Tu Tena Ku Kala Tu Athu a Kidi Ku Mundu Iú Uene Ni Ukexilu Ua Kuzonza o Muxima Ni Kitadi?

“Tua mesena kubhanga mu kidi o ima ioso.”—JIHEBELEU 13:18.

NÉ MUENE tu akua ituxi, o mundu mu tua tungu, ni Diabhu, a tu bhangesa ku tondala, maji etu tu tena ku dituna ku tu nganala! Kiebhi ki tu tena ku bhanga kiki? Mu ku zukama kua Nzambi, ni ku belesela o milongi iê iala mu Maka mê, o Bibidia. Xinganeka mu phangu jiiadi.

KITUMU KIA BIBIDIA: ‘Ki mu kaiele o funza ia mundu iú.’—Loma 12:2.

Musoso ua kidi: Guilherme mukua uenji mu ixi ia Brasil. Muéne uambe kuila ki bhonza ku kala muthu ua kidi. Muéne uambe ué: “Ki bhonza o mukua uenji ku bhanga o uenji sé ku nhana, nange mukonda dia kijijidiku kia ku nganhala o kitadi kia tokala, mba ku di tunda kiambote ku mundu iú. “Athu avulu amba kuila, o ukexilu ua kuzonza o muxima ni kitadi ki kima kia iibha. Ki bhonza kiavulu ku kala u muthu ua kidi, se eie ua mu kalakala ni kitadi kia uenji.”

Maji né kiki, Guilherme uene mu di tunda kiambote mu kijijidiku kia ku kamba ku kala muthu ua kidi. Muéne uambe: “Sumbala mu mauenji muthu ni muthu muene uejiia ioso ia bhanga, né kiki, tu tena ku kala tu athu a kidi. O muthu ua tokala u kaiela o ukexilu uambote. O Bibidia ia ngi kuatekesa kuijiia o mbote ijila mu ku kala muthu ua kidi. O muthu ua kidi uala ni kitongoluelu kia zele ni muxima ua tululuka. Muéne u bhana phangu iambote ku athu bhu kaxi kê.”

KITUMU KIA BIBIDIA: ‘Oso-phe a bhindamena ku kala jimvuama, ene ku dibhala mu ku dianguka, anga a fuá mu mubhetu, ni mu jihanji javulu jaiibha ji tobhesa, ji bheka muthu mu ku senguluka anga u jimisa mu dibuikilu. Kuma o luímbi lua kitadi, luene lundanji lu bhana o ima ioso ia iibha.’—1 Timote 6:9, 10.

Musoso ua kidi: André uala ni ditenda di bhanga ima ia ku langidila jinzo mba makalu ni jimbanza. Muéne ua bhangele salu phala o ditenda dia malunda a fiti. Saí kizuua kioso kia zubha o malunda a fiti, André ua a bhingi kiá o kitadi kia tokalele ku mu futa. Ene akexile hanji mu kondala o kitadi kia tambula ku athu ai mu tala o malunda a fiti. Kuma kua kexile mu vunda kiá, André a mu futu o kitadi kiê.

André uambe: “Kioso ki nga kexile múia ku bhata, nga mono kuila o diiala dienhódio ua ngi bandekesa ku kitadi. Eme ngejidile kuila muéne keji kuijiia se nanhi a mu bandekesa o kitadi. Maji eme ngejidile kuila, o muthu iú ueji futa o kitadi kia ngi bandekesa! Nga vutuka. Nga tena ku bhita bhu kaxi  ka mundu uavulu, phala ku mu vutuila o kitadi kia ngi bandekesa. O diiala ua sasumuka. Muéne uixi, se-ku muthu ua mu vutuile kiá kitadi.”

André u suluka: “O diiala ua uabhele kiavulu o ukexilu uami. Kua bhitile kiá mivu iavulu, eme ngó ngene mu kalakela o ditenda dienhódio, o akuetu kene dingi mu kalakela-ko. Nga sakidila kiavulu o itumu ia Bibidia, mukonda ia ngi kuatekesa ku kala ni ukexilu uambote.”

Ki tu suínisa kiavulu o kuijiia kuila Nzambi, u tu kuatekesa ku di tunda kiambote mu ilongesu ia iibha. Tua tokala kuijiia kuila, se-ku muthu u tena ku zubha o kuzonza ni kitadi mu nguzu iê. O ukexilu ua di muange kiá kiavulu—o athu akua ituxi ka tena dingi ku batula o ukexilu iú. O kuila kiki kilombolola kuila, o kuzonza ni kitadi ki kua-nda bhua? O milongi ia sukina ilondekesa o kitambuijilu kia Bibidia kia lungu ni maka enhá.