Di Longe o Mak’â Nzambi

Kiebhi ki Tua Tokala ku Lembalala o Kufuá Kua Jezú?

O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’eie.

1. Kiebhi kia tokala ku lembalala o kufuá kua Jezú?

Jezú ua tendelesa akaiedi’ê ku lembalala o kufuá kuê, mu kudia o mbolo ni kúnua o vinhu. O mbolo ilombolola o mukutu ua Jezú, o vinhu, o manhinga mê.—Tanga Luka 22:19, 20.

O mbolo ia bukula Jezú ki ia kexile ni felemendu. Mu Bibidia, kioso kia tumbula o felemendu, ia mu lombolola o ituxi. Kienhiki o mbolo, kijimbuete kia tokala phala ku lombolola o mukutu ua iuka ua Jezú. Muéne ua bhana o mukutu uê mu sata, phala ki ku bhingi dingi ku bhana sata ia iama, kála kia tumine o Kitumu kia Mozé. (Jihebeleu 10:5, 9, 10) O vinhu iexile kijimbuete kia manhinga a iuka a Jezú, a bhana phala ku zubha o kituxi kietu.—Tanga 1 Phetele 1:19; 2:24; 3:18.

2. Kizuua kuxi ki tu bhanga o fesa ia lembalasa ia kufuá kua Jezú?

Jezú uafú mu kithangana kia Phasu, mu kizuua kia 14 ku mbeji ia Nizá. O kizuua kia Jijudé kioso kifua o dikumbi. Ande dia kufuá, Jezú uadi o Phasu mu usuku ni jipoxolo jê. Muéne ua mateka o fesa, ia tokalele ku bhanga phala ku lembalala o kufuá kuê.—Tanga Luka 22:14, 15.

Lelu o mundu ua Nzambi, a lembalala o fesa ia tumina Nzambi bhu kaxi ka Jezú phala ku bhulula athu oso ku kituxi ni mu kufuá. (Makatukilu 12:5-7, 13, 17) M’ukulu o Phasu akexile mu i bhanga veji imoxi ku muvu, lelu o fesa ia lembalasa ia kufuá kua Jezú ene mu i bhanga ué veji imoxi ku muvu, kioso kifua o dikumbi mu kizuua kia 14 ku mbeji ia Nizá, kála kilondekesa o kalendalu ka Bibidia.—Tanga Nzuá 1:29.

  3. Nanhi ua tokala kúdia o mbolo, ni kúnua o vinhu?

Kioso kia bhana o vinhu ku akaiedi’ê, Jezú uambe: “O kopho iii, kiene o kikutu kiobhe.” (1 Kolindo 11:25) O kikutu kiobhe kia bhingana o kikutu kia Kitumu kia Mozé, mua kexile o kikanenu kia Nzambi ku akua Izalaiele, kuila se ene a mu belesele eji kala mundu uê. (Makatukilu 19:5, 6) Maji akua Izalaiele, ka belesela o kitumu kia Nzambi. Mukonda dia kiki, Nzambi ua bhange kikutu kiobhe—Tanga Jelemiia 31:31.

Bhu kaxi ka kikutu kiobhe, Jihova u bhana mabesá ku athu bhu kaxi ka kibuka kófele. O athu ala mu kikutu kiobhe, a soka ngó 144.000. Bhu kaxi kâ, athu a ifuxi ioso a-nda tambula o muenhu ua kalelaku mu palaízu mu ixi. O athu a tokala mu kikutu kiobhe, a mu sidivila Jihova lelu mu ixi. Ene ngó adia o mbolo, ni kúnua o vinhu, mukonda o kopho, “kiene o kikutu kiobhe.”—Tanga Luka 12:32; Dijingunuinu 14:1, 3.

4. Mbote iahi i tu katula mu fesa ia Lembalasa ia kufuá kua Jezú?

O fesa ia lembalasa ia kufuá kua Jezú, i bandekesa o kisakidilu kietu mu henda ia Jihova. Muéne ua tumikisa Mon’ê phala ku tu bhulula ku ituxi. Kienhiki, kioso ki tuia mu fesa ia lembalasa ia kufuá kua Jezú, tua tokala tu xinganeka ihi ilombolola o kufuá kua Jezú phala etu. Tua tokala ku xinganeka kiebhi ki tu tena ku sakidila ia bhange Jihova ni Jezú ko kuetu.—Tanga Nzuá 3:16; 2 Kolindo 5:14, 15.

Phala kuijiia dingi, tanga o jimbandu ja 206-208 ja divulu didi, a di bhange ku Jimbangi ja Jihova. Mu Kidi Ihi i Longa o Bibidia?