O Kuila ku Bhinga Kuijiia o Kitambuijilu?

“Nga kexile ni dikuinhi dia mivu kioso ki nga mateka o ku tunda ni minzangala. Ku dimatekenu, tua kexile mu di xaxata ni ku di bhana ji nzobole. Mu ku bhita kithangana, tua kuata ku di xaxata ku mukutu uoso, ni ku bhanga ukexilu uoso ua ufusa. Kioso ki nga kexile ni 15 dia mivu, nga mateka ku kalakala, kua kexile mala akexile mu ngi sota, mukonda a mesenene ku bhanga undumbu ni eme. Nga mesenene ku bhanga ioso ia kexile mu bhanga o jikoleka jami ja ahatu. Nga mesenene kuila ene a ngi xikina, kiki kia ngi bhangesa ku bhanga ufusa.”—SARAH * AUSTRALIA.

OKUILA ueji diuana mu kuijiia kuila Sarah a mu sase ku jitata Jimbangi ja Jihova? O jitata jê a mu kuatekesele ku kumbidila o itumu ia Bibidia. Maji Sarah ua solo njila iéngi.

Nange athu avulu, eji xikina o njila ia solo Sarah. Ene a zuela kuila o milongi ia Bibidia ia lungu ni ku di zeka, ki iala dingi ni valolo. A mukuá amba kuila, ki ki bhange kima kuia mu ngeleja, maji u bhukumukina o itumu ia lungu ni ku di zeka.

O kuila ku bhinga kuijiia o milongi ia Bibidia ia lungu ni ku di zeka, ni ku i kumbidila? O Bibidia izuela kuila, iene ‘divulu dia Nzambi, i sidivila phala ku longa.’ (2 Timote 3:16) Se eie u xikina kuila Nzambi ua bhange o athu, kuma o Bibidia o Maka mê, o milongi iê ia lungu ni maka enhá, iala ni valolo.

Maji saí hanji athu avulu ala ni phata se ihi i longa o Bibidia ia lungu ni ku di zeka. Atuameni a jingeleja amba kuila a xila o Bibidia, kala ni ilongesu imoxi. Mu kidi, o maka enhá ene mu uanuna o atuameni a jingeleja.

Mu veji dia ku dielela mu izuelu ia athu, mukonda diahi ki u katule kithangana phala ku di longa dingi ia lungu ni maka enhá? Mu milongi ia kaiela, tua-nda di longa dikuinhi dia ibhuidisu ia lungu ni ku di zeka. Mu milongi íii, eie ua-nda kuijiia o kidi, ilondekesa se mu kidi ihi i longa o Bibidia. Mu milongi ia sukina-ku, tua-nda di longa se mukonda diahi o ima i tu sola, iala ni valolo.

[Tanga mu luji]