Tu Kale Ku Mesu a Zele Mukonda Tu “Asonhi”
Tu Kale Ku Mesu a Zele Mukonda Tu “Asonhi”
‘Enu-akuetu, phange jami, nga mi dióndo, mu asonhi, mu jingenji mua tundu mu ixi ienu enu muala ku jixi jengi, lenge-nu jinga o jihanji ja xitu.’—1 PHE. 2:11.
KIEBHI KI UEJI TAMBUIJILA?
Mukonda diahi o Jikidistá a a undu a tokala ku a exana asonhi, jingenji mu ngongo’mu?
Mukonda diahi o ‘jimbudi ja mukuá’ asonhi, jingenji?
Ihi i ua kingila ia-nda bhita ku hádia?
1, 2. A nanhi a a tumbula kua Phetele kuila, “a a solo” ni mukonda diahi muéne ua a exana a “sonhi?”
MU KU bhita 30 a mivu kioso kia bande Jezú ku diulu, Phetele ua sonekena o asonhi a muangenene mu jixi ja Ponto, Ngalásia, Kapadósia, Ázia ni Bitinia, enhá exile o jiphange a a solo. (1 Phe. 1:1) O kizuelu “a a solo,” Phetele ua kexile mu zuela o jiphange a a undu ku nzumbi ikôla kála muéne a a ‘vualele dingi lua mukua,’ phala ku tumina ni Kristu ku diulu. (Tanga 1 Phetele 1:3, 4.) Mukonda diahi muéne uexana ió a a solo kuila ene ‘asonhi, jingenji?’ (1 Phe. 2:11) Ihi ilombolola o izuelu íii phala etu, se mu izuua ietu bhu kaxi ka 650 a Jimbangi, muthu umoxi ngó uamba kuila a mu undu?
2 O Jiphange a a undu ku hama ia dianga, a tokalele muene kua ixana asonhi. O Jikidistá a a undu lelu ala hanji ku muenhu, kanda kalelaku mu ixi. O poxolo Phaulu a mu undile ué, ua tokalele ku ‘kilunga kiofele’ uambe: ‘Etu o ixi ietu ku diulu, ku tua kinga ku tunda Mubhuludi uetu, Ngana Jezú Kristu.’ (Luk. 12:32; Fil. 3:20) Mukonda ‘ene a tokala ku diulu,’ kioso kia-nda fuá o Jikidistá a a undu, a-nda tambula o muenhu sé dizubhilu ku diulu. (Tanga Filipe 1:21-23.) Mukonda dia kiki, tu tena kua a ixana “asonhi” ku mundu iú uene mu tumina Satanaji.
3. Kibhuidisu kiebhi kia lungu ni ‘jimbudi ja mukuá’ ji tua-nda di longa?
3 Abha o ‘jimbudi ja mukuá?’ (Nzu. 10:16) O kuila o Bibidia ia a bhana ué kidielelu kia ku tunga mu ixi sé dizubhilu? Se phata, ene a-nda tunga mu ixi hádia ni hádia! Maji lelu ene uá asonhi hanji ku mundu iú. Kiebhi?
“O IBHANGELU IOSO HANJI IA KUATA O KUKEMA”
4. O jinguvulu ja mundu ka tena ku bhanga ihi?
4 Se o mundu ua Satanaji ka u buika luua, athu enioso ni Jikidistá ué a-nda tala hanji hadi, mukonda dia Satanaji ku bhukumukina Jihova. Mu divulu dia Loma 8:2, tu tanga: “Tua k’ijiia kuila o ibhangelu ioso hanji ia kuata kukema mu misusu kala ia kuvuala katé kindala.” O jinguvulu, ni jingijiie ni athu a mukuá a mesena o mbote, ka tena ku zubha o hadi ijila mu ku bhukumuka.
5. Ihi iene mu bhanga o mazunda ni mazunda athu tundé ku muvu ua 1914, ni mukonda diahi?
5 Tundé ku mu 1914, mazunda ni mazunda athu a solo ku kaiela o Sobha ia utuminu ua Nzambi, Jezú Kristu. Ene ka mesena ku bhanga mbandu ku mundu ua Satanaji. Ene a dituna ku kuatekesa o mundu ua Satanaji. Mu veji dia kiki, ene a bhakula o mienhu iâ mu ku kuatekesa o Utuminu ua Nzambi.—Lom. 14:7, 8.
6. Mukonda diahi o Jimbangi ja Jihova a exana asonhi ku mundu iú?
6 O Jimbangi ja Jihova ku 200 a jixi ene mu belesela o itumu i bhana o jinguvulu, kabasa kididi kua tungu, ene asonhi. Ene ka di te mu maka a jinguvulu mba maka a bhita mu ixi lelu. Lelu ene ejiia kuila a tokala ku mundu uobhe, ua-nda bheka Nzambi. Ene a sanguluka kiavulu mu ku mona kuila o izuua ia ku kala asonhi ku mundu iú, i bhixila ku dizubhilu.
7. O jiselevende ja Nzambi, kiebhi kia-nda kala akua ixi ni kuebhi kua-nda kala?
7 Kua kambe ngó, Kristu ni ungana uê ua-nda buika o mundu iú ua Satanaji. O unguvulu ua iuka ua Kristu ua-nda zelesa o ixi mu ku zubha o ituxi ni hadi. O nguvulu íii ia-nda zubha o ukexilu uoso ua iibha uijila mu ku bhukumukina o ungana ua Jihova. O jiselevende ja fiiele ja Nzambi, ene a-nda kala mu Palaízu. (Tanga Dijingunuinu 21:1-5.) Kiki kilombolola kuila, ibhangelu ioso hádia ‘ia ka jituka ku ubhika ua ituxi, hé ia ka bokona mu ufôlo ua fuma, ua an’a Nzambi.’—Lom. 8:21.
IHI IA TOKALA KU BHANGA O JIKIDISTÁ JA KIDI?
8, 9. Jimbulula ihi ia kexile mu zuela Phetele kioso kiambe ‘o jihanji ja xitu lengenu-ju.’
8 Phetele ua jimbulula ihi ia tokalele ku bhanga o Jikidistá kioso kiambe: ‘Enu-akuetu, phange jami, nga mi dióndo, mu asonhi, mu jingenji muala ku jixi jengi, lenge-nu jinga o jihanji ja xitu ja mu lua ita ni muenhu ua muthu.’ (1 Phe. 2:11) O kitendelesu kiki kia tokala ku Jikidistá a undu, maji kia tokala ué ku jimbudi ja mukuá ja Jezú.
9 Saí jihanji, o ku ji bhanga kala ki tuma o Mubhangi uetu, ki kituxi kana. Ki bheka kisangusangu ku muenhu. Mu kifika, saí ji vondadi ja lungu ni kudia, kunuá, ku bhanga itonokenu, ni ku kala ni makamba ambote ki ja iibha. Né muene o ku kala ni vondadi ia ku zeka ni kaza diê, a tokala ku ki bhanga mu ukexilu ua tokala. (1 Kol. 7:3-5) Phetele ua zuela ia lungu ni ‘jihanji ja xitu’ kua ió ala ‘bhânga jinga ni jihanji ja xitu ku mienhu iâ.’ Phala ku londekesa o ilomboluelu ia izuelu íii, saí ji Bibidia a soneka “jihanji ja iibha” (Versão Rei Jaime) mba “jihanji ja ituxi” (Nova Versão Internacional). Kienhiki, kabasa jihanji ja zembe Jihova, ji bhangesa o muthu ku batula o ukamba ni Nzambi, a tokala ku ji eha. Se ka jeha, o muenhu ua muthu u tena ku kala mu kiluezu, ni ku kamba ku tambula o muenhu ua kalelaku.
10. Iebhi o mibhetu iene mu ta Satanaji phala ku sunga o Jikidistá ku mundu uê?
10 O vondadi ia Satanaji o ku zozesa o vondadi ia Jikidistá ja kidi, ia ku kala “asonhi, jingenji” Ngongo’mu. O vondadi ia ku kala ni jimbongo, o vondadi ia ku bhanga o undumbu, o ku mesena ku kala ni fuma, o vondadi ia ku mesene ku kala ku pholo, o ku ximana kiavulu o ixi iê—ima ioso íii, ibhetu ia Satanaji, a tokala ku iejiia kiambote. Se tu dituna ku bhanga o jihanji ja xitu, tua-nda londekesa kuila, ki tu mesena ku bhanga mbandu ia mundu iú ua Satanaji. Tu londekesa kuila tu asonhi, tu jingenji mu Ngongo’mu. O kima ki tua mesena, o ku kala ku mundu ubhe ua iuka ua Nzambi, katé ku hádia ni hádia.
UENDELU UA IUKA
11, 12. Kiebhi kiene mu mona o asonhi a tungu mu jixi jengi, ni ihi ia zuela o athu ia lungu ni Jimbangi Jihova?
11 Phetele ua suluka mu kuzuela ihi ia tokala ku bhanga o Jikidistá “asonhi, jingenji” mu Ngongo’mu, kioso kia zuela mu velusu 12: “Kalenu ni uendelu uenu uafuama, mu’axaxi ka akua jixi jengi a kambe kuijiia Nzambi phala kioso kia mi âmba, exi mua mu bhanga kiaiibha, mu ku mona dingi o ikalakalu ienu iambote, hinu a kala mu ximana Nzambi, mu kizuua kiê kia ku a [talesa].” O athu ala asonhi mu jixi ja ngene, a a zuela kia iibha. Mukonda ene ka difu ni jivizinhu jâ, nange a a mona kuila athu a iibha. Nange ala ni ukexilu uâ ua kuzuela, ua ku bhanga o ima, ua ku zuata, mba ua ku tala. Maji se ene a kala ni ukexilu uambote, alondekesa kuila, o izuelu ia iibha ia athu, makutu.
12 Kiene kimoxi ué, o Jikidistá ja kidi, ka difu ni jivizinhu jâ mu ukexilu uavulu, kála o kuzuela ni ku tonoka. O izuatu iâ ni ukexilu uâ ua ku zuata, u a bhangesa ku di tungula mu sanzala mua tunga. O ukexilu iú u bhangesa o athu kuzuela kuila ene athu a iibha. Maji saí athu a uabhela o ukexilu uâ.
13, 14. Kiebhi o unjimu ‘kia u mona ua iuka mu ibhangelu?’ Bhanga kifika.
13 Kienhiki, o ukexilu uâ uambote, ulondekesa kuila o ima i zuela o athu, makutu. Né muene Jezú, ua sidivile Nzambi ni ufiiele uoso, a mu tatele. Saí athu a mu ixana “[bulutu,] hôlua, kamba dia akua kutambula lubhaku ni akua ituxi.” Maji o unjimu uê mu ku sidivila Nzambi ua londekesa kuila o athu akexile mu tanga makutu. Jezú uambe: “O Unjimu-phe a u tongolola kuala an’a Nzambi.” (Mat. 11:19) Kiene kimoxi ué lelu. Mu kifika, ku ixi ia Alemanha saí jivizinhu ka mu mona kiambote o jiphange a di bhakula mu sidivisu ia Betele mu mbanza ia Selters. Maji athu avulu mu mbanza, a banza kiéngi, ene amba: “O Jimbangi ja Jihova a kalakala mu Betele, ala ni ukexilu uâ, o ukexilu uâ, ki u lalamesa o athu mu diembu mua tungu.”
14 Kiene kia zuela ué ia lungu ni Jimbangi ja Jihova mu mbanza ia Moscou, mu ixi ia Rússia. A a tatela ima iavulu. Ku mbeji ia Kanake ku muvu ua 2010, A Corte Europeia dos Direitos Humanos mu mbanza ia Strasbourg, mu ixi ia França, ia bhanene kitumu kia kuila: “O ima ia zuela ku Jimbangi ja Jihova mu ixi ia [Moscou], makutu.” O Corte domestica ki ia londekesa kima kilondekesa kuila o Jimbangi ja Jihova,” ala ni kikuma, kála o ku uanuna o miji, ku suínisa o ukexilu ua ku di jibha, mba ku dituna o itendelesu ia ji dotolo. “O itumu ia bhana o Corte phala ku fidisa o Jimbangi, ia nemene kiavulu, mukonda ki kiene kia kexile mu itumu ia ixi.”
O KU BELESELA KUA TOKALA
15. Milongi iebhi ia kumbidila o Jikidistá ja kidi?
15 O Jimbangi ja Jihova mu ixi ia Moscou—ni ku mundu uoso—alondekesa o ukexilu ua tokala ku Jikidistá, kala kia tange Phetele. Muéne ua soneka: ‘Mukonda dia Ngana, belesele-nu athu oso: kixi sobha, ua suku ku pholo; mba jinguvulu, a a tumu kuala muéne, mu ku bhesa kaxtiku ku’athu a ituxi, ni ku bhana kijingu ku athu a bhanga mbote.’ (1 Phe. 2:13, 14) Sumbala ka bhange mbandu ia mundu iú ua iibha, o Jikidistá ja kidi a belesela o jinguvulu, mukonda ‘o maungana moso mala-ku, Nzambi ua a tula-ku’ kala kia a tendelesa Phaulu.—Tanga Loma 13:1, 5-7.
16, 17. (a) Ihi ilondekesa kuila etu ki tu di ta mu maka a jinguvulu? (b) Ihi iambe o jinguvulu?
16 Kioso o Jimbangi ja Jihova kia londekesa kuila “asonhi, jingenji” mu ngongo íii, ene ka bhange kiki phala ku dituna ku belesela o itumu; ká fidisa ué o athu o ku bhanga mbandu ku mundu, kala o ku di ta mu maka a jinguvulu. O Jimbangi ja Jihova ká di té mu maka a jinguvulu kála ki bhanga o jingeleja. Ene ka bhana jindunge ku jinguvulu. O kibanzelu kia kuila ene a mesena ku bhukumukina o jinguvulu ni itumu iâ, ki kidi!
17 O ku belesela a mu kalakala mu ididi ia jinguvulu kála kiambe Phetele, kuila: ‘Bhanenu kijingu ku athu oso ku mundu.’ O Jikidistá a xila ni ku bhana kijingu, mukonda dia ki kalakala kala muthu kia bhanga. (1 Phe. 2:17) Saí ithangana o akalakadi a jinguvulu a mona kuila se-ku kima kia a bhangesa ku di ta ni Jimbangi ja Jihova. Mu kifika, o nguvulu mu ixi ia Alemanhá, Steffen Reiche, o mukunji uokulu ku mbanza ia Brandenburg, ua kexile mu bhanga mbandu ku parlamento, uambe: “O ukexilu ua Jimbangi ja Jihova mu kaleia ua londekesa ídifua iambote ia tokala ku ilondekesa lelu, kála m’ukulu, ídifua ia tokala ku ilondekesa ku mbanza, ni ku suína kuâ bhu pholo ia masoladi SS ni henda iâ ia kexile mu londekesa ku akuâ mu kaleia. Mu ku xinganeka o ukexilu ua athu lelu ni kiebhi kiene mu talatala o asonhi, jingenji, ni athu a banza kiéngi, o ukexilu ua Jimbangi ja Jihova, a tokala ku ulondekesa ku athu mu ixi ietu.”
KULONDEKESA HENDA
18. (a) Mukonda diahi ki ki tu bhonza kulondekesa henda ku phange jetu ku mundu uoso? (b) Ihi iene mu mona athu ku Jimbangi ja Jihova?
18 O poxolo Phetele ua soneka: ‘Dizoli-enu ni phange joso ku mundu mu kala ni uôma ua Nzambi.’ (1 Phe. 2:17) O Jimbangi ja Jihova a xila Nzambi, kiki kia a suínisa ku bhanga o vondadi iê. Ene a sanguluka mu sidivila Nzambi kumoxi ni jiphange a mesena ku bhanga ué o vondadi ia Nzambi. Kienhiki, ki kia a bhonza ku ‘dizola ni phange joso ku mundu.’ O uphange iú ki tu u sange ku mundu iú, o ió ki Jimbangi ja Jihova a diuana kia mona o ukexilu iú. Mu kifika, saí diiala mulondekexi ua a sonhi mukua América, ua diuana mu ku mona o henda ia londekesa o Jimbangi ja Jihova ku jiphange jâ a tundu ku jixi jengi mu kiônge kia dikota kia Jimbangi ja Jihova ku mundu uoso, kia bhitile mu ixi ia Alemanha ku muvu ua 2009. Muéne uambe kuila, mu mivu ioso iene mu bhanga o kikalakalu kiki, nuka ua mono o henda íii. Saí Mbangi ia Jihova uambe: “Ima ioso ia zuela ua i zuela ni kisangusangu kioso.” Mu kiônge kia dikota mu uendele uevu-mu muthu ua zuela kiki, ia lungu ni Jimbangi ja Jihova?
19. Ihi i tua tokala o ku kolokota ku bhanga, ni mukonda diahi?
19 Mu misoso ioso i tuevu kiá—ni ima ia mukuá—o Jimbangi ja Jihova a dilondekesa kuila, “asonhi, jingenji” ku mundu iú ua Satanaji. Ni kisangusangu kioso, ene a mesena ku kolokota ku kala asonhi. O kidielelu kiâ, kia ku tokala mu ixi ku mundu uobhe ua Nzambi, kia dikota, saí kima kia a bhangesa ku kala ni kidielelu kiki. Ku mesena ku kala ku mundu uobhe?
[Ibhuidisu ia ku dilonga]
[Foto ku mbandu 23]
Ki tua mu bhângela o mundu ua Satanaji
[Foto ku mbandu 23]
Tua mu boka o mundu uobhe
[Foto ku mbandu 25]
O milongi ia Bibidia ia kuatekesa o muiji iú mu ixi ia Rússia
