‘O Mona ua Mesena ku tu Longa ia Lungu ni Tat’ê’
‘O Mona ua Mesena ku tu Longa ia Lungu ni Tat’ê’
‘Nanhi uejiia o Tata; ua mu’ijiia ngó o Mona, ni ió a mu sola kua Mona, ku mu londekesa-nê.’ —LUK. 10:22.
KIEBHI KI UEJI TAMBUIJILA?
Mukonda diahi Jezú muéne ngó ua tenene kulondekesa Tat’ê?
Kiebhi Jezú kia londekesa Tat’ê ku akuâ?
Kiebhi ki u tena ku kaiela o phangu ia Jezú ia kulondekesa o Tata?
1, 2. Kibhuidisu kiebhi kiene mu thandanganhesa athu avulu, ni mukonda diahi?
‘NZAMBI nanhi?’ Athu avulu kejiia Nzambi. Sumbala saí athu a xikina kuma Nzambi Tilindade, maji a zuela kuila o milongi íii ia bhonzo ku i tendela, saí mutuameni ua ngeleja ua soneka: “O milongi ia Tilindade athu ka tena ku i tendela. O athu a xikina kuila o ima ia moneka ngó.” O athu a banza kiki, a xikina kuila ki kuene Nzambi. Ene amba kuma, o ima ioso iambote iene mu ngongo, se-ku muthu ua i bhange. Mu veji dia ku dituna kuila kuene Nzambi, Charles Darwin, uambe: “O athu ka tena ku tendela o maka enhá.”
2 Athu a jingeleja javulu, a mesena kuijiia se kuene muene Nzambi. Maji kioso kia kamba ku sanga o itambuijilu, ene a bhuila. Kienhiki, Satanaji ‘uene mu bhaka o ilunji iâ mua vundu.’ (2 Kol. 4:4) Ki tu tokala ku diuana mu ku mona athu kejiia o kidi kia lungu ni Tata, o Mubhangi ua ngongo ioso!—Iza. 45:18.
3. (a) Nanhi ua tu londekesa o Mubhangi? (b) Ibhuidisu iebhi i tua-nda di longa?
3 O athu a tokala kuijiia o kidi kia lungu ni Nzambi. Mukonda diahi? Mukonda uoso u di kola ‘mu dijina dia Jihova,’ u bhuluka. (Lom. 10:13) O ku dikola mu dijina dia Nzambi, ku bhinga kuijiia Jihova, kala Muthu ua kidi ni ku tumbula o dijina diê. Jezú Kristu ua longo ku maxibulu mê o maka enhá. Muéne ua longo ia lungu ni Tat’ê. (Tanga Luka 10:22.) Mukonda diahi Jezú, muéne ngó u tena ku longa ia lungu ni Tat’ê? Kiebhi Jezú kia bhange kiki? Kiebhi ki tu tena ku kaiela o phangu ia Jezú, ia ku longa akuetu kuijiia o Tata? Tua-nda di longa o itambuijilu ia ibhuidisu íii.
JEZÚ KRISTU—MUÉNE NGÓ U TENA KU TU LONGA
4, 5. Mukonda diahi Jezú muéne ngó ua tenene ku longa ia lungu ni Tat’ê?
4 Jezú ua tenene ku longa ia lungu ni Tat’ê. Mukonda diahi? Mukonda Jezú, muéne a dianga ku mu bhanga ku diulu, ande dia ima ioso, muéne o ‘Mona umoxi-élele ua Nzambi.’ (Nzu. 1:14; 3:18) Muéne ngó uala ni ujitu iú! Ande dia ima ioso, muéne ua tambula o henda kua Tata, iu uejiia kiambote o ídifua Iê. O Tata, ni mona akexile ni ukamba uambote tundé xahulu. (Nzu. 5:20; 14:31) O Mona ua di longo kiavulu o ídifua ia Tat’ê!—Tanga Kolose 1:15-17.
5 O Tata ua bhana kikalakalu kua Mon’ê, kia ku kala “Diambu dia Nzambi.” (Dij. 19:13) Kienhiki Jezú muéne ngó ua tenene ku longa athu kuijiia Tata. Mukonda dia kiki, Nzuá ua soneka ia lungu ni Jezú, kuila muéne, “o Diambu,” ni kuila “uene bhu jihata ja Tata.” (Nzu. 1:1, 18) Mu kuzuela kiki, Nzuá ua lembalala o kifua kia kexile mu izuua iê, kia lungu ni ola ia kúdia. O mujitu ueji zukama kua mukuá, ene eji tena ku di zuelesa. O mona uala “bhu jihata ja Tata,” ua kexile mu di zuelesa ni Tat’ê.
6, 7. Kiebhi o ukamba ua Tata, ni Mona ua dibandekesa dingi?
6 O ukamba ua Tata, ni Mona, ua dibandekesa dingi. O Mona, ‘kizuua ni kizuua u kala minangu ia Nzambi.’ (Tanga Jisabhu 8:22, 23, 30, 31.) Kienhiki o ukamba uâ, ua suínine dingi kioso kia kexile mu kalakala kumoxi, o mona ua di longo o ídifua ia Tat’ê. Kioso kia bhange o athu a mukuá, o Mona ua mono kiebhi Jihova kia dibhana ni athu enhá, o henda iê ku ídifua ia Nzambi ia di bandekesa dingi.
7 Kioso Satanaji kia tatela o ungana ua Jihova, kiki kia longo o Mona kiebhi Jihova kieji londekesa o henda iê, o ku iuka, o unjimu, ni kutena kuê kioso Muéne kieji dibhana ni maka a bhonzo. Kiki kia longo Jezú kiebhi kieji tena ku dibhana ni ibhidi ieji sanga mu ukunji uê mu ixi.—Nzu. 5:19.
8. Kiebhi o musoso ua Jezú, u tu kuatekesa kuijiia o ídifua ia Tata?
8 Mukonda dia ukamba uê ni Jihova, o Mona ua tange o ídifua ioso ia Tata, se-ku muthu ueji tena ku bhanga kiki. O kuila tueji kuijiia o Tata, se ki tu di longo o ima ia bhange, ni ia longo o Mon’ê umoxi-élele? Xinganeka, kieji tu bhonza kiavulu ku tendela o kizuelu “henda,” se tua ki tangele ngó mu divulu dia dijimbuluilu dia izuelu (dicionário). Maji mu ku xinganeka mu musoso u tanga o ukunji ua Jezú, ni ukexilu uê ua ku kuatekesa o athu, tu tena kuijiia kiambote o kizuelu, “Nzambi henda.” (1 Nzu. 4:8, 16) Kiene kimoxi uê ni ídifua ia mukuá ia Nzambi ia longo Jezú ku maxibulu mê kioso kia kexile mu ixi.
KIEBHI JEZÚ KIA LONDEKESA TAT’Ê?
9. (a) Mu maukexilu ahi mua londekesa Jezú o Tata? (b) Bhana phangu ia kifika kia bhana Jezú phala kulondekesa Tat’ê?
9 Kiebhi kia londekesa Jezú o Tata ku maxibulu mê, ni ió eji kituka maxibulu mê? Muéne ua bhange kiki mu maukexilu a iiadi: Bhu kaxi ka milongi iê, ni ukexilu uê. Tua-nda dianga ku di longa o milongi iê. O ima ia longo Jezú ku akaiedi’ê, ia londekesa kuila uejidile kiambote o ibanzelu ia Tata, ni ukexilu uê. Mu kifika, Jezú ua sokesa Tat’ê, ni kafunga ka jimbudi, uia mu sota o mbudi ia jimbidila. Jezú uambe kuila, o kafunga kia sanga o mbudi iê, ‘u beta ku sanguluka, o makui’ivua n’ivua a kambele ku jimbidila ndenge.’ Ihi ia mesenene ku longa Jezú? Jezú uambe: ‘Kiene kimoxi, kia vondadi ia Tat’enu uene mu diulu; ka-ndala kuila ku tuana tutu bhu texika kamoxi.’ (Mat. 18:12-14) Ihi i ua di longo ia lungu ni Jihova mu kifika kiki? Saí ithangana u banza kuila eie kuala ni valolo, mba se-ku muthu u ku suua, maji o Tat’ê uene ku diulu, u ku suua. Eie ua difu ni “tuana tutu.”
10. Kiebhi Jezú kia londekesa Tat’ê ku maxibulu, bhu kaxi ka ukexilu uê?
10 O ukexilu ua kaiiadi ua Jezú ua kulondekesa o Tata ku maxibulu mê, bhu kaxi ka ukexilu uê. Kienhiki, kioso poxolo Filipe kia bhingi kua Jezú: “Tuidikise Tata,” Jezú ua mu tambuijila: “Uoso ua ngi mono eme, ua mono ue Tata.” (Nzu. 14:8, 9) Xinganeka kiebhi kia londekesa Jezú o ídifua ia Tat’ê. Kioso o mukua dibhute kia diondela Jezú ku mu saka, Jezú ua kuata o diiala dia kexile ni ‘mukutu uê uezala o dibhute,’ Jezú ua mu ambela: “Nga mesena muene, disanze.” Mukonda dia Jezú ku mu saka, o mukua dibhute ua tena ku mona o lukuaku lua Jihova. (Luk. 5:12, 13) Kioso kiafu Lázalu, o maxibulu a mono o henda ia Tata, kioso Jezú kia mu ‘kuata o malamba,’ “anga u dila.” Sumbala Jezú uejidile kuila ueji fukununa Lázalu, maji ua kexile ni henda ia muiji ua Lázalu, ni makamba mê. (Nzu. 11:32-35, 40-43) Sé phata, mu Bibidia muala ué musoso ua ku uabhela, u ku kuatekesa ku mona o henda ia Tata, kála kia ilondekesa mu ima ia bhange Jezú.
11. (a) Kioso kia zelesa o tembulu, ihi ia longo Jezú ia lungu ni Tat’ê? (b) Mukonda diahi o musoso ua Jezú, ua ku zelesa o tembulu u tu tululukisa?
11 Ihi i ku longa o musoso ua Jezú ku zelesa o tembulu? Xinganeka: Jezú ua bhange xikote ia jingoji, ua a kaiesa ene oso mu tembulu, kumoxi ni jimbudi, ni jingombe. Anga u takula bhoxi o ji meza, ni itadi ia akua kutolokala. (Nzu. 2:13-17) Kiki kia lembalala o maxibulu o kikanenu kia Sobha Davidi: “O muanu ua’nzo ié uene ua ngi di.” (Jisá. 69:9) Mukonda dia ku suína, Jezú ua londekesa kuila ua mesenene ku zokela o ubhezelu ua kidi. U tena ku di longa mu musoso iú, o ídifua ia Tata? Kiki, ki tu longa kuila Nzambi, kale ngó ni kutena kua soko phala ku zubha o kuiibha mu ngongo, maji ua mesena ku zubha o kuiibha. O kima kia bhange Jezú, ku athu abhukumuka, kilondekesa kiebhi ki divua o Tata, kioso kia mona o kuiibha kua mu di sanzumuna mu ixi lelu. Kiki, ki tu tululukisa kioso ki tu dibhana ni usuéia!
12, 13. O ukexilu ua Jezú ku dibhana ni maxibulu mê, u ku longa Ihi ia lungu ni Jihova?
12 Tu di longe o phangu ia mukuá—o ukexilu ua Jezú ku dibhana ni maxibulu mê. Ene akexile mu zoka se nanhi ua betele-kota bhu kaxi kâ. (Mar. 9:33-35; 10:43; Luk. 9:46) Mukonda dia ku di longa ni Tat’ê, Jezú uejidile kiebhi kia divu Tata, mukonda dia ukexilu uenhó ua ku dizangeleka. (2 Sam. 22:28; Jisá. 138:6) Jezú ua monene ué o ukexilu iú kua Satanaji o Diabhu. O luímbi luenió, lua mu bhangesa ku mesena o kima ki kia mu tokelele, ni ku kala ni fuma. Kienhiki, Jezú ua luualele kiavulu kioso kia mono kuila o maxibulu mê, a longo akexile ni luímbi! Katé muene ni ió a solele phala ku kala jipoxolo jê! Ene alondekesa luímbi, katé mu kizuua kia kufuá kua Jezú. ( Luk. 22:24-27) Né kiki Jezú ua kolokota ku a tendelesa kiambote, mukonda uejidile kuila ene eji tena ku di longa o phangu iê ia lenduka.—Fil. 2:5-8.
13 U tena ku mona o ídifua ia Tata, mu ukexilu ua Jezú ku tendelesa o maxibulu mê, exile ni luímbi? U tena ku mona o Tata, mu izuelu, ni mu ima ia bhange Jezú, o kuila muéne ka landuka o mundu uê, sumbala ni iluezu iâ? Mu kuijiia o ídifua ia Nzambi, ki kia tokala ku tu suínisa ku mu zukama, ni ku mu sakidila, ni ku mu bhinga muloloki, kioso ki tu lueza?
O MONA UA LONDEKESA TAT’Ê
14. Kiebhi kia londekesa Jezú kuila ua mesenene kuma o athu ejiia Tat’ê?
14 Saí athu akua undanda, ene mu sueka ima iavulu ku athu, phala athu kejiia o kidi. Maji Jezú ka bhange kiki, muéne ua kexile polondo phala kulondekesa o kidi kia lungu ni Tat’ê ku athu. (Tanga Matesu 11:27.) Jezú, ua bhana ué ku maxibulu mê ‘o kilunji kia kuijiia o kidi’ kia lungu ni Jihova Nzambi. (1 Nzu. 5:20) Kiki kilombolola ihi? Jezú ua jikula o ilunji ia maxibulu mê, phala kuijiia Tat’ê. Muéne ka sueka kima kia lungu ni Tata, phala athu ku kamba ku muijiia, kála kiene mu bhanga o ilongesu ia Tilindade.
15. Mukonda diahi Jezú, ka longo o maxibulu mê, ioso ia lungu ni Tat’ê?
15 O kuila Jezú ua longo ioso iejidile ia lungu ni Tat’ê? Kana. (Tanga Nzuá 16:12.) Mukonda diahi? Mukonda, mu kithangana kieniókio, o maxibulu mê ‘keji tena luua ku tendela’ o milongi ioso. Jezú uambe kuila, eji di longa o milongi ia mukuá, kioso kieji bhixila, ‘o múkuatekexi,’ o nzumbi ikôla, iene ieji ku a endesa “mu kidi kioso.” (Nzu. 16:7, 13) Kála o jitata ja unjimu, ka tangela ioso ku tuana, katé kia kula, phala ku tendela o ima, Jezú ua kingila katé, o kithangana kia maxibulu ku kula mu nzumbi, phala ku tendela o milongi ia mukuá ia lungu ni Tat’ê. Ni henda ioso, Jezú uejidile kuila, o maxibulu keji tena ku tendela o milongi ioso.
KAIELA O PHANGU IA JEZÚ MU KU KUATEKESA AKUENU KUIJIIA JIHOVA
16, 17. Mukonda diahi eie uala polondo phala ku kuatekesa akuenu kuijiia o Tata?
16 Kioso ki uijiia kiambote muthu, u uabhela o ídifua iê, ku mesena ku mu londekesa ku akuenu? Kioso kia kexile mu ixi, Jezú ua zuela ia lungu ni Tat’ê. (Nzu. 17:25, 26) O kuila tu tena ku kaiela o phangu iê mu ku kuatekesa akuetu kuijiia Jihova?
17 Kála ki tua di longo, Jezú muéne ngó uejidile kiambote Tat’ê. Né kiki muéne ua mesenene ku longa akuâ, katé ua bhana kilunji ku akaiedi’ê, phala ku tendela o ídifua ia Nzambi. Ni kikuatekesu kia Jezú, ki tu beta-kota kuijiia Tat’ê, athu a mukuá ndenge? Ki tu sanguluka mu kuijiia kuila, bhu kaxi ka milongi ia Jezú, ni ukexilu uê, tuejiia kiambote o Tata! (Jel. 9:24; 1 Kol. 1:31) Kioso ki tu di suínisa ku zukama kua Jihova, muéne u tu zukama ué. (Tiia. 4:8) Kienhiki, tuala polondo phala ku kuatekesa akuetu kuijiia Jihova. Kiebhi ki tu tena ku bhanga kiki?
18, 19. Kiebhi ki u tena ku kuatekesa akuenu kuijiia Tata? Jimbulula.
18 Tua tokala ku kaiela o phangu ia Jezú, ia kulondekesa o Tata ku akuetu, mu izuelu, ni mu ima i tu bhanga. Ejiia kuila, athu avulu u tu sanga mu ukunji uetu, kejiia o dijina dia Nzambi. Ene nange a a longo makutu alungu ni Nzambi. Tu tena ku a kuatekesa kuijiia o dijina dia Nzambi, ihi ia mesena muéne phala o athu, ni ídifua iê, kála ki longa o Bibidia. Tu tena ué kuzuela ni jiphange jetu, o misoso ia Bibidia i tu longa o ídifua ia Nzambi, i tua kambele kuijiia. Kienhiki, ene ué a tena ku katula mbote.
19 Mukonda diahi ki u longo akuenu kuijiia Tata, kioso ki ua mu di suínisa ku kaiela o phangu ia Jezú? O athu kia mona o ima i tu bhanga, ni henda ietu, ene a-nda zukama kua Tata, ni kua Jezú. (Efe. 5:1, 2) O poxolo Phaulu u tu suínisa ku ‘kaiela o phangu iê, kála kia kaiela muéne Kristu.’ (1 Kol. 11:1) Ujitu ua dikota o ku kuatekesa athu kuijiia Jihova bhu kaxi ka ukexilu uetu uambote! Tu kolokote ku kaiela o phangu ia Jezú ia ku kuatekesa akuetu kuijiia Tata.
[Ibhuidisu ia ku dilonga]
