Sota o Ku Ditunda Kua Kidi Ku Muenhu
Sota o Ku Ditunda Kua Kidi Ku Muenhu
‘Ua-nda di tunda kiambote mu uendelu uê. . . uanda bhanga o ima ni unjimu.’ —JOSU. 1:8.
KIEBHI KI UEJI TAMBUIJILA?
Kiebhi Solomá kia ditundu kiambote ku muenhu?
Mu ukexilu uahi Phaulu ua di tundile kiambote ku muenhu?
Kiebhi ki u tena ku ditunda kiambote ku muenhu katé ku hádia ni hádia?
1, 2. (a) Ihi i zuela o athu ia lungu ni ku ditunda kiambote ku muenhu? (b) Phala eie, o ku ditunda kiambote ku muenhu ihi?
IHI ilombolola o ku ditunda kiambote ku muenhu? Se u bhanga o kibhuidisu kiki ku athu, ua-nda mona kuila kala muthu uala ni kitambuijilu kiê. Mu kifika, saí athu amba kuila o ku ditunda kiambote ku muenhu, ulombolola ku kala ni kitadi kiavulu, ku kala ni salu iambote, ni ku di longa kiavulu. A mukuá amba kuila o ku ditunda kiambote ku muenhu ulombolola—ku kala ni ukamba uambote ku muiji, ni makamba, mba ni ji koleka ja salu. O muthu u sidivila Nzambi, u tena ku sokesa o ku ditunda kiambote ku muenhu, ni ku tambula ikalakalu iavulu mu kilunga mba ku kalakala kiavulu mu sidivisu ia ku boka.
2 Phala kuijiia se ihi ilombolola o ku ditunda kiambote ku muenhu, ua tokala u soneka o majina a athu u uejiia kuila, a mu ditunda kiambote ku muenhu uâ—ió uene mua bhana o kijingu kia beta-o kota ni ku a xila. Ukexilu uahi uala nau ene mu diá? Ene jimvuama, mba akua fuma? Anga ene mu kua a zangeleka? O kitambuijilu kia-nda londekesa o ukexilu ua muxima uê, ki tena ué ku funhisa o ima i u sola mba mu ima i u mesena.—Luk. 6:45.
3. (a) Ihi ia tokalele ku bhanga Josuué phala ku ditunda kiambote ku muenhu? (b) Ihi i tua-nda di longa kindala?
3 O kima kia beta o kota, o kuijiia se Jihova u tu mona kala tu athu a mu ditunda kiambote ku muenhu, mukonda o muenhu uetu ua tokala kua muene. Kioso Jihova kia bhana kua Josuué o kikalakalu kia dikota kia kuendesa o akua Izalaiele mu Ixi ia a Kanena, Jihova ua mu tendelesa ku tanga ‘usuku ni muanha’ o Kitumu kia bhele kua Mozé, ni ku kumbidila ioso ia kexile-mu. Nzambi ua mu kanena: ‘Mu kiki ua-nda ditunda kiambote mu uendelu ué, mu uendelu ué ua-nda bhanga o ima ni unjimu.’ (Josu. 1:7, 8) Eie uejiia kuila Josuué ua di tundile muene kiambote ku muenhu. Ihi i tuamba ia lungu n’etu? Kiebhi ki tu tena kuijiia kuila o kibanzelu kietu kia lungu ni kuijiia se ihi ilombolola o ku ditunda kiambote ku muenhu, kiene kimoxi ué ni kia Nzambi? Tua-nda di longa maka alungu ni kiiadi kia athu a a a tange mu Bibidia.
O KUILA SOLOMÁ UA DI TUNDILE KIAMBOTE KU MUENHU?
4. Mukonda diahi tu tena kuzuela kuila Solomá ua di tundile kiambote ku muenhu?
4 Solomá ua di tundile kiambote ku muenhu mu maukexilu avulu. Mukonda diahi? Mukonda mu mivu iavulu, muéne ua kexile mu xila ni ku belesela Jihova, iu ua tambuile mabesá avulu. Ua lembalala kuila kioso Jihova kia bhingi Solomá phala ku mu bhinga ioso ia mesenene, o sobha ua mu bhingile unjimu phala ku tumina kiambote o mundu. Mu kiki, Nzambi ua mu besoala ni unjimu ni jimbote javulu. (Tanga 1 Jisobha 3:10-14.) O unjimu uê, ‘anga u tunda o kuijiia kua athu oso akexile mu thunda, o kuijiia kuoso kua akua Ijitu, ndenge.’ Kienhiki o fuma ia Solomá ia di muange “mu jixi ku jimbandu joso.” (1 Jis. 4:30, 31) Kia lungu ni jimbongo, Solomá ua kexile mu tambula ku muvu, 25 a ji tonelada ja ulu! (2 Mal. 9:13) Muéne ua kexile ni uhete mu ku batula o maka, mu ku tunga, ni mu ku bhanga uenji. Solomá ua kexile mu ditunda kiambote ku muenhu, kioso kia kexile mu belesela Nzambi.—2 Mal. 22-24.
5. Ihi ia zuela Solomá ia lungu ni ku ditunda kiambote ku muenhu bhu pholo ia Nzambi?
5 O ia soneka Solomá mu divulu dia Ndongixi, ilondekesa kuila muéne ka kexile mu banza kuila, o jimvuama mba akua fuma ene ngó a di tundile kiambote ku muenhu. Kana. Muéne ua soneka: ‘Nga mono kuila kana-ku kima kia fuama o muthu kubhanga kala o ku sanguluka ni kubhanga mbote ku muenhu uê. Ni kuila ué, o muthu ua tokala u dia, ua tokala u nua, n’a kembe ku mbote ioso ia kikalakalu kiê, ioso íii ujitu ua Nzambi.’ (Ndo. 3:12, 13) Muéne ua mono kuila o ima íii, iala dingi ni valolo phala ió a a xikina kua Nzambi, ala ni ukamba uambote ni Muéne. Solomá ua zuela ni kidi kioso: “Ku ioso i uene mu kuívua, o dizubhilu diê dienhidi: Xila Nzambi, u aluke o ijila iê, mukonda kiene kia fuama athu oso ku ki bhanga.”—Ndo. 12:13.
6. Ihi i tu longa o phangu ia Solomá ia lungu ni ku ditunda kiambote ku muenhu?
6 Mu mivu iavulu, Solomá ua kexile mu belesela Nzambi. Tua di longo kuma muéne “anga u zola Jihova, u kala mu kuenda mu ijila ia tat’â Davidi.” (1 Jis. 3:3) Iú ki uene o ukexilu ua iuka ua ku ditunda kiambote ku muenhu? Ni itendelesu ia Nzambi, Solomá ua tungu tembulu ia dikota phala o ubhezelu ua kidi, iu ua soneka madivulu atatu a Bibidia. Sumbala ki tu kingila ku bhanga kála kia bhange muéne, maji o phangu ia Solomá kioso muéne kiexile hanji fiiele kua Nzambi, ia tokala ku tu kuatekesa ku tonginina se o ukexilu ua ku ditunda kiambote ku muenhu ihi, ni ku tu kuatekesa ku kala ué ni ukexilu iú. Ia lungu ni maka enhá, lembalala kuila bhu kaxi ka nzumbi ikôla, Solomá ua soneka kuila o jimbote, unjimu, o fuma, ni kutena—o ima ia mona o athu kuila iene i zediuisa o muenhu—ima ia ngó. O ima íii, ki iala ni valolo ia kidi, ‘nguzu ia ku kuata o mulenge.’ Nuka ua ki muene kuila athu avulu a zola o jimbongo a mesena ku kala dingi ni jimbongo? Ene a thandanganha dingi ni ima iala na-iu kiá. Maji saí kizuua o jimbongo jâ, ja-nda xalela kua athu engi.—Tanga Ndongixi 2:8-11, 17; 5:10-12.
7, 8. Kiebhi Solomá kia londekesele ku kamba ufiiele, ni ihi ia bhitile na-iu?
7 Eie uejiia ué kuila, Solomá ka kolokotele mu ufiiele uê. O Mak’â Nzambi amba: ‘Mu bhita thembu, mu ukukilu ua Solomá, o ahatu’ê, a mu bhingalesa o muxima uê, he u kuata kiá ku kaiela jinzambi jengi; o muxima uê ki ua kexile dingi kua Jihova Nzambi, kala kia kexile o muxima ua tat’â Davidi . . . Solomá anga u bhanga kia iibha ku mesu Jihova.’—1 Jis. 11:4-6.
8 Jihova anga u luuala, uambela Solomá: “Mbata . . . eie ua fulu kubhaka o kikutu kiami, mba ngó kualuka o ijila i nga ku xindila, o utuminu ua’xi iii nga-nda ku ku katula-u, anga ngi bhana kua mubhik’é.” (1 Jis. 11:11) Kima kia iibha! Sumbala Solomá ua di tundile kiambote mu ukexilu uoso, saí ithangana muéne ua luualesa Jihova. Mu kima kia betele o kota—o ufiiele kua Nzambi—Solomá ua lueza. Kala muthu ua tokala u dibhudisa, ‘o kuila o ku di longa ia lungu ni ukexilu ua muenhu ua Solomá ia-nda ngi kuatekesa ku ditunda kiambote ku muenhu?’
O KU DITUNDA KUA KIDI KU MUENHU
9. O kuila Phaulu ua ditundu kiambote ku muenhu kala kia kexile mu banza o athu?
9 O ukexilu ua muenhu ua poxolo Phaulu, ki ia difuile ni ua Sobha Solomá. Phaulu kexile sobha, ka kexile mu bhanga jifesa ni jisobha. Mu veji dia kiki, muéne ua bhitile ni nzala, ni dinhota, ni mbambi, ni ku kamba izuatu. (2 Kol. 11:24-27) Mukonda dia ku xikina kuila Jezú, muene o Mexiia, Phaulu ka kexile dingi ni ujitu ua kexile nau mu ngeleja ia Jijudé. A mu zembele ué ku atuameni a Jijudé. A mu takula mu kaleia, a mu beta ni jingoji, a mu beta ni ji mbangala, ia a mu takula matadi. Phaulu uambe kuila muéne ni phange jê ja Jikidistá a a zembele ni ku a zukutisa ni ku a tatela. ‘Katé bhu tuez’abha tua kituka tu dixidilu dia mundu, tu ixete ia ima ioso mu ngongo.’—1 Kol. 4:11-13.
10. Mukonda diahi o athu akexile mu mona kuila Phaulu ua texi o ukexilu uê?
10 O diiala a mu ixanene Saúlu, tua muijiia mu dijina dia poxolo Phaulu, kioso kiexile munzangala, ua di tundile kiambote ku muenhu. A mu vualele ku muiji ua jimvuama, a mu longo ku mesene Ngamadiiele, mulongexi akexile mu ku mu xila kiavulu ku athu, ua soneka: “Mu ubhezelu ua Jijudé, o masoko mami ku akua kokuetu, nga a sombokele ku pholo.” (Nga. 1:14) Saúlu uejidile kiambote o dimi dia Jihebeleu ni dia Ngeleku, ua tokalele ku mbele ia Loma, mukonda dia kiki ua kexile ni ujitu uavulu, ua mesenene ué akuâ. Se muéne ua solele ku di bhakula mu ima ia mundu, nange ueji kala ni kijingu kiavulu ni ku nganhala kitadi kiavulu. Maji mu veji dia kiki, muéne ua solo o njila iéngi, o athu—nange o jindandu jê—a monene kuila iexile njila ia ioua. Mukonda diahi?
11. Ihi ia mesenene ku bhanga Phaulu, ni mukonda diahi?
11 Phaulu ua zolele Jihova, iu ua mesenene kuila muéne u mu xikina, o ku kala ni jimbongo ni fuma bhu pholo ia athu, ndenge. Mukonda dia kuijiia kua kidi, Phaulu ua bhana valolo mu kukula, mu sidivisu ia kuboka, mu kidielelu kia kuia ku diulu—ima kene mu i bhana valolo ku athu a mundu. Phaulu uejidile kuila kua kexile maka phala ku u batula. Satanaji uambe kuila ueji nganala o athu phala ka bhange o sidivisu ia Nzambi. (Jobe 1:9-11; 2:3-5) Né muene ni jipolova javulu, Phaulu ua kolokotele ku kala fiiele kua Nzambi ni ku kolokota mu ubhezelu ua kidi. Kiki kiene kia kambe ku athu ku mundu phala ku ditunda kiambote ku muenhu.
12. Mukonda diahi eie ua solo ku dielela kua Nzambi?
12 O kuila ua mesena ku bhanga kala kia bhangele Phaulu? Sumbala ku bhonza ku kala fiiele, tuejiia kuila, o ku kala fiiele ku bheka mabesá, ni ku tu xikina kua Jihova, kiki kiene ki bhangesa o muthu ku ditunda kiambote ku muenhu. (Jisa. 10:22) Tu katula mbote lelu, ni ku kingila ku tambula mabesá ku hádia. (Tanga Marku 10:29, 30.) Kienhiki, ki tu tokala ku dielela, ku ‘jimbongo ja makutu’iji, ki ji tena ku bhandulula kima. Maji tua tokala ku dielela kua Nzambi, Ió u tena ku tu bhana ku mona dia nzungule ima ioso ia ku zediua phala o mbote ietu.’ ‘Tu lundienu umvuama uambote katé ku hádia, phala kienhiki tu tene ku nganhala muenhu, o muenhu ua kidi.’ (1 Tim. 6:17-19) Kiene muene, tu tena ku xikina kuila hama ia mivu ku pholo, tua-nda tena ku tala ku dima ni kuzuela ni kidi kioso, “nga solo muene o njila ia kidi phala ku ditunda kiambote ku muenhu!”
KUOSO KUA KU KALA O JIMBONGO
13. Kitendelesu kiahi kia bhana Jezú kia lungu ni ku lunda jimbongo?
13 Jezú ua zuela ia lungu ni jimbongo: “Kana ku di lundila jimbongo mu ngongo, mua [tungu] o tubamba ni fuluja i jikinisa, o miii i kanda, i nhana. Lundenu-phe jimbongo mu diulu, ki mu moneka tubamba ni fuluja i jikinisa, mba miii i kanda, i nhana. Mbata kuoso kua ku kala jimbongo, kuene ku ku kala o muxima.”—Mat. 6:19-21.
14. Mukonda diahi ki unjimu ku lunda jimbongo mu ixi?
14 O jimbongo ja muthu mu ixi, ji tena kuvula dingi, o kitadi ndenge. Ji tena ku kala o ima ia soneka Solomá ia lungu ni ku ditunda kiambote bhu pholo ia athu—uhete, fuma, ni kutena. Jezú ua zuela ué ia lungu ni maka a tange Solomá mu divulu dia Ndongixi—jimbongo ja mundu ki ji nangenena. Kala ki uene kia mu mona ku mundu iú, jimbongo joso jiji, ji tena ku bhua, ni ku dibota ni lusolo. O mulongexi ia diiala, F. Dale Bruner, ua soneka ia lungu ni jimbongo: “Athu ejiia kiambote kuila, o fuma ki i nangenena ku muenhu. Mukua fuma mu Sábhalu ia bhiti, mu kithangana kia mukuá a mu zuela kiá kuma, uexile mukuá fuma. O ku kala ni kitadi ku muvu iú, ku muvu ua kamúkua, o kitadi ki bhua. . . . [Jezú] ua zolo o athu. Muéne ua suínisa o athu phala ka kuate ku sota kijingu, mukonda ki bhangesa o muthu ku thandanganha kiavulu. Kiki ki ki nangenena. Jezú ka mesena kuila o maxibulu [mê a kala uá] ni maka enhá. ‘Izuua ioso o mundu u di zangala ni muthu ua kexile ku thandu, mu ku tumina.’” Sumbala athu avulu a xikina mu izuelu íii, athu a kuxi eji xikina kuila o ukexilu iú u lungulula o ukexilu ua ku sola o ima ku mienhu iá? O kuila ua-nda kuehela ué o ukexilu iú ku lungulula o muenhu uê?
15. Tua tokala ku di suínisa mu ku sota ihi?
15 Saí atuameni a jingeleja, a boka kuila kituxi ku di bhakula mu ku sota o jimbongo, ni kuila athu a tokala kueha o ukexilu ua ku sota o ku ditunda kiambote ku muenhu. Ejiia kuila Jezú ka fidisa o muthu ku ditunda kiambote ku muenhu. Mu veji dia kiki, Jezú ua suínisa o maxibulu mê ku bhakula o nguzu iâ, mu ku lunda “jimbongo mu diulu” ka tena ku ji jikinisa. O kima kia beta-kota ki tua mesena, o ku di suínisa ku ditunda kiambote ku muenhu, kala kia mesena Jihova. O izuelu ia Jezú, i tu kuatekesa ku sola o ima i tua mesena mba i tua tokala o ku kaiela ku muenhu uetu. Mu kidi etu tua-ndala o kima kiala ku muxima uetu, kiala ni valolo phala etu.
16. Tu tena ku dielela ku ihi?
16 Se o vondadi ia ku sidivila Jihova iala ku muxima uetu, tu tena ku xikina kuila Jihova ua-nda bhangesa kuila tu tena ku kala ni ima i tua mesena. Muéne nange uehela kuila tu bhita ni nzala, ni dinhota mu kithangana kófele kala kia bhitile ni poxolo Phaulu. (1 Kol. 4:11) Maji né kiki, tu tena ku dielela mu kitendelesu kia bhana Jezú, kia kuila: ‘Kana ku thandanganha, muexi: Tu dia-hi? Mba tu nua-hi? Mba tu zuata-hi? Mbata ima ioso iii iene ia-lu sota o athu kejiia Nzambi. Maji enu o Tata ienu ia diulu ua kijiié kuma im’iii mua i bhindamena. Diangenu-phe kusota o Utuminu ua Nzambi ni uiukilu uê, nda ima ioso iii a mi kuiila-iu.’—Mat. 6:31-33.
SOTA O KU DITUNDA KIAMBOTE BHU PHOLO IA NZAMBI
17, 18. (a) O ku ditunda kiambote ku muenhu kuijila mu ihi? (b) O ku ditunda kiambote ku muenhu ki kuijila mu ihi?
17 O pondo ia beta o kota íii: O ku ditunda kiambote ku muenhu, ki kuijila mu ima i tu nganhala ku mundu. O ku ditunda kiambote ué, ki kuijila mu ikalakalu i tambula o Kidistá mu kilunga. O dibesá didi, diejila mu ku belesela kuetu, ni ufiele uetu kua Nzambi, u tu kanena kuila: “Uoso a mu tuika o kikalakalu kiki, u bhinga u kala fiiele.” (1 Kol. 4:2) Kienhiki, tua tokala tu kolokota ku kala fiiele. Jezú uambe: “Uoso-phe u kolokota katè bhu dizubhilu, muène uà bhuluka.” (Mat. 10:22) Ki u xikina kuila, o ku bhuluka kuene o ku ditunda kiambote ku muenhu?
18 Mu ku xinganeka mu maka i tua tange kiá, u tena ku mona kuila, o ku kala fiiele kua Nzambi, ki kiene kimoxi ni ku kala ni kutena, ku di longa kiavulu, ku kala mba fuma; ki kilombolola ué ku kala ni unjimu, mba ku kala hete. Né muene se tuala ni jimbongo mba kana, tu tena ku kala fiiele kua Nzambi. Bhu kaxi ka mundu ua Nzambi ku hama ia dianga, saí iá exile jimvuama, a mukuá jingadiama. Phaulu ua tendelesa o jimvuama: ‘A bhange jinge o mbote, mbe a kale ni umvuama ua ikalakalu ia fuama, ende ni ku bhana, ende ni ku bhandulula akua oso kala ni kima. Mu ku bhanga kiki, a kela mu lunda dimanenu diambote katé bhu thembu ia hádia, phala kieniókio a tene ku nganhala muenhu, uene o muenhu ua kidi.’ (1 Tim. 6:17-19) O kidi kiki, kia tokala ué lelu. Etu oso tuala ni kithangana kimoxi ni kikalakalu kimoxi: Tua tokala ku kala fiiele ni ku kala ni “umvuama ua ikalakalu ia fuama.’ Se tu bhanga kiki, tua-nda ditunda kiambote ku muenhu bhu pholo ia Mubhangi uetu, tua-nda zediua mu kuijiia kuila tua mu bhanga o ima ia mu uabhela.—Jisa. 27:11.
19. Ia lungu ni ku ditunda kiambote ku muenhu, ihi i ua-nda bhanga?
19 Ku tena ku langa o ima i u bhanga mu ukexilu uoso, maji u tena ku langa o ukexilu ua ku dibhana ni ima. Né muene se u dibhana ni ibhidi iavulu, di suínise phala ku kala fiiele kua Nzambi. Ki beta-kota o ku di suínisa. Dielela kuila Jihova ua-nda ku besoala kiavulu—ki kale kindala mba ku mundu ua ubhe. Kana ku jimba o izuelu ia tendelesa Jezú ku Jikidistá a a undu: “Kala-phe u fiiele katé bh’ufilu [uê], eme ngi ku bhana o kitundu kia muenhu.” (Dij. 2:10) Mu kidi, iú uene o ukexilu ua ku ditunda kiambote ku muenhu!
[Ibhuidisu ia ku dilonga]
[Foto ku mbandu 14]
Mu ibanzelu ia athu, Saúlu ua kexile mu ditunda kiambote
[Foto ku mbandu 15]
Phaulu ua londekesa kuila ua kexile mu ditunda kiambote
