Ehela Jihova N’a ku Bhane o Ufôlo ua Kidi
Ehela Jihova N’a ku Bhane o Ufôlo ua Kidi
‘Ívua o kitumu kia iuka, o kitumu kia tokala ku ufôlo.’ —TIIA. 1:25.
U TENA KU JIMBULULA?
Kitumu kiebhi ki tuambata ku ufôlo ua kidi, ni mbote iahi i tu katula ku kitumu kiki?
Ihi i tua tokala o ku bhanga phala ku tambula o ufôlo ua kidi?
Ufôlo uahi ua kingila ió a kolokota mu njila ia muenhu?
1, 2. (a) Ihi ia mu bhita ni ufôlo ua mundu, ni mukonda diahi? (b) Ufôlo uahi ua mu kingila o jiselevende ja Jihova?
TUALA ku mundu uezala ni luímbi, ni ku xibhaka o itumu, ni ujibhangânga. (2 Tim. 3:1-5) Mukonda dia kiki, o jinguvulu ene mu bhanga dingi itumu, a bandekesa o masoladi, a bandekesa ué o ji makina ji langidila. Mu jixi ja mukuá saí athu, a ta ué ji makina ji langidila ku mabhata mâ, phala ku a dimuna, mba a bandekesa ji sabhi ku mabhitu. A mukuá a kala ni uôma ua ku tunda mu usuku mba kuehela o tuana tuâ ku tunda ubheka uâ—ki kale mu usuku mba mu muanha uatu. Mu kidi, o ufôlo ua mu bhua muene, tua mu mona kuma o ukexilu iú, ua-nda suluka.
2 Mu jaludim ia Edene, Satanaji uambe kuila, phala ku kala ni ufôlo ua kidi, ki ku bhingi ku belesela Jihova. Muéne uejidile kuila ua kexile mu ta makutu! Mukonda kioso athu kia bhukumukina o itumu ia bhana Nzambi, o mundu uoso u tala hadi. O hadi íii, i tula ué ku jiselevende ja Jihova. Maji etu, tua kingila o kizuua kia disukilu dia ubhika uoso ua kituxi ni ku bola, phala ku tambula o mabesá a tanga mu Bibidia kuila “ufôlo ua fuma, ua an’a Nzambi.” (Lom. 8:21) Jihova ua mateka kiá ku pelepalala o jiselevende jê, phala ku tambula o ufôlo iú. Kiebhi kia mu bhanga kiki?
3. Itumu iebhi ia bhana Jihova ku akaiedi a Kristu, ibhuidisu iebhi i tua-nda di longa?
3 O kitambuijilu tu ki sanga mu divulu dia Tiiaku diambe kuila, o ‘kitumu kia iuka, o kitumu kia tokala ku ufôlo.’ (Tanga Tiiaku 1:25.) O ji Bibidia ja mukuá, ji jimbulula o kizuelu kiki, “o kitumu ki tu bhulula” (Bíblia do Perigrino) ni “kitumu kia iuka kia ufôlo” (Bíblia de Jerusalém). O athu a sokesa o kitumu ni kijijidiku, ka ki sokesa ni ufôlo. O ‘kitumu kia iuka, o kitumu kia tokala ku ufôlo’ kilombolola ihi? O kitumu kiki ki tu bhulula kiebhi?
O KITUMU KI BHULULA
4. O ‘kitumu kia iuka, o kitumu kia tokala ku ufôlo’ kilombolola ihi, ni a nanhi a katula mbote mu kitumu kiki?
4 O ‘kitumu kia iuka, o kitumu kia tokala ku ufôlo,’ ki kiene o Kitumu kia bhana Nzambi kua Mozé, kia kexile mu londekesa o ituxi ia dikumbidila kua Kristu. (Mat. 5:17; Nga. 3:19) Maji Kitumu kiebhi kiambe Tiiaku? Muéne ua kexile mu zuela “o Kitumu kia Kristu.” A kixana ué ‘kitumu kia ku xikana Kristu’ mba ‘kitumu ki bhulula o mundu.’ (Nga. 6:2; Lom. 3:27; Tiia. 2:12) O kitumu kia iuka, kia lungu ni ima ioso i tu tumina Jihova. O Jikidistá a a undu, ‘ni jimbudi ja mukuá,’ oso a katula mbote mu kitumu kiki.—Nzu. 10:16.
5. Mukonda diahi o kitumu kia ufôlo ki ki bhonzo ku ki belesela?
5 O ‘kitumu kia iuka’ ki ki sokela ni itumu ia bhana o jinguvulu mu jimbanza javulu, o kitumu kia iuka ki kia neme ijila ni itumu ki ki bhonzo ku ki belesela. (1 Nzu. 5:3) Jezú uambe, “o ima iami ioso i ngi m’inda na-iu, ki i bhonzo; o kimbamba kiami ki ngi mi tuika, kia bhebhuluka.” (Mat. 11:29, 30) O ‘kitumu kia iuka,’ ki ki bhingi ku kizalesa ni ijila i bazela, mba itumu ia ku bhana kaxtiku, maji itumu ia henda, a i soneka ku mixima, ni mu ilunji, ki ku mabaia a matadi.—Tanga Jihebeleu 8:6, 10.
KIEBHI KI TU BHULULA O ‘KITUMU KIA IUKA’
6, 7. Ihi i tuamba ia lungu ni itumu ia Jihova, ni kiebhi ki i tu bhana o ufôlo?
6 O itumu ia bhana Jihova ku jiselevende jê, i sidivila phala o mbote iâ, ni ku a langa. Kála o itumu ia ibhangelu. O athu ka dikalanganza mukonda dia itumu íii. Mu veji dia kiki, ene a i bhana valolo a xikina kuila o itumu ia ibhangelu, itumu iambote phala a kale kiambote ku muenhu. Kiene kimoxi ué ni itumu ia Jihova, i tunda ku ‘kitumu kia iuka’ kia Kristu, phala mbote ia athu.
7 O kitumu kia ufôlo, ki ki tu langa ngó, ki tu kuatekesa ué ku katula mbote mu ima i tu bhanga sé ku diela, mba ku ta kituxi, mba ku katula o ufôlo ua akuetu. O ku kala ni ufôlo—o ku tena ku bhanga o ima ioso i tua mesena, ni ku kala ni ibanzelu iambote ia lungu ni vondadi ia Jihova, ni itumu iê. O kitumu kia iuka ki tu kuatekesa ku zola o ima ia zolo Jihova, ni ku zemba o ima ia zembe muéne.—Amo. 5:15.
8, 9. Mbote iahi ia katula oso a xikana o kitumu kia iuka? Bhana phangu.
8 Sumbala tu akua ituxi, tu suína phala kueha o jihanji ja xitu. Kioso ki tuia ni ku belesela o kitumu kia ufôlo, tu mona kuila, kitumu kia uabha. Mu kifika: Saí dixibulu dia ubhe a mu ixana Jay, ua kexile mu di longa o Bibidia, ua kexile ni kifua kia ku xibha makanha. Kioso kia di longo kuila Nzambi ua zembe o ukexilu iú, muéne ua solo ku bhanga kima. O kuila muéne ueji kolokota o ku belesela o jihanji jê, anga ueji belesela Jihova? Ni unjimu uoso muéne ua solo ku sidivila Nzambi, sumbala ua kexile hanji ni jihanji ja ku xibha makanha. Kiebhi kia divu kioso kieha o kifuá kiki? Mu ku bhita thembu muéne uambe: “Nga divu kiambote, nga bhuluka.”
9 Jay, ua mono kuila o ufôlo ua mundu, u bhangesa o athu ku kala ni ‘ibanzelu ia xitu,’ ubheka ubhika, maji o ufôlo ua Jihova, ulombolola “kilunji kia mu tumina kuala o Nzumbi,” u tu bhulula, u tu bhekela “muenhu ni kutululuka.” (Lom. 8:5, 6) Kuebhi kua tundu o nguzu ia Jay, phala ku tena kueha o kifua kiê? Ki mu nguzu iê kana, maji mu ngunzu ia Nzambi. Muéne uambe: “Nga kexile mu di longa o Bibidia sé ku fonga, ku bhinga o nzumbi ikôla, ni ku bhinga kikuatekesu ku jiphange mu kilunga, a mesenene kiavulu ku ngi kuatekesa.” O ima íii, i tena ué ku tu kuatekesa ku sanga o ufôlo ua kidi. Tu mone kiebhi.
ÍVUA O MAK’Â NZAMBI
10. Ihi ilombolola ‘kuívua’ o kitumu kia Nzambi?
10 O divulu dia Tiiaku 1:25, diambe: ‘Uoso-phe uivua o kitumu kia iuka, o kitumu kia tokala ku ufôlo, anga u ki jijila . . . u zediua mu ioso ia bhanga.’ O kizuelu ‘kuívua’ mu Ngeleku, kilombolola ku “kolokota,” ku bhinga nguzu iavulu. Se tua mesena kuila o kitumu kia tokala ku ufôlo ki tula mu kilunji kietu ni ku muxima, tua tokala ku di longa o Bibidia sé ku fonga, ni ku samba ni ku xinganeka mu milongi i tu di longa.—1 Tim. 4:15.
11, 12. (a) Kiebhi kia londekesa Jezú kuila, o kidi kia tokala ki kala ukexilu ua muenhu uetu? (b) Kala ki tua mu mona mu foto, kiluezu kiahi kia tokala kueha o minzangala?
11 Kiene kimoxi ué tua tokala tu ‘kolokota,’ o ku kumbidila o Mak’â Nzambi ku muenhu uetu. Jezú ua kilondekesa kioso kia mbela o athu a mu xikinine: ‘Se mu xalela mu maka mami, mu kala mu kidi mu maxibul’ami; o kidi mua-nda ku k’ijiia, o kidi anga ki mi bhulula.’ (Nzu. 8:31, 32) Saí divulu dizuela kuila, o ‘kuijiia kima,’ kilombolola ué “ku bhana valolo ku kima kiejiia, mukonda o kima kiki kiala ni valolo phala o muthu ua kijiia.” Kienhiki se ‘tuijiia o kidi mu ukexilu uoso, kia-nda kala ukexilu ua muenhu uetu. Kienhiki tu tena kuzuela kuila, ‘o Mak’â Nzambi’ ene mu tu ‘kalakela’ moxi dietu, a mu lungulula o ídifua ietu, phala tu kale ni ídifua ia Tata ietu ia diulu.—1 Tes. 2:13.
12 Dibhudise: ‘O kuila ngejiia kiambote o kidi? O kuila o kidi ukexilu ua muenhu uami? Anga nga mesena hanji o “ufôlo” ua mundu?’ Saí phang’etu ia muhatu a mu sase ku jitata jê Jikidistá, mu ku xinganeka mu unzangala uê, ua soneka: “Kioso ki u kula mu kidi, Jihova ka kuehela ubheka uê. Maji eme ki ngi muijidile. Ki ngi kexile mu zemba o ima ia zembe muéne. Ki ngi xikinine kuila muéne ua zembele o ima i nga kexile mu bhanga. Nuka nga mu bhingi kikuatekesu, kioso ki nga kexile ni maka. Nga kexile mu bhanga ioso mu unjimu uami, mukonda ki ng’ejidile kima.” O phange íii ua mono kuila ka kexile mu xinganeka kiambote, iu ua lungulula o ibanzelu iê. Muéne ua mateka ku kalakala mu sidivisu ia thembu ioso.
O NZUMBI IKÔLA I TENA KU U KUATEKESA KU KALA NI UFÔLO
13. Kiebhi ki tu kuatekesa o nzumbi ikôla ku kala ni ufôlo?
13 Mu divulu dia 2 Kolindo 3:17, tu tanga kuila: “Bhuoso-phe bhu kala Nzumbi ia [Jihova] bhu kala ufôlo.” Ihi i bhanga o nzumbi ikôla phala ku tu bhana ufôlo? Iene i tu kuatekesa ku kala ni ídifua iambote, i tu bhangesa ku kala ni ufôlo, kála—“Henda, ngalasa, kutululuka, kuxididika, kulenduka, kubhanga mbote, kukala fiiele kubelesela, ni ku di tumina jihanji.” (Nga. 5:22, 23) Se o athu ka kala ni ídifua íii, bhenge-bhenge o henda, o athu ka tena ku kala ni ufôlo—kiene ki tuene mu mona ku mundu lelu. Kioso kia jimbulula o kibundu kia nzumbi, o poxolo Phaulu uambe ué: “O ima kala iii, kana-ku kitumu kia ku i kidika.” Ihi ia mesenene kuzuela? O kibundu kia nzumbi kia Nzambi, se-ku kitumu ki somboka o kitumu kiki. (Nga. 5:18) Ihi i lombolola o kitumu kiki? Jihova ua mesena kuila tu kala ni ídifua iambote ku hádia ni hádia, sé kima ki tu fidisa.
14. Kiebhi o ukexilu ua mundu uene mu bheka ubhika ku athu a u kaiela?
14 O athu a mu kaiela o ukexilu ua iibha ua mundu, mu ku bhanga o jihanji ja iibha ja xitu, nange a banza kuila ala ni ufôlo. (Tanga 2 Phetele 2:18, 19.) Maji kiki makutu, ki kiene ki tuene mu mona. Kuene mu bhinga itumu iavulu phala ku fidisa o ima ia iibha iene mu bhanga o athu. Phaulu uambe: “O Kitumu ka ki bhangela muthu uaiuka, ‘maji a ki bhangela phala o athu a bhengala.’ (1 Tim. 1:9, 10) Ene ué abhika a ituxi, a mesena ku ‘bhanga o jivondadi ja xitu,’ o mesene ia iibha. (Efe. 2:1-3) Mu ukexilu uéngi, o athu a difuangana kála ibamba izalala bhu ditijela dia uiki. Mukonda dia ku touala kua uiki, ene mu a nganala.—Tiia. 1:14, 15.
KALA NI UFÔLO MU KILUNGA
15, 16. Mukonda diahi kima kiambote ku dilunga kumoxi ni jiphange mu kilunga, ni ufôlo uahi u tua-nda tambula?
15 Kioso ki ua mateka ku dilunga ni kilunga, eie kua dilungu ni kibuka kia athu akua mundu. Maji eie ua bokona mu kilunga mukonda Jihova muéne ua kuixana. (Nzu. 6:44) Mukonda diahi muéne ua bhange kiki? O kuila muéne ua mono kuila u muthu ua iuka, ua belesela Nzambi? Nange u tambuijila, “kana!” Ihi ia mono Nzambi? Muéne ua mono muxima u belesela o itumu iê ia ufôlo, muxima ueji xikana o henda ia londekesa. Jihova u dikila o muxima uê bhu kaxi ka kilunga, u ku bhulula ku milongi ia makutu, ni ku uôma, ni ku u bhangesa ku kala ni ídifua iambote, ia Kidistá. (Tanga Efezo 4:22-24.) Mu ku suka-ku, u kala bhu kaxi ka athu mu kilunga, a exana, ‘athu ala ni ufôlo.’—Tiia. 2:12.
16 Xinganeka: Kioso ki u kala bhu kaxi ka athu a zolo Jihova, eie u kala ni uôma? O kuila eie u kala mu di tungula? Kioso ki u kala mu kilunga o kuila uene mu kuata kiambote o ima iê phala ka ku nhane na-iu? Kana! Eie u divua kiambote, sé ku thandanganha ni kima. O kuila kiene ki ueji divua se ua kexile mu kibuka kia athu a mukuá? Sumbala kana! O ufôlo u uala nau bhu kaxi ka mundu ua Nzambi, o dimatekenu ngó dilondekesa o ufôlo u tua kingila ku tambula ku hádia.
“UFÔLO UA FUMA, UA AN’A NZAMBI”
17. Kiebhi o ufolo ua athu, ua lungu ni ‘ku tukuluka kua an’a Nzambi?’
17 Kioso kia zuela ia lungu ni ufôlo ua kanena Nzambi phala o jiselevende jê, Phaulu ua soneka: “O ibhangelu ioso ia xibhidila ni ku kinga o kithangana kia kutukuluka kua an’a Nzambi.” Uambe ué: “Ibhangelu ioso hadia ia kà jituka ku ubhika ua kubôla, hé ia kà bokona mu ufôlo ua fuma, ua an’a Nzambi.” (Lom. 8:19-21) “O ibhangelu,” ilombolola o athu a kingila ku tambula muenhu ua kalelaku mu ixi, ió a-nda katula mbote mu ‘ku tukuluka’ kua an’a Nzambi a a undu nzumbi. O ku tukuluka kuku, kua-nda mateka kioso o “ana” enhá kia-nda ku a fukununa mu nzumbi ni ku tumina ni Kristu, phala ku zelesa o ixi mu ku zubha o hadi ioso, ni ku langa o “mundu uavulu” a-nda kala ku mundu uobhe.—Dij. 7:9, 14.
18. Kiebhi o athu kia-nda tambula o ufôlo, ni ufôlo uahi ua-nda kala nau?
18 O athu a a bhulula, iá a bheka ku ufôlo—ka-nda kala dingi mu ubhika ua Satanaji, ni madimonho mê. (Dij. 20:1-3) Kua-nda kala ufôlo ua kidi! O 144.000 akaiedi’a Kristu, o akunji, ni jisobha, a-nda kolokota mu bhulula o athu, mu ku a bhana o mabesá bhu kaxi ka sata ia kukula, katé ki bhua o kituxi kia Adá. (Dij. 5:9, 10) O athu a di tunda kiambote ku jipolova, a-nda kala ni ufôlo ua kidi ua a kanena Jihova—o “ufôlo ua fuma, ua an’a nzambi.” Xinganeka! Ki kia-nda ku bhonza dingi phala ku bhanga o ima ia iuka bhu pholo ia Nzambi mukonda o mukutu uê uoso ki ua-nda kala dingi ni kituxi, ua-nda kala ni ídifua ia Nzambi.
19. Ihi i tua tokala o ku bhanga lelu phala ku kolokota mu njila ia ufôlo ua kidi?
19 O kuila ua mu kingila ku tambula o “ufôlo ua fuma, ua an’a nzambi?” Se ua mu kingila ehela kuila o muxima uê ni kilunji kiê a ki tumine ku ‘kitumu kia iuka, o kitumu kia [ufôlo].’ Kima kiambote ku dilonga o Bibidia se ku fonga. Ehela kuila o kidi ki kale o ukexilu ua muenhu uê. Samba mu ku bhinga o nzumbi ikôla. Katula mbote mu milongi i bhana Jihova mu kilunga. Kana kuehela Satanaji ku ku nganala kála kia nganala Eva, mu ku xinganeka kuila o itumu ia Nzambi i tu fidisa ku ima iambote. Ijiia kuila Diabhu njimu. Maji kala ki tua-nda di longa ku pholo ki tu tokala ku tu nganala kua ‘Satanaji, mukonda jindunge jê ki tu kambe ku j’ijiia.’—2 Kol. 2:11.
[Ibhuidisu ia ku dilonga]
[Jifoto ku mbandu 14]
O kuila ngandala hanji o ‘ufôlo’ ua mundu?
[Jifoto ku mbandu 14]
O kuila o kidi uene o ukexilu ua muenhu uami?
