O IZUELU íii ia kidi muéne! Ku mundu iú, o muenhu uetu uezala ni “hadi ni mukôndo” nange u dibhudisa: “O kuila o muthu u tena ku zediua ku muenhu lelu?”

Tala o musoso ua Madiia. Muéne uexile muhatu ua nguzu, maji lelu uala kiá ni 84 a mivu, ka tena dingi kuenda ubheka uê. Sumbala uala hanji ni kilunji, muéne kale dingi ni nguzu ku mukutu. Kiebhi muéne kia tena ku zediua ku muenhu?

Abha eie? Nange uene mu dibhudisa se eie ua zediua muene ku muenhu. Nange o salu i u bhanga izuua ioso iene imoxi, i ku bhuisa kiavulu ni ku ku kuma. O athu nange ka bhana valolo mu nguzu mba mu ima i u bhanga. Né muene se uene mu di tunda kiambote ku muenhu, nange u kala ni uôma mu ku kamba kuijiia o ima ia-nda bhita ku hádia. Saí ithangana, u divua ubheka uê ni ku luuala. O muiji uê, nange kene mu dibhana kiambote. Nange ua fundu ndandu. Saí diiala a mu ixana Mandele, uexile dikamba dia kazola dia tat’ê ua kexile mu kata katé kiafu. Mandele ua divu kia iibha, ua divu kuma o ndolo nuka dingi ia ka bhua.

Kioso ki tu bhita mu hadi ni mukôndo, tu dibhudisa: O kuila tu tena ku zediua ku muenhu? Tu tena ku sanga o kitambuijilu kia kibhuidisu kiki, ku muthu ua kexile mu ixi, 2000 ja mivu ku dima—Jezú Kristu. Sumbala ni ibhidi iavulu ia bhitile, Jezú ua zediuile ku muenhu. Tu tena ué ku zediua ku muenhu, se tu kaiela o phangu iê.