O athu a mu sasa an’a muadi uâ mba a muhatu’â, ene mu dibhana ni maka avulu ni athu a mukuá ka tokala ku muiji. * O athu enhá, a dibhana ni maka alungu ni ku tambulula o tata mba mama ia ana a mu sasa, mu ithangana ia ku a kunda, mu ku a ­longa, ni mu ku a dikila. O makamba ni jindandu, ene uá mu bhanga ioso phala ku dibhana kiambote ku muiji. Di longe kiebhi o itumu ia Bibidia i tena ku ku kuatesa ku dibhana kiambote ni ibhidi íii ku muiji.

Muhatu mukua Namíbia dijina diê Judith, uambe: “O mama ua ana a muadi uami, ua zuelele ku tuana tuê kuila, ngi muhatu ngó ua ubhe ua tat’â, ni kuila o tuana tuami ki phange jâ kana. Nga luualele kiavulu ki ngevu kiki mukonda nga zolo kiavulu o tuana tuê kala tuana tuami ué.”

 O jingijiie a xikina kuila o ukamba ni jitata ja vuala o mona, u tena ku bhonza kiavulu phala o muiji ua mu sasa o mona ua diiala diéngi mba ua muhatu uéngi. Saí ithangana o ji mama, ene ka tena ku dibhana kiambote mudiâ. Ihi i tena o ku kuatekesa?

O sabhi phala ku dibhana kiambote: Zuela ioso i ua mesena. Se u fidisa o tata mba o mama ku kuatekesa mon’ê, o mona ua-nda divua kia iibha. * O jitata ja mona, ió ‘a vuala o mona,’ a bhanga mbandu ku muenhu ua mona. (Jisabhu 23:22, 25) Maji se u kala ni ukamba uavulu ni muhatu mba diiala u ua mu xisa kiá, ua-nda bhangesa o kaza diê dia ubhe ku luuala. Bhanga ioso phala ku vudise o ukamba ni muhatu mba diiala ua mu xisa kiá, mu tendelese o ima ia tokala o ku bhanga muéne ni ima ki i tokala ku bhanga, phala u lange o ukaza uê ua ubhe.

NDUNGE PHALA O TATA UA MU SASA MONA UA MUHATU’Ê

• Mu kuzuela ni muhatu u ua xisa kiá ukulu, zuela ngó o ima ia tokala ni ku sasa o tuana. Mu kifika, ni henda ioso, u tena ku mu ibhula se muéne u tena ku sola o izuua mba o ji ola mu kizuua kia ku kunda o mona. Íii ndunge iambote, phala ka xinde mba ka ku kunde mu ithangana ki i tokala.

• Se o tuana tuê a mu tu sasa ku tata iéngi, phala u tena kuzuela nau, ua tokala u xinda, ku soneka mukanda, mba u tumikisa njimbu mu mutelembe. (Matendelelu 6:6, 7) Saí iá a di zuelesa ni an’â ni ku di mona pholo bhu kaxi ka mutelembe ua internete. U tena kuijiia kiebhi kiala o tuana tuê—ni ku a longa ku kala ni ukexilu uambote.

NDUNGE PHALA O MAMA UA MU SASA MONA UA MUADI UÊ

• Kala ni “kixinganeku kimoxi” ni mama u ua mu mu sasela o tuana mu ku mu londekesa kuila, ku ua mu katula o kijingu kiê kia mama. (1 Phetele 3:8) Mu tangele izuua ioso kiebhi kiala o tuana ni ima iambote ia mu bhanga ene. (Jisabhu 16:24) Mu bhinge ndunge, ni ku mu sakidila kioso kia ku bhana o ndunge.

• Kana kulondekesa bhu pholo ia manh’a tuana kuila ua a a zolo kiavulu. Beverly, muhatu mu ixi ia Estados Unidos, uambe: “O ana a muadi uami, a mesenene ku ngi xana mama bhu pholo ia Manh’â. Eme ni muadi uami tua zuelele nau kuila kiene kia tokalele o ku ngi xana kioso ki tu kala kubhata, maji ka tokalele ku ng’ixana mama kioso kia kala ni manh’â ua a vuala, Jane, mba bhu pholo ia muiji ua Jane. Jane ni eme, tua kexile mu dibhana kiambote. Kienhiki, tua kexile mu di kuatekesa mu ku kuatekesa o tuana ni ima ia xikola.”

NDUNGE PHALA O JITATA JA VUALA O MONA, NI TATA UA MU SASA MONA UA MUHATU’Ê MBA MAMA UA MU SASA MONA UA MUADI UÊ KU DIBHANA KIAMBOTE

• Kana kuzuela kia iibha ku ana ia lungu ni tata mba mama ua vuala o mona, mba o jitata a mu sasa o tuana. Ki ku bhonzo kuzuela ima ia iibha, maji ki kima kiambote ku i zuela bhu pholo ia ana-ndenge. Ki uejiia se kiebhi mba kithangana kiebhi o tuana tua-nda bhitulula o ima ia iibha i ua zuela. (Ndongixi 10:20) Se o mona u ku tangela kuila o tata mba mama ua mu vuala, mba tata mba mama a mu mu sasa a ku zuelela kia iibha, muivue kiambote.  U tena ku mu tangela kuila: “Ki kola, ngi mesenene kuila uivua o ima íii ia iibha. Mam’enu ua dizangala n’eme, saí ithangana kioso o athu kia kala ni njinda, a zuela ima iibha.”

• Tendelesa o ima ia tokala ku bhanga o ana oso kubhata. Se kiki, ki ki bhana, jimbulula ihi ia tokala o ku bhanga sé kulondekesa kuila o tata ja mukuá kala ni valolo. Tala o kifika kiki:

  Mama ua mu Sasa Mona ua Muadi uê: Time, nga ku dióndo aneka o dituaia dia bete.

  Time u tambuijila: Kubhata dia mam’etu, mam’etu muene u di aneka.

  Mama ua mu Sasa Mona ua Muadi uê (ni njinda u di kola): Kiki mam’enu ua mu ku longa umonha.

  Kiebhi o Mama iú kia tokalele ku tambuijila?

  Mama ua mu Sasa Mona ua Muadi uê (ni ku tululuka, u tambuijila): Kiene-ze. Maji bhabha etu tu aneka o dituaia.

• Kana ku bhana kikalakalu ku ana mu kithangana kia-nda disanga ni tata mba mama. (Matesu 7:12) Se ku tena ku xisa o ikalakalu phala ku i bhanga mu kizuua kiéngi, dianga kuzuela ni tata mba mama ande dia kuzuela ku ana o kikalakalu ki ua solo phala ene ku bhanga.

Saí divulu, di tanga maka alungu ni muhatu ua kexile mu longolola o ukexilu ua muadi uê ua ku kala ku mbandu ia an’ê a kulu kiá, ni ku dituna kuila o an’ê ka kexile mu xila o muhatu. Muéne ua zuela “Nga kexile mu kala ni njinda iavulu.” Kiebhi ki u tena ku kala ni ukamba uambote ni ana a kulu kiá, sé ku zanga o ukaza uê?

O sabhi phala ku dibhana kiambote: Londekesa henda. O Bibidia i zuela: “Muthu ka sote kubhanduluka ngó muene, maji a sote ue o kubhanduluka kua akuâ.” (1 Kolindo 10:24) Sota ku tendela kiebhi mukuenu kia mu divua. O ana a diiala diéngi mba a muhatu uéngi, nange a banza kuila o jitata ka-nda a zola dingi. Mba a banza kuila o ku kala ni ukamba uambote ni muadi ua manh’â mba muhatu ua tat’â, ku kamba ufiiele ku tata mba ku mama ua a vuala. Kienhiki, o jitata a kala ni uôma ua kuila se a bazela o ana, ene ka-nda a xila ni ku a zola.

Mu veji dia ku jijidika o ana ku kala ni ukamba n’eie, ehela ene muene ku mateka ni ukamba. Ki kima kiambote ku jijidika muthu ku tu zola. (Mukumbi ua Mikumbi 8:4) Kienhiki, kana ku lota kiavulu kioso ki u mateka ku bhanga ukamba ni ana a muadi uê mba muhatu uê.

Kana kuzuela ioso i ua mu divua, né muene se ka mu ku xila. (Jisabhu 29:11) Se o ku langa o dimi diê di bhonza kiavulu, samba kala kia bhange o Sobha Davidi mukua Izalaiele, uambe: “[Jihova tata], langidila o dikanu diami; uinge o muenhu ua mizumbu iami.”—Jisálamu 141:3.

Se u sola ku tunga ku dibhata kua kudila o ana, nange ua-nda diuana mu ku mona kuila ene a zolo kiavulu o dibhata. Kana ku lungulula o ima ioso kubhata, bhenge-bhenge mu dixilu diâ diokulu.  Ku tokala ku di jimba kuila uai mu tunga ku dibhata diéngi dia ubhe.

Marion, muhatu mu ixi ia Canada, uambe: “Mu ithangana iavulu, o jitata jami akexile mu bhana ujitu ku tuana tuami, maji ka kexile mu bhana ku ana a muadi uami. Ki tu mona kiki, tua kexile ué mu sumba ujitu phala o mona ua muadi uami, maji mu ithangana ia mukuá ki tu kexile ni kitadi phala ku sumba.”

O sabhi phala ku dibhana kiambote: Suua o ibhindamu ia tuana tuoso kubhata. Tangela o jindandu jê ni makamba mê ia lungu ni kikutu ki ua bhange ni muiji uê ua ubhe. (1 Timote 5:8) Sumbala ku tena ku kingila kuila o jindandu jê ni makamba mê a zola o muiji uê ua ubhe, u tena ku a bhinga phala a kale ni ukexilu uambote kia bhixila kubhata dienu. U a jimbulula kiebhi kia-nda divua o tuana se ka alondekesa henda ni ku a bhangela o mbote.

Ehela kuila o jitata ja muadi uê mba muhatu’ê ua mu xisa kiá ukulu, a kale uá ni ukamba uambote ni tuana tuê. Saí mama mu ixi ia Inglaterra, dijina diê Susana, uambe: “Mu ku bhita 18 dia mbeji kioso kiafu muadi uami, nga kazala dingi, o jitata ja difundu muadi uami, a bhangele ioso phala ku zola o muadi uami ua ubhe. O ima ia lunguluka kioso ki tua bhingi o tuana phala ku a xinda ni ku a kunda, etu tua kexile mu a sakidila mu ima ioso ia kexile mu bhanga phala ku kuatekesa o tuana tua difundu.”

O ukamba ni athu ka bhanga mbandu ku muiji uê, u tena ku zanga o muiji uê. Maji kaiela o kitendelesu kia Bibidia, kiambe: “Ku tunga dibhata unjimu u u kala na-u, kiu ta-bhu masunga-phe dibhata ua difikidila.”—Jisabhu 24:3.