Di Longe o Mak’â Nzambi

Mukonda Diahi Tua Tokala ku Tumbula o Dijina Dia Nzambi?

O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’eie.

1. Mukonda diahi Nzambi ua di luku dijina?

Sé phata, eie ua uabhela ku kuixana mu dijina diê, mu veji dia ku kuixana mu majina a ujitu, kála “diiala” “ngana” mba “muhatu.” O dijina, di kuatekesa ku u tungununa bhu kaxi ka athu. Nzambi a mu ixana mu majina a ujitu kála “Ngana Tata,” Nzambi Muteni-ia-ioso,” ‘Mubhangi.’ (Dimatekenu 15:2; 17:1; Ndongixi 12:1) Maji muéne ua di luku ué dijina diê phala ku tu kuatekesa ku kala ni ukamba ni muéne. Mu Kimbundu o dijina dia Nzambi, Jihova.—Tanga Izaia 42:8.

O dijina dia Nzambi di moneka 7.000, dia ji veji mu mikanda ia Hebalaiku, sumbala saí ji Bibidia o dijina dia Nzambi a di lungulula, ia a te-mu o majina a ujitu kála “Nzambi,” “Ngana.” Nzambi ua mesena kuila o athu ejiia o dijina diê.—Tanga Izaia 12:4.

2. Mukonda diahi o kuijiia o dijina dia Nzambi kima kia tokala?

O kuijiia o dijina dia Nzambi, ki ku bhingi ngó ku di tumbula. O kuijiia o dijina dia Nzambi, kulombolola ku kala ni ukamba ni muéne. O dijina, Jihova di jimbulula: “Muéne u Bheka ioso ia Mesena o ku Bheka.” Kiki kilombolola kuila Nzambi u bheka ioso ia mesena phala ku kumbidila o kikanenu kiê. Kienhiki, o kuijiia o dijina dia Nzambi, ku bhinga ué ku xikina kuila Nzambi ua-nda kumbidila o ikanenu iê. (Jisálamu 9:10) O kixikanu kia athu ejiia Nzambi, a tumbula o dijina diê, kiki kia a bhangesa ku mu dielela, ni ku dianga ku mu ta ku pholo ku mienhu iâ. Jihova Nzambi ua-nda langa o athu enhá.—Tanga Jisálamu 91:14.

  3. Mukonda diahi Nzambi ua mesena kuila athu ejiia o dijina diê?

Nzambi ua mesena kuila athu ejiia o dijina diê, n’a zediue ku mienhu iâ. O kuijiia o dijina dia Nzambi ku kuatekesa o athu ku kala ni ukamba ni Nzambi, ni ku kala ni kidielelu kia ku kala ni muenhu ua kalelaku. Jihova ua mesena kuila tu longa o dijina diê ku athu!—Tanga Nzuá 17:3; Loma 10:13, 14.

Jezú ua longo o dijina dia Nzambi ku athu mu ku a longa o mak’â Nzambi, o itumu iê ni ikanenu Iê. Lelu o akaiedi a Jezú a suluka mu ku boka, mu ku longa o dijina dia Nzambi ku athu a ifuxi ioso. Ene a bhanga o kikalakalu kiki kumoxi, mukonda ‘mundu ua Nzambi phala o dijina diê.’—Tanga Ikalakalu 15:14; Nzuá 17:26.

4. Kiebhi Nzambi kia-nda fumanesa o dijina diê?

Jihova Nzambi ua mesena ku ximanesa o dijina diê, mukonda o dijina a di xidisa kiavulu ni makutu. Mu kifika, saí athu amba kuila Nzambi ki muéne ua tu bhana o muenhu u tuala nau, ki tu tokala ué ku mu belesela. A mukuá amba kuila muéne ka tu suu, muéne ua bheka o hadi. O athu enhá a xidisa o dijina dia Nzambi. Maji ene ka-nda nangenena. Nzambi ua-nda buika o athu ene mu xidisa o dijina diê.—Tanga Jisálamu 83:17, 18.

Jihova ua-nda ximanesa o dijina diê, kioso o Utuminu uê, kia-nda buika o jinguvulu joso, ni ku bheka o kutululuka, ni ku kondama mu ngongo. (Daniiele 2:44) Kua kambe ngó bhofele, athu oso a-nda kuijiia kuila Jihova muéne o Nzambi ia kidi.—Tanga Izekiiele 36:23; Matesu 6:9.

Ihi i ua tokala o ku bhanga? Zukama kua Nzambi mu ku di longa o Maka mê, ni ku kala kumoxi ni ió a zolo muéne. Kioso Jihova kia-nda ximanesa o dijina diê, muéne ua-nda lembalala o jiselevende jê ja fiiele.—Malakiia 3:16.

Phala kuijiia dingi, tanga o kibatulu 1 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?

[Foto ku mbandu 10]

O dijina dia Nzambi mu isoneku ia Hebalaiku