Di Longe o Muanhu ua Jihova ni ua Jezú
Di Longe o Muanhu ua Jihova ni ua Jezú
‘Lembalala kuila o muanhu ua Ngana ietu, ua bhana kithangana kia ku bhuluka phala etu.’—2 PHE. 3:15.
KIEBHI KI UEJI TAMBUIJILA?
Kiebhi Jihova kiene mu londekesa kuila uala ni muanhu?
Mukonda diahi Jezú ua londekesa muanhu mu thembu iavulu?
Ihi i tua tokala o ku bhanga phala ku kolesa o muanhu uetu?
1. Kibhuidisu kiahi kiene mu bhanga jiselevende javulu ja fiiele?
P HANG’ETU ia muhatu ia fiiele ua kolokota mu ibhidi mivu iavulu, ni ku lenduka kuoso, uebhula, “o kuila nga-nda tena hanji ku mona o dizubhilu ande dia kufuá?” Saí athu ene mu sidivila kiá Jihova mivu iavulu, ene uá mu bhanga o kibhuidisu kiki. Tua kingila o kizuua kia Nzambi ku kitula o ima ioso ku kala ia ubhe, mu ku zubha o hadi ioso i tuene mu dibhana na-iu lelu. (Dij. 21:5) Sumbala tuejiia kuila o dizubhilu dia mundu iú ua iibha ua Satanaji dia zukama, nange ki tu bhonza ku kala ni muanhu ua ku kingila o kizuua kiki.
2. Ibhuidisu iebhi ia lungu ni muanhu ua Jihova i tua-nda di longa?
2 Maji, o Bibidia i zuela kuila tua tokala ku kala ni muanhu. Kála kia bhangele o jiselevende ja Nzambi m’ukulu, tu tena ku tambula o ima ia kanena Nzambi se tu kala ni kixikanu kia kolo, ni ku kala ni muanhu mu ku kingila o thembu ia-nda kumbidila o ikanenu iê ia bhange. (Tanga Jihebeleu 6:11, 12.) Jihova uene mu londekesa kuila mukua muanhu. Se muéne ua mesenene, ueji zubha kiá o hadi ioso, maji ua mu kingila o kithangana kia tokala phala ku ki bhanga. (Lom. 9:20-24) Mukonda diahi muéne uene mu londekesa muanhu? Kiebhi Jezú kiene mu londekesa ué kuila mukua muanhu? Mbote iahi i tua-nda katula se tu londekesa o muanhu kála ua Nzambi? O itambuijilu ia ibhuidisu íii, i tena ku tu kuatekesa ku suínisa o muanhu uetu ni ku kolesa dingi o kixikanu kietu, né muene se tu mona kuila Jihova ua mu laleka kiavulu.
MUKONDA DIAHI JIHOVA ULONDEKESA MUANHU?
3, 4. (a) Mukonda diahi Jihova uene mu londekesa muanhu mu ku kumbidila o vondadi iê ia lungu ni ixi? (b) Ihi ia bhange Jihova kioso kia mu bhukumukina mu jaludim ia Edene?
3 Saí ima i bhangesa Jihova kulondekesa muanhu. Tuejiia kuma Jihova muéne uala ni kutena kua ku tumina o ima ioso mu ngongo mu ithangana ioso; tundé kia mu bhukumukina mu jaludim ia Edene, kua moneka maka a tokala ku mundu uoso. Jihova uene mu londekesa muanhu, mu kuijiia kuila kueji bhinga kithangana phala ku tambuijila o maka enhá mu ukexilu uambote. Mu kuijiia kiambote o ukexilu ni ibhangelu ia athu, ku diulu ni mu ixi, mu kidi muéne uene mu bhanga ioso phala o mbote ietu.—Jihe. 4:13.
4 O vondadi ia Jihova iexile kuila, o ixi izale ni an’a Adá ni Eva. Sumbala Satanaji ua nganala Eva, anga Adá u bhukumuka, Nzambi ka bhuila mu ku kumbidila o vondadi iê. Muéne ka thandanganha, ka bhange kima ni lusolo, mba ku bhanga kima sé ku banza, mba kuehelela o athu ubheka uâ. Mu veji dia kiki, muéne ua soto ndunge iéngi phala ku tena ku kumbidila o kikanenu kia bhangele ku athu ni Ixi. (Iza. 55:11) Phala ku kumbidila o kikanenu kiê, ni ku zangeleka o ungana uê, Jihova uene mu londekesa muanhu, ni ku kingila midi ni midi ia mivu phala ku kumbidila kiambote o vondadi iê.
5. Mabesá ahi a bheka o muanhu ua Jihova?
5 Kima kia mukuá ki bhangesa Jihova ku kingila ni muanhu uoso, o kuijiia kuila saí hanji athu a tokala uá ku kala ni muenhu ua kalelaku. Lelu muéne ua mu bhanga ioso phala ku bhulula o “mundu uavulu.” (Dij. 7:9, 14; 14:6) Jihova u bheka athu bhu kaxi ka kikalakalu kietu kia ku boka, mu ku a kuatekesa kuijiia o Utuminu uê, ni itumu iê ia iuka. O njimbu ia Utuminu ia beta-kota phala o athu oso ku mundu—“Njimbu Iambote.” (Mat. 24:14) O muthu a mu sunga kua Jihova, u bhanga mbandu mu kilunga kia jiphange ku mundu uoso, a zolo o ku iuka. (Nzu. 6:44-47) O Nzambi ietu ia henda u kuatekesa o athu phala ku kala mu henda iê. Muéne uene mu sola ué athu mu ixi, a-nda tumina ku diulu. Kioso kia-nda kala ku diulu, o jiselevende jiji, a-nda kuatekesa o athu a belesela mu ixi ku kala athu a iuka, ni ku kala ni muenhu ua kalelaku. Kioso kia mu kingila, Jihova ua mu kalakala phala ku kumbidila o ikanenu iê—phala o mbote ietu.
6. (a) Kiebhi Jihova kia londekesa kuila ua kexile ni muanhu mu izuua ia Noué? (b) Kiebhi Jihova kia mu londekesa ku kala ni muanhu mu izuua ietu?
6 Jihova ulondekesa muanhu, sumbala ni ima ia iibha i bhanga o athu, tu tena ku ki mona mu ukexilu ua londekesa ande dia Dilúvio. O ixi iezalele ni ufusa ni usuéia, kiki kia “bhekela lamba ku muxima” ua Jihova mukonda dia kuiibha kua athu. (Dim. 6:2-8) Muéne keji kuehela o kuiibha ku nangenena thembu iavulu, kienhiki muéne ua kanena ku bheka dilúvio ku thandu dia athu a bhukumukine. Mukonda dia ‘muanhu ua Nzambi mu izuua ia Noué,’ Jihova ua bhange kima phala ku bhulula Noué ni muiji uê. (1 Phe. 3:20) Mu kithangana kia tokala, Jihova ua tangela Noué ihi ieji bhanga, iu ua mu tumina ku tunga álaka. (Dim. 6:14-22) Kienhiki, Noué uexile ‘muboki ua maka a iuka’ mu bokela o jivizinhu jê kuila o kibuikilu kia zukamene. (2 Phe. 2:5) Jezú ua zuela kuila, o izuua ietu ia difu ni izuua ia Noué. Jihova uejiia se kizuua kuxi kia-nda bheka o dizubhilu dia mundu iú ua iibha. Se-ku muthu uejiia o ‘kizuua ni kithangana’ kia-nda bhixila. (Mat. 24:36) Mu thembu íii, tuala ni kikalakalu kia tu bhana Nzambi kia ku dimuna o athu, ni ku a tangela se ihi ia tokala o ku bhanga phala ku bhuluka.
7. O kuila Jihova ua mu laleka kiavulu mu kumbidila o ikanenu ia bhange? Jimbulula.
7 O muanhu ua Jihova, ki ulombolola kuila muéne ua mu kingila ngó o thembu ku bhita, kuabhu. Mu kiki, ki tu tokala ku banza kuila o muanhu uê ulondekesa kuila muéne ka mu mona o ima ia iibha ia mu bhita mba ka mu tu suua! Ki ki tu bhonzo o ku banza kiki, mukonda tua mu kuka, tua mu tala hadi ku mundu iú ua iibha. Tu tena ku luuala mba tu banza kuila Nzambi ua mu laleka kiavulu mu ku kumbidila o ikanenu iê ia bhange. (Jihe. 10:36) Kana ku jimba kuila, muéne ua lungu mu kulondekesa muanhu ni kuila muéne ua mu bhana o thembu ioso íii, phala o mbote ia jiselevende jê ja fiiele. (2 Phe. 2:3; 3:9) Tua-nda di longa ué kiebhi Jezú kia londekesa o muanhu.
PHANGU IAHI IA TU XILA JEZÚ IA KULONDEKESA O MUANHU?
8. Mu kithangana kiahi mua londekesa Jezú o muanhu?
8 Jezú ua mu bhanga o vondadi ia Nzambi, muéne uene mu i bhanga kiá tundé ukulu ku mazunda ni mazunda a mivu sé konda. Kioso Satanaji kia bhukumuka, Jihova ua solo o Mon’ê umoxi-élele phala kuíza mu ixi kala Mexiia. Xinganeka ngó kiebhi kia divu Jezú—mu ku kingila midi ni jimidi ja mivu ni muanhu, katé kia bhixila o thembu ia tokala. (Tanga Ngalásia 4:4.) Muéne ka kexile ngó mu kingila o thembu; mu veji dia kiki, muéne ua di bhakula mu ku bhanga o kikalakalu kia mu bhanene Tat’ê. Kioso kiéza mu ixi, muéne uejidile kuila ueji kufuá bhu maku a Satanaji, kála kia ki kanene. (Dim. 3:15; Mat. 16:21) Ni muanhu uoso muéne ua bhange o vondadi ia Nzambi, né muene ni kuijiia kuila ueji tala hadi iavulu. Uejidile kuila o ufiiele uê ua betele-kota. Muéne ka banzele ngó mu kijingu kiê, mu kiki tu tena ku katula mbote mu ukexilu uê.—Jihe. 5:8, 9.
9, 10. (a) Ihi ia mu bhanga Jezú kioso kia mu kingila o kithangana kia Jihova? (b) Kiebhi ki tua tokala ku mona o kithangana kia Jihova kia ku bheka o dizubhilu?
9 Kioso kia mu fukununa, Jezú ua tambula o kutena ku diulu ni mu ixi. (Mat. 28:18) Ni kutena kua tambula, muéne u bhanga o vondadi ia Jihova mu kithangana kia xindi Nzambi. Jezú ua kingila ni muanhu uoso ku mbandu ia kadilu ka Nzambi katé ku muvu ua 1914, o kithangana kia Nzambi ku tula o jinguma jê bhoxi dia inama iê. (Jisá. 110:1, 2; Jihe. 10:12, 13) Mu kusuka-ku, muéne ua-nda buika o mundu ua Satanaji. Maji lelu, Jezú ua mu kalakala ni athu mu ku a endesa ku “menha ma muenhu.”—Dij. 7:17.
10 O kuila u tena ku katula phangu kua Jezú, ia lungu ni kiebhi ki tu mona o kithangana kia Jihova kia ku bheka o dizubhilu? Jezú ka kexile ni phata, ua mesenene ku bhanga ioso ia mu bhingile Tat’ê; né kiki, muéne ua mesenene ku kingila o kithangana kia Nzambi. Mu ku kingila o dizubhilu dia mundu ua Satanaji, tua tokala ku kala ni muanhu, ki tu tokala ku somboka o itendelesu ia Nzambi mba ku bhuila mukonda tua luuala. Ihi i tua tokala o ku bhanga phala ku kolesa o muanhu uetu?
KIEBHI KI NGI TENA KU KALA NI MUANHU KÁLA UA NZAMBI?
11. (a) Kiebhi o kixikanu kia kexile mu kuenda kumoxi ni muanhu? (b) Ihi i tu bhangesa ku kolesa dingi o kixikanu?
11 Ande dia Jezú kuíza mu ixi, o jipolofeta ni jiselevende ja mukuá ja fiiele, a xisa phangu ia lungu ni kiebhi o athu a ituxi a tena ku kolokota ni muanhu uoso. O kixikanu kiâ kia kexile mu kuenda kumoxi ni muanhu uâ. (Tanga Tiiaku 5:10, 11.) Se ene ka xikinine mu ima ia a tangele Jihova—se ene a kambele o kixikanu—o kuila ene eji tena ku kingila ni muanhu o ki kumbidilu kia ikanenu ia Nzambi? Ene akexile mu bhita mu jipolova ja kixikanu kiâ, maji ene a dielele kuila Nzambi ueji kumbidila o kikanenu kia a bhangele. (Jihe. 11:13, 35-40) Etu tua beta-kota mu ku kala ni kima ki tu bhangesa ku kala ni kixikanu kia kolo, mukonda Jezú, muéne o ‘Musonguedi ua kixikanu kietu.’ (Jihe. 12:2) Muéne ua kumbidila o kikanenu, iu ua jimbulula o vondadi ia Nzambi mu ukexilu u tu kuatekesa ku kala ni kixikanu.
12. Ihi i tua tokala o ku bhanga phala ku kolesa o kixikanu kietu?
12 Ihi i tua tokala o ku bhanga phala ku kolesa o kixikanu kietu ni ku suínisa o muanhu uetu? Tua tokala o ku belesela o itendelesu ia Nzambi. Mu kifika, xinganeka mu ima i ku bhangesa ku ta ku pholo o Utuminu ua Nzambi ku muenhu uê. O kuila u tena ku suína dingi phala ku kumbidila o milongi mu divulu dia Matesu 6:33? Kiki kilombolola ku kalakala kiavulu mu sidivisu ia ku boka, mba ku lungulula o ukexilu ua muenhu uê. Kana ku jimba kiebhi Jihova kiene mu besoala o nguzu i u bhanga katé lelu. Muéne uene mu ku kuatekesa ku sanga muthu ua ubhe phala ku mu longa o Bibidia, mba uene mu ku kuatekesa ku tambula o “kutululuka kua Nzambi kua somboka o kitongoluelu kioso kia muthu.” (Tanga Filipe 4:7.) Kioso ki uia ni ku xinganeka mu mbote i uene mu tambula, mu ku kaiela o itendelesu ia Jihova, ua-nda bhana dingi valolo ku muanhu.—Jisá. 34:8.
13. Kiebhi ki tu tena ku jimbulula o kixikanu ni muanhu?
13 Kiki kia difu ni ukexilu ua ku kuna, ku sonzola ni ku bhongolola. Mu ithangana ioso, se o kidimakaji u bhongolola idima iavulu, muéne u kala dingi nguzu ia ku kuna jimbutu mu thembu iéngi. Sumbala muéne ua tokala u kala ni muanhu phala ku kingila o kithangana kia ku bhongolola o idima, maji kiki ki kia-nda mu fidisa ku kuna o jimbutu, mukonda muéne u kingila ku bhongolola dingi. Muéne u dielela kuila ua-nda bhongolola o idima. Kiene kimoxi ué, kioso ki tuia ni ku di longa o itendelesu ia Jihova, tu mu belesela, tu katula mbote, o kidielelu kietu kua Jihova ki di bandekesa dingi. O kixikanu kietu kia-nda di bandekesa ué, tu tena ku kingila o mabesá mu kuijiia kuila, a-nda kuíza.—Tanga Tiiaku 5:7, 8.
14, 15. Ihi i tua tokala o ku banza ia lungu ni hadi i tala o athu?
14 O ukexilu ua mukuá ua kulondekesa o muanhu, o kuijiia kiebhi ki tua tokala ku mona o mundu ni ukexilu uetu ua muenhu. Tala o ima, kála ki tala Jihova. Mu kifika, xinganeka ngó kiebhi muéne kia mona o hadi i tala o athu. Tundé ukulu muéne u divua kia iibha kioso athu kia tala hadi; né kiki, muéne kene mu zoza mukonda dia hadi ia mona ku athu, sé ku tena ku bhanga kima kiambote phala o athu. Muéne ua tumikisa Mon’ê umoxi-élele “phala a muange o ikalakalu iene mu bhanga Diabhu,” ni ku zubha o kuiibha kuoso kuene mu bheka Satanaji ku athu. (1 Nzu. 3:8) Mu kidi, o hadi ki ia-nda nangenena, maji o kima kia-nda bhanga Nzambi, kia-nda nangenena kate ku hádia ni hádia. Kiene kimoxi ué, mu veji dia ku luuala mu ku mona o kuiibha kuene mu bheka Satanaji, mba tu mona kuila o dizubhilu dia mu laleka kuíza, kota se tu dielela mu ima kiluua i moneka ia-nda nangenena kate ku hádia ni hádia. Jihova ua xindi o kithangana kia ku zubha o kuiibha kuoso, iu ua-nda bhanga kiki mu kithangana kia tokala.—Iza. 46:13; Nah. 1:9.
15 Mu ithangana íii ia bhonzo, ia izuua isukidila-ku, tuene mu bhita ni ibhidi iavulu ia lungu ni kixikanu kietu. Mu veji dia ku kala ni njinda iavulu se a tu bhanga kia iibha mba jindandu jetu ja mu tala hadi, tua tokala ku dielela kua Jihova. Etu tu akua ituxi, ki tu bhonza kiavulu ku dielela kua Nzambi. Lembalala ihi ia bhange Jezú, kala kia ki tange mu divulu dia Matesu 26:39.—Tanga.
16. Ihi ki tu tokala ku bhanga mu thembu íii ia suku-ko?
16 O kima ki tena ku tu fidisa kulondekesa o muanhu ua Nzambi, o ku kala ni ukexilu ua ku mesena ku mona o ima phala ku xikina. Kiki kilombolola ihi? O muthu u kamba o ku dielela kuila o dizubhilu dia zukama, nange u kuata ku bhanga ima ia mesena, kioso kia mona kuila o ima ki ia mu tunda kala kia kanena Jihova. Mu izuelu ia mukuá, o muthu u tena ku banza, ‘eme nga-nda kingila ni ku mona se o kizuelu kia Jihova kia kidi muene.’ Muéne u kuata ku bhanga ima phala ku fumanesa o dijina diê ku mundu iú, mu ku sota o jimbote mu veji dia ku ta ku pholo o Utuminu ua Nzambi, mba ku dielela mu ulongelu ua katunda phala ku kala ni ukexilu uambote ua muenhu lelu. Kiki ki kieji londekesa kuila muthu iú ua kambe kixikanu? Lembalala kuila Phaulu ua tu tendelesa ku kaiela o phangu ia jiselevende ja fiiele a tambuile o ikanenu ia Jihova ‘mu ku xikana ni muanhu.’ (Jihe. 6:12) Jihova ka-nda kuehela kuila o mundu iú ua iibha, unangenena dingi thembu iavulu, se ku kumbidila o vondadi iê. (Haba. 2:3) Kienhiki, ki tu tokala ku bhuila mu ku sidivila Jihova. Mu veji dia kiki, tua tokala ku aluka ni ku kalakala ni nguzu ioso mu ku boka o njimbu iambote, i bhekela kisangusangu né muene lelu.—Luk. 21:36.
MABESÁ A BHEKA O MUANHU?
17, 18. (a) Kithangana kiahi ki tuala nakiu lelu, kia lungu ni muanhu? (b) Mabesá ahi u tu tambula mu kulondekesa muanhu lelu?
17 Ki kale se tua mateka kindala mba tuala ukulu mu sidivila Nzambi, tua tokala tu kolokota o ku mu sidivila katé ku hádia. O muanhu u tu kuatekesa ku kolokota katé kia-nda tu bhulula, né muene se tua-nda kala hanji kithangana kiavulu ku mundu iú ua iibha. Jihova ua mu tu bhana o kithangana phala tu dielele mu ima ia-nda bhanga muéne, né muene—se ku bhinga—ku tala hadi mu ku zokela o dijina diê. (1 Phe. 4:13, 14) Nzambi ua mu bhana ué milongi i tu kuatekesa kulondekesa muanhu phala tu bhuluke.—1 Phe. 5:10.
18 Jezú uala ni kutena ki kale ku diulu mba mu ixi, se-ku kima ki tena ku mu fidisa ku ku langa—se u kolokota mu ufiiele. (Nzu. 10:28, 29) Ki tu tokala ku kala ni uôma ua ima ia-nda kuíza ku hádia, mba uôma ua kalunga. O ió a kolokota katé ku dizubhilu, a-nda kua bhulula. Kienhiki, ki tu tokala kuehela kuila o mundu u tu nganala mba u tu bhangesa ku kamba ku dielela kua Jihova. Mu veji dia kiki, tua tokala ku kolokota mu ku kolesa o kixikanu kietu ni ku katula mbote ku muanhu ua Nzambi mu ukexilu uambote.—Mat. 24:13; tanga 2 Phetele 3:17, 18.
[Ibhuidisu ia ku dilonga]
[Jifoto ku mbandu 21]
O muanhu ua Nzambi u ku kuatekesa ku ta o Utuminu ua Nzambi ku pholo ni ku tambula mabesá!
