Madiuanu A-nda Bhita Kindala
Madiuanu A-nda Bhita Kindala
SE DOTOLO a mu solo phala ku bhanga pelasá ia bhonzo ku mukutu uê, kiebhi ki ueji divua mu kuijiia kuila muéne nuka ua bhangele o pelasá íii? Se phata ueji kala ni uôma. Abha se uivua kuila o dotolo íii muéne o mesene ia ji dotolo mu kikalakalu kiê, ni kuila muéne ua bhange kiá pelasá javulu ja tundu kiambote kála íii ia-nda ku u bhanga? Ki ueji ku mu dielela, kuila ua-nda ku kuatekesa?
O mundu iú mu tuala, ua kate, ua bhingi ku “u saka.” Bhu kaxi ka Maka mê, o Bibidia, Jihova Nzambi ua kanena kuila ua-nda bhanga dingi o ixi íii Palaízu. (2 Phetele 3:13) Maji phala o ixi ku kala palaízu, a tokala ku dianga ku zubha o kuiibha kuoso. (Jisálamu 37:9-11; Jisabhu 2:21, 22) O ima ioso i tu bhekela hadi i tuene mu mona ku mundu, ia-nda bhua ande dia kuíza o palaízu. Kiki kia-nda kala madiuanu!—Dijingunuinu 21:4, 5.
O Jimbangi ja Jihova ja xikina mu ima ioso ia-nda bhita. Mukonda diahi? Mukonda o madiuanu a bhangele Jihova Nzambi, a londekesa kuila muene uala ni kutena kua ku kumbidila o ikanenu ioso ia bhange. Sokesa o madiuanu a samanu a tange mu Bibidia, ni ikanenu ia-nda di kumbidila ku hádia.
Eie u tena ku di longa dingi o ikanenu ia Bibidia ia-nda bhita ku hádia. Kioso ki uia ni ku bandekesa o kixikanu kiê, o kidielelu kiê ki di bandekesa ué—o kidielelu kia ku kala mu thembu ia-nda bhita o madiuanu a-nda bhanga Jihova phala o mbote iê.
[Kidikisu/Foto ku mbandu 7]
MADIUANU:
JEZÚ UA DISA ATHU AVULU NI TU MBOLO NI TU MBIJI.—MATESU 14:13-21; MARKU 8:1-9; NZUÁ 6:1-14.
KIKANENU:
‘Phala o mavu ende ni ku bhana dingi o idima iê; o Nzambi, Nzambi ietu muene ua-nda tu bhana o ku zediua.’—JISÁLAMU 67:6.
KILOMBOLUELU PHALA ETU:
SE-KU MUTHU UA-NDA KAMBA KUDIA.
MADIUANU:
JEZÚ UA JIKULA O MESU A IFOFO.—MATESU 9:27-31; MARKU 8:22-26.
KIKANENU:
“O mesu a ifofo a kà jikuka.”—IZAIA 35:5.
KILOMBOLUELU PHALA ETU:
ATHU OSO ALA IFOFO A-NDA MONA.
MADIUANU:
JEZÚ UA SAKE O INEMA.—MATESU 11:5, 6; NZUÁ 5:3-9.
KIKANENU:
“Inema ia kà tuka-tuka, kala jimbambi.”—IZAIA 35:6.
KILOMBOLUELU PHALA ETU:
O INEMA IOSO IA-NDA KU ELUKA.
MADIUANU:
JEZÚ UA SAKE MAUHAXI AVULU.—MARKU 1:32-34; LUKA 4:40.
KIKANENU:
‘Ki kua ka kala muthu uamba: Nga kate.’ —IZAIA 33:24.
KILOMBOLUELU PHALA ETU:
O MAUHAXI OSO A-NDA BHUA. TUA-NDA KALA NI SAUIDI IA IUKA.
MADIUANU:
JEZÚ UA TULULUKISA O NGUZU IA IBHANGELU.—MATESU 8:23-27; LUKA 8:22-25.
KIKANENU:
“Ene-phe a kà tunga jinzo, anga a kala-mu; a kà dima milenga ia mividi, anga a kà dia idima iê. Ene ué ka kà kalakala mu kingoho.”—IZAIA 65:21, 23.
“O athu ami anga a kà tunga mu diembu dia batama, ni mu madiembu a kondama, ni mu ididi ia tululuka ia kunhoha.”—IZAIA 32:18.
KILOMBOLUELU PHALA ETU:
KI KUA-NDA KALA DINGI MAVUUA.
MADIUANU:
JEZÚ UA BHEKA ATHU KU MUENHU.—MATESU 9:18-26; LUKA 7:11-17.
KIKANENU:
‘Oso ala mu jimbila a-nda . . . tunda-mu.’—NZUÁ 5:28, 29.
“O musanza ua kalunga anga u bhana oso o madifundu ala-mu. O kùfua ni kalung’a-ngombe, anga a bhana uâ ni madifundu mâ ma jikilile bhoxi dia kutena kuâ.”—DIJINGUNUINU 20:13.
KILOMBOLUELU PHALA ETU:
O JINDANDU JETU A-NDA KU A BHEKA KU MUENHU.
