Iala ni Kibanzelu Kimoxi Ngó

“Mukonda o ikanenu ia zuela o jipolofeta, ka izuela ku vondadi ia’thu. Maji ene a zuela jinga mu kutula o Njimbu ia tunda kua Nzambi kala kia endesa ku Nzumbi Ikôla.”—2 PHETELE 1:21, NW.

MUKONDA DIAHI O BIBIDIA IA DI TUNGULA? Sumbala athu avulu a soneka o Bibidia, maji né kiki kibanzelu kimoxi ngó. O madivulu a soneka o athu, mu ididi iavulu, mu ithangana ki i difu, ki iene mu kala ni kibanzelu kimoxi ngó. Mu Bibidia muala 66 a madivulu maji ia tokala ku Muthu umoxi ngó—iala ngó ni njimbu imoxi.—2 Timote 3:16.

MU KIFIKA: Mozé uexile kafunga ka jimbudi ku hama 16 A.K.K., ua soneka o madivulu atanu a dianga mu Bibidia, ua soneka kuila o mbutu ieji kuíza mu bhulula o mundu. Mu ku bhita kithangana, mu divulu didi ua soneka kuila o mbutu íii ieji tunda ku muiji ua Mbalahamu, Izake, ni Jakobo. (Dimatekenu 3:15; 22:17, 18; 26:24; 28:14) Mu ku bhita 500 ja mivu o polofeta Natane ua kanena kuila o mbutu ieji tunda ku muiji ua sobha Davidi. (2 Samuuele 7:12) Mu ku bhita midi ia mivu, o poxolo Phaulu ua tange kuila o mbutu, Jezú ni kibuka kia akaiedi a solo muene. (Loma 1:1-4; Ngalásia 3:16, 29) Ku disukilu dia hama ia dianga K.K., a kanena mu divulu dia sukina dia Bibidia kuila o athu a bhanga mbandu ku mbutu eji bhana umbangi ua lungu ni Jezú mu ixi, ni kuila eji ia ku diulu mu tumina nê mu 1.000 ia mivu. O mbutu íii ia-nda buika Diabhu ni ku bhulula o mundu.—Dijingunuinu 12:17; 20:6-10.

IHI I ZUELA AKUA KU TOKUESA O BIBIDIA: Kioso kia zubha ku tokuesa o 66 a madivulu a Bibidia, Louis Gaussen ua soneka kuila ua diuana mu “ku mona kuila o madivulu enhá a zuela kima kimoxi ngó, sumbala a a soneka ku athu avulu, mu midi ni hama jitanu ia mivu, . . . sumbala ene k’exile ni ufunu umoxi maji oso a suluka ni ku soneka kima kimoxi ngó, kala ejidile o ima ia kexile mu soneka, kuila kueji kuíza dizubhilu, ni kuila o mundu eji u bhulula kua Mon’â Nzambi.”—Theopneusty—The Plenary Inspiration of the Holy Scriptures.

IHI I U BANZA? O kuila eie ueji kingila kuma o divulu dio soneke 1.500 ja mivu ndenge, ku 40 a athu, di kala ni kibanzelu kimoxi ngó? Anga o Bibidia ngó i tena ku bhanga kiki?

[Kilombuelelu ku mbandu 7]

“Kioso kia bandekesa o isoneku íii, i kala divulu dimoxi ngó . . . Se-ku divulu ku mundu dia difu ni divulu didi.”​—THE PROBLEM OF THE OLD TESTAMENT, BY JAMES ORR