Di Longe Kiebhi Kiala ‘O Kidi’
Di Longe Kiebhi Kiala ‘O Kidi’
‘Eie mu Kitumu, eie uala ni kuijiia kuoso ni kidi.’—LOM. 2:20.
1. Mukonda diahi tua tokala kuijiia o Kitumu kia bhanene Nzambi kua Mozé?
SE KI tu kexile ni milongi ia soneka poxolo Phaulu, kieji tu bhonza kiavulu kuijiia o maka ala mu Kitumu kia bhanene Nzambi kua Mozé. Mu kifika mu mukanda ua sonekena ku akua Jihebeleu, muéne ua jimbulula kiebhi Jezú o ‘mukunji ua dikota ua fiiele’ ueji bhana ‘o muenhu uê mu sata’ i bhangesa kuila uoso u mu xikina u kala ni ‘muenhu ua kalelaku.’ (Jihe. 2:17; 9:11, 12) Phaulu ua jimbulula kuila o balaka iexile ngó “ilembeketa ia ima iene mu diulu,” kuma Jezú muéne Mukunji ua kikutu kia “beta ujitu,” o kia Mozé, ndenge. (Jihe. 7:22; 8:1-5) Mu izuua ia Phaulu, o Jikidistá a bhanene valolo iavulu ku ilomboluelu íii, lelu iala ué ni valolo ia dikota. O ilombuelelu íii, i tu kuatekesa ku bhana valolo mu ima ioso iene mu tu bhana Nzambi.
2. Ujitu uahi ua kexile nau o Jikidistá Jijudé, o athu kejidile Nzambi ka kexile nau?
2 Kioso Phaulu kia sonekena o Jikidistá mu Loma, muéne uambe ia lungu ni jiphange mu kilunga a tokalele ku muiji ua Jijudé, a a longele mu Kitumu kia bhanene Nzambi kua Mozé. Muéne uejidile kuila o athu enhá, akexile ni ujitu ua dikota mukonda dia kuijiia o Kitumu kia Nzambi, ene akexile “ni kuijiia kuoso ni kidi,” kia lungu ni Jihova ni itumu iê. O “kuijiia kuoso ni kidi,” ni ku ki xila ni muxima uoso, kia kuatekesa o Jikidistá akua Judé, ni Jijudé ja mukuá exile uá jifiiele, a endesa, ia a longo, iá akexile mu kuatekesa ió akexile mu dituna o Kitumu kia bhanene Jihova ku mundu uê.—Tanga Loma 2:17-20.
KILONDEKESU KIA LUNGU NI SATA IA JEZÚ
3. Mbote iahi i tu katula mu ku di longa o jisata ja kexile mu bhanga o Jijudé m’ukulu?
3 O kidi kiambe Phaulu, kima kia bhingi phala tu tene ku tendela kiambote o vondadi ia Jihova. Maji o ijila ioso ia bhanene Nzambi kua Mozé, iala hanji ni valolo iê. Mu ku xinganeka mu maka enhá, tua-nda di longa o Kitumu kia lungu ni—jisata, ni ima ia bhanene ku Jijudé ja lenduka kua Kristu, ia a kuatekesa kuijiia se ihi ia mesenene Nzambi phala ene. Mu kuijiia kuila Jihova kene mu lungulula o itumu iê phala o mundu uê, tua-nda di longa ué o itumu ia bhanene Nzambi ku akua Izalaiele ia lungu ni jisata, ni ujitu, ia-nda tu kuatekesa ku xinganeka o sidivisu ietu ikola.—Mal. 3:6.
4, 5. (a) O Kitumu kia bhanene Nzambi kua Mozé, kia londekesele ihi ku mundu ua Nzambi? (b) O kitumu kia Nzambi kia lungu ni jisata kia kexile mu londekesa ihi?
4 O Kitumu kia bhanene Nzambi kua Mozé, kia londekesele kuila o Jijudé exile ati a ituxi. Mu kifika, muthu uoso ua kuatele ku kimbi, ua tokalele ku di zelesa. Phala ku bhanga kiki, o muthu ua tokalele ku bhana sata ia ngombe ia kusuka. O utokua uê a tokalele ku u ta mu “menha” akexile mu lundulula ku muthu mu kizuua kia katatu, ni mu kizuua kia kasambuadi phala ku di zelesa. (Dia. 19:1-13) Ene ejidile kuila exile akua ituxi, mukonda kioso o muhatu kia vuala, ua tokalele kuijiia kuila muéne ua xidi, phala ku di zelesa ua tokalele ku bhana sata.—Iji. 12:1-8.
5 Phala ku tambula o muloloki ua ituxi, kua bhingile ku bhana sata ia iama mu ukexilu uoso ua muenhu. Ki kale se ene a kijidile mba kana, o jisata ja kexile mu bhana—ni ujitu ua kexile mu bhana mu tembulu ia Jihova—iexile ‘ilondekesu’ ia sata ia Jezú sé kituxi.—Jihe. 10:1-10.
IHI I BHANGUESA KU BHANA SATA
6, 7. (a) O akua Izalaiele a tokalele kuijiia ihi, kioso kia kexile mu sola ku bhana ujitu, ni ihi ia kexile mu londekesa? (b) Ibhuidisu iahi i tua tokala ku di bhanga?
6 O iama ioso ia kexile mu satela Jihova, ia ‘disanzele’ mu ukexilu uoso, kala kia ki xindi mu kitumu, ki i tokalele kufua mesu, ku bukuka kidiandu, ia kinema mba ia kate. (Iji. 22:20-22) Kioso o akua Izalaiele kia kexile mu bhana idima iâ kua Jihova, ene a tokalele ku bhana o “ibundu ia dianga ku ima ioso i kala mu ngongo.” (Dia. 18:12, 29) Jihova ka kexile mu xikina o sata ia kambe ku i bhana ni muxima uoso. O kitumu kiki, kia kexile ni valolo ia dikota ia lungu ni sata ia iama, phala kulondekesa kuila o sata ia Jezú ki ia kexile ni kituxi, ni kuila Jihova ueji bhana o mon’ê ua kazola phala ku bhulula o mundu.—1 Phe. 1:18, 19.
7 Se muthu ua mesena ku sakidila Jihova, mukonda dia mbote ioso Iene mu tu bhana, keji sola o kima ni kisangusangu kioso phala ku ki bhana? O muthu muene uejidile se ueji bhana sata mba kana. Maji muéne uejidile kuila Nzambi ka sanguluka ni ujitu ua kima kia kambe valolo, mukonda kiki kieji londekesa kuila o muthu u mona o ujitu iú kála kima kioso-kioso ngó, mba kima kia neme. (Tanga Malakiia 1:6-8, 13.) Kiki, kia tokala ku tu bhangesa ku xinganeka mu sidivisu ietu i tu bhanga kua Nzambi: ‘O kuila ngene mu sidivila Jihova ni vondadi ioso? O kuila nga tokala ku xinganeka mu ukexilu uami ua ku mu sidivila, ni ihi i ngi bhangesa ku mu sidivila?’
8, 9. Mukonda diahi tua tokala ku di longa o ukexilu ua akua Izalaiele ua ku bhana o jisata?
8 Se mukua Izalaiele ua bhanene sata mu vondadi iê, phala ku sakidila Jihova, mba ku satela iama phala ku kala ni ukamba ni muéne, nange ki kieji mu bhonza ku sola o kiama kia tokalele o ku ki satela. O ku satela o kiama kua Jihova kieji mu bhana kisangusangu kiavulu. Lelu o Jikidistá kene mu satela iama kála kia ki xindi mu Kitumu kia bhanene Nzambi kua Mozé, maji né kiki ene a bhana ujitu, a bhana o kithangana kiâ, o ngunzu iâ, ni jimbote jâ, phala ku sidivila Jihova. O poxolo Phaulu ua zuela ia lungu ni ‘ku fisala ni dikanu’ o kidielelu kia Kidistá, ni “kubhanga o mbote ni ku di bhindumuna,” kála jisata ji sangulukisa Nzambi. (Jihe. 13:15, 16) O ukexilu iú u bhangesa o mundu ua Jihova ku bhanga o ima ioso íii, ilondekesa o kisangusangu kiâ, ni valolo ia bhana mu ima ioso ia a bhana Nzambi. Kienhiki o ukexilu ua athu, ua ku bhanga o sidivisu ia Nzambi lelu, ua sokela ni ujitu ua kexile mu bhana m’okulu.
9 Ihi i tuamba ia lungu ni Kitumu kia bhanene Nzambi kua Mozé, kia jijidikile o ujitu ua kituxi, mba ua kikuma kia muthu? O kuila o ukexilu iú ueji bhonzesa o muthu ku bhana sata ni muxima uoso? O kuila phala ku bhana o jisata jiji, kua bhingile ku a jijidika? (Iji. 4:27, 28) Ki kua bhingile ku a jijidika, se muthu ua mesena ku kala ni ukamba uambote ni Jihova.
10. Sata” iahi ia tokala ku bhanga o Jikidistá, phala ku kala ni ukamba uambote?
10 Kiene kimoxi ué lelu, nange u mona kuila ua bhange kima kia luualesa phange. Nange o kitongoluelu kiê ki ku tangela kuila eie ua lueza. O muthu u sidivila Jihova ni muxima uoso keji bhanga ioso phala ku lungulula o ukexilu uê? Phala ku bhanga kiki, ku bhinga o muloloki ni muxima uoso, se ua te kituxi u bhinga kikuatekesu ku tufunga. (Mat. 5:23, 24; Tiia. 5:14, 15) Ku bhinga ué ku bhanga kima phala ku tambula o muloloki kua Nzambi ni ku phang’etu. Se tu bhanga o “sata” íii, tu kala dingi ni ukamba ni Jihova ni phang’etu, ki tu bhangesa ué ku kala ni kitongoluelu kia zele. Mu ku bhanga kiki, tu londekesa kuila o njila ia Jihova iene ia beta-kota.
11, 12. Ihi ia kexile mu londekesa o sata ia ku tululuka? (b) O sata ia ku tululuka iexile ni valolo iahi?
11 Saí jisata a ji xindile mu Kitumu kia bhanene Nzambi kua Mozé, a ji monene kala sata ja ku tululuka. O ujitu iú ulondekesa ku kala ni ku tululuka ni Jihova. O muthu ua kexile mu bhana o ujitu iú, ua kexile mu dia ni muiji uê, o xitu ia kiama ia satela, mu kididi kia kudila kia kexile mu tembulu. O mukunji ua kexile mu satela, ua tokalele ku tambula ué mbandu, kala kia kexile mu bhanga o akunji a sidivile mu tembulu. (Iji. 3:1; 7:31-33) O kima kia bhangesele o muthu ku bhana sata, o ku kala ni ukamba ni Nzambi. Kia difuanganene kuila muéne, ni muiji uê, ni mukunji, ni Jihova, akexile mudia kumoxi ni kisangusangu kioso ni ku tululuka.
12 Ki kieji kala ujitu ua dikota se mu kifika uixana Jihova kala mujitu ué, anga muéne u xikana kudia ni eie? Mu kidi o mukua ku zalela, se phata ueji mu lambela o kudia kua beta o ku uabha. O sata ia ku tululuka ia kidi ia Kitumu, ilondekesa kuila athu oso a tena ku kala ni ukamba ni Mubhangi, mu kaxi ka sata ia Jezú. Lelu tu tena ku kala ni ukamba ni Jihova, se tu di bhakula ni vondadi ioso mu ku mu sidivila ni jimbote jetu, ni ngunzu ietu mu sidivisu iê.
TUA TOKALA KU DILANGA MU KU BHANA SATA
13, 14. Mukonda diahi Jihova ua ditunu o sata ia Sobha Saúlu?
13 Phala Jihova ku xikina o jisata a ji xindile mu Kitumu kia bhanene Nzambi kua Mozé, a tokalele ku ji bhana ni muxima uambote. Mu Bibidia muene phangu iavulu ia lungu ni jisata ja kambele ku ji xikina kua Nzambi. Ihi ia bhangesa Nzambi ku dituna? Tua-nda di longa phangu jiiadi.
14 O polofeta Samuuele uambela Sobha Saúlu kuila o kithangana kia bhixila kia Jihova ku fundisa akua Amaleke. Saúlu ua tokalele ku jibha o jinguma jê kumoxi ni ibhaku iâ. Mu kiki, kioso Saúlu kia nganhala, ua tumina o masoladi mê ku bhulula Akake sobha ia akua Amaleke. Saúlu ua bhulula ué o ibhaku iâ, phala ku i satela Jihova. (1 Sam. 15:2, 3, 21) Kiebhi kia divu Jihova? Muéne ua ditunu Saúlu mukonda dia ku bhukumuka kuê. (Tanga 1 Samuuele 15:22, 23.) O phangu íii i tu longa ihi? I tu longa kuila phala Nzambi ku xikina sata, ku bhinga ku belesela o itumu iê.
15. Ukexilu uahi ua iibha ua kexile nau o akua Izalaiele mu izuua ia Izaia, ni ihi ia londekesa?
15 Mu divulu dia Izaia tu sanga-mu ué phangu ia mukuá. Mu izuua ia Izaia, akua Izalaiele a tokalele ku bhana sata kua Jihova. Maji o ukexilu uâ ua iibha, uene ua bhangesa Nzambi ku dituna o jisata jâ. Muéne uambe: “‘Eme ngi Jihova, o ilunga ienu ia jisata, i ngi bhandulula’hi?’ Ngedi ni ibhaku ienu ia jimbudi ja kuoha, ni ia matheka ma ibhaku ia jisevadu, ia ngi kumu. . . . Kana dingi kuiza mu ku titidila mu malumbu mami.” Mukonda diahi? Nzambi ua ambela: “Kioso ki mu vudisa o misambu ienu eme ki ngi ivu, mukonda o maku’enu ezala manhinga. Disukudienu, mu dizelese, phulu ioso ia ibhangelu ienu katulenu-iu, i tunde ku mesu mami, ehenu o kubhanga kiaiibha.”—Iza. 1:11-16.
16. Ihi i bhangesa o sata ku i xikina kua Nzambi?
16 Jihova ka sangulukile ni jisata ja ati a ituxi ka mesenene ku diela. Nzambi ua xikinine ngó o misambu, ni ujitu ua athu akexile mu di suínisa ku belesela o itumu iê. O kitumu kia tange o athu enhá akexile akua ituxi, ene a bhingile muloloki. (Nga. 3:19) Kua bhingile o kuijiia kuku, phala ku diela o ituxi. Kiene kimoxi ué lelu, tua tokala kuijiia kuila o sata ia Kristu i tena ku loloka o ituxi. Se tu tendela kiambote o maka enhá, ni ku a bhana valolo, Jihova ua-nda “uabhela kiambote” o ujitu u tu mu bhana, ni sidivisu ietu.—Tanga Jisálamu 51:17, 19.
XIKINA MU SATA IA JEZU!
17-19. (a) Kiebhi ki tu tena kulondekesa o kisakidilu kietu kua Jihova, mu kukula kua Jezú? (b) O milongi ia-nda kaiela ia-nda tu longa ihi?
17 O ujitu uetu ki ua difu ni ua Jikidistá ja dianga, mukonda etu ki tua mu mona ngó o “ilembeketa” ia ikanenu ia Nzambi. (Jihe. 10:1) O itumu ia lungu ni jisata, ia suínisa o Jijudé ku kala ni ukexilu uambote phala ku kala ni ukamba ni Nzambi—ku mu sakidila, ni ku kala ni vondadi ia ku mu bhana o ujitu ua beta-kota, ni kuijiia kuila a bhindamene o kukula. O Kikutu Kiobhe, ki tu kuatekesa kuijiia kuila bhu kaxi ka kukula, Jihova ua-nda bhuisa o ituxi ioso, lelu muéne u tu ehela ku kala ni kitongoluelu kia zele bhu pholo iê. O sata ia Jezú ujitu ua dikota!—Nga. 3:13; Jihe. 9:9, 14.
18 Mu kidi, ki tu tokala ngó kuijiia o kukula, tua tokala ué ku bhanga kima phala ku tambula o mabesá. O poxolo Phaulu ua soneka: “Uila kiki, o Kitumu kifua kia bhiluka kiledi kietu ki tu tambula konda katé bhuoso bhu ijila Kristu, mbé Nzambi a tene ku tu xikina mu kuxikana.” (Nga. 3:24) O kixikanu kia tokala ku di kalela ni ima ia ku bhanga. (Tiia. 2:26) Kienhiki Phaulu ua suínisa o Jikidistá ja dianga, akexile ni kuijiia kuoso ni kidi, kia di longo mu Kitumu kia bhanene Nzambi kua Mozé. Mu ku bhanga kiki, ene eji tena ku belesela o itumu ia Nzambi iejidile kiá.—Tanga Loma 2:21-23.
19 Sumbala ki ku bhingi kuila o Jikidistá lelu a belesela o Kitumu kia bhanene Nzambi kua Mozé, maji né kiki ene a tokala ku bhana jisata ji sangulukisa Jihova. O milongi ia-nda kaiela ia-nda londekesa se kiebhi ki tu tena ku bhanga kiki.
SOTA O ITAMBUIJILU IA IBHUIDISU ÍII:
․․․․․
O jisata ja xindi mu Kitumu kia bhanene Nzambi kua Mozé ja londekesele ihi?
․․․․․
Mu ukexilu uahi o jisata ja Jikidistá ja lelu ja difu ni ja kexile mu bhana o akua Izalaiele?
․․․․․
Ihi i bhangesa o sata ku i xikina kua Jihova?
[Ibhuidisu ia ku dilonga]
[Kilombuelelu ku mbandu 19]
O itumu ia Jihova ia bhana ku jiselevende jê kene ku i lungulula
[Foto ku mbandu 20]
Mbundi iebhi i ueji bhana kua Jihova?
[Foto ku mbandu 21]
Oso a bhana jisata ji sangulukisa Jihova a kala ni ukamba ni muéne
