bhanga o imbamba ia xitu?
11, 12. Ihi ia bhange Jihova phala ku tu bhulula mu ituxi ni mu kufuá, ni ihi i tua tokala ku bhanga phala n’a tu xikine kua Nzambi?
11 Tua sanguluka kiavulu mu kuijiia kuila Jihova ua bhange kima phala ku loloka o ituxi ietu, ni ku zubha o kalunga. Jezú uambe: “Mbata Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.” Se tu kala mu henda ia Nzambi, ni kuxikina o sata ia Jezú Kristu, tu tena ku tambula o muloloki ua ituxi i tua lundula. (Nzu. 3:16-18) Kienhiki, tua tokala ku sakidila, kála Phaulu kioso kiambe: “Nga sakidila-phe Nzambi, kuma sai-ku kubhanduluka mua Jezú Kristu, Ngana ietu!”
12 O ukexilu uetu ua difu ni ku saka uhaxi. Se tua mesena ku disanza, tua tokala ku kaiela kiambote o itendelesu i bhana o dotolo. Sumbala o kuxikina o sata, ku tu bhulula mu ituxi, ni mu kufuá, maji né kiki tu ati a ituxi hanji. Phala ku tu xikina kua Nzambi, ni ku tambula o mabesá mê, tua tokala ku bhanga dingi kima. Kia lungu ni ku kumbidila, “kioso kia iuka kia xindi o Kitumu,” Phaulu ua tange ué maka alungu ni ku kaiela o nzumbi ia Nzambi.
Kiebhi ki tu Tena ku Kaiela o Nzumbi ia Nzambi?
13. Ihi ilombolola kuehela ku tuendesa ku nzumbi ia Nzambi?
13 Kioso ki tuenda njila o mbambe i tu suua o ku bhixila bhu kididi. Kienhiki, o ku kaiela o nzumbi ia Nzambi, ku bhinga ku kula mu nzumbi—maji ki kilombolola ku kala muthu ua iuka. (1 Tim. 4:15) Izuua ioso, mu ukexilu uoso ua muenhu uetu, tua tokala ku bhanga ioso phala ku kaiela o nzumbi ia Nzambi. Se tu ehela “o Nzumbi ia Nzambi ku endesa o mienhu” ietu, a-nda tu xikina kua Nzambi.—Nga. 5:16.
14. O athu “a suua o imbamba ia xitu,” a xinganeka ngó ku bhanga ihi?
14 Mu mukanda ua sonekena ku akua Loma, Phaulu ua zuela ia lungu ni athu a suua imbamba ia xitu, ni ió a kaiela o nzumbi ia Nzambi. (Tanga Loma 8:5.) O kizuelu “xitu” ki kilombolola o mukutu uetu. Mu Bibidia o kizuelu “xitu,” kilombolola o ima ia iibha i tu bhanga, mukonda dia kituxi ki tua lundula. O ukexilu iú, ki u difu ni ku kaiela o nzumbi ia Nzambi ia tange Phaulu ku dimatekenu. Mu kiki, o athu “a suua imbamba ia xitu,” kene mu bhanga ioso phala kueha o ukexilu iú. Mu veji dia ku xinganeka ihi ia mesena Nzambi phala ene, ni ku xikina o kikuatekesu kia a bhana, ene a suua imbamba ia xitu, “o ilunji iâ a mu i tumina ku kikexilu kiene’okio.” Ene a banza ngó ku bhanga o jihanji ja xitu. Maji oso-phe “a tokala ku Nzumbi ia Nzambi,” a suua “imbamba ia Nzumbi,” a xinganeka mu ima ioso i bhana Nzambi, ni mu sidivisu iâ mu kilunga.
15, 16. (a) Kiebhi o ku suua kima, ki tena ku bhangesa o muthu ku bhanga kima kia iibha, mba kia uabha? (b) Lelu o athu ene mu thandanganha dingi ihi?
15 Tanga Loma 8:6. Phala ku bhanga kima, ki kale kia iibha, mba kia uabha—o muthu ua tokala ku xinganeka. O athu a suua ngó o imbamba ia xitu, o ima ia bhanga ia lungu ni jihanji ja xitu. Ene a thandanganha dingi ni mbote iâ.
16 Lelu o athu ene mu thandanganha dingi ni ima iahi? O poxolo Nzuá ua soneka: “Kuma o ima ioso iene ku mundu, ki ima ia tundu kua Tata. O jihânji jaiibha ja luimbi lua xitu, o vondadi ia luimbi lua kumesena ima ioso i mona o mesu, ni izala mu ima ioso iene ku muenhu—ima ioso íii ia mundu.” (1 Nzu. 2:16) O jihanji ja xitu ja lungu ni undumbu, o fuma, ni ku kaiela o jimbote. O madivulu, ji jurnale, ji filme, ni Internete, alondekesa athu a suua ngó o imbamba ia xitu, mukonda iú uene o ukexilu ua mesena o athu. Maji o ku “suua o imbamba ia xitu ku bheka kalunga,” mukonda u zanga o ukamba uetu ni Nzambi. Mukonda diahi? “Uila kiki, o muthu u di zemba ni Nzambi, se o kilunji kiê kia kala mù ki tumina kuala o kikexilu kia xitu. Mukonda ka xikina kubelesela Kitumu kia Nzambi, ni kidi muène, ka tena ku ki belesela. O ió oso ala mù tumaka o kikexilu kia xitu, ka tena muene kuuabhela Nzambi.”—Lom. 8:7, 8.
17, 18. Kiebhi ki tu tena ku kaiela o nzumbi ia Nzambi, ni mabesá ahi u tua-nda tambula?
17 O ku kala-phe “ni kilunji kia mu tumina kuala o Nzumbi, ki bhekela muenhu, ni kutululuka”—muenhu ua kalelaku ku hádia, ni ku tululuka kua muxima, ni kutululuka ni Nzambi lelu. Kiebhi ki tu tena ku kala “ni kilunji kia mu tumina kuala o Nzumbi” ia Nzambi? O ku suua o ima ia nzumbi, ni kuehela ku tuendesa ku nzumbi ia Nzambi, ki tu kuatekesa ku kala ni ukexilu uambote. Mu ku bhanga kiki, tua-nda “xikina kubelesela Kitumu kia Nzambi,” ni ku “tumaka” o ijila iê. Se tu dibhana ni tendasá, ki kia-nda tu bhonza ku sola o ukexilu uambote. Tua-nda sola kiambote, se tu kaiela o nzumbi ia Nzambi.
18 Kienhiki, tua tokala ku kaiela o nzumbi ia Nzambi. Tu tena ku bhanga kiki, mu ku ‘kala polondo’ mu ku samba, ku tanga o Bibidia, kuia mu iônge, ni kuia mu boka. (1 Phe. 1:13) Mu kiki, ki tu tokala kueha kuila o imbamba i suua o xitu, i tu landukisa, tua tokala ku kaiela o nzumbi ia Nzambi. Se tu bhanga kiki, tua-nda kolokota mu ku kaiela o nzumbi ia Nzambi. Kienhiki, tua-nda tambula mabesá, mukonda o ku kaiela o nzumbi ia Nzambi, ku bheka muenhu, ni kutululuka.—Nga. 6:7, 8.
U Tena ku Jimbulula?
• Kiebhi o Kitumu kia ‘bhuila mu xitu,’ ni kiebhi Nzambi kia bhange kiki?
• Kiebhi o “kitumu kia ituxi ni kalunga,” ni kiebhi kia tu bhulula?
• Ihi i tua tokala ku bhanga phala ku kala “ni kilunji kia mu tumina kuala o Nzumbi” ia Nzambi?
[Ibhuidisu ia ku dilonga]
[Foto ku mbandu 16]
O kuila uene mu kaiela o imbamba i suua o xitu, anga o nzumbi ia Nzambi?
