‘A a Tumina Jinga Kuzuela Kuala o Nzumbi Ikôla’
‘A a Tumina Jinga Kuzuela Kuala o Nzumbi Ikôla’
“Mukonda o ikanenu ia zuela o jipolofeta, ka izuela ku vondadi ia’thu. Maji ene a zuela jinga mu ku kutula o njimbu ia tunda kua Nzambi kala kia a tumina ku Nzumbi Ikôla.”—2 PHE. 1:21, NW.
MAKA PHALA KU XINGANEKA
Kiebhi o nzumbi ikôla kia jimbulula o njimbu ia Nzambi ku asoneki a Bibidia?
Ihi ilondekesa kuila o Bibidia ia tokala kua Nzambi?
Ihi i ua tokala ku bhanga izuua ioso phala ku uabhela o mak’â Nzambi?
1. Mukonda diahi tua bhingi o Mak’â Nzambi?
KUEBHI ku tua tundu? Mukonda diahi tuala mu ngongo? Tua múia kuebhi? Mukonda diahi o mundu uala kiki? Ihi i bhita n’etu kioso ki tu fuá? Athu avulu ene mu bhanga o ibhuidisu íii. Kiebhi ki tu tena ku sanga o itambuijilu ia ibhuidisu ia maka enhá, se ki tu kexile ni Mak’â Nzambi? Sé o Mak’â Nzambi, tueji bhanga ngó o ima mu kilunji kietu. Se tu dielela mu kilunji kietu, o kuila o ibanzelu ietu ieji difua ni ia mukua Jisalamu ia lungu ni “ngonge ia Jihova?”—Tanga Jisálamu 19:7.
2. Ihi ia-nda tu kuatekesa ku kolokota ku zola o mak’â Nzambi, o ujitu ua tu bhana Nzambi?
2 O kima kia iibha lelu, o athu ene mu zoza ku henda ia kexile na-iu ku dimatekenu ku milongi ia Bibidia. (Sokesa ni Dijingunuinu 2:4.) Ene ka mu kuenda dingi mu njila ia uabhela Jihova. (Iza. 30:21) Ki tu tokala kuehela kuila kiki ki bhita n’etu. Tu tena ku bhanga ioso phala ku zola kiavulu o Bibidia, ni milongi iê. O Bibidia ujitu ua beta-kota, ua mu Mubhangi uetu ua henda. (Tiia. 1:17) Ihi ia-nda tu kuatekesa ku zola kiavulu o “Mak’â Nzambi?” O kima ki tena ku tu kuatekesa, o ku xinganeka kiebhi kia tumina o asoneki a Bibidia ku i soneka. Ku bhinga ku xinganeka mu jipolova ji londekesa kuila Nzambi ua tumina ku i soneka. Se tu bhanga kiki, kia-nda tu suínisa ku tanga o Mak’â Nzambi izuua ioso, ni ku belesela o milongi iê ku muenhu uetu.—Jihe. 4:12.
KIEBHI KIA ‘A TUMINA KU NZUMBI IKÔLA?’
3. Kiebhi o asoneki a Bibidia kia ‘a tumina ku nzumbi ikôla?’
3 Tundé ku muvu ua 1513 A.K.K, katé ku 98 K.K.—kua bhitile kiá 1.610 dia mivu—40 a mala a soneka o Bibidia. Saí iâ exile ji polofeta ‘a tumina ku nzumbi ikôla.’ (Tanga 2 Phetele 1:20, 21.) Mu Ngeleku o kizuelu “a a tumina,” kilombolola “ku katula bhu kididi, phala ku iambata bhu kididi kiéngi,” o “kizuelu kiki a tena ku ki jimbulula mu maukexilu avulu, kala: ku a tuma, ku a tumina, kuehela ku a tumina.” * O divulu dia Ikalakalu 27:15, di tumbula o kizuelu kiki phala ku jimbulula ulungu ua ambata ku kididi kiéngi ku mulenge. O jipolofeta ja Nzambi a a ‘tumina ku Nzumbi ikôla’ ni kuila Nzambi ua kexile mu zuela na-u, ku a tumina, ni ku a tumina bhu kaxi ka nguzu ia Nzambi ia tenene. Kiki kilondekesa kuila ene ka soneka mu kilunji kiâ, maji a soneka o ibanzelu ia Nzambi. Saí ithangana o jipolofeta kejidile o ima ia kexile mu soneka, mba ia kexile mu kanene. (Dan. 12:8, 9) Kienhiki, o “Mikanda ioso ia bhusu Nzambi” ki ia tokala ku athu.—2 Tim. 3:16.
4-6. Kiebhi Jihova kia kexile mu bhana o njimbu iê ku asoneki a Bibidia? Bhana kifika.
4 Kiebhi o nzumbi ikôla ia jimbulula o njimbu ia Nzambi ku asoneki a Bibidia? O kuila ene a tambula kisoneku kia tokalele ku soneka mu izuelu iâ? Xinganeka o mukua uenji u soneka o mukanda. Se ku bhinga ku soneka mukanda, o xefe u zuela o ima ia tokala ku soneka ku musoneki uê ua muhatu, kizuelu ni kizuelu. O musoneki u soneka, mu kusuka-ku o xefe u ta-ku o kidimbu kiê. Mu ithangana ia mukuá muéne u zuela ngó o ima ia beta-kota, o musoneki uê u soneka o mukanda mu ukexilu uê. O mukua uenji u tanga se a u soneka kia mbote, se ku bhingi, o musoneki u lungulula o ima ia tokala. Mu kusuka-ku, o xefe u ta o kidimbu kiê, o athu a-nda kuijiia kuila o mukanda ua xefe.
5 Kiene kimoxi ué, saí jimbandu ja Bibidia jo soneke ni “mulembu ua Nzambi.” (Mak. 31:18) Saí ithangana, Jihova ua tumina ué ku soneka. Mu kifika, mu divulu dia Makatukilu 34:27, tu tanga: “Nzambi anga uambela dingi Mozé, uixi: Maka oso iá, soneka-u, mukonda, kala kia lombolola o maka enhá, nga te kikutu kiami n’eie ni Izalaiele.’” Kiene ué kimoxi, Jihova uambela o polofeta Jelemiia: ‘Maka oso u ngene mu ku tangela, soneka-u mu divulu.’—Jel. 30:2.
6 Mu ithangana ia mukuá, Jihova ka kexile mu zuela, maji mu madiuanu, ua kexile mu ta ku muxima ni mu kilunji kia asoneki a Bibidia. Kiki kia a bhangesa kuila ene a sola o izuelu phala kuzuela, kála kiambe o divulu dia Ndongixi 12: 10. “O Ndongixi iú ua sota njinga maka ambote, iú ua soneka ni kuiuka o maka a kidi.” O musoneki Luka ua soneka, ‘ki nga zubha ku ibhuidisa kiambote tunde ku ia tundile, nga-ndala ku ku sonekena-iu mu kimoxi-kimoxi.’ (Luk. 1:3) O nzumbi ia Nzambi ia bhangesa ioso phala o athu a ituxi ka zange o njimbu iê.
7. Kiebhi ki tu mona o unjimu ua Nzambi mu ku tumina athu akua ituxi ku soneka o Bibidia?
7 O unjimu ua beta-kota ua Nzambi, ua ulondekesa kioso kia tumina o athu akua ituxi ku soneka o Bibidia. O izuelu ki i tu longo ngó, maji ilondekesa kiebhi kia kexile mu divua, ni ibanzelu iâ. Se Jihova ua tumine o ji-anju ku soneka o maka mê? O kuila ene eji tena kulondekesa o ibanzelu ia athu, kala o uôma, o ku luuala, kuene ku mundu? O kuehela kuila o athu akua ituxi a soneka o njimbu ia tambula ku nzumbi, Nzambi u bhana o njimbu iê ni henda ioso, i sangulukisa o mixima ia athu!
IHI ILONDEKESA KUILA O BIBIDIA MAK’Â NZAMBI
8. Mukonda diahi tu tena ku zuela ni kidi kioso kuila o Bibidia ki i difu ni madivulu a jingeleja?
8 Ima iavulu ilondekesa kuila o Bibidia Mak’â Nzambi. O Bibidia i tu ijidisa Nzambi, mukonda se-ku divulu dia ngeleja di tena ku bhanga kiki. Mu kifika, o ilongesu ia akua Hindu, a i soneka mu madivulu a mimbu védico, ni madivulu a jimbulula o ijila ia mimbu íii, o kikutu a ki xana Upanichades, ni misoso a i xana Ramayana, ni Mahabharata. O Bagavat Gita, divulu muala ilongesu, mbandu ia Mahabharata. O Tipitaka Budista, (“Madivulu Atatu”) dimoxi dizuela o ukexilu uambote ua tokala ku kala nau o athu a tungu kumoxi, o ji monge, ji madele. O dia mukuá dizuela o ilongesu ia Jibudistá. O dia katatu a soneka-mu o ilongesu ia Buda. O Buda kambe kuila muéne uexile Nzambi, ka zuela kiavulu maka alungu ni Nzambi. O ilongesu ia confucionismo, i tanga ima ia bhiti ni ukexilu ua tokala ku kala nau o athu, ni ilongesu ia iphata, ni mimbu. Mu kidi o divulu dikola dia ngeleja islamica, di longa Mak’â Nzambi, iamba kuila, muéne ngó, uejiia ioso, u tanga o ima ki luua i bhita, u tanga o ima ioso ia tokala ku bhita, maji ki di tumbula o dijina dia Jihova, a di soneka kiavulu mu Bibidia
9, 10. Ihi i tu di longa ia lungu ni Nzambi ia Bibidia?
9 O madivulu a jingeleja ka zuela kiavulu Mak’â Nzambi, maji o Bibidia i tu kuatekesa kuijiia Jihova Nzambi, ni ima ioso ia bhanga. Kiki ki tu kuatekesa ku mona o ídifua iê. O Bibidia ki zuela ngó kuila Nzambi Muteni-a-ioso, mukua unjimu, ua iuka, maji muéne Nzambi ua tu zolo. (Tanga Nzuá 3:16; 1 Nzuá 4:19.) O Bibidia i tu tangela ué kuila: “Nzambi kene ni kathombo ka athu. Maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.” (Ika. 10:34, 35) O kidi kiki tu ki mona, mukonda kuene nzungule ia ji Bibidia. O athu a di longa o madimi, a zuela kuila bhu kaxi ka 6.700 a madimi ene mu zuela ku mundu, lelu kuala 100 ia madimi, ku hama ia athu, 90 athu ala ni Bibidia mundu a zuela o madimi enhá. Mukonda dia kiki, o Bibidia ene mu i bhanga ia tenena, mba mu jimbandu, mu 2.400 ja madimi ndenge. Athu avulu ku mundu ala na-iu, ki kala mbandu, mba ia tenena.
10 Jezú uambe: “Tata iami ua mu kalakala katé kindala; eme uami ngi kalakala.” (Nzu. 5:17) Tundé xahulu katé ku hádia, Jihova muéne o Nzambi u nangenena!. Kienhiki xinganeka mu ima ioso ia bhange! (Jisá. 90:2) O Bibidia i tu longa o ima ia bhange Nzambi m’ukulu, i tanga o ima ia-nda bhanga ku hádia. O Bibidia i tu tangela ué ihi ia uabhela Nzambi, ni ihi ia zembe, i tu londekesa ué kiebhi ki tu tena ku mu zukama. (Tiia. 4:8) Ki tu tokala kuehela kuila kima kioso-kioso, ki tu sondola kua Nzambi.
11. Unjimu uahi ua beta-kota u tu sanga mu Bibidia?
11 O unjimu u tu sanga mu Bibidia, ulondekesa ué kuila o divulu didi dia tokala ku muthu ua beta-kota mu unjimu. O poxolo Phaulu ua soneka: “Nanhi u tena kuijiia o muxima ua [Jihova]? Nanhi muène u tena ku mu longa kaiula?” (1 Kol. 2:16) O velusu íii ia lungu ni kibhuidisu kia bhange o polofeta Izaia ku athu mu izuua iê: “Mukuahi uendesa o Nzumbi ia Jihova? Ndongixi kuxi, ua mu longesa?” (Iza. 40:13) Se-ku muthu u tena o ku tambuijila. Se-ku phata kuila o milongi ia lungu ni ukaza, ni ana, ni utonokenu ni ukamba, ni kidi, ni ukexilu uambote, u bheka ku zediua sé ku lueza! Ki tua-nda sanga milongi ia iibha mu Bibidia. O athu kala ni unjimu ua ku bhana milongi i bheka ku zediua kua kidi. (Jel. 10:23) O milongi iâ, ene mu i lungulula kiavulu kioso kia mona kuila ia lueza, o Bibidia izuela kuila: “Jihova uejiia muene o kuxinganeka kua muthu, kuma usemenhi uoso.”—Jisá. 94:11.
12. O Bibidia ia bhuluka ku nguzu iahi iene mu bhanga o athu?
12 O kima kia mukuá ki tu londekesa kuila o Bibidia ia tokala kua Nzambi, tu ki mona mu nguzu ia bhange o athu phala ku jiminisa o njimbu iê. Ku muvu ua 168 A.K.K., o Sobha ia Sídia Antíoco IV, ua mesenene ku sanga o madivulu a Kitumu phala ku a oha. O Sobha ia Loma Diocleciano, ua tumina ku buika o ididi ioso mua kexile ku diongeka o Jikidistá, ni kuoha o madivulu oso ku muvu ua 303 K.K. O kibuika kiki, kia nangenena mivu iavulu. Tundé ku hama ia 11, o papa muene ua kexile ku pholo phala ku fidisa kuila o Bibidia ka i lungulule mu madimi a mukuá. Sumbala ni nguzu ia Satanaji ni makamba mê, o Bibidia iene hanji katé mu izuua ietu. Jihova kehela kuila muthu u jikinisa o ujitu uê ua bhana ku athu.
IMA IAVULU I BHANGESA ATHU KU XIKINA KUILA O BIBIDIA, MAK’Â NZAMBI
13. Kiebhi ki tu tena kuijiia kuila o Bibidia Mak’â Nzambi?
13 Saí jipolova ja mukuá ji londekesa kuila o Bibidia divulu dikola: Dia dilungu mu kidi, dizuela maka alungu ni jingijiie, dizuela o ikanenu ia dikumbidila kiá, di tena ku lungulula o mienhu ia athu, di tanga misoso ia kidi, di tambuijila o ibhuidisu ia moneka mu kaxi ka 1. Tu di longe ihi ia kuatekesa o athu ku mona kuila o Bibidia Mak’â Nzambi.
14-16. (a) Ihi ia xikanesa o muxulumanu, ni mukua Hindu, ni kilumba ua kexile ni phata kuila kuene Nzambi, ni kuila o Bibidia ia tokala kua Nzambi? (b) Maka ahi a ku uabhela alondekesa kuila o Bibidia Mak’â Nzambi a tena ku longa mu ukunji uê?
14 Solomá * uexile muxulumanu tundé mu undenge ku Oriente Médio. Kioso kiai mu tunga ku América do Norte, o Jimbangi ja Jihova a mu kundu kubhata diê. Solomá uambe: “Mu kithangana kieniókio eme nga zembele o jingeleja ja Kidistá, mukonda dia ima ia iibha ia kexile mu bhanga, maji mukonda nga uabhela kuijiia o ima, nga xikina ku di longa o Bibidia.” Mu ku bhita kithangana, Solomá ua vutuka kubhata, nuka dingi ua di sangele ni jimbangi ja Jihova. Kioso kiai ku Europa, muéne ua mateka ku di longa o Bibidia, iu ua mono kima: “O i kumbidilu ia ikanenu ia Bibidia, ni Kidi kia Bibidia, ni kuila o asoneki a Bibidia, oso a zuela kima kimoxi ngó, ni henda iene mu londekesa o Jimbangi ja Jihova, ia mu xikinisa kuila o Bibidia iene o mak’â Nzambi.” Kienhiki Solomá a mu batizala ku muvu ua 1998.
15 O kilumba a mu i xana Santa, uala ni 16 dia mivu, o muiji uê akua Hindu. Muéne uambe: “Nga kexile mu samba ngó kioso ki nga kexile mu ibhidi, maji ki ngi kexile mu banza Nzambi kioso o ima ku muenhu uami ia kexile mu kuenda kiambote.” Muéne uambe dingi: “Kioso o Jimbangi ja Jihova kia phupha ku dibhitu diami nga lungulula o ukexilu ua muenhu uami.” Santa ua mateka ku di longa o Bibidia, iu kituka kamba dia Jihova. Ihi ia mu xikinisa kuila o Bibidia o mak’â Nzambi? Muéne uambe: “O Bibidia ia tambuijila o ibhuidisu iami ioso. Kiki kia ngi kuatekesa ku kala ni kixikanu kua Nzambi—sumbala se ku mu mona, se ku bhinga kuia mu ngeleja ku fukamena kiteka.”
16 Phaula a mu sase mu Katolika, kioso kia kituka kilumba, muéne ua ditunu ku xikana Nzambi. Maji saí kima kia bhiti. Muéne uambe: “Eme nga kexile ni di kamba, nuka dingi tua di monene. Tundé ki tua kexile mu tonoka. Kioso ki nga mono kuila muéne ua lungulula o ukexilu uê—lelu ua zele, iu ua sanguluka—nga mu ibhula: ‘Ihi ia bhiti n’eie, ni kuebhi ku ua kexile?’ Muéne ua tambuijila kuila ua kexile mu di longa ni Jimbangi ja Jihova, muéne ua mateka ku ngi tangela o Mak’â Bibidia.” Kioso kia mono o kutena kua Bibidia ku lungulula o ukexilu ua athu, o kilumba kiki, ua xikana kuma o Bibidia Mak’â Nzambi.
“MAKA MÊ KANDEIA KA INAMA IAMI”
17. Kiebhi ki ku kuatekesa o ku tanga ni xinganeka o Mak’â Nzambi?
17 O Bibidia ujitu ua tu bhana Jihova bhu kaxi ka nzumbi ikôla. Se u i tanga izuua ioso, ua-nda i uabhela kiavulu, ua-nda zola ué kiavulu Nzambi. (Jisá. 1:1, 2) Samba ande dia ku mateka ku di longa o Bibidia, mu ku bhinga o nzumbi ia Nzambi phala kuendesa o ibanzelu iê. (Luk. 11:13) Mu Bibidia muala ibanzelu ia Nzambi, kioso ki u xinganeka ua-nda bhanga kuila o ibanzelu ia Nzambi i kala o ibanzelu iê.
18. Mukonda diahi ua mesena ku suluka ni ku di longa o Bibidia?
18 Kioso ki uia ni ku kula mu Mak’â Nzambi, kumbidila ioso i uene mu di longa. (Tanga Jisálamu 119:105.) Tonginina kiambote o Mikanda Ikola kála ki uene mu di tonginina mu lumuenu, se u moma kuila saí kima ki ua tokala ku lungulula, lungulula-kiu. (Tiia. 1:23-25) O Mak’â Nzambi a tokala a kala xibhata phala ku zokela o kixikanu kiê, ni ku batula o ilongesu ia makutu ku mixima ia athu a mesena kuijiia o kidi. (Efe. 6:17) Kioso ki uia ni ku bhanga kiki, ua-nda sakidila kuila o jipolofeta ni maiala a soneka o Bibidia a ‘a tumina ku nzumbi Ikôla.’
[Tanga mu luji]
^ kax. 3 Léxico Grego-Inglês do Novo Testamento e de Outra Primitiva Literatura Cristã.
^ kax. 14 O majina a a lungulula.
[Ibhuidisu ia ku dilonga]
[Kilombuelelu ku mbandu 32]
Se u tanga o Bibidia izuua ioso, ua-nda i uabhela kiavulu, ua-nda zola ué kiavulu Nzambi
[Foto ku mbandu 29]
O kidimbu ku mukonda kilondekesa se o mukanda ua nanhi
