Kala ni Ukexilu Uambote se Kuene Maka mu Ukaza
Kala ni Ukexilu Uambote se Kuene Maka mu Ukaza
“Phala oso a [kazala] kiá, ngala ni kijila kia ku a bhana, ki kiami eme, maji kia Ngana.”—1 KOL. 7:10.
U TENA KU JIMBULULA?
Mu ukexilu uebhi Nzambi ua bandeka o makaza?
Kiebhi o tufunga kia tena ku kuatekesa o Jikidistá ala ni maka mu ukaza?
Kiebhi ki tua tokala ku mona o ukaza?
1. Kiebhi o Jikidistá kia tokala ku mona o ukaza ni mukonda diahi?
KIOSO o Jikidistá kia kazala, ene a bhanga kikutu, bhu pholo ia Jihova—o kikutu kiki kia dikota, ka tokala ku ki mona kala kima kioso-kioso. (Ndo. 5:4-6) Mukonda dia muéne ku kala o Mubhangi ua ukaza, Jihova ua ‘a bandeka’ mu ukaza. (Mar. 10:9) O kikutu kiki ki nangenena bhu pholo ia Nzambi, katu-ku, ku itumu ia athu iene mu uanuna o ukaza. O jiselevende ja Jihova, a tokala ejiia kuila o ukaza kima kilondekesa se ene abhezi a kidi a Nzambi mba kana.
2. Ibhuidisu iebhi ia-nda tambuijila mu milongi íii?
2 O ukaza uala kiambote, u bheka kisangusangu kiavulu. Maji ihi ia tokala o ku bhanga se mu ukaza mu moneka maka? O kuila o ukaza u tena ku bhua sé ka u suínisa? O kuila saí kikuatekesu phala o makaza ala ni maka mu ukaza?
UKAZA UÊ UA-NDA KALA UA KU SANGULUKA MBA UA UHAXI?
3, 4. Ihi i tena ku bhita se muthu ka sola kiambote diiala mba muhatu ua-nda kazala nê?
3 Se o ukaza ua Kidistá u kala uambote, kisangusangu kia dikota, ni kijingu kua Jihova. Maji se mu kala maka, uhaxi ua dikota. Se o Kidistá dikudi ua mesena ku kazala, ua-nda di tunda kiambote se u kaiela o itendelesu ia Nzambi. Maji o ku kamba ku sola kiambote diiala mba muhatu phala ku kazala nê, ku tena ku bheka ndolo iavulu ni ku luuala. Mu kifika, saí minzangala, kioso kia mateka o ku tangesa, kala luua polondo phala ku dibhana ni maka ijila mu ukaza. Saí iá a sange o muthu phala ku kazala mu internete, a banze kuila a-nda zediua mu ukaza. A mukuá a ta kituxi kioso kia mateka o ku di tangesa, mukonda dia kiki ene a kazala ngó, né muene sé ka mesenene, a mateka kiá o ukaza sé ku di xila mudiâ.
4 Saí Jikidistá ka kazala “mua Ngana,” a tala hadi iavulu, mu ku kala ni muiji ua diuane mu ubhezelu. (1 Kol. 7:39) Se kiki kia mu bhita ué ni eie, bhinga o muloloki ua Nzambi phala n’a ku kuatekese. Maji muéne ka-nda zubha o ibhidi ia ituxi ia te o muthu, maji muéne u kuatekesa o muthu ua diela ku dibhana ni ibhidi. (Jisá. 130:1-4) Bhana o muxima ué phala ku mu sangulukisa lelu ni ku hádia, mukonda o ‘ku sanguluka kua Jihova iene o nguzu ienu.’—Neh. 8:10.
SE KI MUA MU DIBHANA KIAMBOTE MU UKAZA
5. Ia lungu ni ukaza ua bhonzo, ibanzelu iahi ia tokala kueha o makaza?
5 O ió a tala hadi mu ukaza a tena ku dibhudisa: ‘O kuila o ukaza ua mu bhua ngi tena ku bhanga kima phala ku u bhulula? Se kia bhanene ngeji tena ku vutuka ku dima anga ngi kazala ni muthu uéngi!’ Ene a tena ku banza kuila a tokala ku di xisa—phala ku kala dingi dikudi! Mukonda diahi ki tu di xisa? Né muene se ki ngi tena ku mu xisa mu ukexilu u longa o Bibidia, mukonda diahi ki ngi sondoloka phala ngi kale dingi ngi dikudi?’ Mu veji dia ku kala ni ibanzelu íii, mba ku banza mu ima ia tokalele o ku bhanga, o Jikidistá a kazala kiá a tokala ku bhanga ioso phala ku sota o itendelesu ia Nzambi ni ku i belesela.
6. Jimbulula o maka a tange Jezú mu divulu dia Matesu 19:9.
6 Se Kidistá diiala mba o muhatu u mesena ku xisa kaza diê, nange ka di jituna luua, mba ua di jituna kiá phala ku kazala ni muthu uéngi kala ki tanga o Bibidia. Jezú uambe: ‘Muthu uoso u xisa muhatu’ê ua fiiele mukonda dia kikuma kiéngi, o kia phánda ki kiene, anga u kazala muhatu uéngi, muenhú ua te phánda.’ (Mat. 19:9) O kituxi kiambe Jezú kia lungu ni ku ta ‘phánda’ mba ufusa. Kima kiambote ku samba hanji ande dia ku banza ku di xisa, se o kaza diê ua te phánda.
7. Ihi ia-nda zuela o athu se o ukaza ua Jikidistá ubhua?
7 O ukaza uetu ua tokala ulondekesa kuila tuala kiambote mu nzumbi. O poxolo Phaulu ua zuela o maka enhá: ‘Muthu kia kamba kuijiia ku tumina o dibhata diê-muene, u tambula kiebhi o konda ia kilunga kia Nzambi?’ (1 Tim. 3:5) Mu kidi, se o makaza a zuela kuila Jikidistá maji o ukaza uâ ubhua, o athu a-nda zuela kuila ene ka mu belesela o milongi iene mu longa ku athu.—Lom. 2:21-24.
8. Ihi ki iala kiambote mu ukaza se o makaza a Jikidistá a sola ku di xisa?
8 Se o makaza a di batizala kiá a mu banza ku di senga mba ku di xisa, mu ukexilu ka u tumina mu Bibidia, ene kala kiambote mu nzumbi. Saí muthu mu ukaza ka mu kumbidila kiambote o milongi ia Bibidia, mba kiiadi kiâ. Se ene a ‘dielela Jihova ni muxima uoso,’ o athu ka-nda xikina kuila ene ka tena ku bhulula o ukaza uâ.—Tanga Jisabhu 3:5, 6.
9. Mabesá ahi a tambula o Jikidistá se ka di xisa ni lusolo?
9 Saí makaza a mesene ku di xisa, maji mu ku bhita thembu, a tena ku bhulula o ukaza uâ. O Jikidistá a dituna ku di xisa ni lusolo kia kala ni maka mu ukaza, a tambula mabesá. Xinganeka ihi i tena ku bhita mu dibhata a diuane mu ubhezelu. Phaulu ua soneka: “Kiene ue enu ahatu beleselenu anume enu, phala né-mbe bhu kala ni iá a kamba kutumaka o maka ma Nzambi, ki bhekela ku a nganhala mu uendelu ua mbote ua [ahatu’â.] Ene ki kua-ndù bhinga ngó ku a zuelela kima, kioso kia mi mona o uendelu uenu ua ujitu ni uoma.” (1 Phe. 3:1, 2) Mukonda dia ukexilu uambote ua muhatu, o diiala ki Kidistá u tena ku kala mubhezi ua Jihova! O ukaza a u bhulula, u bhana kijingu kua Nzambi, dibesá phala o diiala ni muhatu ni ana a-nda vuala.
10, 11. Maka ahi a tena ku moneka mu ukaza, maji ihi ia tokala kuijiia o Kidistá?
10 O vondadi ia ku belesela Jihova, i bhangesa kuila o Jikidistá a kazala ngó ni abhezi’ê. Maji saí ithangana, né muene mu ukaza ua Jikidistá, mu tena ku moneka maka. Mu kifika, saí ithangana, muthu umoxi mu ukaza, u tena ku kala ni maka. Mba mu ku bhita thembu tundé kia kazala, muthu umoxi mu ukaza ka mesena dingi ku boka. Phala ku jimbulula: Linda * Kidistá ua suína mu ku sidivila Nzambi, mama iambote, ua mono muadi uê ku di ta mu jinjila jaiibha, mu kiki a mu kaie mu kilunga. Ihi ia tokala ku bhanga o Kidistá se o ukaza uê ua mu bhua mukonda dia maka enhá?
11 Nange u dibhudisa: ‘O kuila nga tokala ku kolokota ku bhulula o ukaza uami, sumbala ni maka avulu?’ Se-ku muthu ua tokala ku sola ihi i ua tokala o ku bhanga. Maji saí kima ki fidisa ku xisa o ukaza ua mu boba. O diiala mba o muhatu ua mu tala hadi mu ukaza mukonda dia kitongoluelu kiê, uala ni valolo bhu pholo ia Nzambi. (Tanga 1 Phetele 2:19, 20.) Bhu kaxi ka Maka mê, ni nzumbi iê, Jihova u kuatekesa o Jikidistá a mu suína ku bhulula o ukaza ua mu boba.
ENE ALA POLONDO PHALA KU KUATEKESA
12. Ihi ia-nda banza o tufunga se tu bhinga o kikuatekesu kiâ?
12 Se eie ua mu bhita ni maka mu ukaza uê, kana ku kala ni hele ia ku sota o tufunga mu kilunga. O tufunga a sidivila kala abhidi a kilunga, a ku kuatekesa bhu kaxi ka milongi a Bibidia. (Ika. 20:28; Tiia. 5:14, 15) Kana ku banza kuila eie ni kaza diê, ka-nda mi xila ku tufunga se mu sota o kikuatekesu kiâ, se mu a tangela o maka a dikota u muala nau. Ene a-nda mi zola dingi, a-nda mona kuila enu mua mesena ku sangulukisa Nzambi.
13. Kitendelesu kiahi ki tu sanga mu divulu dia 1 Kolindo 7:10-16?
13 Kioso kia a bhinga phala ku kuatekesa o Jikidistá kala kumoxi mu ubhezelu, o tufunga a kaiela o kitendelesu kia Phaulu, kiambe: “Phala oso a [kazala] kiá, ngala ni kijila kia ku a bhana, ki kiami eme, maji kia Ngana, kuila: O muhatu ua kazala ka tokala ku di senga ni muadi uê. Maji se u senga, a kale sé ku kazala; mba a di vutukile dingi ni muadi uê. O diiala uê ka tokala ku senga muhatu’ê. . . . Eie u muhatu ua kidistá, ua k’ijiia kiebhi se muadi ué u mu bhulula? Ni eie u diiala dia kidistá, ua k’ijiia kiebhi se muhatu’é u mu bhulula?” (1 Kol. 7:10-16, NW) Mabesá a dikota kioso o munumi ki Kidistá u xikina o ubhezelu ua kidi!
14, 15. Ihi i tena ngó ku bhangesa o dikaza Kidistá ku xisa o ukaza uê, maji mukonda diahi kima kiambote ku samba ni kuzuela o kidi?
14 Ihi i tena ngó ku bhangesa o muhatu ua Kidistá “ku di senga ni muadi uê?” Saí makaza a sola o ku di senga mukonda dia diiala ku kamba ku bhana o kudia kubhata. A mukuá a bhanga kiki mukonda o diiala u beta, mba u ta o ukexilu uê ua nzumbi mu kiluezu
15 Ki kale se ua-nda senga kaza diê mba kana, o muthu muene uejiia. Maji o kaza diê ua tokala ku samba ni ku zuela o kidi. Mu kifika, o kuila o diiala ki Kidistá muéne ua mu mu bhangesa ku zoza mu nzumbi, anga o Kidistá muene, kene mu tanga dingi o Bibidia, u fonga mu iônge, ni ku boka?
16. Ihi ia-nda fidisa o Jikidistá ku xisa o ukaza ni lusolo?
16 Mukonda dia ku sanguluka ni ukamba uetu ni Nzambi, ni ku sanguluka ni ujitu ua tu bhana o ukaza, u tu fidisa ku di xisa mu ukaza ni lusolo. Mukonda tu jiselevende ja Jihova, tua mesena ku bhana kijingu ku dijina diê. Kienhiki, ki tu tokala ku xisa o ukaza uetu, phala ku kazala dingi ni muthu uéngi.—Jel. 17:9; Mal. 2:13-16.
17. Mu ukexilu uahi tu tena kuzuela kuila Nzambi uexana o Jikidistá a kazala ku kala ni ku paze?
17 O Kidistá ua kazala ni muthu ki mubhezi ua Nzambi, ua tokala u kolokota mu ukaza uê. Maji o Kidistá ka tokala ku luuala sumbala ni nguzu ioso ia bhanga phala ku kala kiambote mu ukaza, se o dikaza ki Kidistá ka mesena dingi mukonda Phaulu uambe: ‘Maji o diiala mba muhatu ua kambe ku xikana-phe, kia bhindamena o ku senga, aiê. Mukonda bhu kaxi’abha o diiala uala kidistá, mba muhatu uala kidistá, ka tokala ku kala mubhika bhu kaxi ka maka enhá. Mukonda Nzambi ua tu ixanena ku kala ni muenhu ua kutululuka.’ 1 Kol. 7:15. *
DIELELA KUA JIHOVA
18. Né muene se ka tena ku bhulula o ukaza, mbote iahi ijila mu ku bhanga nguzu phala ku u bhulula?
18 Mu ku dibhana ni maka mu ukaza uê, dielela kua Jihova phala ku ku bhana nguzu, mu ku kingila kua muéne. (Tanga Jisálamu 27:14.) Xinganeka Linda tua mu tange ku dimatekenu, o ukaza uê ua boba, sumbala mu mivu iavulu muéne ua bhange ioso phala ku u bhulula. O kuila muéne ua banze kuila ua zange ngó o thembu iê? Muéne uambe, “kana.” Muéne uambe dingi, “nga bhana umbangi ku athu a mono o nguzu i nga bhange phala ku bhulula o ukaza uami. Ngala ni kitongoluelu kia zele. Kiki kia kuatekesa o mon’etu ua muhatu, ku kala mu ubhezelu. Muéne ua kulu iu uala Mbangi ia Jihova.”
19. Ihi i tena o ku bhita se o makaza a Jikidistá a bhanga nguzu phala ku bhulula o ukaza?
19 Saí phang’etu ia muhatu a mu ixana Marilyn, ua zediua mu ku dielela kua Nzambi ni ku bhanga nguzu phala ku bhulula o ukaza uê. Muéne uambe: “Nga mesene ku xisa muadi uami mukonda ka mesenene ku bhana kúdia kubhata, kiki kia kexile mu ngi bhangesa ku zoza mu nzumbi. Maji muadi uami uexile kiá kafunga ande dia ku di ta mu ikalakalu ki ia tokala ku bhanga o Kidistá, mu kiki a mu kaie mu kilunga. Muéne ua mateka ku fonga mu iônge, etu ki tua kexile dingi mu di zuelesa. O ujibhangânga ua bhiti mu mbanza ietu, ua ngi sasumukisa kiavulu, eme nga di sueka, nga mono kuila eme uami nga kexile mu lueza. Anga tua mateka ku di zuelesa dingi, ku bhanga o ubhezelu ku muiji kumoxi, kuia dingi mu boka, ni kuia mu iônge, o tufunga a tu zolele kiavulu, ia a tu kuatekesa kiavulu. Tua zediua dingi mu ukaza. Mu ku bhita thembu, muadi uami ua tambula dingi o ikalakalu ia kexile mu bhanga mu kilunga. Mu ku suka-ku o ibhidi íii ia tu bhekela ku zediua.”
20, 21. Kia lungu ni ukaza, ihi i tua tokala o ku bhanga?
20 Ki kale se tua kazala kiá mba tu akudi hanji, tua tokala ku kolokota ku dielela kua Jihova. Se tua mu bhita ni maka mu ukaza, tua tokala tu bhanga ioso phala ku a batula, ni ku lembalala kuila, “ene kala dingi kiiadi, maji xitu imoxi kiá.” (Mat. 19:6) Tua tokala kuijiia ué kuila se tu kolokota mu ukaza ua diuane mu ubhezelu, tua-nda sanguluka, tua-nda bhangesa kuila o dikaza u kala mubhezi ua kidi.
21 Ki kale ni maka avulu a moneka mu ukaza, tua tokala tu dilanga mu ku a batula, phala tu tene ku bhana umbangi uambote ku athu ka tokala mu kilunga. Se tu mona kuila o ukaza uetu ua mu bhua, tua tokala tu samba ni ku suína, ni ku tonginina o ibanzelu ietu ni ku di longa o Mikanda Ikola ni muxima uoso, ni ku sota o kikuatekesu kia tufunga. Kolokota o ku bhanga o vondadi ia Jihova Nzambi mu ithangana ioso, ni kulondekesa kuila ua uabhela o ujitu uê, o ukaza.
[Tanga mu luji]
^ kax. 10 O majina a a lungulula.
^ kax. 17 Tanga o divulu “Kala mu Henda ia Nzambi” mu jimbandu ja 219-221; O Mulangidi ua 1 ua Kamoxi ua 1988, mu jimbandu ja 26-27; Mulangidi ua 15 ua Kasambuadi ua 1976, mu jimbandu ja 319, mu phutu.
[Ibhuidisu ia ku dilonga]
[Kilombuelelu ku mbandu 16]
O Jikidistá ka xisa ni lusolo o ukaza a tambula mabesá
[Kilombuelelu ku mbandu 18]
Dielela kua Jihova izuua ioso, mu kingile ni ku suína
[Foto ku mbandu 15]
Jihova u besoala o makaza a Jikidistá a bhanga ioso phala ku suínisa o ukaza uâ
[Foto ku mbandu 17]
O Jiphange mu Kilunga a tena ku kuatekesa
