O Kuila u Xikina mu Madiuanu o Soneke mu Bibidia?

SE A ku tangele musoso, ki ueji xikina ku muthu ua mu ku tangela o musoso, se ua kijidile kuila o muthu muenhó muthu ua kidi kene mu tanga makutu? O kidielelu kiki, ki kieji kuíza ngó mu kuijiia kuila o muthu iú ua mu zuela o kidi, maji mu kuijiia ué o ukexilu uê uoso. Se o muthu uene mu ku tangela kiá o kidi tundé ukulu, nuka ua ku tangele makutu, ueji xikina o kidi kia mu ku tangela lelu.

Kiene kimoxi ué ni madiuanu a a tange mu Bibidia. Se-ku muthu mudietu ua kexile ku muenhu kioso kia bhitile o madiuanu enhó. Maji tu tena kuijiia se tua tokala ku dielela ku misoso ia Bibidia—se i tanga muene o kidi. Kiebhi ki tu tena ku bhanga kiki? Tua-nda di longa maka a tu kuatekesa ku bandekesa o kixikanu kietu mu misoso ia Bibidia, ia lungu ni madiuanu.

O madiuanu avulu a bhangele mu ididi mua kexile athu avulu. Saí ithangana, mazunda ni mazunda a athu akexile mu mona o madiuanu. (Makatukilu 14:21-31; 19:16-19) Ka kexile mu ku a bhanga mu kasuekele, dikanga dia athu.

Ki kua bhingile ipheteka phala ku bhanga o madiuanu. Ki ku bhingile ima ia bhonzo, mba iphata. O madiuanu a tanga o Bibidia, a a bhangele mu ithangana ka i kingile, ni kioso athu kia kexile mu i bhinga. (Marku 5:25-29; Luka 7:11-16) Mu ithangana ia bhange o madiuanu enhó, ka a bhangele mu kididi kia iudikile phala ku bhanga o madiuanu.

O athu ka kexile mu bhanga o madiuanu enhá phala kua bhana fuma, ni ku katula-ku kijingu mba phala ku a futa. Maji akexile mu ku a bhanga phala ku bhana kijingu kua Nzambi. (Nzuá 11:1-4, 15, 40) Kiexile kituxi o athu ku bhanga o madiuanu phala kua futa.—2 Jisobha 5:15, 16, 20, 25-27; Ikalakalu 8:18-23.

O madiuanu oso o soneke mu Bibidia, alondekesa kuila ki athu ahatu akexile mu ku a bhanga. Mu kifika, o kalunga ni mulenge a tululukile, o menha o lungulule mu vinhu, o nvula a i fidisile, anga i noka dingi, o athu akexile mu ku  a saka, o ifofo akexile mu mona. O madiuanu oso, alondekesele kuila saí muthu ua tundu o athu oso, ua kexile mu bhanga o madiuanu enhó.—1 Jisobha 17:1-7; 18:41-45; Matesu 8:24-27; Luka 17:11-19; Nzuá 2:1-11; 9:1-7.

O jinguma ja mono o madiuanu ka kexile ni phata kuila a bhitile muene. Kioso Jezú kia fukununa Lázalu, o jinguma ja Jezú ka kexile ni phata kuila Lázalu ua fuile. Kiebhi kieji kala ni phata? Lázalu ua bhitile kiá izuua iuana mu mbila. (Nzuá 11:45-48; 12:9-11) Né muene se kua bhitile hama ja mivu kioso kiafu Jezú, o asoneki a Talmude ia Jijudé, ejidile kuila Jezú ua kexile ni ku tena kua ku bhanga madiuanu. Ene kejidile ngó kuebhi kua kexile mu tunda o kutena kua ku bhanga o madiuanu enhó. Kiene kimoxi ué kioso kiambata o maxibulu a Jezú mu inzo ia kufundisa ia Jijudé, ene ka ebhuidisa: “Enu mua bhange madiuanu?” Maji a ebhuidisa: “O kubhanga kiki, mua ki bhange ni kutena kuahi, mba mu dijina dia nanhi?”—Ikalakalu 4:1-13.

O kuila u xikina mu madiuanu a tu tangela o Bibidia? O milongi ioso i tua di longo, ilondekesa kuila o milongi ia Bibidia ia lungu ni kuila o madiuanu, kidi muene. Saí dingi ima i tu bhangesa ku dielela ku misoso íii i tanga o Bibidia. Mu kifika, o Bibidia kioso ki i tanga o misoso, i tanga ué o kithangana kia bhiti o musoso, o ididi mu ia bhitila, ni majina athu. Katé muene ni athu a tokuesa o Bibidia, ene mu diuana ni kidi kia Bibidia. Mazunda a ikanenu iene mu dikumbidila sé ku kamba kikanenu kimoxi. Mu Bibidia tu sanga-mu ué milongi i tena ku kuatekesa o athu ku dibhana kiambote—milongi iene mu kuatekesa athu a itala ioso, a ukexilu uoso. O milongi i longa o Bibidia ia lungu ni ukexilu ua athu ku dibhana, ki i difu ni milongi iéngi.

Se kua dielela luua ku milongi ia Bibidia, mukonda diahi ku sota kithangana phala ku di longa-iu? Kioso ki uia ni kuijiia o milongi iê, ua-nda beta ku i dielela. (Nzuá 17:17) Ua-nda mona kuila u tena ku dielela mu misoso ié ia lungu ni madiuanu a bhitile m’ukulu. Se u xikina mu misoso ia Bibidia, ua-nda xikina ué mu ikanenu ié ia lungu ni ima ia-nda bhita ku hádia.

[Foto ku mbandu 5]

O jinguma ja Jezú ka kexile ni phata kuila Lázalu ua fuile