Ku Dibhana ni Mavuua

Mu kuijiia kuila o mavuua ene mu dimendala dingi kiavulu, ihi ia tokala o ku bhanga o muthu phala ku dibhana ni maka enhá? Tua-nda di longa se ihi ia tokala o ku bhanga.

Lenga o kiluezu. O Bibidia izuela: “Njimu kiluezu u ki mona mu kanga, anga u suam’é kiá; ilalu-phe a lundujuka ngó, katé ki a bonga divuua.” (Jisabhu 22:⁠3) Kiki kitendelesu kiambote, kiene kimoxi ué mu kithangana kia mavuua. Se a bhana kitendelesu kia lungu ni kima kia-nda bhita, kála kalemba, kitembu kia dikota, mba mavuua, kima kiambote se o athu ala mu ididi íii a tunda, aia bhu kididi kia kondama. O muenhu ua beta-kota, o jimbongo, mba jinzo, ndenge.

Saí iá ka tena ku sola o kididi phala ku tunga-mu, a tunga mu ididi ia iluezu. Saí nguvulu uambe: “O kiluezu kia mavuua kiavulu dingi. Saí ididi mu jixi mua beta ku kala ni iluezu, ni kuila ku hádia mu ididi ienii, o iluezu ia-nda vula dingi.” Nange ki kala kidi, mu kifika, kala kiene mu bhita mu ji honga, ni mu ididi ia lungila bhu mbandu a kalunga. Se eie u belesela o kitendelesu kia ku tunda mu ididi ia iluezu, ni kuia mu tunga mu kididi kia kondama, o divuua nange ki dia-nda ku tula.

Ijiia i ua tokala o ku bhanga. Sumbala u dilanga, nange o divuua di tena ku ku tula se ku di kingila. O ku dibhana ni maka enhá nange ki ki bhonzo se uijiia kiá ihi i ua tokala o ku bhanga. O kitendelesu kiki kia lungu ué ni kitendelesu ki tu sanga mu divulu dia Jisabhu 22:​3, ki tua tange kiá. O kuila ua bhake kiá o ima ia tokala, eie uala polondo phala ku lenga? O divulu 1-2-3 of Disaster Education, di tendelesa ku bhaka o ima kála: Milongo, menha mu ji ngalafa, makudia ni madukumendu. Kieji beta-kota ué kuzuela ni muiji uê o ukexilu ua mavuua ene mu moneka, ni ihi ia tokala o ku bhanga mu ithangana íii.

Kala ni ukamba ni Nzambi. Kiki ki tena ku ku kuatekesa mu ithangana ioso. O Bibidia izuela kuila Nzambi, “Tata ia jihenda, Nzambi ió athu oso kuene mú tambula o dikuatekesu! Muène mukua ku tu kuatekesa mu hadi ietu ioso.” O velusu ia mukuá iamba kuma Nzambi, “mukua kutululukisa oso a bhondalala.”​—⁠2 Kolindo 1:​3, 4; 7:⁠6.

Nzambi uejiia o hadi i bhita ni ió uala ni kixikanu kua muéne. Muéne Nzambi ia henda, u bhana kikuatekesu mu ukexilu uoso. (1 Nzuá 4:⁠8) O musambu ki madiuanu kana, maji o nzumbi ikôla ia Nzambi, i tena ku kuatekesa o muthu mu ithangana ioso. O nzumbi ikôla i tena ku lembalesa ibatulu ia Bibidia i tena ku tu suínisa, ni misoso ia ió a bhiti kiá mu maka avulu. Mu kiki, o jiselevende ja Nzambi ja fiiele, a tena ku divua kála kia divu Davidi, uexile sobha mu Izalaiele, uambe: “Né-mbe ngi bhita mu dikôla dia kitômbe kia kalunga, ki ngi kala ni uoma ua kima kiaiibha, mukonda eie uala ngi bheka; ni mbangala ié ni dikoue dié, ene a ngi bhuisa hele.”​—⁠Jisálamu 23:⁠4.

O Jikidistá a di kuatekesa mudiâ. Ku hama ia dianga, o Kidistá a muixana Akabu, ua zuelele kuila, kueji “ku kala nzala ia dikota mu ngongo ioso. O nzal’iii ia bhiti mu izuua ia kexi mu tumina Kaláudio.” O nzala ia tudile ku jixibulu javulu ja Jezú mu Judeia. Ihi ia bhange o jixibulu ja kexile mu ixi ia dikanga kioso kiévu o maka akexile mu bhita ni jiphange jâ? O musoso uambe: “Kieniokio jixibulu joso, kala muthu kioso kia soko na-kiu, a sola kusanga ngasu ia kutuma kubindumuna jiphange ja tungu mu Judeia.” (Ikalakalu 11:​28, 29) Ene mu henda iá, a kuatekesa o jiphange jâ.

Mu izuua ietu, kioso ki ku bhita mavuua, o jiselevende ja Nzambi kiene uâ kia bhanga. O Jimbangi ja Jihova, a ejiia kiambote mu ku kuatekesa o jiphange jâ. Mu kifika, kioso kia bhiti o kitungutu kia ixi, kia tula ku ixi ia Chile mu kizuua kia 27 ku mbeji ia Kauana, ku muvu ua 2010, o Jimbangi ja Jihova sé ku laleka a kuatekesa ió akexile mu ibhidi íii. Karla a mu budile o dibhata diê ku kalema, uambe: “Kia ngi suínisa kiavulu o ku mona kuila mu kizuua kia mukuá, o jiphange a tundu mu ididi iavulu ejile mu tu kuatekesa. Sé phata, Jihova ua tu suínisa mu ku tumikisa o jiphange jiji phala ku tu kuatekesa mu vondadi iâ. Nga divu kuila a ngi zola, a ngi lange kiambote.” O kuku’ê ki Mbangi ia Jihova, ua mono o kikuatekesu kia mu bhana o jiphange. O kuku’ê uambe: “Kiki ki ki difu ni ngene mu mona mu ngeleja iami mu mivu iavulu.” O ima ia mono ia mu bhangesa ku bhinga o Jimbangi ja Jihova ku mu longa o Bibidia.

O ku kala ni ukamba ni ió a zola Nzambi, ki tena ku kuatekesa kiavulu o muthu mu ithangana ia ibhidi. Kienhiki, o kuila o mavuua saí kizuua a-nda bhua? Tua-nda di longa ihi i longa o Bibidia ia lungu ni maka enhá.

 [Foto ku mbandu 7]

O kuila ua bhake kiá o ima ia tokala, eie uala polondo phala ku lenga?

[Foto ku mbandu 7]

O Musambu ki madiuanu kana, maji o nzumbi ikôla ia Nzambi, i tena ku kuatekesa o muthu ithangana ioso

[Foto ku mbandu 7]

O Jikidistá a di kuatekesa mudiâ kioso kia dibhana ni mavuua

[Foto ku mbandu 7]

“Nga divu kuila a ngi zolo, a ngi lange kiambote”