OKUILA Jezú ua zediuile muene ku muenhu? O jitata jê kexile jimvuama, muéne ué kexile ni ima iavulu. Jezú kexile né muene ni ‘kididi kia ku zendekela o mútue.’ (Luka 9:57, 58) A mu zembele kiavulu ku jinguma jê ni ku mu jibha.

Eie nange u zuela: “Kuku ki ku zediua ku muenhu!” Maji saí dingi ima ku muenhu ua Jezú i tua tokala kuijiia. Tua-nda di longa ima i uana ia bhange Jezú ku muenhu uê.

“Kúdia kuami o ku bhanga o vondadi ia ió ua ngi tumu.”—Nzuá 4:34.

Mu izuelu ni mu ima ia bhange, Jezú ua soto ku bhanga o vondadi ia Tat’ê ia diulu, Jihova. * Jezú ua sangulukile kiavulu mu ku bhanga o vondadi ia Nzambi. Muéne ua sokesa o ku bhanga o vondadi ia Nzambi ni kúdia, kála kilondekesa o velusu ia Bibidia ku thandu. Ijiia ihi ia bhangesa Jezú kuzuela kiki.

Jezú ua tange o izuelu íii ku mediia. (Nzuá 4:6) Muéne ua kexile ni nzala, mukonda uende o kamene koso ku mbanza ia Samadiia, iezalele ni milundu. O maxibulu mê a zuela: “Mesene kúdia kuku.” (Nzuá 4:31) O kitambuijilu kiê, kia londekesa kuma, muéne ua kexile ni nguzu ni ku divua kiambote mukonda dia ku bhanga o vondadi ia Nzambi. O kuila kiki ki kilondekesa kuila muéne ua zediuile ku muenhu?

‘Eme nga zolo o tata.’—Nzuá 14:31.

Jezú ua kexile ni ukamba ua kidi ni Tat’ê ia diulu. O henda iê kua Nzambi ia mu suínisa kuijidisa tat’ê ku athu—o dijina diê, o vondadi iê ni ídifua iê. Jezú ua londekesa kiambote o ídifua ia tat’ê mu izuelu iê, ni mu ima ia bhange ni mu ídifua iê—Kienhiki se tu mona Jezú, tua mu mona ué o Tat’ê. Mu kiki, kioso Filipe kia bhingi kua Jezú: “Tuidikise Tata,” Jezú uixi: ‘Uoso u ngi mona, ua mono ué o tat’etu.’—Nzuá 14:8, 9.

Jezú ua zolele kiavulu Tat’ê, iu ua mesenene ku mu belesela katé mu kufuá kuê. (Filipe 2: 7, 8; 1 Nzuá 5:3) O ku zola kiavulu Nzambi, kua bhangesa Jezú ku sanguluka kiavulu.

“Kana-ku henda ia tundu iíi, se muthu u bhana muenhu uê bhu kididi kia makamba-mê.”—Nzuá 15:13.

Mukonda tu akua ituxi, ki tuala ni kidielelu kia kidi. O Bibidia i zuela: “Mukonda dia muthu umoxi o kituxi kia bokona mu ngongo, o kufuá kuejila mu ituxi; kiene ué kia bhiti o kufuá ku thandu dia athu oso, kuma ene oso ituxi a i te.” (Loma 5:12, NW) Etu oso tu fuá mukonda dia kituxi.—Loma 6:23.

Mu henda iê, Jihova u tu bhana o kidielelu kia kidi. Muéne uehela o mon’ê ua iuka, Jezú, kufuá bhu kididi kietu phala ku tu bhulula ku ituxi ni mu kufuá. Jezú mu ku zola Tat’ê ni mundu, ua bhana o muenhu uê phala ku tu bhulula. (Loma 5:6-8) O henda iê ku athu, ia mu bhekela ku zediua kua kidi ku muenhu uê. *

‘Muenhú Mon’ami a kazola, nga mu zolo kiavulu.’—Matesu 3:17.

Jihova ua tange o izuelu íii tundé ku diulu, kioso Jezú kia mu batizala. Mu ku bhanga kiki, Jihova ua londekesa o henda iê kua mon’ê, Jezú. Kiki kiene kia bhangesa ué Jezú o kuzuela: ‘O Tata ua ngi zolo!’ (Nzuá 10:17) Mu kuijiia kuila Tat’ê ua mu zolele kiavulu, Jezú ua kolokota mu izukutisu ioso katé mu ufuilu uê. O henda íii, ia mu kuatekesa ué ku suína katé mu ufuilu uê. (Nzuá 10:18) Kiki, kia mu bhangesa ué ku zediua ku muenhu.

Mu kidi, Jezú ua zediuile ku muenhu. Tu tena ku di longa ima iavulu ku phangu iê ia lungu ni kiebhi ki tu tena ku zediua ku muenhu. O milongi ia kaiela-ku ia-nda zuela o itendelesu ia bhana Jezú ku akaiedi’ê, phala ku sanga o ku zediua kua kidi ku muenhu.