A ngi vualela ku mbanza iofele ia Texcoco, ku ixi ia México. Kioso kia ngi vuala, o ikoka ki ia kexile kiambote, iezalele ni fufuta. O athu akexile mu tunda ku sanzala jâ ni jibulu j’iezalele ni imbamba ia ku sumbisa. Tuexile jingadiama. Tu divua dia jiphange, eme ngi mona ua kasambuadi mu divumu dia mam’etu. Tat’etu ua kexile mu iudika idiotelu ia zanganha phala ku dikila o muiji. Maji muéne uafú kioso ki nga tenesa sambuadi dia mivu. Tundé o kithangana kieniókio, mam’etu ua mateka o ku kalakala phala ku tu dikila.

O tata ia mam’etu, ua kexile mu xika ngoma ni kuendesa kibuka kia ji ngimbidi ja ngeleja. Athu oso ku muiji uetu, a xikele ngoma. Mam’etu ua kexile mu kuimba mu ngeleja, o sekulu’etu, uexile ngimbidi ia opera ni ku xika ué ngoma. O muiji uetu ua tokalele mu ngeleja ia Katolika—ng’exile múkuatekexi ua padele, eme nga mesenene ku kala ngi mukunji ua Katolika mu ixi iéngi. Maji nga uabhele kiavulu ku tala ji filme ja ku di beta. Mu ku tala o jifilme jiji, eme nga mateka ku kala ni ukexilu ua iibha.

Ku mbanza ia Puebla, nga bokona mu xikola iexile mu longa athu a mesenene ku kala padele. Eme nga mesenene ku kala ngi padele. Maji mu muvu uami ua sukina mu ku di longa mu xikola ienioió, nga mono kima mu Ngeleja ia Katolika kia ngi luualesa kiavulu. Kilumba, madele, ua mesenene ku zeka n’eme. Eme nga kolokota ni ku dituna o ku zeka ni muéne, maji mukonda dia kiki, nga banze o ku kazala. Nga mono ué ji padele javulu ku bhanga ima ia iibha kala o undumbu. Mu ku bhita thembu, nga lungulula o ibanzelu iami, ki ngi mesenene dingi ku kala padele.

 Nga banze o ku di longa o Kuimba, mu Xikola ia kexile mu Mbanza ia México. Kioso ki nga zubha o ku di longa, nga kazala, etu tua vuala ana kiuana. Nga kexile mu dikila o muiji, mu kuimba mu Ngeleja ia Katolika.

Tundé ku dimatekenu, o ukaza uetu uexile ni maka. Tua kexile mu di kuata kiavulu mukonda dia difuba. Tua kexile mu di xinga ni ku di beta. Mu ku bhita 13 kia mivu, tua di xisa.

Nga di sange ni Jimbangi ja Jihova mu veji ia dianga, ande dia ku di xisa ni muhatu uami. Mbangi jiiadi ja Jihova, a phupu o dibhitu diami, ia a mesenene ku ngi longa o Bibidia. Nga fikile kuila ng’ejidile ima iavulu ia lungu ni Nzambi, eme nga xikina ku di longa o Bibidia ni ene phala ku alondekesa kuila ene kejidile ima iavulu ia lungu ni Bibidia. Nga kexile mu a bhanga ibhuidisu ia bhonzo i ngejidile kuila, keji tena ku i tambuijila. Maji ene akexile mu i tambuijila bhu kaxi ka Bibidia, nga diuanene kiavulu. Nga mono kuila, ki ngejidile ima iavulu ia lungu ni Nzambi. Maji o muhatu uami, ka zolele o Jimbangi ja Jihova, eme ué ki ngi kexile ni kithangana phala ku di longa, mukonda dia kiki, tua lembua.

Mu ku bhita mivu itanu, kioso ki nga kexile mu tunga ni muhatu uéngi, Elvira, a ngi kundu dingi ku Jimbangi ja Jihova. Elvira ka kexile mu ngi fidisa ku di longa o Bibidia ni Jimbangi ja Jihova, eme nga mateka o ku di longa izuua ioso. Maji, kua bhiti mivu iavulu phala ku lungulula o ukexilu uami.

Nga mono kuila, se nga mesenene ku bheza Jihova ni muxima uoso, nga tokalele ku lungulula o ukexilu uami. Kia dianga, nga tokalele ku xisa o kikalakalu kiami kia kuimba mu Ngeleja ia Katolika, ni ku sota kikalakalu kiéngi phala ku dikila o muiji uami. (Dijingunuinu 18:4) Nga tokalele ué ku kazala ni Elvira.

Maji o ia ngi bhonzele dingi, o kueha o njinda. Velusu jiiadi ja Bibidia ja ngi kuatekesa: O divulu dia Jisálamu 11:5, di londekesa kuila Jihova ua iibhila o usuéia, ni divulu dia 1 Phetele 3:7, dia ngi longo kuila, se nga mesena kuila Jihova uivua o misambu iami, nga tokalele ku xila o muhatu uami ni ku mu bhana ujitu. Mu ku xinganeka mu velusu jiji ni ku bhinga kikuatekesu kua Jihova bhu kaxi ka musambu, nga tenene ku langa o njinda iami ni ku tululuka ni akuetu.

Eme nga zediua kiavulu ni muiji uami. Nga mu bhanga ué ioso phala ku dibhana kiambote ni ana u nga vuala ni muhatu ua dianga, u nga mu xisa, ni ku kuatekesa o muiji uami ua ubhe ku kolesa o kixikanu kiâ kua Jihova.

Mu undenge uami, nga mesenene ku kala padele ni ku kuatekesa o athu. Maji lelu, nga sange o ku zediua kua kidi ku muenhu. Nga mu dikila o muiji uami, mu ku longa o athu o uhete ua kuimba. Ngi sakidila Jihova, mu ku ngi bhana o kithangana kia ku muijiia ni ku lungulula o ukexilu uami!