Mukonda Diahi Kuene Hanji o Kuzonza ni Kitadi?

‘Muthu u kala mu ku tumina mukuá phala ku mu sengulula ngó.’​—NDONGIXI 8:9.

O IZUELU íii, ilondekesa kiambote o ukexilu ua ku tumina ua jinguvulu lelu. O ukexilu iú uene mu bheka hadi ni uadiama. M’ukulu ué, o athu ambote a mesenene ku bheka o kuiuka akexile mu ku a zonza o mixima ni kitadi. Mukonda diahi? Mukonda diahi kuene hanji o kuzonza ni kitadi? Mukonda dia maukexilu atatu a kaiela a suínisa o ukexilu ua kuzonza ni kitadi.

1. O kituxi ki suínisa o ukexilu iú.

O Bibidia i zuela kuila etu oso ‘tuala bhoxi dia ituxi.’ (Loma 3:9) Kála o uhaxi u tu lundula, o kituxi ‘kia tungu’ moxi dietu. O kituxi kiene mu ‘tumina’ kiá o athu tundé xahulu kála sobha. O “kitumu” kiê, ki tu bhikisa ithangana ioso. O kituxi ki bhangesa o athu ku diangela mu ku bhanga ngó o jivondadi jâ, mba ku bhita ku thandu dia akuâ phala ku kala ni ima ia mesena.—Loma 5:21; 7:17, 20, 23, 25.

2. O mundu ua iibha mu tua tungu, u suínisa o ukexilu iú.

O mundu uetu uezala ni luímbi. Mukonda dia ukexilu iú, o athu a bhonzo o ku di tungula. Mukonda dia luímbi, ene a zolo kiavulu ku tumina akuâ. Ene uâ a kala ni jihanji javulu ja ku kala ni kitadi kiavulu ni jimbote—sumbala ka ji bhindamena. A mesena ué ku bhanga ima ia iibha phala ku tena ku kala ni ima ioso ia mesena. Mu veji dia ku dituna o ukexilu iú o athu enhá a ‘kaiela o mundu a mesena ku sota mulonga.’—Makatukilu 23:2.

3. Satanaji o Diabhu u suínisa o ukexilu iú.

Satanaji o anju ia bhukumuka, ua mu ‘nganala o mundu uoso.’ (Dijingunuinu 12:9) Muéne ua uabhela ku nganala o athu. Muéne u tonginina kiambote o ima ia uabhela o athu, kála o ku uabhela o jimbote ni kitadi, kiki ki bhangesa o muthu ku kala mu nganala akuâ.

O kuila kiki kilondekesa kuila tu utuma bhu maku a Satanaji—ni kuila tu xikina ngó ku tu umba kala kia mesena muéne? Tua-nda di longa se mukonda diahi, mu milongi ia-nda kaiela.