Nanhi Uene mu Kuívua o Misambu?
Nanhi Uene mu Kuívua o Misambu?
SE KUENE muthu uivua o misambu, o muthu iú o Mubhangi ua ngongo. Nanhi dingi, se ki muene ngó, Ió ua bhange o uongo ua muthu, u tena kuijiia o ibanzelu ia athu? Nanhi dingi u tena ku tambuijila o misambu ni ku kuatekesa mu ibhindamu ia athu? Maji nange eie u dibhudisa, ‘o kuila tua tokala ku xikina kuila kuene muene Mubhangi?’
Athu avulu a banza kuma phala ku xikina kuila kuene Mubhangi, ki kala u dituna o kidi kia jingijiie lelu. Maji o ilongesu ia kuila o muthu u xikina mu uhete ua jingijiie, ka tena ku xikana kuila kuene muene Nzambi, ki ilongesu ia kidi. Tu xinganeke hanji.
▪ Ku 1.646 ia jimesene ku 21 a ji xikola ja katunda ku Estados Unidos, 549 dia jiselevende ngó ambe kuila, “ka xikina Nzambi.”
Maji jingijiie javulu a xikina kuila kuene muene Nzambi.
Ima ilondekesa kuila kuene muene Mubhangi
O kuila tua tokala ku xikina kuma kuene Muthu uivua o misambu né muene sé ku mona kima kia bhange? Kana. O kibanzelu kia kuila o kixikanu kilombolola ku xikina kima sé ku mona, ki kidi. O Bibidia iamba kuila o kixikanu kijila mu ‘ku dielela ku ima ia kidi, o ilondekesu i tu mona, ni ima kiluua i moneka.’ (Jihebeleu 11:1) O Bibidia ia mukuá i zuela kuila o kixikanu, “o ku dielela kua kidi ku ima ki tu tena ku i mona.” (Biblia na Linguagem de Hoje) Mu kifika, eie ku tena ku mona o matuta a mazui a mu bhita phala ku bokona mu matuta a mu mutelembe uê, maji u tena kuívua o mazui alondekesa kuma o mutelembe uê ua mu zuela mazui, a ku xikinisa kuila kuene matuta a mazui ki tu tena ku a mona; Kiene kimoxi ué, sumbala ki tu tena ku mona ió uene mu kuívua o misambu, maji tu tena ku mona o ilondekesu iê bhu kaxi ka ibhangelu iê, i tena ku tu londekesa kuila muéne muthu ua kidi.
Kuebhi ku tu tena ku sanga ima ilondekesa kuila kuene muene Nzambi? Tua tokala ku tala ngó o ima ia tu kondoloka. O Bibidia i zuela: “Kuma dibhata dioso di bhinga muthu u di tunga; ua tungu-phe o ima ioso, Nzambi.” (Jihebeleu 3:4) O kuila eie u xikina kuila kiki, kidi? Nange mu ku tala kioso kia sokejeka o ima mu ngongo, kiebhi kia bhange o muenhu, o ima ioso mu ixi, kiebhi kia bhange o athu, eie u xikina kuila saí muthu ua tundu o athu ua bhange o ima ioso. *
Maji o ima mu ngongo i tena ku tu longa ioso ia lungu ni Nzambi. O ku mona kuila kuene Nzambi bhu kaxi ka ibhangelu, kia difu ni kuívua makanda a muthu ua zukama bhu dibhitu diojike. Eie uejiia muene kuila saí muthu ua bhixila, maji nanhi-phe? Phala kuijiia se nanhi, eie ua tokala u jikula o dibhitu. Kiene kimoxi ué, tua tokala ku bhanga kima phala tuijiie o Muthu ua bhange o ima ioso mu ngongo.
O Bibidia, diene o dibhitu di tu kuatekesa kuijiia Nzambi. Kioso ki u jikula o dibhitu didi, u di longa o ikanenu ni kiebhi ki iene mu dikumbidila, ilondekesa kuila kuene muene Nzambi. * O misoso ia lungu ni Nzambi ku dibhana ni mundu uê, ilondekesa o ukexilu uambote ua Muthu uivua o misambu.
Nanhi-phe o Mukua Kuívua o Misambu?
O Bibidia i longa kuma o Mukua kuívua o misambu, muthu ua kidi, eie u tena ku mu ijiia. Mu kidi, muthu umoxi ngó u tena kuívua o misambu. Kienhiki kima kiambote o ku tanga: ‘Eie u mukua kuívua o misambu, ko kuê kuene ku bhongolokela o xitu ioso.’ (Jisálamu 65:2) Muéne uivua ió a samba kua muéne ni kixikanu. Muéne uala ni dijina. Mukonda o Bibidia i zuela: “Jihova athu a bhuma ua sanduka dikanga; maji uividila o musambu ua athu aiuka.”—Jisabhu 15:29.
Jihova u divua uê. Muéne “Nzambi ia henda,” a muixana ué “Nzambi ia ku sanguluka.” (2 Kolindo 13:11; 1 Timote 1:11, NW) O Bibidia i zuela kiebhi kia divu kioso kia vudile o kuiibha mu ngongo: ‘Kia mu bhekela dilamba ku muxima uê.’ (Dimatekenu 6:5, 6) O kizuelu kia athu, kiamba kuila Nzambi muene ua bheka o hadi phala ku polovala o athu, kizuelu kia makutu. O Bibidia i zuela: ‘Nzambi ka tena ku bhanga kia iibha.’ (Jobe 34:10) Maji nange eie u dibhudisa, ‘se Nzambi muene o Mubhangi Muteni-a-ioso, mukonda diahi muéne uehela o kuiibha o ku dimendala?’
Jihova ua bhana ku athu ufôlo ua ku sola, kiki ki tu longa kuila Nzambi ua a bhana ujitu. Ki tu tokala ku bhana valolo ku ufôlo uetu ua tu bhana, mu ku sola kiebhi ki tua-nda kuambata o muenhu uetu? Maji athu avulu ka bhana valolo ku ufôlo ua a bhana, katé muene a di bhekela hadi ni ku talesa hadi ku akuâ. O kibhuidisu kia mukuá ki tua tokala ku xinganeka, kiki: Kiebhi Nzambi kia-nda tena ku zubha o kuiibha mu ngongo, sé ku katula o ufôlo ua athu? Tua-nda di longa o kibhuidisu kiki ku pholo.
[Tanga mu luji]
^ kax. 8 Phala kuijiia dingi se kuene muene Nzambi, tanga o kadivulu, A Origem da Vida—Cinco Perguntas Que Merecem Resposta ni divulu, Existe um Criador Que Se Importa com Você?, mu phutu, a di bhange ku Jimbangi ja Jihova.
^ kax. 10 O kadivulu, Um Livro para Todas as Pessoas ni divulu, A Bíblia—Palavra de Deus ou de Homem?, mu phutu, a a di bhange ku Jimbangi ja Jihova, phala ku ku kuatekesa ku mona kuila o Bibidia divulu dia Nzambi.
[Kidikisu ku mbandu 5]
O Kuila o i Bhanga o Jingeleja, i ku Kuatesa Phata?
Mu kidi, o jingeleja jene mu bhangesa o athu ku kala ni phata se kuene muene Nzambi mukua henda uivua o misambu. Mukonda dia jingeleja ku di ta mu ita, mu ujibhangânga, ni kuehela o ukexilu ua ku zangata o ana, kiene mu bhangesa o athu ene mu samba, kuzuela kuila: “Eme ki ngi xikina kuila kuene Nzambi.”
Mukonda diahi o jingeleja jene mu bhana phangu ia iibha? Mu kima kimoxi: Saí athu a bhanga ima ia iibha mu dijina dia jingeleja. O Bibidia ia kanene kiá kuma mu ubhezelu ua kidi, mueji bokona athu a iibha, a-nda bhangesa akua ku bhanga ima ia iibha ki i lungu ni vondadi ia Nzambi. O poxolo Phaulu ua zuela ku tufunga mu ilunga: ‘ Mudienu muene, mua ka moneka athu a tanga ima ia makutu, ia kutondalesa, hé a sunga jixibulu ku mbandu iâ.’—Ikalakalu 20:29, 30.
Nzambi ua zembe o jingeleja ja makutu. Mu kidi, o Mak’â Nzambi o Bibidia iambe kuila o jingeleja ja makutu jene jala ni kikuma kia ku bhubhisa “manhinga . . . ma athu oso a a jibha jinga mu ngongo.” (Dijingunuinu 18:24) Mukonda o jingeleja ja makutu ja lembua o ku longa o athu o kidi kia lungu ni Nzambi ia kidi, o Nzambi ia henda. O jingeleja jiji ji bhangesa o athu ku bhanga o ima ia iibha, mukonda dia kiki jene jala ni kikuma kia ku bhubhisa manhinga bhu pholo ia Nzambi.—1 Nzuá 4:8.
O Mukua kuívua o misambu, u kala ni henda ia athu ene mu a nganala ku jingeleja. Kua kambe ngó bhofele, o henda ia Nzambi ku athu, ia-nda mu bhangesa ku fundisa o abhezi a makutu bhu kaxi ka Jezú. Jezú uambe: ‘Saí avulu a ka ng’ambela mu kizu’okio kuila: Ngana, kífua etu ki tua tele maka mu dijina diê? . . . Bhenhobho eme nga ká a tangela, ngixi: Eme ki nga m’ijidile. Tundenu bhu mbandu iami, enu mu ati a ituxi.’—Matesu 7:22, 23.
