Iala ni Valolo Lelu

‘Maka mê kandeia ka inama iami, mukengeji u ngi muikina mu njila.’—JISÁLAMU 119:105.

MUKONDA DIAHI O BIBIDIA IA DI TUNGULA? Saí madivulu a tena ku a dielela, maji ka tena kuendesa muthu. O madivulu a lelu ene mu a lungulula ithangana ioso. Maji o Bibidia i zuela kuila, ‘ima ioso io sonekene m’ukulu mu Mikanda Ikola, a i sonekena phala etu ku di longa.’—Loma 15:4.

MU KIFIKA: Sumbala ki i zuela ihi ia tokala o ku bhanga o athu phala ku saka o mauhaxi, maji o Bibidia i bhana itendelesu ia tokala ia lungu ni sauidi. Mu kifika, o Bibidia i zuela ué kuila, o ‘muxima ua tululuka, u bhekela ku disanza mu mukutu.’ (Jisabhu 14:30) O Bibidia i tendelesa: “Uoso u kala ubheka uê, u sota ku bhanga o jivondadi jê, ka tena ku kala ni unjimu ua kidi.” (Jisabhu 18:1, NW) O Bibidia i zuela ué kuila, ‘o ku bhana kota mu ku zediuisa, o ku tambula ndenge.’—Ikalakalu 20:35.

IHI IA ZUELA AKUA KU TOKUESA: O ku tululuka, o ukamba uambote, ni ku uabhela o ku bhana, ku bheka sauidi. O Jurnale, Associação Médica Americana i zuela: “Athu a kala ni njinda iavulu, ene a beta-kota mu ku kala ni uhaxi, o ió ka kokoloka mu njinda ndenge.” O makuinhi a mivu a bhange ku ixi ia Austrália mu ku tokuesa, a mono kuila o athu a kuka kiá akexile “mu ibuka ia isangela ni makamba a kidi, ejiia ku bhaka kikutu,” a betele mu ku kola muenhu. Ku muvu ua 2008, akua ku tokuesa ku ixi ia Canadá ni ku ixi ia Estados Unidos, a mono kuila “o ku ngastala kitadi ni akuâ, ki bheka dingi ku zediua, o ku ngastala ubheka uê ndenge.”

IHI I U BANZA? O kuila eie ueji dielela ku itendelesu ia lungu ni sauidi mu divulu dia soneka 2.000 ja mivu ku dima? Anga o Bibidia ngó i tena ku bhanga kiki?

[Kilombuelelu ku mbandu 8]

“Phala eme, o Bibidia divulu dia beta-kota . . . mukonda muala itendelesu iambote ia lungu ni sauidi.”​—HOWARD KELLY, M.D., UA TOKALA KU KIBUKA KIA, THE JOHNS HOPKINS UNIVERSITY SCHOOL OF MEDICINE