Di Longe o Mak’â Nzambi

Mukonda Diahi o Jikidistá a Tokala ku a Batizala?

O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’eie.

1. Ihi ilombolola o batizu ia Kidistá?

Phala o muthu ku kala ni ukamba uambote ni Nzambi, ua tokala ku di batizala. Kienhiki, o Kidistá a tokala ku mu batizala, kala muthu ua kulu, u tena ku di longa ia lungu ni Nzambi, ni ku kituka dixibulu dia Jezú, ka tokala ku mu batizala se muéne kabuetele hanji. (Ikalakalu 8:12; 1 Phetele 3:21) Tu tena ngó ku kala dixibulu dia Jezú kioso ki ku di longa o Bibidia ni ku kumbidila o itendelesu ioso ia tu bhana muéne.—Tanga Matesu 28:19, 20.

Mu izuua ia jipoxolo, athu avulu a bhange kima ni lusolo, kioso kia di longo ia lungu ni Nzambi ni Jezú. Mu kifika, saí diiala kioso kia di longo kuila, o kufuá kua Jezú, kua jikula o njila phala ku bhulula athu, muéne ni lusolo luoso, ua kituka dixibulu dia Jezú. Lelu kuene uê athu avulu ene mu sola ku kituka maxibulu a Jezú—Tanga Ikalakalu 8:26-31, 35-38.

2. Mukonda diahi Jezú a mu batizala?

Jezú ua kexile ni 30 a mivu, kioso kia mu batizala kua Nzuá dia Batizu mu Ngiji ia Njolodá. O batizu ia Jezú ia lombolola o vondadi iê, ia ku bhanga o vondadi ia Nzambi. (Jihebeleu 10:7) Kia bhingile uê ku bhana o muenhu uê, mu kukula phala ku bhulula o athu mu ituxi. Ande dia kuíza mu ixi, Jezú ua zolele kiavulu Tat’ê, Jihova, ni ku mu belesele.—Tanga Marku 1:9-11; Nzuá 8:29; 17:5.

  3. Mukonda diahi o Kidistá a tokala ku mu batizala?

Etu ki tu difu ni Jezú—mukonda tu akua ituxi. Maji mukonda dia kukula kua Jezú, tu tena ku kala ni ukamba uambote ni Nzambi. (Loma 5:10, 12; 12:1, 2) Tu tena ku vutuka kua Nzambi phala ku bhanga mbandu ia muiji uê. (2 Kolindo 6:18) Ihi i tua tokala o ku bhanga phala ku kala ni ujitu iú? Mu musambu uetu tu di bhakula kua Jihova, tu mu kanena ku bhanga o vondadi iê ku muenhu uetu. Kioso ki tu samba tu bhakula o muenhu uetu mu ku di batizala.—Tanga Matesu 16:24; 1 Phetele 4:2.

4. Kiebhi ki u tena ku di pelepalala phala ku di batizala?

O Jimbangi ja Jihova ene mu longa o Bibidia ku athu oso a mesena ku zukama kua Nzambi. O ku di longa o Bibidia ni kuia mu iônge ia Jikidistá, ia-nda ku kuatekesa ku bandekesa o henda iê ni ku kolesa kixikanu kiê kua Nzambi. Ia-nda ku kuatekesa uê ku kala ni ukexilu uambote, ni ídifua iambote. O ku kala dingi ni henda, kixikanu, ni ídifua iéngi ia-nda ku kuatekesa ku kumbidila o kikutu kiê kia ku sidivila Jihova katé ku hádia ni hádia.—Tanga Nzuá 17:3; Jihebeleu 10:24, 25.

Phala kuijiia dingi, tanga o kibatulu 18 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?