O kuila Jihova u tu suua, inga muéne ka mona o hadi i bhita na-iu o athu mu ixi? O kitambuijilu kia Bibidia kia kibhuidisu kiki, ki tu suínisa kiavulu. Nzambi u suua kiavulu o athu mu ixi, iu ua mesena kuila, tu zediua ku muenhu. Izuua ioso muéne uehela o athu—katé muene ió kene mu ximana Nzambi—a katule mbote mu ima iambote i bhanga Nzambi. Tanga o izuelu ia poxolo Phaulu.—Tanga Ikalakalu 14:16, 17.

Mu kuzuela ni athu a tungile mu mbanza ia Listra ka kexile mu bheza Nzambi, Phaulu uambe: ‘Nzambi m’okulu uehela akua-jixi joso kuenda kioso kia a tumu o mixima iâ. Maji mu thembu joso Nzambi ka kambele ku d’idikisa kioso muéne kiene, mu mbote iê iene mu ku bhanga. Kuma muéne mukua ku bhana jinga mvula ku diulu, ni idima kuvula bhu thembu ja tokala, phala mu kale ni kúdia, o muxima uenu uizale ni ku sanguluka.’ Ihi ilombolola o izuelu ia Phaulu?

O akua Listra, a tenene ku tendela kiambote kuila, o ia kexile mu zuela Phaulu, kidi. Exile idimakaji, ia a tungile mu kididi mua kexile mu bhana idima iambote. Maji Phaulu ua a lembalesa kuila, Nzambi muéne u bhana o mvula ni idima kuvula bhu thembu ja tokala. Kienhiki, kioso kia kexile mu bhongolola o idima ni ku idia, ene akexile mu katula mbote mu henda ia Nzambi.

O izuelu ia Phaulu ku akua Listra, i tu longa ima iavulu ia lungu ni Jihova Nzambi.

Jihova u tu bhana o ufôlo ua ku sola. Talesa kuila, Jihova uehela kuila o athu a ifuxi ioso kexile abhezi ia Nzambi, “kuenda kioso kia a tumu o mixima iâ.” Saí divulu di kuatekesa o alunguludi, di zuela kuila o izuelu íii, ilombolola “kuenda kala kia mesenene” mba “ku bhanga o ima ia monene kuila ia uabha bhu pholo iâ.” Jihova ka jijidika muthu o ku mu bheza. Muéne ua tu bhange ni ufôlo ua ku sola—o uhete ua ku sola o ima i tu bhanga ku muenhu uetu.—Matendelelu 30:19.

Jihova ua mesena kuila tu muijiia. Phaulu ua jimbulula: ‘Nzambi ka kambe ku d’idikisa.’ O divulu di kuatekesa o alunguludi di tua tumbula kiá, di zuela ué kuila, o izuelu íii ilombolola: “Muéne uene mu di londekesa ku athu, se muéne Nzambi ia kídifua kiahi.” O ibhangelu ia Nzambi, i bhana umbangi ua ‘ídifua iê ia kambe ku moneka ku mesu,’ kala o ku bhanga o mbote, o unjimu, o kutena ni henda. (Loma 1:20) Jihova u dilondekesa ko kuetu bhu kaxi ka Bibidia. (2 Timote 3:16, 17) O kuila kiki, ki kilombolola kuila muéne ua mesena kuila tu muijiia?

Jihova ua mesena kuila tu zediua ku muenhu. Phaulu uambe kuila muéne ‘uizalesa o muxima uetu ni kudia.’ Katé muene ni athu kene mu xila Jihova, adia uá mu idima i bhana Nzambi ni ku sanguluka ku muenhu. Maji Nzambi ua mesena kuila tu sanga o ku zediua kua kidi. Tua-nda tena ngó ku sanga o ku zediua kua kidi se tu di longa o kidi kia lungu ni muéne ni ku i kumbidila ku muenhu uetu.—Jisálamu 144:15; Matesu 5:3.

Izuua ioso tuene mu katula mbote mu henda ia Nzambi. Mukonda diahi ku di longe dingi ia lungu ni kiebhi ki u tena o ku sakidila o Nzambi uizalesa o muxima uetu ‘ni ku sanguluka’ ni kudia kua tu bhana muéne.