Eie u Kimbadi Kia Fiiele!
Eie u Kimbadi Kia Fiiele!
‘Ki mu di tokala dingi enu mudienu.’ —1 KOL. 6:19.’
KIEBHI KI UEJI TAMBUIJILA?
Iebhi iexile o ikalakalu ia imbadi m’ukulu?
Ikalakalu iebhi ia tambuile o imbadi ioso ia Nzambi?
Kiebhi ki tua tokala ku mona o umbadi ua tu bhana?
1. Kiebhi o kibanzelu kia mundu kia lungu ni ku di tumina?
MIDI jiiadi ni hama jitanu ja mivu ku dima, diiala mukua Ngeleku mu kua ku soneka izuelu ia drama, ua soneka: “Se-ku muthu u xikina ku di bhanga mubhika phala ku tala hadi.” Nange athu avulu lelu, a xikina mu kizuelu kiki. O kizuelu ubhika, ki lembalesa muthu a mu jijidika ku belesela, u bhanga ikalakalu i bhekela mbote ki phala muéne, maji phala akuâ mba phala ngana iê.
2, 3. (a) Kikalakalu kiahi kiala nakiu o jiselevende ja Kristu? (b) Ibhuidisu iebhi ia lungu ni umbandi i tua-nda di longa?
2 Né kiki, Jezú uambe kuma o maxibulu mê eji kala athu a lenduka, a sidivila, mba abhika. Se-ku kima kia iibha, kioso kia zuela ia lungu ni abhika a kidi a Jikidistá. O abhika enhá a tambula kijingu, a a dielela, ni ku a xila. Mu kifika, xinganeka iambe Jezú ia lungu ni “selevende” ande dia kufuá Kuê. Kristu ua kanena ku bhana ikalakalu ku “selevende’oio ia fiiele.”—Mat. 24:45-47.
3 Kima kiambote kuijiia kuila mu kithangana kia mukuá, o selevende ió, a mu ixana “kimbadi.” (Tanga Luka 12:42-44.) Jikidistá javulu ja fiiele jala ku muenhu mu ixi, ka tokala ku kibuka kia kimbadi kia fiiele. Maji o Mikanda Ikola, ilondekesa kuila oso a mu sidivila Nzambi a a bhana ikalakalu. Iebhi o ikalakalu ia bhanga? Kiebhi kia tokala ku mona o ikalakalu íii? Phala ku sanga o itambuijilu, tua-nda di longa o ikalakalu ia kexile mu bhanga o kimbadi m’ukulu.
IMBADI—O KIKALAKALU KIÂ
4, 5. Ikalakalu iahi ia kexile mu tambula o imbadi mu thembu iokulu? Bhana phangu.
4 Mu’kulu, o kimbadi kiexile selevende ia fiiele ia tambuile o kikalakalu kia ku langa o ima ioso kubhata, mba o mauenji a ngana. O kimbadi kia tambuile ungana ua dikota, ni ku tambula konda ia ima ioso kubhata ni kitadi ni ku langa o jiselevende ja mukuá. Tu tena ku ki mona kua Eliiezele, ua kexile ni kikalakalu kia ku langa o ima ioso ia Mbalahamu. Nange Eliiezele muene a mu tumu kua Mbalahamu kuia ku Mezopotamiia ku sola-mu muhatu phala mon’ê Izake. Kiki kiexile kikalakalu kia dikota!—Dim. 13:2; 15:2; 24:2-4.
5 O mululu ua Mbalahamu, Zuze ua kexile ni kikalakalu kia ku langa o ima ioso ia Potifale. (Dim. 39:1, 2) Mu ku bhita thembu, Zuze, ua kexile ué ni kimbadi kiê, ua tambuile o kikalakalu kia ku ‘langidila o’nzo ia Zuze.’ O kimbadi kiki, kiene kia bhele o kúdia ni ku longela o jisaku ja dikuinhi dia jiphange ja Zuze. Muéne ua bhange ioso ia lungu ni ku ‘nhana’ o kopho ia phalata, kala kia mu tumine Zuze. Mu kidi, o kimbadi kia tambuile ujitu ua dikota ku jingana jâ.—Dim. 43:19-25; 44:1-12.
6. Kikalakalu kiahi ki tambula o tufunga mu kilunga?
6 Mu ku bhita hama ja mivu, o poxolo Phaulu ua soneka kuila, o tufunga tua Jikidistá, eji kala ‘kimbadi kia Nzambi.’ (Tit. 1:7) A a solo phala ku inga “o kilunga kia Nzambi,” ene ala ku pholo ni ku uanena o ikalakalu mu kilunga. (1 Phe. 5:1, 2) Maji o ikalakalu iâ ki i difu. Mu kifika, tufunga tuavulu tua Jikidistá, a sidivila mu kilunga. O tufunga tua ilunga, a sidivila ilunga iavulu. O Kibuka kia Filiiale, a langa o ilunga ioso mu ixi mua tokala. Maji né muene kiki, oso a tokala a bhanga o kikalakalu kiâ ni ufiiele uoso; mukonda oso ‘a ka bhakuila ji konda kua Nzambi.’—Jihe. 13:17.
7. Kiebhi ki tuejiia kuila o Jikidistá joso, a sidivila kala kimbadi?
7 Ihi i tuamba ia lungu ni Jikidistá javulu ja jifiiele ki tu funga mu ilunga? O poxolo Phaulu ua soneka mukanda phala o Jikidistá joso, kuila: ‘Kala muthu o uhete ua tambula a u kumbidila mu ukunji, mu sidivila akuenu kala u kimbadi bhu kaxi kia mbote ki tu tokala a ilondekesa mu maukexilu avulu.’ (1 Phe. 1:1; 4:10) Bhu kaxi ka mbote iê ki i tu tokala, Nzambi ua tu bhana o ujitu, ni jimbote, ni uhete, phala tu tene ku kuatekesa o phange jetu mu kilunga. Kienhiki, selevende joso ja Nzambi ene mu sidivila akuâ kala o kimbadi, mu ku bhangesa kiki a tambula kijingu, u a bhangesa ku a dielela, kikalakalu kia dikota.
ETU TUA TOKALA KUA NZAMBI
8. Kitumu Kiebhi ki tua tokala kuijiia?
8 Tua-nda di longa itumu itatu i tua tokala kuijiia mu ku bhanga o kikalakalu kietu kia umbadi. Kia dianga: Etu oso tua tokala kua Nzambi, tu bhakuila o ji konda kua muéne. Phaulu ua soneka: ‘Ki mu di tokala dingi enu mudienu. Kuma a mi sumbu ni pelesu.’ (1 Kol. 6:19, 20) Mukonda tua tokala kua Jihova, tua tokala ku belesela o ijila iê, kuma o ijila iê ki i neme kana. (Lom. 14:8; 1 Nzu. 5:3) Etu ué tu abhika a Kristu. Kála o kimbadi m’ukulu, etu ué a tu bhana ufôlo uavulu—maji ki ufôlo ua ku bhanga ioso i tua uabhela. Tua tokala ku bhanga o kikalakalu kala kia tu bhana. Kikalakalu kioso-kioso ki tu tambula ni ku kaiela o itendelesu mu kilunga, etu enioso tu jiselevende ja Nzambi ni ja Kristu.
9. Kiebhi Jezú kia sokesa o ukamba ua ngana ni selevende iê?
9 Jezú u tu kuatesa ku tendela o ukamba ua ngana ni selevende iê. Saí kizuua muéne ua zuela ni maxibulu mê ia lungu ni selevende ua vutukile kubhata kioso kia zubha ku kalakala o kizuua kia muvimba. O kuila o ngana ua mu ambela: ‘Nanhi mu dienu u kala ni selevende ua kalakala o kizuua kioso ku díbhia mba mu ku langa o jimbudi, mu bhixila kubhata, u mu ambela: Zá kunu bhabha, xikama ku meza ni u diê? Anga ua-nda ku mu ambela: Bhanga lusolo u ngi lambele kúdia ni ngi nué. Ki ngi zubha kiene ki ua-nda diâ? O kuila u sakidila o selevende mukonda ua bhange i ua mu tumina? Kiene ué kimoxi ni enu, se mua bhange o ima ioso ia mi tumu, mu ila kuma: Tu akalakadi a iximba. I tua bhange, iene i tua tokala o ku bhanga.’—Luk. 17:7-10.
10. Ihi ilondekesa kuila Jihova ua uabhela o nguzu ietu i tu bhanga ia ku mu sidivila?
10 Mu kidi, Jihova ua uabhela o nguzu ietu i tu bhanga ia ku mu sidivila. O Bibidia i tu tangela: ‘Nzambi ki mukua ku zonda. Muéne ka landuka mu ku jimba o sidivisu i mua bhange, mba o henda i mu edikisa mu dijina diê.’ (Jihe. 6:10) Jihova ka tu bhingi kima ki tu tena ku ki bhanga. Maji kabasa kima kia tu bhinga, ki sidivila phala o mbote ietu, ki kima ki nema kana. Kála kia tange Jezú mu kifika, o selevende ka bhange ima phala muene, mu ku ta o ibhindamu iê ku pholo. O pondo ia tokala íii, kioso ki tu di bhakula kua Nzambi, tu sola ku ta ku pholo o vondadi ia Nzambi. Ku xikina mu kiki?
IHI I KINGILA JIHOVA KO KUETU
11, 12. Mukonda dia ku kala tu kimbadi, ídifua iebhi i tua tokala o kulondekesa, ni iebhi i tua tokala o kueha?
11 O kitumu kia kaiiadi kiki: Mukonda dia ku kala tu kimbadi, etu oso tu belesela kijila kimoxi. Mu kidi, saí ikalakalu ka i bhanga ku jiphange joso mu kilunga. Maji saí ima ia tokala ku bhanga athu oso mu kilunga. Mu kifika, mukonda dia ku kala tu maxibulu a Jezú, tu Jimbangi ja Jihova, a tu tendelesa ku di zola mudietu. Jezú uambe kuila, o ku di zola, kiene o kijimbuete kia Jikidistá ja kidi. (Nzu. 13:35) O henda ietu ki tu ilondekesa mu kilunga. Tu suína mu kulondekesa henda ku athu kala kumoxi n’etu mu ubhezelu. Kiki kiene ki tua tokala o ku bhanga etu oso.
12 O ukexilu uambote, kima ué ki tua tokala ku ulondekesa. Kienhiki, tua tokala kueha o ukexilu ua iibha ua muenhu a u fidisa mu Mak’â Nzambi, Bibidia. Phaulu ua soneka: “Jindumbu, ni abhezi a iteka, ni akua jiphanda, ni mâla a ilalu, ni mâla akua kubhanga ufusa ni mâla ni akuâ. Ni mii, ni akua luimbi, ni jihôlua, ni axingi a jindaka, ni ingulungumba, ene oso kà tena kubhingana mu Utuminu ua Nzambi.” (1 Kol. 6:9, 10) Mu kidi, ku bhinga ku bhanga nguzu phala tu tena ku belesela o ijila ia Nzambi. Maji, kima kiambote ku bhanga nguzu, mukonda i tu bhekela mabesá avulu, katé muene ni ku kala ni ukexilu uambote u tu bhangesa ku kala ni sauidi iambote, ku dibhana kiambote ni akuetu, ni ku tu xikina kua Nzambi.—Tanga Izaia 48:17, 18.
13, 14. Kikalakalu kiahi kia bhana ku Jikidistá joso, ni kiebhi ki tua tokala ku mona o kikalakalu kiki?
13 Lembalala ué kuila, o kimbadi kia kexile ni kikalakalu. Etu ué tuala ni kikalakalu. A tu bhana o ujitu ua dikota—o kuijiia kua kidi. Nzambi u kingila kuila tu bhana ué o kuijiia kuku ku akuetu. (Mat. 28:19, 20) Phaulu ua soneka: “Etu tua tokala kuila enu mu tu banza kuma tu jingunza ja Kristu, tu imbadi a tu tuika kulonga o kidi kia ijinganu ia Nzambi.” (1 Kol. 4:1) Phaulu uejidile kuila o kimbadi u langa o “ijinganu ia Nzambi,” ni ku zuelela akuetu ni ufiiele uoso kala kia tendelesele o Mesene, Jezú Kristu.—1 Kol. 9:16.
14 O ku zuelela akuetu o kidi, kilondekesa henda. Tuejiia kuila kala Kidistá uala ni ibhidi iê. Maji ki athu oso a tena ku kalakala kiavulu mu sidivisu ia ku boka. Jihova uejiia o maka enhá. O kima kia beta o kota, o ku bhanga ioso i tu tena. Mu ku bhanga kiki, tu londekesa o henda ia kidi kua Nzambi ni ku jivizinhu jetu.
O VALOLO IA KU KALA FIIELE
15-17. (a) Mukonda diahi o kimbadi kia tokala ku kala fiiele? (b) Kiebhi Jezú kia londekesa o ibhidi ijila mu ku kamba o ufiiele?
15 O kitumu kia katatu kia lungu ué ni ijila iiadi i tua di longo kiá: Tua tokala ku kala tu athu a fiiele, athu a kidielelu. O kimbadi nange u kala ni ifua iambote ni uhete mu ku bhanga o ima, maji né kiki, o ifua iambote ni uhete uê ki i kala ni valolo se muene ka londekesele ufiiele kua ngana iê. O ufiiele kima kia bhingi phala ku kala kimbadi kiambote ni ku di tunda kiambote bhu pholo ia ngana iê. Lembalala ia soneka Phaulu: “Kunu-phe uoso a mu tuika o kikalakalu kiki, u bhinga u kala fiiele.”—1 Kol. 4:2.
16 Se tu kala tu athu a fiiele, tua-nda tambula mabesá; kiki kidi muene. Se ki tu kala tu athu a fiiele, tua-nda kala ni ibhidi iavulu. Tua mono o kijila kiki, mu kifika kia tange Jezú kia lungu ni ji talendu. O jiselevende ja bhangele o “uenji” ni kitadi kia ngana ni ufiiele uoso, a a ximana ia a a besoala kiavulu. O selevende ka tena ku bhanga o uenji ni kitadi kia mu bhana ngana iê, a mu fundisa, iu a mu tangela kuila selevende ia “bhukumuka,” “kilalu kia selevende,” ni kuila ‘ka sidivila kima.’ A mu tambula o talendu ia mu bhanene, ia a mu kaie.—Tanga Matesu 25:14-18, 23, 26, 28-30.
17 Mu kithangana kia mukuá, Jezú ua zuela o ibhidi ijila ku muthu u kamba ufiiele. Muéne ua zuela: “Bhua kexile mvuama u kala ni kimbadi kiê. Anga bhu kala ue athu, aia, hé a mu tanga kua mvuama muenhú kuma muène ua-lu zanga jimbongo jê. Anga u mu ixana, u mu ambela, uixi: Ngala ku kuívua kiebhi? Ima iala ku kutanga ia kidi? Bhana konda ia umbadi ué, mukonda kutena dingi kukala u kimbadi kiami.” (Luk. 16:1, 2) A mu kaiele mukonda dia ku zanga o jimbongo ja ngana iê. Disá dia dikota phala etu! Mu kidi, etu ki tu mesena ku kamba ufiiele mu ima ia tu bhingi o ku bhanga.
O KU DISOKESA NI AKUENU—O KUILA KIMA KIAMBOTE?
18. Mukonda diahi ki tu tokala ku di sokesa ni akuetu?
18 Kala muthu u tena ku dibhudisa: ‘Kiebhi ki nga mu mona o umbadi uami?’ Se tu kuata o ku di sokesa ni akuetu, tu tena ku kala ni maka avulu. O Bibidia i tu tendelesa: ‘Kala muthu a londekese o ibhangelu iê, kiene ki mu bhangesa o ku sanguluka mu diê, sé ku bhindamena ku mona o ibhangelu ia athu engi.’ (Nga. 6:4) Mu veji dia ku sokesa o ima i tu bhanga ni iene mu bhanga akuetu, tua tokala tu tonginina kiambote mu ima i tu tena o ku bhanga. Kiki, ki kia-nda tu langa ngó mu ukexilu ua ku di zangelaka, maji mu ukexilu ué ua ku zoza. Mu ku di tonginina, tua tokala kuijiia kuila o ithangana ietu i lunguluka. Nange mukonda dia ku kamba sauidi iambote, o kitala, mba o ikalakalu iavulu, ki tu tena ku bhanga dingi ioso i tuejidile o ku bhanga. Mba ku mbandu ia mukuá, nange tu tena ku bhanga dingi, i tua mu bhanga kindala ndenge. Se kiki, kiene, mukonda diahi ku fikisa ku bandekesa dingi mu ikalakalu ietu?
19. Se ki tu tambula o ujitu mu kilunga mu kithangana ki tua kingila, mukonda diahi ki tu tokala ku luuala?
19 O maka a mukuá u tua tokala o kuijiia, alungu ni ikalakalu i tua mu bhanga kindala, ni i tua mesene o ku bhanga ku pholo. Mu kifika, phange nange ua mesene ku kala kafunga mu kilunga, mba ku bhanga mbandu mu iônge ionene ni mu iônge ia makota. Kima kiambote ku kalakala kiavulu phala ku kala polondo phala ku tambula o ikalakalu íii, maji né kiki, ki tu tokala ku luuala mba ku zoza, se ka tu bhana mu kithangana ki tua kingile o ku tambula. Saí maujitu nange tu a tambula mu kithangana ki tu ki fikile. Lembalala kuila Mozé, nange ua kexile polondo phala ku katula o akuâ Izalaiele ku Ijitu, maji muéne ua tokalele ku kingila 40 a mivu phala ku bhanga o kikalakalu kiki. Kiki kia mu bhana dingi kithangana kia ku bandekesa o uhete uê, phala ku tena ku tumina o mundu ua Izalaiele a thathamena kiavulu, a bhukumukine.—Ika. 7:22-25, 30-34.
20. Ihi i tua di longo ku phangu ia Jonata?
20 Saí ithangana, o ujitu ka tu bhana-u etu. Kiki kia bhiti ni Jonata. Muéne uexile mon’â sobha, muéne ua tokalele ku kala sobha ia Izalaiele ioso. Maji Nzambi ua solo Davidi, munzangala phala ku kala sobha. Kiebhi Jonata kia divu ni maka enhá? Muéne ua xikina, iu ua kuatekesa Davidi, katé muene ni ku ta o muenhu uê mu iluezu. Muéne uambela Davidi: “Hádia eie muene ua kà kala ku ungana ua kutumina Izalaiele, eme-phe ngà bhabhelela kò-kué; kifua mu ungana ué eme kadi.” (1 Sam. 23:17) O kuila ua kuata o pondo bhabha? Jonata ua xikina, ka kuatele difuba dia Davidi, kala kia bhangele tat’ê. Mu veji dia ku kala ni difuba dia ikalakalu iene mu tambula akuetu mu kilunga, etu enioso tua tokala ku langa kiambote o kikalakalu kietu ki tua tambula kiá. Tu tena ku xikina kuila ku mundu ubhe, Jihova ua-nda kumbidila o vondadi ia jiselevende jê joso.
21. Kiebhi ki tua tokala ku mona o umbadi uetu?
21 Tua tokala tuijiia kuila, mukonda dia ku kala tu imbadi a tu dielela, o ubhika uetu ki u tu katula o ufôlo ni ku tu bhangesa ku dila. Mu veji dia kiki, tu katula mbote. Tu kala ni ujitu ua dikota, a tu dielela, mukonda tua mu bhanga o kikalakalu ka-nda ki bhanga dingi, kia ku boka o njimbu iambote mu izuua íii ia iibha isukidila-ku. Kioso ki tuia ni ku bhanga o kikalakalu kiki, tu kala ni ufôlo ua ku bhanga o kikalakalu mu ukexilu u tu tena. Kienhiki-phe, tu kale imbadi ia fiiele. Mu kiki, tu sanguluka ni ujitu ua tu bhana, ua ku sidivila Ió ua beta o kota mu ngongo ioso.
[Ibhuidisu ia ku dilonga]
[Foto ku mbandu 20]
Tu bhanga ni ufiiele uoso o kikalakalu kia tu bhana phala ku ki bhanga
