Mukonda Diahi o Mukua Kuívua o Misambu Uehela o Hadi?

SAÍ ATHU sumbala a samba, maji ala hanji ni phata se kuene muene Nzambi. Mukonda diahi a kala ni phata? Nange o ku mona o hadi iavulu ku mundu iú. Ua di ebhuidisa kiá se mukonda diahi Nzambi uehela o hadi mu ngongo?

O kuila Nzambi ua bhange muene o athu kála ki tuala lelu—akua ituxi a tala hadi? Ki tueji tena ku xila nzambi u bhanga athu akua ituxi a tala o hadi. Maji xinganeka mu kifika kiki: Se eie u sanguluka mu ku tala dikalu dia ubhe, u di tonginina kiambote, anga u tala kuila saí-ku mbandu ku dikalu ia budika, o kuila ueji zuela kuila o dikalu didi a di bhange kiá kiki? Kana! Ueji banza kuila o dikalu a di bhange muene ni “ku iuka,” saí muthu ua di zange.

Kiene kimoxi ué, tu diuana mu ku mona o ima mu ngongo, maji kioso ki tu mona o kavuanza ka bhanga o athu ni ima ia mukuá ia iibha, ihi i tu banza? O Bibidia i longa kuila Nzambi ua bhange o dikaza dia dianga ni ku iuka, maji ene a di bhekela hadi mudiâ. (Matendelelu 32:4, 5) O njimbu iambote, o kuijiia kuila Nzambi ua kanena ku zubha o hadi ni ku bhangesa o athu a belesela ku kala mu palaízu sé kituxi. Mukonda diahi muéne ua mu kingila o thembu ioso íii?

Mukonda Diahi Uehela o Thembu Ioso Íii?

Muéne uehela o thembu ioso íii, phala kuijiia se nanhi ua tokala o ku tumina o mundu. Jihova ka bhange o athu phala ku di tumina mudiâ. Muéne ua tokalele ku a Tumina. O Bibidia i zuela ia lungu ni athu: ‘O njila ie-nda o muthu ki iene bhu lukuaku lua muthu muene.’ (Jelemiia 10:23) Maji o dikaza dia  dianga a solo ku bhukumukina o ungana ua Nzambi. O ukexilu iú ua a bhangesa ku ta kituxi. (1 Nzuá 3:4) Mukonda dia kiki, ene a kituka akua ituxi, a di bhekela malamba, ni ku mbutu iâ.

Tundé ukulu, Jihova uene mu kuehela o athu ku di tumina mudiâ, o ima ia bhanga, iene mu londekesa kuila o athu kala ni kutena kua ku di tumina mudiâ. Mu kidi, mautuminu oso ku mundu, ene mu bheka hadi ku athu. Se-ku utuminu ua tena ku zubha o ita, ujibhangânga, mba o mauhaxi.

Kiebhi Nzambi Kia-nda Zubha o Kuiibha Kuoso?

O Bibidia i kanena kuila kua kambe ngó bhofele, Nzambi ua-nda bheka mundu uobhe ua iuka. (2 Phetele 3:13) O athu a-nda kala ku mundu iú, o athu a sola ni ufôlo uâ ua a bhana Nzambi, ua ku zola akuâ, ni ku zola ué Nzambi.—Matendelelu 30:15, 16, 19, 20.

O Bibidia i zuela kuila “o Kizuua kia Kufundisa” kia zukama, ni kuila Nzambi ua-nda zubha o hadi ni athu a bheka o hadi. (2 Phetele 3:7) Kienhiki o Sobha a mu tumbika kua Nzambi, Jezú Kristu, ua-nda tumina o athu a belesela. (Daniiele 7:13, 14) Ihi ia-nda bhanga Jezú? O Bibidia i zuela: ‘Oso-phe a lenduka, ene a ka lundula o ixi; A ka kala mu ngalasa ni kutululuka kuavulu.’—Jisálamu 37:11.

Mukonda dia ku kala Sobha ia diulu, Jezú ua-nda zubha o kuiibha kuoso—kála, o mauhaxi, o ku kuka, ni kalunga—iéza mukonda dia athu ku bhukumukina Jihova, ‘o fixi ia muenhu.’ (Jisálamu 36:9) Jezú ua-nda saka athu oso a xikina o unguvulu uê ua henda. Mu unguvulu uê, o ikanenu íii ia Bibidia ia ka dikumbidila muene:

▪ ‘Ki bhua ka kala mukua bhata uila: “Nga mu kata.” Mukonda o mundu ua ka tunga-mu, ki ua ka kala dingi ni kikuma, mbata o ituxi iâ ioso a ka a loloka-iu.’—Izaia 33:24.

 ▪ ‘[Nzambi] u a kondona o masoxi moso ku mesu mâ! Ki ku kala dingi kufuá, né ngó mukôndo, mba kudila, mba ku kata. Mukonda ima ia diangele-ku, ia bhiti.’—Dijingunuinu 21:4.

Kiki ki ki tu suínisa kuijiia kuila kua kambe ngó bhofele, Nzambi ua ka kumbidila o kikanenu kiê kia ku zubha o hadi mu ngongo? Mu kiki, ki tu tokala ku zoza mu kidielelu kietu ku mukua kuívua o misambu ietu, mukonda dia kuehela o hadi mu ngongo.

Kuene muene Nzambi. Muéne u tena ku kuívua, katé muene ni jindolo jê ni ku kondama kuê. Muéne ua mesena kuila eie u sanguluka ku muenhu mu kithangana kia-nda zubha o jiphata jê ni jindolo jê.