Ioso mu i Bhanga ni Muxima Uoso Phala Jihova
Ioso mu i Bhanga ni Muxima Uoso Phala Jihova
“Ioso-ioso i mu bhanga, mu kalakala ni muxima uoso [phala Jihova].”—KOL. 3:23.
1-3. (a) O ufuilu ua Jezú ku taka kilombolola kuila Jihova ka kingila dingi sata ko kuetu? Jimbulula. (b) Kibhuidisu kiahi kiene mu bhanga ia lungu ni jisata lelu?
KU HAMA ia dianga K.K., Jihova ua tangela o mundu uê kuila o sata ia kukula kua Kristu ia zubhile o Kitumu kiê kia bhanene kua Mozé. (Kol. 2: 13, 14) O jisata joso ja bhangele o Jijudé mu mivu iavulu, ki jeji kala dingi ni valolo. O Kitumu kia kumbidile kiá o kikalakalu kiê, mukonda o kitumu kia kexile kála “kiledi kietu ki tu tambula konda katé bhuoso bhu ijila Kristu.”—Nga. 3:24.
2 Maji kiki ki kilombolola kuila o Jikidistá ka tokala ku bhana dingi jisata. O poxolo Phetele ua londekesa o valolo ia ku bhana “o jisata ja nzumbi ji uabhela Nzambi, mukonda dia Jezú Kristu.” (1 Phe. 2:5) O poxolo Phaulu ua londekesele kiambote kuila o ukexilu uoso—ua muenhu ua Kidistá ua di bhakula—a tokala ku ixana “sata.”—Lom. 12:1.
3 Kienhiki o Kidistá u tena ku bhana sata kua Jihova, ki kale mu ku mu bhana ima, mba ku xisa ima mukonda dia muéne. Kála ki tuejiia kiá, ia lungu ni itumu ia bhanene ku akua Izalaiele, kiebhi ki tu tena kuijiia se o jisata jetu, a ji xikana kua Jihova?
MU UKEXILU UOSO UA MUENHU
4. Ihi i tua tokala ku lembalala kioso ki tu bhanga o ima ia kizuua ni kizuua ku muenhu uetu?
4 Mukonda dia ikalakalu ietu ia kizuua ni kizuua, nange ki bhinga ku sokejeka o ikalakalu ietu phala ku bhana sata kua Jihova. O ima íii, ia lungu ni ikalakalu ia dibhata, ni ia salu, ni kuia mu itanda, nange i tu bhangesa ku kamba kithangana phala o sidivisu ia nzumbi. Maji se ua di bhakula kua Jihova, mba ua kingila o palaízu ku hádia, ua tokala ku xinganeka kiambote kiebhi ki u dibhana ni ima íii ia mundu. Etu tu Jikidistá kizuua kia muvimba. Tua tokala ku belesela o itumu ia Bibidia mu ukexilu uoso ua muenhu uetu. Kienhiki Phaulu u tu tendelesa: “Ioso-ioso i mu bhanga, mu kalakala ni muxima uoso, kuma [Jihova] mua mu kalakela, ki athu.”—Tanga Kolose 3:18-24.
5, 6. Ihi i tua tokala kuijiia ia lungu ni ukexilu uetu, mba o uzuatelu uetu, mu kizuua ni kizuua?
5 O ima ioso iene mu bhanga o Jikidistá kizuua ni kizuua, sata phala Jihova. Mukonda dia kiki Phaulu u tu suínisa ku ‘kalakala ni muxima uoso phala Jihova,’ i tu bhangesa ku xinganeka o ukexilu ua muenhu uetu. Kienhiki, kiebhi ki tua tokala ku belesela o kitumu kiki ku muenhu uetu? O kuila tuene mu bhanga ima iambote, mba ku zuata kiambote mu ithangana ioso? O kuila kioso ki tuia mu itonokenu tu kala ni jisonhi ja ku dilondekesa kuila tu Jimbangi ja Jihova, mukonda dia ukexilu uetu, mba dia uzuatelu uetu? Kiki, ki ki tokala ku bhita! O jiselevende ja Jihova ka mesena ku bhanga kima ki xidisa o dijina dia Nzambi.—Iza. 43:10; 2 Kol. 6:3, 4, 9.
6 Tua-nda mona kiebhi o ku ‘kalakala ni muxima uoso phala Jihova,’ ku bhinga ku ki bhanga mu ukexilu uoso ua muenhu uetu. Mu ku bhanga kiki, ejiia kuila o jisata joso ja kexile mu bhana akua Izalaiele kua Jihova, ja tokalele ku beta-kota.—Mak. 23:19.
KIEBHI O MAKA ENHÁ KIA TOKALA UÉ KU MUENHU UÊ
7. Ihi ia bhingi kua ió a di bhakula kua Nzambi?
7 Kioso ki ua di bhakula kua Jihova ua bhange kiki ni muxima uê uoso, ki kidi? Eie ua kanena kuila mu ukexilu uoso ku muenhu uê, Jihova muéne ueji kala ku pholo. (Tanga Jihebeleu 10:7.) Ua solo kiambote. Uene mu mona ué kuila, kioso ki u batula maka kala ki tumina Jihova, u di tunda kiambote. (Iza. 48:17, 18) O mundu ua Nzambi ua zele, ua sanguluka, mukonda ala ni ídifua ia Nzambi uene mu ku a longa.—Iji. 11:44; 1 Tim. 1:11.
8. Mukonda diahi kima kiambote kuijiia kuila Jihova m’ukulu ua monene o jisata kala ima ikôla?
8 O jisata ja kexile mu bhana akua Izalaiele kua Jihova jexile jikôla. (Iji. 6:25; 7:1) O kizuelu “i kôla kinéne,” mu Hebalaiku, kilombolola kima kia zele, kia tokala ngó ku muthu umoxi, mba phala Nzambi. Phala Jihova ku xikina o jisata jetu, tua tokala tu di tungula, mba ki tu tokala ku bhanga o ima ia mundu. Ki tu tokala ku zola o ima ia zembe Nzambi. (Tanga 1 Nzuá 2:15-17.) Kiki kilombolola kuila, ki tu tokala ku dilunga ni ima, mba athu a tu bhangesa ku di xidisa, bhu pholo ia Nzambi. (Iza. 2:4; Dij. 18:4) Kilombolola ué ku fidisa o mesu metu ku tala o ufusa, mba o ima ia xidi, ni ku i xinganeka.—Kol. 3:5, 6.
9. Mukonda diahi o ku bhanga mbote ku akuetu kiala ni valolo?
9 Mukonda dia ukexilu uâ, o Jikidistá a tena ku bhana jisata ku muenhu uâ. Kiebhi kia tena ku bhanga kiki? Phaulu ua suínisa o jiphange: “O kubhanga o mbote ni ku di bhindumuna mudienu ki ku mi jimbe, mukonda ilumbu kala íii Nzambi ia mu uabhela kiavulu.” (Jihe. 13:16) O ku bhanga o mbote ku akuetu, sata i xikana Jihova. O ukexilu iú kidimbu kia Jikidistá ja kidi.—Nzu. 13:34, 35; Kol. 1:10.
JISATA MU UBHEZELU
10, 11. Kiebhi kiene mu mona Jihova o sidivisu ietu ia kuboka, o ubhezelu uetu, ni ihi i tua tokala ku xinganeka?
10 O kima kiambote ki tena ku bhana o Jikidistá ku akuá, o ‘ku fisala ni dikanu o kixikanu kietu.’ O kuila uene mu bhanga kiki kioso ki ku moneka kithangana? Phaulu uambe kuila o ku bhanga kiki, “sata i tua bhakula—ujitu ua tundu ku mizumbu i fisala o dijina [dia Nzambi].” (Jihe. 10:23; 13:15; Hoz. 14:2) Tua tokala kuijiia o kithangana ki tu bhanga mu ku boka o Utuminu, ni kiebhi ki tuene mu bhanga kiki, o Kiônge kietu kia Sidivisu, kiene mu tu kuatekesa kiavulu ku maka enhá. Tua tokala ué kuijiia kuila o sidivisu ietu i tu bhanga mu kuboka, ‘ku fisala ni dikanu o kixikanu kietu.’ I bhanga mbandu ku ubhezelu uetu, o sata íii ia tokala i beta-kota, phala ku i bhana kua Nzambi. Sumbala ki tuene mu kala kiambote izuua ioso, maji o kithangana ki tu bhanga mu kuboka, kilondekesa o kisakidilu kietu mu ima ia nzumbi.
11 Izuua ioso o Jikidistá ene mu bhana o kithangana kiá mu ku bheza, ki kale mudiâ, mba kumoxi ni jiphange jâ. Mukonda kiene kia bhingi Jihova. Tuejiia kuila ki ku bhingi dingi ku belesela o kitumu kia ku nhoha mu Sábhalu, mba kuenda njila ia lebha phala kuia mu jifesa ku Jeluzaleme. O jikidistá mu ukulu akexile mu bhanga kiki, mukonda kiene kia a bhingile Jihova. Lelu Nzambi ua jijila hanji kuila tu eha o ukexilu ua mundu, phala ku di longa o Bibidia, ni kuia mu iônge. O mutuameni ua muiji ua tokala ku longa o Bibidia ku muiji uê. (1 Tes. 5:17; Jihe. 10:24, 25) Tua tokala ku di ebhuidisa ia lungu ni ubhezelu uetu, ‘ngi tena ku bhanga dingi mu ubhezelu uami?’
12. (a) O uasu ua dizumba ua kexile mu bhana m’ukulu lelu ua sokela ni ihi? (b) Kiebhi, o kifika kiki ki tu kuatekesa mu misambu ietu?
12 O Sobha Davidi uimbila Jihova, uixi: “Musambu uami u bande ko kué, kala uasu ua dizumba.” (Jisá. 141:2) Xinganeka bhofele mu misambu i uene mu bhanga—se uene mu samba izuua ioso, se uene mu i bhanga kiambote. O divulu dia Dijingunuinu dizuela kuila, o “misambu ia akua-Ngana,” ia sokela ni uasu ua dizumba, misambu i xikina Jihova, kála dizumba diambote. (Dij. 5:8) Mu Izalaiele, o uasu ua dizumba ua kexile mu bhana ku kalatódio ka Jihova, a tokalele ku i bhanga kiambote. Jihova ueji i xikana ngó se ene a belesele o itumu ia bhanene. (Mak. 30:34-37; Iji. 10:1, 2) Se tuene mu bhanga o misambu ietu ni ujitu uoso, tu dielela kuila Jihova uene mu i xikana.
KU BHANA NI KU TAMBULA
13, 14. (a) Ihi ia bhange Epafrodito, ni jiphange a tokalele mu kilunga kia Filipe, ni kiebhi kia divu Phaulu? (b) Kiebhi ki tu tena ku kaiela o phangu ia Epafrodito, ni jiphange mu kilunga kia Filipe?
13 O kitadi ki tu bhana phala ku kuatekesa o sidivisu ia kuboka ku mundu uoso, a tena ku ki sokesa ni jisata, ki kale kiavulu, mba kia tolo. (Mar. 12:41-44) Ku hama ia dianga K.K. o kilunga mu Filipe kia tumikisa Epafrodito mu Loma, phala ku kuatekesa Phaulu. Muéne ua mu kuatekesa ni kitadi kia kexile mu bhana o jiphange mu kilunga. O kilunga kia Filipe, ki kia kuatekesa ngó Phaulu mu veji íii. Mukonda ene ka mesenene kuila Phaulu, u thandanganha ni ku sota kitadi, mukonda kieji mu fidisa ku bhanga kiambote o sidivisu iê ia ukunji. Kiebhi kia divu Phaulu ni ujitu iú? Muéne uambe kuila, “dizumba di nuha kiambote, sata i tambula Nzambi.” (Tanga Filipe 4:15-19.) Phaulu ua zolele o ujitu ua Jiphange jê, Jihova ué kia mu uabhele.
14 Lelu Jihova ua uabhela kiavulu o ujitu uetu, ua ku sangela kitadi phala ku kuatekesa o kikalakalu kia kuboka ku mundu uoso. Muéne u tu kanena ué kuila, se tu kolokota ku ta o Utuminu uê ku pholo, muéne ua-nda dikila o ibhindamu ietu ioso, ni mu nzumbi.—Mat. 6:33; Luk. 6:38.
LONDEKESA O KISAKIDILU KIÊ
15. Ima iahi i ku bhangesa ku sakidila Jihova?
15 Kuene maukexilu avulu a kulondekesa o kisakidilu kietu kua Jihova. Ku xikana kuila tua tokala ku sakidila Jihova izuua ioso mu ku tu bhana o muenhu? Muéne ua tu bhana ioso i tua bhindamena phala ku kala ku muenhu—kudia, izuatu kididi kia ku zeka, ni muha. O kixikanu kietu kijila mu kuijiia o kidi, ki tu bhana kidielelu. Kima kiambote ku bheza Jihova ni ku mu bhana jisata ji mu uabhela mukonda dia ima ioso iene mu tu bhangela.—Tanga Dijingunuinu 4:11.
16. Kiebhi ki tua tokala ku sakidila o Sata ia kukula kua Kristu?
16 Kála ki tua di longo mu milongi ia dianga, o ujitu ua beta-kota ua tu bhana Nzambi, o sata ia kukula kua Kristu. Kiki kilondekesu kia henda ia Nzambi ko kuetu. (1 Nzu. 4:10) Mukonda diahi tua tokala ku sakidila? Phaulu uambe: “Kuma tuezala ni henda ia Kristu ia tu kuatela, mukonda tua k’ijiia kuila muthu umoxi ua fuidile ene oso, . . . o muène ua fuidile ene oso bhu kididi, phala oso kiki ala ku muenhu, ki ki kale ene dingi a di vu, maji ua a vu muène ua a fuidile bhu kididi, iú ua fukunuka.” (2 Kol. 5:14, 15) Mu kidi Phaulu ua kexile mu londekesa kuila, se tu bhana valolo ku henda ia Nzambi, tua-nda mu sidivila ngó Muéne, ni Mon’ê. O henda ietu kua Nzambi, ni kua mon’ê Kristu, tu ilondekesa mu ku mu belesela, ni mu vondadi ietu ia ku boka ni ku bhanga maxibulu.—1 Tim. 2:3, 4; 1 Nzu. 5:3.
17, 18. Kiebhi o jiphange kiene mu londekesa o kisakidilu kiá kua Jihova? Bhana phangu.
17 O kuila ki ku bhonza ku bhana sata iambote kua Nzambi? Kioso kia xinganeka mu ima ioso iambote iene mu ku a bhangela Jihova, ene a bhanga ioso-ioso, phala ku kala ni kithangana, phala ku bandekesa o sidivisu mu kuboka, ni sidivisu ia mukuá mu kilunga. Saí iá a sola mbeji ku muvu phala ku kala muboki ua ithangana ni ithangana, a mukuá ene mu kala aboki a thembu ioso. A mukuá ene mu tunga o Ididi ia Ubhezelu. Ki ukexilu uambote ua kulondekesa o kisakidilu kietu? Se tu bhanga o ima ni muxima uambote—kilondekesa kuila tua sakidila—o ima i tu bhanga mu sidivisu ikola, a-nda i xikana kua Nzambi.
18 O Jikidistá ejiia kuila a tokala ku sakidila Nzambi, kiki kiene mu ku a suínisa ku samba. Umoxi, Morena. Muéne ua kexile mu sota itambuijilu mu milongi ia Katolika, mu ngeleja mua kudila, ni mu milongi ia Ásia. Maji ka sange itambuijilu. Ua i sange ngó kioso kia mateka ku di longa o Bibidia ni Jimbangi ja Jihova, ua zubha o dinhota diê mu nzumbi. Morena ua sangulukile kiavulu mukonda dia ku sanga o itambuijilu ia ibhuidisu iê mu Mikanda Ikola, muéne ua mesenene ku sakidila Jihova ni ku bhakula o muenhu uê mu ku mu sidivila. Kioso kia mu batizala muéne ua kalakala kala muboki ua ithangana ni ithangana, mukonda ua tena ku bhanga dingi, ua suu o mbambe ia ku kala muboki ua thembu ioso. Morena uala kiá muboki ua thembu ioso 30 a mivu.
19. Kiebhi ki u tena ku bandekesa o jisata jê kua Jihova?
19 Mu kidi saí jiselevende ja Jihova, ka tena ku kala aboki a thembu ioso, mukonda dia indanganda iavulu. Maji kama koso-koso, ku tu tena o ku bhanga mu sidivisu ia Jihova, ka tena ku kala sata ia uabhela muéne. O ukexilu uetu ua tokala kulondekesa o itumu i tuene mu di longa, mu kuijiia kuila tu Jimbangi ja Jihova kizuua kia muvimba. Mu kixikanu kietu, tua tokala ku dielela mu ikanenu ia Nzambi. O ima iambote i tu bhanga, i tena ku bhangesa kuila tu boka o njimbu iambote. O muxima uetu uezala ni kisakidilu mu ima iene mu tu bhangela Jihova, tua tokala ku kolokota ku bhanga jisata ni muxima uoso phala Jihova.
O KUILA U TENA KU TAMBUIJILA:
․․․․․
Kiebhi ki tu tena ku ximana Jihova mu ibhangelu ietu izuua ioso?
․․․․․
Jisata jahi ji tu bhanga mu ubhezelu uetu kua Nzambi?
․․․․․
Kiebhi ki tu tena ku bhana o ima ietu kua Jihova?
[Ibhuidisu ia ku dilonga]
[Kilombuelelu ku mbandu 27]
O kuila o henda ia Jihova i ku suínisa ku bandekesa o jisata jê?
[Foto ku mbandu 25]
O kuila uene mu bhana umbangi kioso ki ku moneka kithangana?
