A Endesa ku Nzumbi ia Nzambi ku Hama ia Dianga ni Lelu
A Endesa ku Nzumbi ia Nzambi ku Hama ia Dianga ni Lelu
‘Maji iene ioso íii-phe, o Nzumbi imoxi iene ngó i kalakala.’—1 KOL. 12:11.
1. Ihi i tua-nda di longa mu milongi íii?
MU KIZUUA kia Pendekoxi ku muvu ua 33, kua bhiti madiuanu! (Ika. 2:1-4) O ku tambula o nzumbi ikôla mu kithangana kiki ku hama ia dianga, kia londekesa o dimatekenu dia Nzambi ku bhanga ukamba ni jiselevende jê. Mu milongi ia bhiti, tua di longo maukexilu avulu alondekesa kiebhi o nzumbi ia Nzambi ia kuatekesele o jiselevende ja fiiele ku bhanga ima ia bhonzo. Maji ihi i tu longa o ukexilu ua nzumbi ia Nzambi ku kuatekesa o Jiselevende j’okulu, ni mu ukexilu ua ku kuatekesa o Jikidistá ku hama ia dianga? Kiebhi o Jikidistá lelu kia katula mbote ku kikuatekesu kia nzumbi ikôla ia Nzambi lelu? Tua-nda di longa.
“Eme’ami’ú, Ngi Mubhika ua [Jihova]”
2. Kiebhi Madiia kia mono o kikuatekesu kia nzumbi ikôla?
2 Madiia ua kexile ué mu xilu kioso kia tambula o ujitu ua nzumbi ikôla. (Ika. 1:13, 14) Ande dia ku bhita o madiuanu enhá, kua bhitile kiá makuinhi atatu a mivu, muéne ua kexile kia mu mona o kikuatekesu kia nzumbi ia Jihova. Jihova ua tumikisa o Mon’ê tundé ku diulu mu mala dia Madiia, kioso muéne kexile hanji kilumba kia muzeletete. O mona a mu imita bhu kaxi ka “Nzumbi Ikôla.”—Mat. 1:20.
3, 4. Ukexilu uahi ua londekesa Madiia, ni kiebhi ki tu tena ku kaiela o phangu iê?
3 Mukonda diahi Madiia a mu bhana o ujitu iú ua dikota? Kioso o anju kia zubha kuzuela ihi ia mesenene Jihova, Madiia uambe: “Eme’ami’ú, ngi mubhika ua [Jihova]. Ki ngi bhite Ngana kala ki ua ki zuela.” (Luk. 1:38) Mu ku tambuijila kiki, Madiia ua londekesa o ukexilu uê uambote uejidile kiá Nzambi. Kiki kia londekesa kuila muéne ua kexile polondo phala ku bhanga o vondadi ia Jihova. Muéne ka xinganeka se ihi ieji zuela o athu ku diembu diê kieji mu mona ni divumu, mba ihi ieji zuela o diiala dia di kutu nadiu. Mu kuzuela kuila muéne mubhika, Madiia ua londekesa kuila muéne ua dielele Jihova kala Ngana iê.
4 O kuila ua divuile kiá kia iibha mu ku bhanga o sidivisu ia Nzambi? Kala muthu ua tokala u dibhudisa: ‘O kuila nga dielela kua Jihova mu ku bhanga o kikalakalu kiê kala kia mesena muéne? Nga mu londekesa kuila ngala ni vondadi ia ku bhanga ia ngi bhingi?’ Ejiia kuila Nzambi u bhana o nzumbi iê ku athu oso a mu dielela ni muxima uoso, a xikana ku bhanga o vondadi iê.—Ika. 5:32.
Phetele a mu Kuatekesa ku Nzumbi Ikôla
5. Kiebhi Phetele kia monene o kikuatekesu kia nzumbi ikôla ande dia Pendekoxi ku muvu ua 33 K.K.?
5 Kála kia bhiti ni Madiia, o poxolo Phetele ua monene kiá o kutena kua kikuatekesu kia nzumbi ikôla ia Nzambi ande dia Pendekoxi ku muvu ua 33 K.K. Jezú ua bhanene kua Phetele ni ku jixibulu ja mukuá o kutena kua ku tundisa madimonho ku athu. (Mar. 3:14-16) Sumbala o Mikanda Ikola ki i jimbulula kiavulu o maka enhá, nange Phetele ua kexile mu tundisa o madimonho mu kutena kua tambula. O kutena kua Nzambi a kulondekesa ué kioso Jezú kiexana Phetele phala kuenda ku thandu a menha a Kalunga ka Ngalileia, Phetele ua tena. (Tanga Matesu 14:25-29.) Mu kiki, Phetele ua dielele kuila o nzumbi ikôla ieji mu kuatekesa ku bhanga ima ia madiuanu. Ku pholo o nzumbi íii ieji kuatekesa Phetele, ni jixibulu ja mukuá mu ukexilu uéngi.
6. Ihi ieji bhanga Phetele mu kaxi ka nzumbi ikôla, mu kizuua kia Pendekoxi ku muvu ua 33 K.K., ni ku pholo?
6 Mu Fesa ia Pendekoxi ku muvu ua 33 K.K., Phetele ni jixibulu ja mukuá a a bhana kutena kua kuzuela mu madimi a ajitu akexile mu kuíza mu Jeluzaleme. Kienhiki, Phetele uemana ni akuâ, iu ua kuata o ku longa o athu. (Ika. 2:14-36) O diiala didi uexile muthu ua iibha, athu a mu kuatele uôma, kindala kiki ua suínine mu ku bhana umbangi ku athu sumbala akexile ku mu xonguena, ni ku mu zukutisa. (Ika. 4:18-20, 31) Muéne ua tambula o kuijiia mu kaxi ka madiuanu. (Ika. 5:8, 9) Muéne a mu bhana ué kutena kua ku fukununa o athu.—Ika. 9:40.
7. Milongi iebhi ia Jezú, ia tendela Phetele kioso kia mu undu?
7 Né muene ande dia kizuua kia Pendekoxi, Phetele uejidile kiá milongi iavulu ia kidi ia di longo kua Jezú. (Mat. 16:16, 17; Nzu. 6:68) Maji saí milongi ia longo Jezú ka kexile mu i tendela kiambote ande dia Pendekoxi. Mu kifika, Phetele ka banzele kuila Kristu eji mu fukununa muthu mu nzumbi mu kizuua kia katatu; mba kuila o Utuminu, ueji kala ku diulu. (Nzu. 20:6-10; Ika. 1:6) Phetele ka tendela ué kiambote o milongi ia lungu ni athu ku kituka athu mu nzumbi, ni ku Tumina ku diulu. Kioso kia mu undu ni nzumbi ikôla, ia a mu bhana o kidielelu kia ku kala ku diulu, kiene ngó kia mateka o ku tendela ihi ilombolola o milongi ia Jezú.
8. Ihi iejiia o jikidistá a a undu, mba o ‘jimbudi ja mukuá’?
8 O maxibulu a Jezú a mateka ué ku tendela kiambote kioso kia tambula o nzumbi ikôla. Bhu kaxi ka nzumbi a soneka o Kikutu Kiobhe—phala o mbote ietu—i tu jimbulula kiambote o vondadi ia Jihova. (Efe. 3:8-11, 18) Lelu, ki kale o Jikidistá a a undu, mba o ‘jimbudi ja mukuá’ ene mu dia kumoxi o kudia mu nzumbi, ni ku tendela ué o maka enhá a kidi. (Nzu. 10:16) O kuila eie uene mu longa o Mak’â Nzambi u uejiia mu kaxi ka nzumbi ikôla ku akuenu?
Phaulu “Uezala ni Nzumbi Ikôla”
9. Ihi ia tenene ku bhanga Phaulu bhu kaxi ka nzumbi ikôla?
9 Kioso kia bhiti o muvu ua Pendekoxi ku muvu ua 33 K.K., saí ué muthu uéngi ua tambuile ué o ujitu iú ua Nzambi, o nzumbi ikôla. O muthu iú, Saúlu a mu ixanene ué Phaulu. O kikuatekesu kia tambula mu kaxi ka nzumbi, kiene mu tu kuatekesa ué lelu. O poxolo Phaulu ua soneka 14 dia madivulu a Bibidia. Kála kia bhiti ni Phetele, o nzumbi ia Nzambi ia kuatekesa Phaulu ku tendela, ni ku soneka o maka alungu ni kidielelu kia ku tambula muenhu ku diulu. Bhu kaxi ka nzumbi ikôla Phaulu ua sake athu, ua tundisa madimonho ku athu, iu ua fukununa imbi! Maji o kutena kua tambula ku nzumbi ikôla, kueji mu kuatekesa ku bhanga kikalakalu kia dikota, kiene kimoxi ué ni jiselevende ja Nzambi lelu, ene mu tambula ué o kikuatekesu kiki, maji ka ki tambula mu madiuanu.
10. Kiebhi o nzumbi ikôla ia kuatekesa Phaulu ku sakalala mu kuzuela?
10 Phaulu mu ‘kuizala ni nzumbi ikôla’ ua zuela ni ku suína kuoso ni mukua uanga. Ihi ia bhange o nguvulu ia Xipele, ua kexile mu kuívua o maka enhá? O nguvulu-phe kia mono ia kexile mu bhita, u xikana, “kuma ua diuana o ulongelu ua [Jihova.]” (Ika. 13:8-12) Mu kidi, Phaulu uejidile kiambote o kikuatekesu kia nzumbi ia Nzambi kioso kia kexile mu longa o kidi. (Mat. 10:20) Mu ku bhita thembu, ua bhingi o jiphange mu kilunga kia Efezo, phala a sambe kua Nzambi phala ku mu bhana o kutena kua “ku sakalala mu kuzuela.”—Efe. 6:18-20.
11. Kiebhi Phaulu kia mu endesa ku nzumbi ia Nzambi?
11 O nzumbi ikôla ki iehela ngó Phaulu ku longa, saí ithangana ia mu fidisa kuia mu boka mu ididi ia mukuá. Kioso muéne kia kexile mu kuenda jinjila jê mu ukunji, Phaulu akexile mu ku muendesa ku nzumbi ia Nzambi. (Ika. 13:2; tanga Ikalakalu 16:6-10.) Lelu Jihova uene hanji mu kuendesa o kikalakalu kia kuboka bhu kaxi ka nzumbi iê. Kála kia bhite ni Phaulu, o jiselevende joso ja Jihova ja belesela, a suína mu ku boka o kidi ni ku kolokota ni muanhu. Nzambi kene mu tuendesa kála kiendesa Phaulu, maji tu tena ku dielela kuila Jihova, bhu kaxi ka nzumbi iê u kuatekesa athu a mesena kuijiia o kidi kia Bibidia.—Nzu. 6:44.
“O Unjimu ua Maufunu ua di Tungula mu Idifanganu”
12-14. O kuila o nzumbi ia Nzambi i kuatekesa o jiselevende ja Nzambi mu ukexilu umoxi? Jimbulula.
12 O kuila o misoso ia athu a tambula mabesá mu kilunga kia dianga ku hama ia dianga, i suínisa o jiselevende a di bhakula kua Nzambi lelu? Ia a suínisa! Xinganeka mu izuelu ia Phaulu iambe ku jiphange mu kilunga kia Kolindo ia lungu ni maujitu a nzumbi mu izuua iê, kioso kiambe: ‘Mauhete-phe ma Nzumbi ma di tungula mu idifuanganu, maji o Nzumbi-phe iene imoxi ia mu a bhana. O maubhikilu ué ma di tungula mu idifanganu, maji o Ngana iene imoxi i tua mu bhikila. O unjimu ua maufunu ua di tungula mu idifuanganu, maji-phe Nzambi imoxi u bhana unjimu moxi dia ene oso, phala muthu ni muthu n’a bhange o kikalakalu kiê.’ (1 Kol. 12:4-6, 11) Mu kiki, o nzumbi ikôla i tena ku kuatekesa o selevende ia Nzambi mu ukexilu uavulu. Ki kale o “kakilunga kófele” ka Kristu, mba o ‘jimbudi ja mukuá’ a endesa ku nzumbi ikôla. (Luk. 12:32; Nzu. 10:16) Maji muthu ni muthu mu kilunga, u tambula mu ukexilu uê.
13 Mu kifika, phala ku sola muthu phala ku kala kafunga, o nzumbi ikôla iene i sola. (Ika. 20:28) Maji ko tufunga tuoso a a sola ku nzumbi ikôla, a kala ku pholo ia kibuka kia tufunga mu kilunga. Kiki ki tu longa ihi? Ki tu longa kuila o nzumbi ia Nzambi, i kuatekesa o jiphange mu ukexilu uavulu mu kilunga.
14 O nzumbi i kuatekesa o Jikidistá a a undu, ku kituka ‘an’a Nzambi,’ iene imoxi ia fukununa na-iu Jihova o Mon’ê umoxi-élele, phala ku kala ku muenhu ku diulu. (Tanga Loma 8:11, 15.) O nzumbi íii iene ué ia bhange na-iu Jihova o ngongo. (Dim. 1:1-3) Iene ué ia kuatekesa na-iu Bezalele ku bhanga kikalakalu kia dikota mu balaka, ia bhana nguzu kua Sansau phala ku bhanga ima ia tokalele ku i bhanga ni nguzu iavulu, ia kuatesa ué Phetele kuenda ku thandu a menha. Kienhiki, ki tu tokala ku banza kuila o nzumbi ia Nzambi, i kuatekesa ngó o muthu a mu undu ni nzumbi ia Nzambi. Nzambi muéne u sola o muthu a tokala o ku mu unda ni nzumbi.
15. O kuila o athu a-nda ku a batizala mu nzumbi ikôla katé ku hádia? Jimbulula.
15 O nguzu ia tenena ia Nzambi iene mu kuatekesa o jiselevende ja Nzambi mu ukexilu uavulu, kála kia bhitile ni jiselevende jê ku mivu ni mivu ku dima ande dia ku mateka ku unda o athu phala kuia ku diulu. O nzumbi ikôla ia kexile dingi ku kuatekesa o jiselevende ja Nzambi ku Pendekoxi ku muvu ua 33 K.K., maji ki ia-nda unda athu katé ku hádia. O Batizu mu nzumbi, ia-nda bhua kiá, maji o nzumbi ikôla ia-nda suluka mu kuatekesa o mundu ua Nzambi ku kolokota ku bhanga o vondadi iê ku muenhu uoso.
16. Ihi ia mu bhanga lelu o jiselevende ja Nzambi bhu kaxi ka nzumbi iê?
16 Ihi iene mu bhita mu ixi ioso bhu kaxi ka nzumbi ikôla ia Jihova? O divulu dia Dijingunuinu 22:17, dizuela: “Ni Nzumbi ni Dibhanga, edi: Izá! Uoso ue uívua im’íii, ele: Izá! Uoso dinhota dia mu kuata, eze. Uoso uandala, a tambule o menha ma muenhu mu ngoho.” Ni kikuatekesu kia Nzumbi ia Nzambi, lelu o Jikidistá ene mu kuixana ‘oso a-ndala’ phala eze mu tambula o menha a muenhu. O Jikidistá a a undu, ene ala ku pholo mu ku bhanga o kikalakalu kiki. Maji o jimbudi ja mukuá ene uâ mu bhanga o kikalakalu kiki. Ki kale o jikidistá a a undu, mba o jimbudi ja mukuá, ene mu a endesa ku nzumbi ikôla mu ku bhanga o kikalakalu kiki. O ibuka iiadi íii, a di bhakula kua Jihova mu ku a batizala, “mu dijina dia Tata, ni dia Mona, ni dia Nzumbi Ikôla.” (Mat. 28:19) Ene oso a xikana ku a endesa ku nzumbi ia Nzambi ku mienhu iâ ioso, ni kulondekesa o ídifua ia nzumbi. (Nga. 5:22, 23) Kála ki bhanga o jikidistá a a undu, o jimbudi ja mukuá ene mu kuehela o nzumbi ia Nzambi ku a kuatekesa. Ni kikuatekesu kia nzumbi ia Nzambi, ene a bhanga ioso phala ku kumbidila o ijila ioso ia Jihova.—2 Kol. 7:1; Dij. 7:9, 14.
Kolokota ku Bhinga o Nzumbi Ikôla
17. Kiebhi ki tu tena kulondekesa kuila tua tambula o nzumbi ia Nzambi?
17 Ki kale se Nzambi u ku bhana kidielelu kia ku tambula o muenhu ku diulu mba mu ixi, Jihova u tena ku ku bhana “o nguzu i lenda” phala u kolokote ni ku tambula o kifutu kiê. (2 Kol. 4:7) O ku suína kuê mu ku boka o njimbu ia Utuminu, nange athu ka i bhana valolo. Maji ejiia-nakiu kuila “se a mi bhana malebhu mu kukaiela o dijina dia Kristu, mua zediua. Mukonda kia lombolola kuila o Nzumbi ia fuma, Nzumbi ia Nzambi, ia mi tula ku thandu.”—1 Phe. 4:14.
18, 19. Kiebhi Jihova kia-nda ku kuatekesa bhu kaxi ka nzumbi ikôla iê, ni ihi i ua tokala o ku bhanga?
18 O nzumbi ikôla ia Nzambi, ujitu ua Nzambi phala ió a i sota mu kidi. Ki i lungulula ngó o uhete uê, maji ni vondadi ué ia ku bhanga dingi mu sidivisu iê. “Kuma Nzambi muène u kalakala moxi dienu, mu ku mi solesa ni ku mi bhangesa kutumaka kioso kia mu kala mu vondadi iê iambote.” O ujitu ua nzumbi ikôla, ni nguzu i tu bhanga phala ku kolokota, “mu ku a tela o Maka ma muenhu,” ia-nda tu kuatekesa ku ‘kalakala ni ujitu uoso ni uôma, phala ku mona o ku bhuluka.’—Fil. 2:12, 13, 16.
19 Ni kidielelu ku nzumbi ia Nzambi, kalakala ni muxima uoso ni ku kumbidila kabasa kikalakalu kia ku bhana mu kilunga, ni ku sota o kikuatekesu kia Jihova. (Tiia. 1:5) Muéne ua-nda ku bhana ioso i ua bhindamena phala ku tendela o Maka mê, ni ku dibhana ni ibhidi ku muenhu ni ku boka o njimbuiambote. “Eme-phe ue ngi mi ambela: bhingenu, nda a mi bhane. Sotenu, nda mu sange. Bundenu, nda a mi jikuile dibhitu,” kiki kia lungu ni ku tambula ué o nzumbi ikôla. (Luk. 11:9, 13) Kolokota ku bhinga kua Jihova phala u kale kála o jiselevende ja Nzambi, j’okulu ni ja lelu, a endesa ku nzumbi ikôla ia Nzambi.
U Tena ku Jimbulula?
• Ihi i tu di longa ku phangu ia Madiia, ni mabesá ahi tua-nda tambula?
• Mu ukexilu uebhi Phaulu a mu endesa ku nzumbi ia Nzambi?
• Kiebhi o nzumbi ia Nzambi, kiene mu kuendesa o jiselevende ja Nzambi lelu?
[Ibhuidisu ia ku dilonga]
[Foto ku mbandu 26]
O nzumbi ia Nzambi ia kuatekesa Phaulu ku bhânga ni jinzumbi ja iibha
[Foto ku mbandu 28]
Lelu o nzumbi ikôla iene mu kuatekesa ué o Jikidistá, ki kale se ala ni kidielelu kia kuia ku diulu, mba ku kala mu ixi
