A ngi vuala ku Moundsville, mbanza ia tululuka ia zukama ku Ngiji Ohio ku kibatu kia Virgínia. Tu kiuana kia jiphange, mala atatu ni muhatu umoxi, eme ngi mona ua kaiiadi mu divumu dia manh’etu, tuexile tu muiji ua sanguluka. O jitata jami exile athu a uabhele kiavulu o ku kalakala, athu a kidi, ni ku zola athu oso. Etu ki tuexile jimvuama, maji nuka tua zekele ni nzala. Mukonda dia ku kala Jimbangi ja Jihova, o jitata jetu a bhange ioso phala ku tu longa o Bibidia mu undenge.

Maji mu unzangala uami, o muxima uami ua mateka ku lungulukila o ima ia ngi longele mu undenge. Nga kexile mu dibhudisa se, o kuehela ku ngi endesa ku itumu ia Bibidia ieji ngi zediuisa muene. Nga kexile mu banza kuila, o ufôlo ua ku bhanga ioso i nga mesenene, iene o njila i bhangesa o muthu ku zediua mu kidi. Mu kiki, ki ngi kexile dingi múia mu iônge. O kota diami dia diiala, ni ndenge’ami ia muhatu, a kaiela uá o ukexilu uami ua iibha. O jitata jetu, a bhange ioso phala ku tu kuatekesa, maji tua ditunu o kikuatekesu kiâ.

Ki ngi kijidile kuila o ufôlo ua ku bhanga ioso i nga mesenene, ueji ku ngi ambata mu njila ia ubhika. Saí kizuua, kioso ki nga kexile mu tunda mu xikola, nga takajana ni kamba diami ua ngi bhana makanha phala ku buakula. Eme nga xikina. Tundé o kizuua kieniókio, nga xikina o ima ioso ia iibha. Mu ku bhita thembu, nga mateka o ku tambula ji droga, kúnua uhôlua, ni ku bhanga ima ia ufusa. Bhofele-bhofele, nga kexile kiá mu tambula ji droga ja makota, eme nga kituka mubhika ua ima íii. Phala ku dikila o ukexilu uami ua iibha, nga mateka ku sumbisa ji droga.

Kioso ki nga kexile mu bhukumukina o kitongoluelu kiami, kiene kia kexile hanji mu ngi tangela kuila o ukexilu ua muenhu uami, uexile ua iibha. Maji nga mono kuila, ki ngeji tena dingi ku lungulula o ukexilu ua muenhu uami. Sumbala nga kexile kumoxi ni athu, saí ithangana nga kexile mu divua ubheka uami ni ku kala ni kikote. Saí ithangana nga kexile mu banza ku jitata jami, exile athu ambote, eme nga kexile mu dibhudisa, kiebhi ki nga xisa o njila ia kidi.

Sumbala ki ngi kexile dingi ni kidielelu kia ku lungulula o ukexilu uami, o jindandu jami akexile ni kidielelu. Ku muvu ua 2000, o jitata jami a ngi xana phala kuia mu kiônge kia dikota kia Jimbangi ja Jihova. Sumbala ki ngi mesenene, maji nga xikina. O phang’ami ia diiala ni phang’ami ia muhatu a kaiele o ukexilu uami ua iibha, akexile ué mu kiônge kieniókio.

Mu kiônge kieniókio kia dikota, nga lembalala kuila nga kexile kiá mu kididi kieniókio muvu ku dima, phala kuimba o muimbu ua rock. O ima i nga mono, ia ngi bhangesa ku banza. Kioso ki nga kexile mu kididi kieniókio phala kuimba, o kididi kiezalele ni ixete, ni ixidixilu ia makanha. Athu avulu akexile kuenhoko, exile indanda, o mimbu iexile ia jindaka. Maji mu kiônge kia dikota, nga kexile ni athu a zediuile kiavulu—athu a ngi tambulula kiambote sumbala ki nga ejidile. O kididi kia zelele, o milongi ia kexile mu zuela kuenhoko, iexile njimbu iambote i bhana kidielelu. Mu ku mona ihi i bhanga o milongi ia Bibidia ku athu, ia ngi bhangesa ku banza, se mukonda diahi nga ditunine o kidi!—Izaia 48:17, 18.

Sé ku laleka, kioso kia zubha o kiônge kia dikota, nga banze o ku vutuka mu kilunga kia Nzambi. Mukonda dia ima ioso iévu mu kiônge kia dikota, o phange jami jiiadi, a banze uá o ku vutuka mu kilunga. Kitatu kietu, tua xikina o ku di longa o Bibidia.

O velusu ia Bibidia ia ngi tula dingi ku muxima, iala mu divulu dia Tiiaku 4:8, iambe: ‘Zukamenu kua Nzambi, muéne u mi zukama enu.’ Nga mono kuila, phala ku zukama kua Nzambi, nga tokalele ku zelesa o muxima uami. Nga tokalele kueha o ku buakula o makanha, ku tambula ji droga ni kúnua uhôlua.—2 Kolindo 7:1.

Nga xisa o makamb’ami okulu, eme nga soto makamba a ubhe a bheza Jihova. O kafunga ua kexile mu ngi longa o Bibidia, ua ngi kuatekesa kiavulu. Muéne izuua ioso ua kexile mu ngi xinda mu mutelembe ua kafuetele, iu ua kexile mu ngi kunda ni kuijiia kiebhi ki nga kexile mu bhita. Lelu, muéne kamba diami dia kidi.

Ku kixibhu kia muvu ua 2001, nga di bhakula kua Nzambi, mu ku ngi batizala, kumoxi ni phange jami jiiadi. O jitata jami ni phange ja mukuá mu kilunga, a sangulukile kiavulu mu ku mona o muiji uetu kumoxi mu ubhezelu ua Jihova.

Nga kexile mu banza kuila o itumu ia Bibidia i katula o ufôlo ua muthu, maji lelu ngi mona kuila iene i langa o muthu. O Bibidia ia ngi bhana nguzu phala kueha o ku sumbisa ji droga ni ku kituka muthu uambote.

Ngala ni ujitu ua ku bhanga mbandu ku muiji ua phange joso ku mundu ua Jimbangi ja Jihova. O athu enhá a dizola mudiâ ni kidi kioso, ene a sidivila kumoxi Nzambi. (Nzuá 13:34, 35) Mu ukamba iú ua phange joso ku mundu, nga tambula dibesá dia dikota—o muhatu’ami, Adriana, o muthu u nga zolo kiavulu. O ku sidivila kumoxi o Mubhangi uetu, kua tu bheka kisangusangu kiavulu.

Mu veji dia ku sota o fuma, nga di bhakula mu sidivisu ia thembu ioso phala ku longa o athu kiebhi kia tena uá o ku zediua mu ku di longa o Mak’â Nzambi. O kikalakalu kiki, kiene mu ngi bhekesa kisangusangu kiavulu. Ngi tena kuzuela ni kidi kioso kuila, o Bibidia ia lungulula o ukexilu uami. Mu kiki, nga sange o ufôlo ua kidi.