Zukama Kua Nzambi

“Tua ku Dióndo Tuehele tu Vutuke Kubhata Diê”

O kuila eie ua sidivile kiá Jihova? Ua mesena ku mu sidivila dingi, maji ua mesena kuijiia se muéne ua-nda ku xikina? Tua ku dióndo tanga kiambote o milongi íii, ni ia mukuá ia-nda kaiela. A iudika phala eie.

M UHATU ua xisa o kilunga kia Kidistá, uambe: “Eme nga sambe, nga ku dióndo Jihova ngi loloke, ngehele ngi vutuke ku bhata diê.” O kuila uala ni henda ia muhatu iú? O kuila ua xinganeka kiá: ‘Kiebhi ki divua Nzambi ia lungu ni ió a xisa o ubhezelu ua kidi? O kuila muéne u a lembalala? O kuila muéne ua mesena kuila ene a “vutuka kubhata?”’ Phala ku tambuijila o ibhuidisu íii tu tanga o izuelu ia soneka Jelemiia. Sé phata o i tambuijilu ia-nda sangulukisa o muxima uê.—Tanga Jelemiia 31:18-20.

Xinganeka o izuelu ia dianga ia Jelemiia. Ku muvu ua 740 A.K.K, ande dia izuua ia Jelemiia, Jihova uehela o dikuinhi dia miji ia utuminu ua Izalaiele ku a ambata ku ubhika ku akua Asídia. * Nzambi ua ehela ku tala o hadi íii, mukonda o mundu uê ua tele kituxi, ka mesenene kuívua o jingolokela ja kexile mu bhanga o jipolofeta. (2 Jisobha 17:5-18) Sumbala o mundu ua bhukumukine kiavulu, ia a ambata ku ubhika, o kuila ka kexile dingi mu sidivila o Nzambi iâ, ku ixi kuendele? O kuila Jihova ua a jimbile? O kuila muéne ueji xikina kuila ene a vutuka kubhata diê?

“Nga Diela Muene”

O mundu a uambata ku ubhika, ua diela. Jihova ua mono o ku luuala kuâ. Tala kiebhi Jihova kia tange o ku di tenda kua akua Izalaiele akexile mu ubhika, ua a luku dijina dia Ifalaíme.

Jihova uambe: “Nga k’ivu muene kiambote kuila Ifalaíme ua kexi muene mu ku di tenda.” (velusu 18) Muéne uevu o ku ditenda kua akua Izalaiele kioso kia kexile mu diela o kituxi kia tele. Saí ngijiie uambe kuila, o kizuelu “ku di tenda,” ki tena kulombolola “ku luuala, mba ku kala ni jiphaxi.” Ene exile kála mona ua bhukumuka ua luuala, u zambesa o mutué kioso kia banza o hadi ia di bhekela, ni ukexilu uambote ua kexile nau kubhata. (Luka 15:11-17) Ihi ia kexile mu zuela o mundu?

‘Eie ua ngi bazela. . . nga difuangana kala kana ka ngombe k’ejidila luua.’ (velusu 18) O mundu uejidile kuila a tokalele ku u kaxtikala. Mukonda akexile kála ngombe k’ejidila luua. Saí divulu diambe kuila, o kifika kiki kilondekesa kuila ene a sokelele ni ngombe, ‘ia beta ngó ni xikote kioso ki i bhukumuka.’

‘Ngi bhangese ku vutuka, phala ni ngi vutuke ni lusolo, mukonda eie u Jihova Nzambi iami.’ (Velusu18) Ene a diela ni muxima uoso ia dikola kua Nzambi. Ene a tele kituxi, maji kindala a mu bhinga o kikuatekesu phala ku a xikina dingi. Saí divulu dizuela: “Eie u Nzambi ietu—tua ku dióndo tuehele ku vutuka kubhata.”

‘Nga diela muéne . . . sonhi ja ngi kuata o pholo nga i te bhoxi, dia kuenda mu  ku sebhuluka kua unzangala.’ (Velusu19) O mundu ua diela o kituxi. Ene kexile ni jisonhi, ia xikina ué o kituxi kiâ. Ene a xikina kuila akua ituxi, a mono o hadi ia kexile mu tala ia a diela.—Luka 15:18, 19, 21.

O akua Izalaiele a diela. Ene a luualele kiavulu, ia fisala o kituxi kiâ kua Nzambi, ia xisa o ukexilu uâ ua iibha. O kuila o ku diela kuâ, kua bhangesa Nzambi ku a kuatela henda? O kuila muéne ueji ku a ehela ku vutuka kubhata?

‘Eme Nga-nda mu Kuatela Henda Iavulu’

Jihova ua zolele kiavulu akua Izalaiele. Muéne uambe: “Eme nga di bhange ngi tata phala Izalaiele, O Ifalaími muene phande-kumbi iami.” (Jelemiia 31:9) O kuila tata ia henda ueji tambulula mon’ê ua diela mu kidi? Tala kiebhi kia londekesa Jihova o henda iê ku mundu uê.

“Manhi Ifalaími ki mon’ami [nga mu solo]? [ki] Kamona kami ka makembu? Mukonda kioso ki ngi zubha ku mu zuela ima ia ku mu bhanga kia [iibha] hanji ngi mu xinganeka ni muxima uoso.” (Velusu 20) O izuelu íii i suínisa! Kála o tata ia henda Nzambi, ‘ua zuelela’ an’ê, mu ku a tendelesa mukonda dia ituxi iâ. Kioso kia ditunu ku mu ivua, muéne ua ehela ku ambata ku ubhika—ene a xisa o dibhata diê. Sumbala ua bhanene kaxtiku muéne ka a jimbi kana. Muéne nuka ueji bhanga kiki. O tata ia henda ka jimbié o tuana tuê. Kiebhi kia divu Jihova kioso kia mono kuila an’ê a diela ni muxima uoso?

“Kienhiki mixima moxi i ngi bhuá-mu mukonda dia muene, hanji nga-nda mu kuatela henda iavulu.” * (Velusu 20) Jihova ua-ndalele kiavulu o an’ê. O ku diela kuâ kua mu bhangesa ku kala ni henda, iu ua mesenene kuila ene a vutuka kubhata. Kála o tata a mu tange kua Jezú, ua kexile ni mona ua vutuka kubhata, Jihova ‘anga henda ia an’ê i mu kuata,’ ua mesenene ku sangesa o an’ê kioso kieji vutuka kubhata—Luka 15:20.

“Jihova Ngehele ngi Vutuke Kubhata!”

O izuelu ia Jelemiia 31:18-20, i tu longa o henda ia Jihova. Nzambi kene mu jimba oso a mu sidivile kiá. Abha se o athu enhá a mesena ku vutuka ko kuê? Nzambi “u lenguluka kuloloka.” (Jisálamu 86:5) Muéne nuka ua-nda dituna oso a mesena ku mu sidivila ni muxima uoso. (Jisálamu 51:17) Muéne u sanguluka, u a sangesa kioso kia vutuka kubhata.—Luka 15:22-24.

O muhatu tua mu tange ku dimatekenu ua vutuka kua Jihova, iu uai mu kididi kia ubhezelu kia Jimbangi ja Jihova. Ku dimatekenu ka tenene ku jimba o kima kia bhangele. Muéne uambe, “nga kuata jisonhi.” Maji o tufunga mu kilunga a mu suínisa, ia mu kuatekesa ku kala dingi ni ukamba ni Jihova. Muéne uambe ni muxima uezale ni kisakidilu, “kima kiambote kuijiia kuila Jihova ua ngehela ku vutuka kubhata!”

Se eie uexile kiá selevende ia Jihova, se ua mu banza ku vutuka, tua ku suínisa kuia mu kididi kia ubhezelu kia Jimbangi ja Jihova. Lembalala kuila Jihova u tambuijila ni henda ioso, se o jiselevende jê ji diela a mu bhinga: “Tua ku dióndo tuehele tu vutuke kubhata.”

[Tanga mu luji]