Kutululuka mu Midi ia Mivu—o Hádia sé Dizubhilu!
Kutululuka mu Midi ia Mivu—o Hádia sé Dizubhilu!
‘Nzambi ua ka tumina ku thandu dia ima ioso.’—1 KOL. 15:28.
U TENA KU JIMBULULA?
Ihi ilombolola o ki kumbidilu kia ikanenu mu ibatulu íii, phala eie?
Mikeia 4:4
Izaia 11:6-9
1. Ima iahi iambote ia kingila o “mundu uavulu?”
U TENA ku xinganeka o mbote ioso ia-nda bhanga o nguvulu ia iuka, mukua henda, ku athu a mu xikina mu midi ia mivu? O “mundu uavulu”—ua-nda bhuluka ku “hadi ia dikota,” ua kingila izulukutu a madiuanu ia-nda bheka o dizubhilu dia mundu iú ua iibha.—Dij. 7:9, 14.
2. Ibhidi iahi iene mu bhita na-iu o athu mu 6.000 ia mivu ia bhiti?
2 Mu 6.000 ja mivu, tundé kia bhange o athu, o vondadi ia ku di tumina mudiâ, iene mu bheka hadi mu ngongo. Tundé ukulu o Bibidia iene mu zuela: ‘Muthu u kala mu ku tumina mukuá phala ngó ku mu sengulula.’ (Ndo. 8:9) Ihi i tuene mu mona lelu? Katuku, o ita ni ku bhukumuka, saí maka a mukuá kála o uadiama, o mauhaxi, o ku zanga o ixi, o ku lunguluka kua jithembu, ni ima ia mukuá dingi. O jinguvulu ene mu dimuna kuila se ki tu lungulula o ibanzelu ietu, ia lungu ni ima i tuene mu bhanga, tua-nda kala ni ibhidi iavulu.
3. Ihi ia-nda bheka o Utuminu ua Midi ia Mivu?
3 Mu Utuminu ua Jezú Kristu ni 144.000 a jisobha, o Utuminu ua Nzambi ua-nda bhanga ima iavulu, phala ku zubha o ima ia iibha iene mu bhita na-iu o athu ni dibhata diâ, o Ixi. O Utuminu ua Midi ia Mivu, ua-nda kumbidila o kikanenu kia bhange Jihova Nzambi, kuila: ‘Eme ngi iudika kiá maúlu m’obhe ni ixi iobhe; o ima ia bhiti kiá ki ku kala dingi ku i banza, né ngó kuíza mu kilunji, lembua.’ (Iza. 65:17) Kizulukutu kiahi kia madiuanu kiluua ki moneka, ki tua kingila? Ni kikuatekesu kia Mak’â Nzambi, tu banze o ima ia madiuanu, ia ‘kambe o ku moneka ku mesu.’—2 Kol. 4:18.
‘ENE A KA TUNGA JINZO A KA DIMA MILENGA IA MIVIDI’
4. Maka ahi alungu ni ku kala ni jinzo jene mu dibhana na-iu o athu lelu?
4 O kuila saí muthu ka uabhela ku kala ni inzo iê, mua kala ni muiji uê ni ku tululuka ni ku kondama? Maji ku mundu iú, ku bhonza kiavulu ku kala ni inzo iambote. O jimbanza, ni ji sanzala jezala ni athu. Saí athu a kala mu jinzo ki ji fuama, j’ofele ja iangu mu jisanzala muene o uadiama uavulu. Phala o athu enhá o ku kala ni inzo iâ, nzoji ngó.
5, 6. (a) Kiebhi kia-nda dikumbidila o ikanenu mu madivulu a Izaia 65:21 ni Mikeia 4:4? (b) Kiebhi ki tu tena ku tambula o mabesá enhá?
5 Mu Utuminu ua Nzambi, o athu oso a-nda kala ni inzo, o polofeta Izaia ua kanena: ‘Ene-phe a ka tunga jinzo, anga a kala-mu; a ka dima milenga ia mividi, anga a ka dia idima iê.’ (Iza. 65:21) O ku mesena ku kala ni inzo ki iene ngó ia kingila o athu. Mukonda lelu, saí athu ala ni ji sabhalalu. Maji o athu enhá ene hanji mu thandanganha, mukonda a tena ku a tambula o jinzo jâ, mukonda dia ku kamba kitadi mba ku a nhana. Maji mu Utuminu ua Nzambi, o ima íii ki ia-nda bhita dingi! O polofeta Mikeia ua soneka: ‘Muthu u xikama bhoxi dia muvidi uê, ni bhoxi dia mufiku uê, o u a kuatesa uôma ka moneka.’—Mik. 4:4.
6 Ni kidielelu kiki, ihi i tua tokala o ku bhanga? Etu enioso tua bhindamena inzo iambote. Maji mu veji dia ku di bhindamena ku kala ni inzo i ua mesena lelu—katé muene ni ku ta makongo—ki kima kiambote ku dielela mu ikanenu ia Jihova? Lembalala kuila Jezú uambe ia lungu ni muéne: ‘O mikenge saí ngenda jâ; o jinjila ji bhita bhulu sai ue ni ikalanga iâ; maji o Mon’a Muthu kala ni bhuma bhua zendelekela o mútue.’ (Luk. 9:58) Jezú ua kexile ni uhete ni kutena kua ku kala ni inzo iambote. Mukonda diahi muene ka tungu inzo? Jezú ka mesenene ku landuka ni ima ieji mu fidisa ku ta o Utuminu ua Nzambi ku pholo. O kuila tu tena ku kaiela o phangu iê, ia ku kala ku mesu a zele—phala ki tu kaiele o jimbote, mba tu kala ni ibhindamu iavulu?—Mat. 6:33, 34.
‘KIMBUNGU NI SESEME IA MBUDI A KA DILA DIKELA DIMOXI’
7. Kiebhi kia tokalele ku dibhana o athu ni iama, kala kia mesenene Jihova?
7 Kioso kia bhange o ima ioso mu ixi, o athu ene a suku-ku mu ku a bhanga. Jihova ua tangela o kikanenu kiê ku Dixibulu diê, o Mon’ê ua dianga, kuila: “Tu bhangienu muthu mu kidifuanganu kietu, a [kale ni] kijingo kietu, a tumine ku jimbiji jendela mu menha, ni ku jinjila ji bhita bhulu, ni ku ibhaku, ni ixi ioso, ni ku ibamba iendela ku mavu.” (Dim. 1:26) Kienhiki, Adá ni Eva, ni athu oso, a a bhange phala ku tumina o iama ioso mu ngongo.
8. Uebhi o ukexilu ua iama lelu?
8 O kuila o athu a tena ku tumina o iama ioso ni ku tunga na-iu ni kutululuka? Athu avulu a uabhela o iama, kála o ji ngato ni jímbua. O kuila kiene ué ni iama ia muxitu? Saí divulu diambe: “O jingijiie a dibhana ni iama, ene mu di longa o ifua ia iama ia mixitu, a mona kuila o iama íii iala ué ni ukexilu uê.” Tuene mu mona iama i kala ni uôma, mba i tema se a mona kiluezu, o kuila iene i tena ku kala ni malamba, mba henda kala kia ki tange? O divulu di suluka: “Kioso ene kia kala ni tuana tuofele, kiene kia londekesa o ukexilu uâ—o henda.”
9. Ihi i tua kingila ia lungu ni iama?
9 Ki tu tokala ku diuana kioso ki tu tanga mu Bibidia kuila, o athu a-nda kala ni ku tululuka ni iama. (Tanga Izaia 11:6-9; 65:25.) Mukonda diahi? Lembalala kioso Noué ni muiji uê kia tundu mu álaka kioso kia bhiti o Dilúvio, Jihova ua ambela: ‘O uôma ni ku mi lenga kuala o iama, u kale ku thandu dia jixitu joso mu ngongo.’ Jihova ua bhange kiki phala ku langa o iama. (Dim. 9:2, 3) O kuila Jihova ka tenene ku katula o uôma ku iama, phala ku kumbidila o vondadi iê ia dianga? (Hoz. 2:18) Kia-nda kala kithangana kiambote phala ió a mesena ku bhuluka phala ku kala mu ixi!
‘MUÉNE UA KA KONDA O MASOXI MOSO’
10. Mukonda diahi athu ene mu ndonda masoxi?
10 Solomá kioso kia mono kuila, ‘o ku bhindamesa ni ku tatesa kuoso kua mu bhanga athu kulu-dia-mundu,’ muéne ua di kola: “Ngi mona o masoxi ma ió oso a a tatesa, ni masoxi ma iá a kambe uoso u a konda o malamba.” (Ndo. 4:1) Kiene kimoxi ué lelu, o hadi ia mu di bandekesa. Nanhi mu dietu ua kambe o ku ndonda o masoxi mu kudila? Mu kidi, saí ithangana o muthu u ndonda masoxi a ku sanguluka. Maji o masoxi ni kikote alondekesa muxima ua malamba.
11. Musoso uebhi ua Bibidia u tula ku muxima uê?
11 Xinganeka o misoso i tesa uôma ni ia ngalasa i tu tanga mu Bibidia. Kioso kiafu Sala mu 127 a mivu, ‘Mbalahamu anga uíza mu dila ni kitote kia Sala.’ (Dim. 23:1, 2) Kioso kia xalesa Nouemi, o jimbalakaji jê, “anga a zangula mázui mâ, ni kudila,” “anga a zangula dingi mázui mâ a ta kibúlukutu ni kudila.” (Lute 1:9, 14) Kioso kia kate Sobha Ezekiia, mu ku zukama kufuá, muéne ua sambe, ni ‘ku dila,’ Jihova anga u mona o malamba mê. (2 Jis. 20:1-5) Nanhi ka kala ni henda kioso kia tanga o musoso ua poxolo Phetele kia ditunu Jezú? Kioso kiévu o dikolombolo dia kokola, Phetele, “u tubhuka, u dila kisoxi kiavulu.”—Mat. 26:75.
12. Kiebhi o Utuminu ua Nzambi kia-nda konda o malamba ku athu?
12 Mukonda dia mavuua i tuene mu bhita nau—ki kale ofele mba onene—o athu a mesena ku a konda o malamba ni ku a bhulula. Kienhiki, o Utuminu ua Midi ia Mivu, ua-nda bheka o ima íii ku mundu uê: “[Nzambi] u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata.” (Dij. 21:4) Kima kiambote kuijiia kuila ki kua-nda kala dingi mukôndo, ndolo, ku dila, Nzambi u kanena ué ku buika o nguma ia sukina-ku—o kalunga. Kiki kia-nda bhita kiebhi?
‘OSO ALA MU JIMBILA A KA . . . TUNDA-MU’
13. Ihi iene mu bhanga o kalunga ku athu tundé kia te Adá o kituxi?
13 Tundé kia te Adá o kituxi, o kalunga kene mu tumina o athu kála sobha. O nguma íii, se-ku muthu u tena ku i tolola, o disukidilu dia athu a ituxi, iene mu bheka hadi iavulu ni ndolo. (Lom. 5:12, 14) Mu kidi, mazunda ni mazunda a athu, “hanji a xikama mu ubhika ua hele ia kalunga.”—Jihe. 2:15.
14. Ihi ia-nda bhita kioso kia-nda bhuisa o kalunga?
14 O Bibidia i tanga o thembu, ia-nda buika ‘o nguma i sukidila-ku, o kalunga.’ (1 Kol. 15:26) Ibuka iiadi a-nda tambula o mabesá enhaá. O “mundu uavulu” uala ku muenhu lelu, ua-nda bhuluka phala ku tunga ku mundu uobhe, ku hádia ni hádia. Mazunda ni mazunda a athu afú kiá, a-nda ku a fukununa, phala ku tambula o muenhu ku mundu uobhe. U tena ku xinganeka o kisangusangu kia ku di sanga ni ió afú kiá? O misoso ia Bibidia ia lungu ni difukunukinu, i tu londekesa kiebhi ki tua-nda divua.—Tanga Marku 5:38-42; Luka 7:11-17.
15. Ihi i ueji bhanga mu ku mona ndandu iê ua vutuka ku muenhu?
15 Xinganeka mu izuelu íii, “enhoso kithangan’okio anga a diuana kisuma kia dikota,” anga ‘ene oso a kala mu ximana Nzambi.’ Se ua kexile mu kithangana kieniókio, nange ueji bhanga ué kiki. Mu kidi o ku mona dingi o jindandu jetu ku vutuka ku muenhu, kia-nda tu sangulukisa kiavulu. Jezú uambe: “Kumbi dí diza, dia oso ala mu jimbila kuívua o dízui diê, ni kutunda-mu.” (Nzu. 5:28, 29) Se-ku muthu mudietu ua mono kiá o ima íii ku bhita; o kizulukutu kiki, kia lungu ni “ima ia kambe ku moneka.”
NZAMBI UA-NDA TUMINA ‘KU THANDU DIA IMA IOSO’
16. (a) Mukonda diahi tua tokala kuzuela ni kisangusangu kioso o mabesá a kambe ku moneka? (b) Ihi iambe Phaulu phala ku suínisa o Jikidistá mu kilunga kia Kolindo?
16 Mu kidi, lelu oso a kala jifiiele kua Jihova mu izuua íii ia bhonzo, a kingila mabesá a dikota! Sumbala o mabesá enhá, kiluua a a mona, o ku a xinganeka ku tu kuatekesa ku suua o ima ia beta-kota, phala ka tu dibhalese ku ima ia mundu iú ia-nda bhita. (Luk. 21:34; 1 Tim. 6:17-19) Mu usuku ua ubhezelu ku muiji, mu kuzuela ni jiphange, ku longa o maxibulu, ni ió a mesena o kuívua, tua tokala kuzuela ni kisangusangu kioso, o kidielelu kietu ni ima i tua kingila ku hádia. Se tu bhanga kiki, o ima íii ia-nda kala ku mixima ietu. Kiene kia bhange poxolo Phaulu mu ku suínisa o jiphange. Muéne ua kexile mu zuela nau, kala o Utuminu ua Kristu ua Midi ia Mivu ua zukamene kiá. Xinganeka o izuelu ia Phaulu mu divulu dia 1 Kolindo 15:24, 25, 28.—Tanga.
17, 18. (a) Kiebhi Jihova kia kexile mu tumina ‘ku thandu dia ima ioso’ ku dimatekenu kioso kia bhange o athu? (b) Ihi ia-nda bhanga Jezú phala mu ngongo mu kale kutululuka?
17 Se-ku ukexilu ua mukuá ua kulondekesa o disukilu dia ima, íii kála o izuelu, ‘Nzambi ua-nda tumina ku thandu dia ima ioso.’ Kiki kilombolola ihi? Xinganeka mu jaludim ia Edene, kioso Adá ni Eva kia kexile hanji athu a iuka, Adá ni Eva exile muiji ua tululuka ua Jihova. Jihova muéne o Ngana ia Ngongo ioso, ua kexile mu tumina ku thandu dia ibhangelu iê ioso, o ji-anju ku diulu ni athu mu ixi. Ene akexile mu zuela né, ku mu bheza, muéne ua kexile mu ku a besoala. Muéne ué ua kexile mu tumina ‘ku thandu dia ima ioso.’
18 Maji o ukamba iú a u batula kioso athu a a nganala kua Satanaji, a bhukumukina o ungana ua Jihova. Tundé ku muvu ua 1914, o Utuminu ua Mexiia ua mu kalakala phala ku bheka dingi o ukamba iú ni kutululuka. (Efe. 1:9, 10) Ku Utuminu ua Midi ia Mivu, o ima ia madiuanu “ia kambe ku moneka” lelu, tua-nda i mona. Kiene kia-nda kuíza “o dizubhilu,” kua-nda sukila o Utuminu ua Kristu ua Midi ia Mivu. Ihi ia-nda bhita? Sumbala a mu bhana ‘o kutena kuoso . . . ku diulu, ni mu ngongo,’ Jezú ki mukua luímbi kana. Muéne ka mesena ku tambula o kididi kia Jihova. Muéne ni ku lenduka kuoso, “ungana uoso ua kà u bhakuila Nzambi, muène Tata.” Muéne mu kididi kiê kia ngana, u kala ‘mu ku bhana o fuma kua Nzambi, o Tata.’—Mat. 28:18; Fil. 2:9-11.
19, 20. (a) Kiebhi kia-nda londekesa o jifiiele ku Utuminu, kuila a xikina o ungana ua Jihova? (b) Ihi i tua kingila?
19 Mu kithangana kieniókio, o jifiiele joso ja belesela ku Utuminu, a-nda kala athu a iuka. Ene a-nda kaiela o phangu ia Jezú, ni kulenduka kuoso, a-nda xikina o ungana ua Jihova. Ene a-nda kala ni ujitu ua kulondekesa o vondadi iâ ia ku bhanga kiki, kioso kia-nda bhita ku polova ia sukina. (Dij. 20:7-10) Maji o athu oso a bhukumuka—ki kale athu mu xitu, mba mu nzumbi—a-nda ku a buika. Kia-nda kala kithangana kia kisangusangu kia dikota! O muiji uoso mu ngongo, ua-nda ximana ngó Jihova, ua-nda tumina ‘ku thandu dia ima ioso.’—Tanga Jisálamu 99:1-3.
20 O kuila o ima ia madiuanu ia-nda bhita ku hádia ku Utuminu ua Nzambi, i ku suínisa ku bhanga o vondadi ia Nzambi? O kuila u tena ku dituna ku u nganala ku ikanenu ia makutu ni kidielelu ki bhana o mundu ua Satanaji? O kuila ua-nda suína mu ku kuatekesa ni ku zokela o ungana ua Jihova? O ukexilu uê ua tokala ulondekesa kuila ua mesena ku bhanga kiki katé ku hádia. Ua-nda tambula o ujitu ua ku kala ni kutululuka mu midi ia mivu—o hádia sé dizubhilu
[Ibhuidisu ia ku dilonga]
[Jifoto ku mbandu 16]
Kioso kia-nda zubha o kikalakalu kiê kia Sobha, ni kulenduka kuoso, Jezú ua-nda vutula o Utuminu kua Tat’ê
