Ihi Ia-nda Bhita Ande Dia Kuíza o Dizubhilu Dia Mundu Iú
Ihi Ia-nda Bhita Ande Dia Kuíza o Dizubhilu Dia Mundu Iú
‘Ki muala mu’avundu, kuila Kizuua kia Ngana ki mi tukumukisa kala muii.’—1 TES. 5:4.
U TENA KU JIMBULULA?
Izulukutu iahi ia kambe ku moneka i tanga o madivulu enhá?
Daniiele 2:44
1. Ihi ia-nda tu kuatekesa ku dilanga ni ku dibhana ni ibhidi?
KUA kambe ngó bhofele, kua-nda bhita izulukutu ia dikota ku mundu uoso. O i kumbidilu ia ikanenu ia Bibidia ilondekesa kuila o izulukutu ia-nda bhita muene, kienhiki, tua tokala ku dilanga. Ihi ia-nda tu kuatekesa o ku dilanga? O poxolo Phaulu u tu tendelesa phala ‘ku kingila . . . o ima ia kambe ku moneka ku mesu.’ Tua tokala ku xinganeka mu kifutu kia ku tambula o muenhu ua kalelaku, ki kale ió a-nda kala mu ixi, mba ió a-ndaia ku diulu. Kala kilondekesa o ibatulu ia mukuá, Phaulu ua soneka o izuelu íii, phala ku suínisa o jiphange jê ku xinganeka mu kisangusangu kijila mu ku kala fiiele. O ku bhanga kiki, kieji ku a kuatekesa ué o ku dibhana ni ibhidi, ni kizukutisu.—2 Kol. 4:8, 9, 16-18; 5:7.
2. (a) Phala ku kolesa o kidielelu kietu, ihi i tua tokala o ku bhanga? (b) Ihi i tua-nda di longa mu milongi íii, ni ia-nda kaiela?
2 Mu kitendelesu kia Phaulu muala milongi ia beta-kota: Phala ku kolesa o kidielelu kietu, tua tokala ku xinganeka mu ima ia kambe ku moneka ku mesu. Tua tokala ku xinganeka o izulukutu ia makota ia kambe o ku moneka. (Jihe. 11:1; 12:1, 2) Kienhiki, tua-nda di longa dikuinhi dia izulukutu ia-nda bhita ku hádia, ia lungu ni kidielelu kietu kia muenhu ua kalelaku. *
IHI IA-NDA BHITA ANDE DIA KUÍZA O DIZUBHILU?
3. (a) Kizulukutu kiahi kia-nda bhita, kio tange mu divulu dia 1 Tesalonika 5:2, 3? (b) O jinguvulu ja mundu ja-nda bhanga ihi, ni a nanhi a-nda di bunda kua ene?
3 Saí kizulukutu kia-nda bhita ku hádia, a ki tumbula kua Phaulu mu mukanda ua sonekena ku akua Tesalonika. (Tanga 1 Tesalonika 5:2, 3.) Muéne ua zuela ia lungu ni “Kizuua kia Ngana.” O “Kizuua kia Ngana,” kia lungu ni kithangana kia ku buika o jingeleja ja makutu kia-nda suka mu ita ia Alumajedone. Maji ande kia ku bhixila o kizuua kiki, o jinguvulu ja mundu a-nda dikola kuma ‘kua Tululuka, kua kondama!’ Nange mu kithangana kiki, kua-nda bhita kizulukutu, mba izulukutu iavulu. Nange o ifuxi a-nda banza kuila a mu tena ku batula o maka ene mu ku a bhonza o ku a batula. Ihi i tuamba ia lungu ni atuameni a jingeleja? Mukonda dia ku bhanga mbandu ia mundu, nange a-nda di bunda ni jinguvulu ja mundu. (Dij. 17:1, 2) Mu ku bhanga kiki, o atuameni a jingeleja a-nda londekesa kuila a kaiela o phangu ia jipolofeta ja makutu ja mbanza iokulu ia Judá. Jihova ua zuela ia lungu ni ene: ‘Ene a ka dikola, “kua Tululuka! Kua tululuka!” maji kana-ku kutululuka.’—Jel. 6:14; 23:16, 17.
4. Ihi i tuejiia ia kambe kuijiia o athu ku mundu?
4 Né muene se athu oso a dikola, ‘kua Tululuka, kua kondama!’ kiki kia-nda londekesa kuila, o kizuua kia Jihova kia-nda mateka kiá. Mukonda dia kiki, Phaulu uambe: ‘Enu-phe, jiphange, ki muala mu’avundu kuila Kizuua kia Ngana ki mi tukumukisa kala muii. Mbata enu oso muala mu an’a mukengeji.’ (1 Tes. 5:4, 5) O athu ku mundu ka tena ku tendela o izulukutu kala kia i tange mu Mikanda Ikola, maji etu tu tena ku i tendela. O kikanenu kia lungu ni athu a dikola kuila, ‘kua Tululuka kua kondama!’ kiebhi kia-nda dikumbidila? Tua tokala ku kingila phala tu mone o ki kumbidilu kiê. Kienhiki, tua tokala ‘tu tona, tu kala ku mesu a zele.’—1 Tes. 5:6; Sof. 3:8.
O “MVUALE” KA MU MONA KIAMBOTE O IZULUKUTU
5. (a) Kiebhi kia-nda mateka o kizuua kia “hadi ia dikota?” (b) Kiebhi o “mvuale” ka mu mona kiambote se ua-nda bhuluka?
5 Kizulukutu kiebhi kiluua ki moneka, kia-nda kaiela? Phaulu uambe: ‘Kioso athu kia-nda dikola: “Kua tululuka, kua kondama!” a ka tukumuka, kibuika kiâ kia tula.’ O ‘kibuikilu kia-nda dianga ku tukumukisa,’ “Babilonha ia Dikota,” o kisangela kia jingeleja ja makutu, a ki exana ué o “kidia-nzunga” mba muhatu mukua munhungu. (Dij. 17:5, 6, 15) O kizuua kia ‘hadi ia dikota,’ kia-nda mateka ni kibuikilu kia jingeleja joso ni Kidistándade. (Mat. 24:21; 2 Tes. 2:8) O kizulukutu kiki, kia-nda tukumukisa athu avulu. Mukonda diahi? Mukonda o muhatu mukua munhungu ua-nda di mona kala “mvuale” ua xikama ku ungana, u banza kuila ‘ka-nda kala mutudi.’ Maji muéne mu kithangana kieniókio, ua-nda kuijiia kuila ua di nganala, mukonda ka-nda bhuluka. A-nda mu buika ni lusolo “mu kumbi dimoxi.”—Dij. 18:7, 8.
6. Nanhi ua-nda buika o jingeleja ja makutu?
6 O Mak’â Nzambi a zuela o kidia-nzunga, a-nda kibuika ku ‘kiama kia muxitu,’ kiala ni “kuinhi dia lumbinga.” O divulu dia Dijingunuinu, di londekesa kuila o kiama kia muxitu, kilombolola o Nações Unidas. O “kuinhi dia lumbinga,” ijimbulula o jinguvulu joso ja mu tumina ji kuatekesa o “kiama ki kusuka.” * (Dij. 17:3, 5, 11, 12) Kiebhi kia-nda ki buika? O Nações Unidas, ua-nda xisa o muhatu mukua munhungu sé kima, phala kulondekesa o ukexilu ué ua iibha, a ka mu dia o xitu “a mu oha mu túbhia.” O muhatu mukua munhungu ua-nda jimuka.—Tanga Dijingunuinu 17:16.
7. Ihi ia-nda bhangesa o “kiama kia muxitu” ku buika o muhatu mukua munhungu?
7 O kikanenu kia Bibidia kilondekesa ué ihi ia-nda bheka o kizulukutu kiki. Jihova ua-nda ta ku mixima ia jinguvulu ‘ku bhanga kia mu kala mu kilunji kiê,’ ku buika o muhatu mukua munhungu. (Dij. 17:17) O jingeleja a mu bheka ita ni maka ku mundu a buikisa; o ifuxi a-nda banza kuila o ku buika o kidia-nzunga kia-nda batula o maka mâ oso. Kioso o jinguvulu kia-nda buika o muhatu mukua munhungu, a-nda fika kuila ene a mu bhanga ia a kala mu ‘ilunji iâ.’ Maji Nzambi ua te ku mu mixima iâ, phala ku buika o jingeleja joso ja makutu. Mu kidi, o mbandu ia kisangela kia Satanaji kia-nda buika o mbandu ia mukuá, mu kiki, Satanaji ka-nda kala ni kutena kua ku a fidisa.—Mat. 12:25, 26.
O MUNDU UA NZAMBI A-NDA U ZUKUTISA
8. Ihi ilombolola o kizukutisu kia ‘Goge ia ixi ia Magoge?’
8 Kioso kia-nda buika o jingeleja ja makutu o jiselevende ja Nzambi, a-nda “a tunga a soma” ki “kuâ ka moneka kimbaka.” (Ize. 38:11, 14) Ihi ia-nda bhita ni kibuka kiki kia athu a-nda kolokota ku bheza Jihova, kála kala ni ku tena kua ku a langa? Ene a-nda ku a zukutisa ku ‘athu avulu.’ O Mak’â Nzambi, a zuela kuila, o ‘Goge ia ixi ia Magoge,’ muéne ua-nda bheka o kizukutisu kiki. (Tanga Izekiiele 38:2, 15, 16.) Kiebhi ki tua tokala o ku mona o kizukutisu kiki?
9. (a) O Jikidistá a tokala ku thandanganha ni ihi? (b) Ihi i tua tokala o ku bhanga phala ku kolesa o kixikanu kietu?
9 Ki tu tokala ku kala ni uôma ua kizukutisu kiki, mukonda tuejiia kiá kuila o mundu ua Nzambi a-nda ku u zukutisa. Kienhiki, ki tu tokala ku thandanganha ni ubhulukilu uetu, tua tokala ku thandanganha ni ku ximanesa o dijina dia Jihova, ni ku fumanesa o ungana uê. Jihova uambe mu 60 a ji veji ndenge kuma: “Phala enu mu k’ijiie kuila eme ngi Jihova.” (Ize. 6:7) Kienhiki, tua tokala ku kingila o ima ia-nda bhita ku hádia ni kisangusangu kioso, mu ku mona o ki kumbidilu kia kikanenu ki tu sanga mu divulu dia Izekiiele, mu ku dielela kuila “Nzambi uejiia kukudila akua uôma uê mu’axaxi ka kudianguka.” (2 Phe. 2:9) Mu kiki, tua tokala ku suínisa o kixikanu kietu lelu, phala tu tene ku kolokota mu ufiiele uetu kua Jihova, né muene ni ibhidi i tua-nda bhita na-iu. Ihi i tua tokala o ku bhanga? Tua tokala ku samba, ku di longa o Mak’â Nzambi, ni ku a xinganeka, ni ku longa o njimbu ia Utuminu ku akuetu. Se tu bhanga kiki, tua-nda kolesa o kidielelu kietu kia ku tambula o muenhu ua kalelaku kála ‘ngunji.’—Jih. 6:19; Jisá. 25:21.
IFUXI IOSO IA-NDA KUIJIIA JIHOVA
10, 11. Kijimbuete kiahi kia-nda londekesa kuila Alumajedone ia mateka, ni ihi ia-nda bhita mu kithangana kieniókio?
10 Kizulukutu kiahi kia-nda bhita kioso kia-nda mateka ku zukutisa o jiselevende ja Jihova? Jihova bhu kaxi ka Jezú ni ji-anju jê, ua-nda zokela o mundu Uê. (Dij. 19:11-16) Ene a-nda ku a zokela mu “ita ia kizuua kia Dikota kia Nzambi, Muteni-a-Ioso”—mu Alumajedone.—Dij. 16:14, 16.
11 Ia lungu ni ita íii, Jihova uambe bhu kaxi ka Izekiiele: “Nga ka mu’ixanena [Goge] o xibhata ku thandu dia milundu iami ioso, kiene kiambe Jihova Nzambi. ‘O xibhata ia muthu ia ka lungulukila muene phang’iê.” Oso ala ku mbandu ia Satanaji, a-nda di jibha mudiâ—disoladi di jibha disoladi ni mukuá. O phulu íii ia-nda tula ué kua Satanaji. Jihova uambe: ‘Mvula ia kungulula-musoke, ni matadi a makota a mvula, nga ka lauila túbhia ni xofidi ku thandu dia [Goge] ni masoladi mê, ni ku thandu dia miji iavulu ioso i kala kumoxi ni muene.’ (Izek. 38: 21, 22) Ihi ia-nda bhita kioso Nzambi kia-nda zokela o mundu uê?
12. O ifuxi ia-nda kuijiia nanhi?
12 O ifuxi a-nda kuijiia kuila Jihova muene ua mu ku a buika. Kala kia bhiti ni masoladi akua Ijitu, a kaiele akua Izalaiele mu Kalunga ka Kusuka, o ió ala ku mbandu ia Satanaji nange a-nda di kola: “Jihova uala ku a bhangela!” (Mak. 14:25) Kienhiki, o ifuxi ia-nda kuijiia se Jihova nanhi. (Tanga Izekiiele 38:23.) O izulukutu íii ia-nda bhita thembu kuxi?
KI KUA-NDA TUKULUKA DINGI UTUMINU UÉNGI
13. Ihi i tuejiia ia lungu ni mbandu ia katanu ia kiteka kia tange Daniiele?
13 O kikanenu ki tu sanga mu divulu dia Daniiele, ki tu kuatekesa ku tendela o kithangana ki tuala. Daniiele ua lombolola o kiteka kia difu ni muthu, ni jimbandu jê. (Dan. 2: 28, 31-33) Kilombolola o mautuminu a mundu, a zukutisa o mundu ua Nzambi m’ukulu, ni lelu ué. O mautuminu enhá, Babilonha, Mediia ni Pélesa, Ngeléxia, Loma—ia suku-ku mu izuua ietu, o utuminu uéngi ua mu tumina o mundu. O divulu dia Daniiele dia londekesa kuila o utuminu ua suku-ku ua kiteka, o inama ni milembu. Mu Ita ia Dianga ku bhita ku Mundu, o Utuminu ua Grã-Bretanha ni Estados Unidos a bhange ukamba. Kienhiki o mbandu ia katanu ia kiteka kia tange Daniiele, o Utuminu ua Grã-Bretanha ni Estados Unidos. O inama ia kiteka, kilombolola kuila ki kueji moneka dingi utuminu uéngi. O inama ni milembu a i bhange ni felu ni utuma, ilondekesa kuila o Utuminu ua Grã-Bretanha ni Estados Unidos ki ueji kala ni kutena kuavulu.
14. Utuminu uebhi ua-nda tumina hanji o mundu, kioso kia-nda kuíza o Alumajedone?
14 Daniiele uambe ué kuila o Utuminu ua Nzambi ulombolola o ditadi dia dikota, dia tundu ku mulundu ua ungana ua Jihova ku muvu ua 1914. O ditadi didi dia zukama phala ku tula—ku inama ia kiteka. Ku Alumajedone o inama ni jimbandu ja mukuá ja kiteka, a-nda ji sasujula. (Tanga Daniiele 2:44, 45.) Kiki kilombolola kuila o Utuminu ua Grã-Bretanha ni Estados Unidos, uene hanji ua-nda tumina ku mundu katé kia-nda kuíza o Alumajedone. O ku mona o ki kumbidilu kia kikanenu kiki, kia-nda tu sangulukisa kiavulu! * Ihi ia-nda bhanga Jihova kua Satanaji?
O NGUMA IA DIKOTA IA NZAMBI A-NDA I BHANGA KIEBHI
15. Kioso kia-nda bhita o Alumajedone, ihi ia-nda bhita ni Satanaji ni madimonho mê?
15 Kia dianga, Satanaji ua-nda mona kioso kia-nda mateka ni kia-nda zubha ku buika o kisangela kiê mu ixi. Mu kusuka-ku a-nda bhilukila Satanaji. O poxolo Nzuá ua zuela ué se ihi ia-nda bhita dingi. (Tanga Dijingunuinu 20:1-3.) Jezú Kristu—o “anju . . . ua kuata sabhi ia dikungu ki di moneka hole”—ua-nda ta Satanaji ni madimonho mê mu dikungu ki di moneka hole, mu midi ia mivu. (Luk. 8:30, 31; 1 Nzu. 3:8) Kiki, kia-nda londekesa kuila o kithangana kia ku bula o mutué ua nhoka kia mateka kiá. *—Dim. 3:15.
16. O ku takula Satanaji mu “dikungu ki di moneka hole,” kulombolola ihi?
16 O “dikungu ki di moneka hole,” mua-nda takula Satanaji ni madimonho mê, ihi? O kizuelu mu Ngeleku aʹbys·sos kiambe Nzuá, kilombolola “dikungu dia zongo.” Kilombolola ué “dikungu, ki diala ni disukilu,” “dikungu dia hatu.” Mu kididi kiki, se-ku muthu u tena kuia-mu, Jihova ngó ni anju iê ia bhana o kutena, “ua kuata sabhi ia dikungu ki di moneka hole.” Satanaji a-nda mu takula-mu, ka-nda tena ku bhanga dingi kima phala ‘ka nganale dingi o athu.’ Mu kidi, o “hoji i zuma,” a-nda i buika!—1 Phe. 5:8.
O IZULUKUTU IA-NDA BHITA ANDE DIA KUÍZA O KU TULULUKA MU NGONGO
17, 18. (a) Izulukutu iahi ia kambe ku moneka i tua di longo kiá? (b) Kioso kia-nda bhita o izulukutu íii, tua-nda sanguluka ni ihi?
17 Ku hádia tua-nda mona izulukutu iavulu. Tua kingila o ku mona kioso o athu kia-nda dikola ‘kua Tululuka, kua kondama!’ Tua-nda mona ué o kibuikilu kia Babilonha ia Dikota, kia-nda kuata Goge ia ixi ia Magoge, o ita ia Alumajedone, ni kioso kia-nda takula Satanaji ni madimonho mê mu dikungu ki di moneka hole. Kioso kia-nda bhita o izulukutu ioso íii, o kuiibha kua-nda bhua—tua-nda kala ku Utuminu ua Kristu, tua-nda sanguluka ni “kutululuka kuavulu.”—Jisá. 37:10, 11.
18 Sumbala tua di longo kiá izulukutu itanu, saí dingi “ima ia kambe ku moneka,” i tua ‘kingila.’ Tua-nda di longa o izulukutu íii mu milongi ia kaiela.
[Tanga mu luji]
^ kax. 2 Mu milongi íii ni ia-nda kaiela tua-nda di longa dikuinhi dia izulukutu.
^ kax. 6 Tanga o divulu, Revelação—Seu Grandioso Clímax Está Próximo! mu jimbandu ja 251-258.
^ kax. 14 O izuelu “ua ká sasujula o mautuminu moso’ama,” mu divulu dia Daniiele 2:44, ilombolola jisobha, mba mautuminu a mundu, kala kia londekesa ku jimbandu ja kiteka. Kienhiki, o kikanenu kia Bibidia kilondekesa kuila “o jisobha mu ngongo ioso” a-nda bhânga ni Jihova mu “kizuua kia Dikota kia Nzambi, Muteni-a-Ioso.” (Dij. 16:14; 19:19-21) Ko mautuminu ngó a kiteka a-nda buika, ni mautuminu oso a mundu iú, a-nda u buika ué ku Alumajedone.
^ kax. 15 O mutué ua nhoka, a-nda zubha ku u bula kioso kia-nda bhua o midi ia mivu, kioso Satanaji ni madimonho mê, kia-nda ku a takula “mu kizanga kia túbhia ni xôfidi.”—Dij. 20:7-10; Mat. 25:41.
[Ibhuidisu ia ku dilonga]
[Kidikisu/Foto ku mbandu 9]
IZULUKUTU ITANU IA-NDA BHITA:
1 A ka di kola, ‘kua Tululuka kua kondama!’
2 O ifuxi ia-nda bhânga ni ku buika “Babilonha ia Dikota”
3 O mundu ua Jihova a-nda ku u zukutisa
4 O Ita ia Alumajedone
5 Satanaji ni madimonho mê mu dikungu ki di moneka hole
