O Kuila Kuene Muthu Uivua o Misambu?

“Nga kexile ni jiphata se kuene muene Nzambi. Maji né kiki, saí ithangana nga kexile hanji mu samba. Ki ngi kijidile se kuexile muthu u ngivua, maji nga kingile kuila muthu ku diulu uívua o misambu iami. Eme ki ngi zediuile, ki ngi kexile ni kidielelu ku muenhu. Ki nga mesenene ku xikina kuila kuene Nzambi, mukonda nga banzele kuila o athu a tobho, ene ngó a xikina kuila kuene Nzambi.”—PATRICIA, * IRLANDA.

O KUILA ua divuile kiá kála Patricia? O kuila eie uene mu samba, né muene ni jiphata se kuene muene Nzambi? Se kiki kiene, k’eie ngó kana. Di longe o phangu íii.

▪ Mu ku ebhuidisa 2.200 ja athu ku ixi ia Britânia, 484 a athu a tambuijila kuila, kuene muene Nzambi, muéne ua bhange o mundu, uivua o misambu. Maji 1.210 dia athu a a ebhuidisa, ambe kuila saí ithangana ene mu samba.

▪ Ku 10.000 dia athu mu jixi javulu, ebhuidisa-ku athu ka xikana kuila kuene Nzambi, kua moneka 3.000 jambe kuila ene mu samba.

Mukonda Diahi Ene Ala ni Phata?

Saí diiala mukua Inglaterra a mu ixana Allan, uambe: “Ng’exile mu zuela kuila, ki ngi xikina kua Nzambi, mukonda ngi banza kuila, o jingeleja ji sidivila ngó phala ku ta o ilunji ia’thu mua vundu ni ku nganhala kitadi. Se kuene muene Nzambi, mukonda diahi o kuiibha kuene mu dimendala dingi. Saí ithangana, nga kexile mu sota kididi kia tululuka, anga ‘ngi zuela ni muthu.’ Ngi di ebhuidisa mu diami: ‘Mukonda diahi ngala ku muenhu?’”

O muthu u banza kiki, saí ima i mu bhangesa ku kala ni phata se o misambu ia bhanga, ene muene mu i tambuijila. Saí ithangana, o muthu u kala ni phata mukonda dia ibhuidisu ka i tambuijila, kala:

▪ O kuila kuene muene Mubhangi?

▪ Mukonda diahi o jingeleja ji suínisa o ukexilu ua iibha?

▪ Mukonda diahi Nzambi uehela o hadi?

Se eie uejidile o itambuijilu ia ibhuidisu íii, ki ueji dielela dingi mu misambu?

[Tanga mu luji]