O Kuila ua mu Londekesa o ku Bhenha Kua Jihova?
O Kuila ua mu Londekesa o ku Bhenha Kua Jihova?
‘Etu . . . tu londekesa o ku bhenha kua Jihova kála lumuenu.’ —2 KOL. 3:18.
KIEBHI KI UEJI TAMBUIJILA?
Sumbala tu akua ituxi, kiebhi ki tu tena kulondekesa o ku bhenha kua Jihova?
Kiebhi o misambu, ni kuia mu iônge, ku kuatekesa o ku bhana kijingu kua Nzambi?
Ihi i tena ku tu kuatekesa mu kulondekesa o ku bhenha kua Jihova?
1, 2. Mukonda diahi tu tena ku kala ni ídifua ia Jihova?
ETU enioso tua difuangana ni jitata jetu, mukonda dia kiki ki tu tokala ku diuana se tuívua muthu u zuela ku munzangala: ‘Eie ua difuangana ni tat’enu.’ Mba kilumba a mu amba: ‘Eie u ngi lembalesa mam’enu.’ Ana a mesena ku kaiela o phangu ia jitata jâ. O kuila etu ué kiene? Tu tena ku kaiela o phangu ia Tat’etu ia diulu Jihova? Sumbala ki tu tena ku mu mona, maji tu tena kuijiia o ídifua iê mu ku di longa o Maka mê, ki tu tala o ibhangelu iê, ni ku xinganeka mu Bibidia, bhenge-bhenge mu izuelu, ni ima ia bhange o Mon’a Nzambi Jezú Kristu. (Nzu. 1:18; Lom. 1:20) Etu tu tena kulondekesa o ku bhenha kua Jihova.
2 Ande dia ku bhanga Adá ni Eva, Nzambi uejidile kuila o athu eji tena ku belesela o vondadi iê, ni kulondekesa o ídifua iê, ni ku mu bhana kijingu. (Tanga Dimatekenu 1:26, 27.) Mu ku bhanga o ubhezelu ua kidi, tua-nda londekesa o ídifua ia Ió ua tu bhange. Se tu bhanga kiki, tua-nda kala ni ujitu ua kulondekesa o ku bhenha kua Nzambi, né muene ni ijila ia ixi ietu, ni ixi mua tu vualela, se tua di longo kiavulu, mba kana, ni kikonda kietu. Mukonda diahi? Mukonda “Nzambi kene ni kathombo ka athu. Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.”—Ika. 10:34, 35.
3. Mbote iahi i katula o Jikidistá mu ku sidivila Jihova?
3 O Jikidistá a a undu, alondekesa o ku bhenha kua Jihova. O poxolo Phaulu a mu undu ni nzumbi ikôla, ua soneka: ‘Uila kiki, etu enioso, ni pholo io futumune, tu kala mu londekesa o ku bhenha kua Jihova kala ki bhanga o lumuenu. Kuma o ku bhenha koko kua mu tunda kua Jihova, muene o Nzumbi.’ (2 Kol. 3:18) Kioso kia tuluka polofeta Mozé ku Mulundu ua Sinai, ni mabaia mua kexile o Dikuinhi dia Itumu, o pholo iê ia kexile mu bhenha mukonda Jihova ua zuelele nê. (Mak. 34:29, 30) Sumbala o Jikidistá nuka a bhitile ni kima kia bhiti ni Mozé, maji a tena ku sanguluka kioso kia tangela akuâ, ia lungu ni Jihova, ni ídifua iê, ni vondadi iê ia lungu ni athu. Kienhiki, kála o lumuenu, m’ukulu, o Jikidistá a a undu, ni jiphange jâ, alondekesa o ku bhenha kua Jihova ku mienhu iâ, ni mu ukunji uâ. ( 2 Kol. 4:1) O kuila ua mu londekesa o ku bhenha kua Jihova mu ukexilu uê ua kidistá, ni mu sidivisu iê ia ku boka o Utuminu?
TUA MESENA KULONDEKESA O KU BHENHA KUA JIHOVA
4, 5. (a) Kála Phaulu, ihi i tua mu bhânga na-iu? (b) O kituxi ki tu bhangesa ku bhanga ihi?
4 Mukonda tu jiselevende ja Jihova, tua mesena ku mu bhana kijingu ni kulondekesa ku bhenha ku Mubhangi uetu, mu ima ioso i tu bhanga. Maji ki tu tena ku bhanga ioso i tua mesena. Phaulu ua dibhana ué ni maka enhá. (Tanga Loma 7:21-25.) Phala ku jimbulula se mukonda diahi tua mu dibhana ni maka enhá, Phaulu ua soneka: “Ene oso ituxi a i te, a bhondalala, o bhu fuma ia Nzambi, i bhulula, ka tena-bhu.” (Lom. 3:23) Mukonda a lundula o kituxi kia Adá, o athu a a bhikisa ku ‘Sobha Kituxi.’—Lom. 5:12; 6:12.
5 O kituxi ihi? O ku bhanga o ima ioso ki i difu ni ídifua ia Jihova, kála o jinjila jê, o itumu iê, ni vondadi iê. O kituxi, ki zanga o ukamba ua muthu ni Nzambi. O kituxi ki bhangesa kuila ki tu tena ku bhanga kima kia iuka, kála o dinhanga u takula o sosa maji u lueza. Etu tu tena ku ta kituxi se ku ki mesena, mba mu ku lueza. (Dia. 15:27-31) O kituxi kiala mu manhinga a athu, kia a sondolola ku Mubhangi uâ. (Jisá. 51:5; Iza. 59:2; Kol. 1:21) Kienhiki o athu enioso kala mu ukamba ni Jihova, mukonda dia kiki kala ni ujitu ua kulondekesa o ku bhenha kua Nzambi. Se-ku phata kuila o kituxi, ki bheka jiphaxi, ki tolola o athu uoso.
6. Sumbala tu akua ituxi, kiebhi ki tu tena ku londekesa o ku bhenha kua Nzambi?
6 Sumbala tu akua ituxi, maji Jihova uene mu londekesa kuila ‘Nzambi ia ku bhana kidielelu.’ (Lom. 15:13) Muéne ua bhange kima phala ku katula o kituxi—o sata ia kukula kua Jezú Kristu. Mukonda dia ku kala ni kixikanu mu sata íii, lelu ki tu ‘abhika dingi a ituxi,’ maji tu tena kulondekesa o ku bhenha kua Jihova. (Lom. 5:19; 6:6; Nzu. 3:16) O ku kala ni ukamba uambote ni Nzambi, ku tu bhekela mabesá lelu, ni muenhu ua kalelaku ku hádia. Sumbala tu akua ituxi hanji, dibesá dia dikota, kuijiia kuila Nzambi u tu ehela ku londekesa o ku bhenha kuê!
LONDEKESA O KU BHENHA KUA NZAMBI
7. Ihi i tua tokala kuijiia ia lungu ni etu, phala tu tene kulondekesa o ku bhenha kua Nzambi?
7 Phala kulondekesa o ku bhenha kua Nzambi, tua tokala tu xikina kuila tu akua ituxi. (2 Mal. 6:36) Tua tokala kuijiia kuila a tu vuala mu kituxi, ni ku bhanga ioso phala ki tu te kituxi, phala tu tene kuia ku pholo, ni kulondekesa o ku bhenha kua Nzambi. Mu kifika, se tu ta kituxi, kála o ku tala o ufusa, tua tokala tu xikina kuila tua bhindamena kikuatekesu kia tufunga—ni ku bhanga ioso phala ku tambula o kikuatekesu. (Tiia. 5:14, 15) Kiki, kiene o kima kia dianga ki tua tokala ku bhanga, phala ku kala ni ukexilu u bhana kijingu kua Nzambi. Mukonda tu abhezi a Jihova, tua tokala ku di tonginina, phala kuijiia se tua mu belesela o itumu iê. (Jisa. 28:18; 1 Kol. 10:12) Né muéne se tuejiia kiá iene mu tu bhangesa ku ta o kituxi, tua tokala ku bhanga ioso phala tu tene kulondekesa o ku bhenha kua Nzambi.
8. Sumbala tu akua ituxi, ihi i tua tokala ku bhanga?
8 Jezú muene ngó o muthu ua bhiti mu ixi, uafú ka lueza mu ku bhanga o vondadi ia Nzambi, ni kulondekesa o ku bhenha Kuê. Sumbala tu akua ituxi, ki tu sokela ni Jezú, tu tena ku suína phala ku kaiela o phangu iê. (1 Phe. 2:21) Jihova u mona o nguzu ioso i tu bhanga, kioso ki tu di tunda kiambote, muéne u besoala o nguzu i tu bhanga phala kulondekesa o ku bhenha kuê.
9. Kiebhi o Bibidia i kuatekesa o Jikidistá a mesena ku belesela o itumu ia Nzambi?
9 O Mak’â Jihova, a tena ku muikina o njila ietu, phala tu di tunde kiambote. Tua tokala ku di longa, ni ku xinganeka mu maka u tu di longa. (Jisá. 1:1-3) O ku tanga o Bibidia izuua ioso ia-nda tu kuatekesa ku di tunda kiambote. (Tanga Tiiaku 1:22-25.) O kuijiia o Bibidia, kuene ku tu kuatekesa ku kala ni kixikanu, ku tu fidisa ué ku ta kituxi, ki suínisa o vondadi ietu ia ku bhana kijingu kua Jihova—Jisá. 119:11, 47, 48.
10. Kiebhi o musambu ki u tena ku tu kuatekesa ku sidivila Jihova ni muxima uoso?
10 Phala kulondekesa o ku bhenha kua Jihova, tua tokala tu ‘kolokota mu kusamba.’ (Lom. 12:12) Etu tua tokala tu samba kua Jihova, mu ku bhinga kikuatekesu phala tu tene ku mu sidivila kala kia mesena muéne. Kienhiki, tua tokala ku mu bhinga o nzumbi ikôla, ku bandekesa o kixikanu kietu, tu tena ué ku bhinga phala tu tene ku di bhana ni tendasá, ni ku bhinga uhete ua ‘ku longa kiambote o maka a kidi.’ (2 Tim. 2:15; Mat. 6:13; Luk. 11:13; 17:5) Kála o mona-ndenge u bhinga ku muendesa kua tat’e, etu ué tu bhinga ku tuendesa kua Tata ietu Jihova. Se tu bhinga o kikuatekesu kiê, phala ku mu sidivila ni muxima uoso, tu tena ku dielela kuila muéne ua-nda tu kuatekesa. Ki tu tokala ku banza kuila tuala ku mu bhindamesa! Maji mu musambu tu tena ku mu ximana, ku mu sakidila, ni ku bhinga ku tuendesa, bhenge-bhenge ki tu kala ni ibhidi, tu mu bhinga ku tu kuatekesa ku mu sidivila mu ukexilu u tena ku bhana kijingu ku dijina diê.—Jisá. 86:12; Tiia. 1:5-7.
11. Kiebhi o iônge i kuatekesa kulondekesa o ku bhenha kua Jihova?
11 Nzambi ua bhakula o jimbudi jê ku ‘kimbadi kia fiiele. (Mat. 24:45-47; Jisá. 100:3) O kimbadi kia fiiele, ua thandanganha ni ukexilu ua jiphange kulondekesa o ku bhenha kua Jihova. Mu iônge ietu muene mua tu bhana o itendelesu ia lungu ni uzuatelu uetu, ni ukunji uetu, kála ki tu sota o muthu u tunga phala ku iudika kiambote o kizuatu kietu, phala ki tu soke kiambote. (Jihe. 10:24, 25) Tua tokala tu bhixila mu iônge mu kithangana kia tokala, se ki tu bhixila mu kithangana kia tokala, ki tua-nda kuívua o ‘itendelesu,’ i tu kuatekesa ku kala ni ukexilu ua tokala ku jiselevende ja Jihova.
TU KAIELE O PHANGU IA NZAMBI
12. Kiebhi ki tu tena ku kaiela o phangu ia Nzambi?
12 Se tua mesena kulondekesa o ku bhenha kua Jihova, tua tokala ‘ku kaiela o phangu ia Nzambi.’ (Efe. 5:1) Tu tena ku kaiela o phangu ia Jihova mu ku banza kala muéne. O ku kala ni ukexilu ua ku bhukumuka, u tena ku ta o muenhu uetu mu iluezu. Tuejiia kuila o mundu a mu u longesa kua Satanaji o Diabhu, tua tokala ku suína phala ku zemba o ima ia zembe Jihova, ni ku zola o ima ia zolo muéne. (Jisá. 97:10; 1 Nzu. 5:19) Tua tokala kuijiia kuila kuala ngó ukexilu umoxi ua ku sidivila Nzambi, o ku bhanga o ima ioso phala ku mu ximana.—Tanga 1 Kolindo 10:31.
13. Mukonda diahi tua tokala ku zemba o kituxi? Ihi ia-nda tu kuatekesa o ku bhanga kiki?
13 Jihova ua zembe o kituxi, etu ué tua tokala tu ki zemba. O kuijiia o kidi kiki, ki tu suínisa kueha o ukexilu ua iibha, mu ku banza kuila tu tena ku bhanga kima kia iibha, mukonda ki kituxi. Mu kifika, tua tokala ku di langa ku athu akua ku lungulula o kidi, o kituxi ki tena ku tu bhangesa ku kamba kulondekesa o ku bhenha kua Nzambi. (Mate. 13:6-9) Ki tu tokala ku dibhana ni akua ku lungulula o kidi, mba muthu uamba kuila phange maji u bhukumukina Nzambi. Né muéne se o muthu iú ndandu ietu. (1 Kol. 5:11) Ki tu tokala kuívua o akua ku lungulula o kidi, mba ió a zuela kia iibha o kilunga kia Jihova. Mu kidi kiluezu kia dikota, né muéne o ku tanga o ima ia soneka, mba i moneka mu Internete.—Tanga Izaia 5:20; Matesu 7:6.
14. Phala kulondekesa o ku bhenha kua Nzambi, kídifua kiahi ki tua tokala ku kala na-kiu ni mukonda diahi?
14 O kulondekesa o henda, ukexilu uambote ua ku kaiela o phangu ia Tat’etu ia diulu. Kála muéne, tu tokala ué kulondekesa o henda. (1 Nzu. 4:16-19) O henda ietu ilondekesa kuila tu maxibulu a Jezú, ni kuila tu jiselevende ja Jihova. (Nzu. 13:34, 35) Mukonda tua lundula o kituxi, saí ithangana ki tu bhange o ima ia tokala, maji tua tokala ku suína phala kulondekesa o henda ietu mu ithangana ioso. O henda, ni ídifua ia mukua ia-nda tu fidisa, ku bhanga ima ia iibha, mba ku ta kituxi.—2 Phe. 1:5-7.
15. Kiebhi o henda i tu kuatekesa ku dibhana ni akuetu?
15 O henda i tu suínisa ku bhanga ima iambote ku akuetu. (Lom. 13:8-10) Mu kifika, o ku zola kaza dietu, kia-nda tu fidisa ku bhanga ima ia iibha mu ukaza uetu. O henda ku tufunga, ia-nda tu suínisa ku xila o kikalakalu kiâ, ni ku belesela o itendelesu iâ. O an’a a zola o jitata jâ, a belesela, a xila o jitata jâ, ka a zuela kia iibha. Se tu zola o jiphange jetu, ki tua-nda kua mona kuila etu tua beta-kota, ene ndenge, mba kuzuela nau sé ujitu. (Tiia. 3:9) O tufunga a zolo o jimbudi ja Nzambi, a ji langa ni henda ioso.—Ika. 20:28, 29.
16. O kulondekesa o henda ku tu kuatekesa kiebhi mu ukunji uetu?
16 O henda a tokala ué ku ilondekesa mu ukunji uetu. Mukonda dia henda ietu kua Jihova, ki tua-nda kuehela ku tu zozesa ku athu ka mesena ku tuívua. Mu veji dia kiki, tua-nda kolokota, mu ku boka o njimbu iambote. O henda ia-nda tu suínisa ku pelepalala kiambote o milongi ietu, ni ku kala ni uhete mu ukunji uetu. Se tu zola Nzambi, ni akuetu, ki tua-nda mona kuila o kuboka o Utuminu ki sidivisu iambote, mba a mu tu jijidika ku ki bhanga. Maji tua-nda mona kuila sidivisu ia ujitu, tua-nda ki bhanga ni kisangusangu kioso.—Mat. 10:7.
KOLOKOTA KULONDEKESA O KU BHENHA KUA JIHOVA
17. Mukonda diahi tu katula mbote mu kuijiia kuila tu tena ku lueza mu kulondekesa o ku bhenha kua Nzambi?
17 O athu oso kejiia kuila o kituxi kima kia iibha, maji etu tua k’ijiia. Kiki ki tu bhangesa ku bhânga ni kituxi. O kuijiia kuila tu akua ituxi, ku tu kuatekesa ku longa o kitongoluelu kietu, phala tu bhange ima iambote, kioso ki tu kala ni vondadi ia ku ta kituxi ku muxima uetu. (Lom. 7:22, 23) Tuejiia kuila etu ki tu tena mu nguzu ietu, maji Nzambi u tena ku tu bhana nguzu, phala tu bhange o ima ia tokala mu ithangana ioso—2 Kol. 12:10.
18, 19. (a) Ihi i tu kuatekesa ku di tunda kiambote mu ku luua ni Satanaji ni madimonho? (b) Ihi i tua tokala ku bhanga?
18 Se tua mesena ku bhana kijingu kua Jihova, tua tokala ku bhânga ni Satanaji ni madimonho mê. O Nzambi ietu u tu bhana o kibhakatu ki tu kuatekesa ku di tunda kiambote. (Efe. 6:11-13) Satanaji ka bhuila, muéne ua mesena ku nhana o kijingu kia tokala ngó kua Jihova. O Diabhu ué ua mu bhanga ioso phala ku zanga o ukamba uetu ni Jihova. Maji Satanaji uene mu kuata jisonhi kioso jimidi ja athu a ituxi, ki kala mala, ahatu, ni ana-ndenge, a kolokota mu kixikanu kiâ, ni ku bhana kijingu kua Nzambi! Kienhiki tua tokala ku kolokota ku bhana kijingu kua Jihova kála o ji-anju kia kola: “Eie u Jihova, Nzambi ietu! Kia ku fuama o ku tambula fuma ni ujitu, ni unéne. Mukonda eie Muene ua bhange ioso, o vondadi iê iene ia bhangesa o ima kuíza-ku, iene iala-ku mukonda diê.”—Dij. 4:11, NW.
19 Tua tokala ku kolokota mu ku bhana o kijingu kua Jihova ni kulondekesa o ku bhenha kuê, mu ithangana iambote, mba mu ibhidi. Muéne u sanguluka mu kuijiia kuila, athu avulu a mu bhanga ioso phala kulondekesa o ku bhenha kuê. (Jisa. 27:11) Tua tokala ku kala ué ni ibanzelu ia Davidi uimbi: “Ngi ku ximana [Jihova] Nzambi iami, ni muxima uami uoso; ngi jingisa jinga o dijina dié, sé ngó kufula, katé ku hádia ni hádia.” (Jisá. 86:12) Tua mu kingila o kizuua ki tua-nda londekesa o ku bhenha kua Jihova sé ku lueza, ni ku mu bhana kijingu katé ku hádia! O athu a belesela a-nda kala ni kisangusangu kiki. O kuila ua mu bhana kijingu kua Nzambi lelu, eie ua mesena ku bhanga kiki katé ku hádia?
[Ibhuidisu ia ku dilonga]
[Foto ku mbandu 30]
O kuila eie ua mu londekesa o ku bhenha kua Jihova mu maukexilu iâ?
