Alumajedone Ihi i Zuela o Athu?

‘Jinzumbi ja iibha anga ji bhongolola o jisobha bhu kididi a k’ixana mu mbimbi ia Hebeleu exi Alumajedone.’—DIJINGUNUINU 16:16.

IHI i u banza, kioso ki uivua o kizuelu “Alumajedone?” Nange u banza kuila divuua dionene. Sumbala o kizuelu kiki, ki moneka ngó veji imoxi mu Bibidia, o kizuelu kiki ene mu ki tumbula kiavulu ku athu, ni ku atuameni a jingeleja.

O kuila o ima i zuela o athu ia lungu ni Alumajedone, iene imoxi ni i longa o Bibidia? Kima kiambote kuijiia o kitambuijilu. Mukonda diahi? Mukonda o kidi kia lungu ni Alumajedone, ki tena ku katula o uôma u uala na-u, phala ku kuatekesa kuijiia kiambote o maka a-nda bhita ku hádia, ni ku kala ni ibanzelu ia lungu ni Nzambi.

Di longe o ibhuidisu itatu ia kaiela, sokesa-iu ni ima i zuela o athu ia lungu ni Alumajedone, ni ihi i longa o Bibidia, ia lungu ni maka enhá.

  1. O KUILA O ALUMAJEDONE, DIVUUA DIA-NDA BHEKA O ATHU?

Akua jingolokela ni akua ku tokuesa, ene mu tumbula o kizuelu “Alumajedone,” phala ku jimbulula o mavuua a bhekesa o athu. Mu kifika, o Ita ia Dianga, ni ia Kaiiadi, ia bhiti ku mundu, athu a zuela kuila, Alumajedone. Kia bhiti o ita iiadi íii, athu akexile ni uôma mukonda, o Estados Unidos ni União Soviética, a bhange matenda a makota, a zanga o munza. Akua jingolokela, ambe kuila se jixi jiiadi jiji a bhânga ni matenda a makota enhá, a ixana “Alumajedone ia matenda a makota.” Lelu, akua ku tokuesa ala ni uôma ua kuila o ima íii, ia-nda zanga o ukexilu uoso ua ixi, ene a dimuna o athu kuila kua-nda kuíza “Alumajedone ia munza u jibha.”

Ihi i zuela o athu: O athu ejiia kiambote ku langa o ixi, ni ima ioso iala-mu. Maji se o jinguvulu a lueza ku i langa, o ima ioso mu ixi ia-nda dibota.

Ihi i longa o Bibidia: Nzambi ka-nda eha o athu ku buika o ixi. O Bibidia i tu kanena kuila Jihova * ka bhange o ixi phala ku kala “kiphulungunzu kia hatu, kana.” Maji ua i bhanga “phala athu ku tunga-mu.” (Izaia 45:18) Mu veji dia kuehela kuila o ixi a i buika ku athu, Nzambi ua-nda ‘buikisa athu oso ene mu zanga o ixi.’—Dijingunuinu 11:18.

2. O KUILA O ALUMAJEDONE DIVUUA?

Saí ithangana, akua jingolokela, a tumbula o kizuelu Alumajedone phala ku jimbulula divuua dia dikota dia bhiti. Mu kifika, ku muvu ua 2010, saí diiala mukua ngolokela ua zuela ku mutelembe ua izunzumbia ia lungu ni “‘Alumajedone’ ia bhiti ku ixi ia Haiti.” Ua kexile mu zuela o hadi ioso, ni athu oso a a jibha ku kitungutu kia ixi kia bhiti mu ixi ienioió. Akua jingolokela, ni akua ku bhanga jifilme, kene mu tumbula ngó o kizuelu kiki mu izulukutu ia bhiti kiá, maji ene alondekesa ué o uôma uene nau ua ima ia-nda bhita ku hádia. Mu kifika, ene a tumbula o kizuelu “Alumajedone,” phala ku jimbulula ihi i tena ku bhanga o ditadi (asteróide) se di lauka ku diulu, di tula mu ixi.

Ihi i zuela o athu: O Alumajedone kima ki jibha athu avulu kala ni kikuma kia kima. Se-ku kima ki u tena o ku bhanga phala ku di bhulula ku kima kiki.

Ihi i longa o Bibidia: O Alumajedone ki kima ki jibha athu oso. Mu veji dia kiki, ku Alumajedone o athu a iibha, ene ngó a-nda kufuá. O Bibidia i kanena kuila kua kambe ngó bhofele, “u tala kiambote bhu kididi kiê, mukua phulu ka moneka dingi ku mesu dia athu.”—Jisálamu 37:10, NW.

3. O KUILA NZAMBI UA-NDA BUIKA O IXI KU ALUMAJEDONE?

Saí athu ene múia mu jingeleja, a zuela kuila, kua-nda kuíza ita ia dikota, kuila Nzambi ua-nda bhânga ni Diabhu, o ita íii iene ia-nda bheka o dizubhilu dia ixi ioso. O kibuka Princeton Survey Research Associates, ku Estados Unidos, kia tokuesa 40 a athu, a zuela kuila o ixi a-nda i buika ku ‘ita ia Alumajedone.’

 Ihi i zuela o athu: O athu ka a bhange phala ku nangenena mu ixi, o ixi ka i bhange ué phala ku nangenena. Nzambi ua bhange o athu phala kufuá kabasa kithangana.

Ihi i longa o Bibidia: O Bibidia izuela kuila Nzambi, “ua tena kutula madisesa ma’xi katé ia kuata, ki i xikina ku i lundumuna.” (Jisálamu 104:5) Ia lungu ni athu mu ixi o Bibidia izuela: “Ixi-phe ixalela ku athu iá aiuka, ene a i lundula, muene mua tunga, o thembu iâ ki ibhu.”—Jisálamu 37:29.

Mu kidi, o Bibidia i longa o kidi, kana kiene mu banza o athu kia lungu ni Alumajedone. Kienhiki-phe, kiebhi o kidi?

[Tanga mu luji]