Nanhi Uexile Mbalahamu?
Nanhi Uexile Mbalahamu?
LELU ki mala avulu mu jingeleja ene mu atumbula ku mundu oso. O Jijudé, ni akua Muxulumanu, ni Jikidistá, ene mu tumbula kiavulu Mbalahamu * kála “dizonda mu Mikanda Ikola,” ni kuila “phangu ia dikota ia kixikanu.” O Bibidia i tumbula Mbalahamu kála “tata ia oso a xikana Nzambi.”—Loma 4:11.
Mukonda diahi Mbalahamu a mu tumbula kiavulu? Mukonda, Mbalahamu muéne ngó a mu tumbula mu Bibidia kuila kamba dia Nzambi—mu veji jitatu!—2 Malunda 20:7; Izaia 41:8; Tiiaku 2:23.
Maji Mbalahamu uexile muthu kála etu. Muéne ua di bhanene ué ni ibhidi i tuene mu dibhana na-iu lelu—maji ua di tundu kiambote mu ku dibhana na-iu. Ua mesena kuijiia se kiebhi muéne kia bhange kiki? Ejiia se ihi i longa o Bibidia ia lungu ni Mbalahamu.
Ihi ia di Longo
Mbalahamu a mu vuala ku muvu ua 2018 A.K.K., ua kudila mu ixi ia Uli. (Dimatekenu 11:27-31) Uli iexile ixi ia dikota, iexile ixi ia umvuama. O athu exile uâ abhezi a iteka. Tela, tata ia Mbalahamu, uexile ué mubhezi ua iteka. (Josuué 24:2) Maji né kiki, Mbalahamu ua solo ku bheza ngó Jihova, * mu veji dia ku bheza o jinzambi ja kambele o muenhu.
Mukonda diahi Mbalahamu ua solo ku sidivila Jihova? Kioso Mbalahamu kia mu vuala, kua bhitile kiá 150 a mivu ande dia ufuilu ua mon’â Noué, Seme. O kuila o ku kala ni ukamba ni diiala didi, kia mu kuatekesa ku muenhu uê? Mbalahamu ua di longo kiavulu ku phangu ia Seme ia lungu ni ku bhuluka ku Dilúvio. A mu longo ué o valolo ia ku bheza Jihova, o Nzambi ia bhulula Seme ni muiji uê ku Dilúvio.
Ki kale se Seme ua mu longo, mba muthu uéngi, Mbalahamu ua xikina o milongi ia lungu ni Nzambi ia kidi. Kioso Jihova o mukuá “kutungula o mixima ia athu” kia mono Mbalahamu, kuila diiala diambote—ua mu kuatekesa dingi ku kala muthu uambote.— Jisabhu 17:3; 2 Malunda 16:9.
O ukexilu ua Muenhu uê
Mbalahamu ua kexile ni muenhu uambote, sumbala ua kexile ué ni ibhidi, maji ua sangulukile kiavulu ku muenhu. Ejiia o ibhidi ia bhiti ku muenhu uê.
▪ Kioso Mbalahamu kia kexile mu ixi ia Uli, Nzambi ua mu tumina kuia mu ixi ieji mu londekesa. Sumbala Mbalahamu ni Sala kejidile se kuebhi kueji kuia—ni mukonda diahi Nzambi ua mu bhingi ku xisa o ixi iâ—maji né kiki, ene a belesela. Mbalahamu ni Sala, a tungu mu jibalaka kala asonhi mu ixi ia Kanana.—Ikalakalu 7:2, 3; Jihebeleu 11:8, 9, 13.
▪ Sumbala Mbalahamu ni Sala ka kexile ni ana, Jihova ua kanena kuila ueji sokolola Mbalahamu, ni ku kala muiji ua dikota. Jihova uambe ué kuila ueji besoala o miji ioso mu ngongo bhu kaxi ka Mbalahamu. (Dimatekenu 11:30; 12:1-3) Mu ku bhita kithangana Jihova ua kumbidila o kikanenu kiki. Jihova uambela Mbalahamu kuila o mbutu iê ieji sokolola kiavulu kala o jithéthembua ku diulu.—Dimatekenu 15:5, 6.
▪ Kioso Mbalahamu kia kexile ni 99 a mivu, Sala nange ni 90, Jihova ua kanene kuila ene eji kala ni mona. Mu ibanzelu ia athu, kiki kieji bhonza kiavulu, maji Mbalahamu ni Sala, ka monene kuila kiki “kima ki mu bhonza [Jihova] ku ki bhanga.” (Dimatekenu 18:14) Mu ku bhita muvu umoxi, kioso kia kexile kiá ni 100 a mivu, Mbalahamu ua kituka tata, o mona ua mu luku o dijina dia Izake. (Dimatekenu 17:21; 21:1-5) Nzambi ua kanena kuila ueji besoala o ngongo bhu kaxi ka Izake.
▪ Mu ku bhita mivu, Jihova ua bhingi kima kua Mbalahamu: Muéne ua bhingi Mbalahamu ku satela o mon’ê ua kazola, Izake, sumbala uexile hanji munzangala ka kazalele luua, ka kexile ué ni tuana. * Sumbala ua luualele, Mbalahamu ua kexile polondo phala ku bhanga ia mu bhingile Jihova, o ku satela Izake. Mbalahamu ua dielele kuila Nzambi ua kexile ni kutena kua ku fukununa Izake, se ua mesenene phala ku kumbidila o kikanenu Kiê. (Jihebeleu 11:19) Kioso Mbalahamu kia kexile kiá polondo phala ku satela mon’ê, Nzambi ua bhulula Izake, mu ku fidisa Mbalahamu. Muéne ua ximana Mbalahamu mu ku mu belesela. Jihova ua tumbula o kikanenu kia bhangele kiá kua Mbalahamu.—Dimatekenu 22:1-18.
▪ Mu ku bhita 175, a mivu Mbalahamu uafú. O Bibidia izuela kuila, muéne anga “ufua kiá ku uadiakimi uavulu, ua kuka kiá, ua kukidile muene mivu ia mu kumu.” (Dimatekenu 25:7, 8) Mu kiki, Mbalahamu ua mono o ki kumbidilu kia kikanenu kia mukuá kia mu bhangele Nzambi—ua ku kola muenhu, ni kuia ni ku tululuka ku’alunga.— Dimatekenu 15:15.
O Phangu iê
Mbalahamu ki muthu ngó a mu tumbula kiavulu mu jingeleja, mba musoso ua bhiti m’ukulu. Lelu, o musoso uê u tu xisa phangu iambote phala ku i kaiela. (Jihebeleu 11:8-10, 17-19) Tua-nda di longa ídifua iuana ia londekesa Mbalahamu. Tua-nda dianga ku di longa o kídifua kiê kia dianga—o kixikanu.
[Tanga mu luji]
^ kax. 2 Ku dimatekenu Mbalahamu, a mu ijidile mu dijina dia Mbalamu, o muhatu’ê a mu ijidile mu dijina dia Salai. Mu ku bhita thembu, Nzambi ua lungulula o dijina diê Mbalamu, mu dijina Mbalahamu, dilombolola “tata dia ndumba ia ifuxi,” iu ua lungulula ué o dijina dia Salai mu dijina dia Sala, dilombolola “mvuale.” (Dimatekenu 17:5, 15) Phala ku tendela kiambote o maka enhá, mu jimbandu ja milongi íii, tua-nda ku a tumbula mu majina a Mbalahamu, ni Sala.
^ kax. 6 O Bibidia i longa kuila o dijina dia Nzambi, Jihova.
^ kax. 14 Tanga o “Atangi a Madivulu Metu Ebhula,” ku dífue dia 23 mu kadivulu kaka, mu phutu.
[Kidikisu ku mbandu 4]
O Muthu a mu Tumbula Kiavulu mu Bibidia
O dikuinhi dia ibatulu dia divulu dia Dimatekenu, di tanga misoso ia jiselevende ja Nzambi, kala Abele, Enoko, ni Noué. Mu ibatulu ia 15 ia kaiela, i tanga musoso ua muenhu ua muthu umoxi—Mbalahamu.
O Bibidia ia dianga ku tanga maka alungu ni Mbalahamu. Mu kifika, mu musoso ua muenhu ua Mbalahamu muene mu tu dianga ku sanga . . .
▪ o kizuelu kia dianga kia kuila Nzambi, Ngubu, mba Mulangidi ua jiselevende jê.—Dimatekenu 15:1; tanga ué, Matendelelu 33:29; Jisálamu 115:9; Jisabhu 30:5.
▪ o kizuelu kia dianga kia ku kala ni kixikanu kua Nzambi.—Dimatekenu 15:6.
▪ o kizuelu kia dianga kia, polofeta.—Dimatekenu 20:7.
▪ o kizuelu kia dianga kia henda ia tata.—Dimatekenu 22:2.
