Eie u xikina kua Nzambi? Se kiene, o kuila u tena ku jimbulula ihi i ku bhangesa ku xikina kuila kuene Nzambi? Saí polova i tu londekesa kuila Nzambi uala ni unjimu ua soko, kutena ni henda iavulu. Polova iebhi, ni kiebhi kiki ki tu suínisa? Phala ku tambuijila, tala o izuelu ia poxolo Phaulu ia sonekena o Jikidistá ku Loma.

Phaulu uambe: ‘Kuma o ídifua iê ia kambe ku moneka ku mesu, a tena ku i mona ku ibhangelu ia mundu, kala o nguzu iê ni Unéne uê, ki i jimbi, mukonda ia di monekena. Kuma athu ia a jimbulukila mu imbamba ia bhange Nzambi. Kala kiki, ene kala dingi ni maditatu.’ (Loma 1:20) Nzambi ua xisa o kidimbu kiê mu ima ia bhange muéne, kala kia zuela Phaulu. Tu mone kiambote ihi ilombolola o izuelu íii ia Phaulu.

Phaulu ua soneka kuila, o ídifua ia Nzambi a tena ku i mona ‘ku ibhangelu ia mundu.’ Mu velusu íii, o kizuelu mu Ngeleku “mundu” ki kilombolola o ixi. Maji, kilombolola o athu mu ixi. * Kienhiki, Phaulu ua mu zuela kuila, tundé mu kithangana kioso Nzambi kia bhange o athu, ene eji tena ku mona o ídifua ia mubhangi mu ima ia bhange muéne.

O polova íii iala muene mu’axaxi k’etu. Ka i sueka mu ima iala mu ngongo, maji a tena “ku i mona kiambote.” Ki kale o ima iofele mba ia makota i tu sanga mu ngongo, iene ki i tu londekesa ngó kuila kuene muene Nzambi, maji i tu londekesa ué o ídifua iê ia iuka. O kuila o ima i tu mona mu ngongo, ki i tu londekesa kuila, Nzambi uala ni unjimu? O kuila o jithéthembua ku diulu, ni musanza ua kalunga, ki i tu londekesa kuila Nzambi uala ni kutena? O kudia kua uabha ku tuene mudia, o ufuilu ua dikumbi ni utundilu uê, ki ilondekesa o henda ia Nzambi ku athu?—Jisálamu 104:24; Izaia 40:26.

Ihi i tu longa o polova íii? Kiki ki tu londekesa kiambote kuila, o athu kene mu mona o polova íii, ka tena ku dituna o ima ia mona. Saí ngijiie, u zuela kiki: Xinganeka muthu ua mu kuendesa dikalu, u xibhaka o kijimbuete kilondekesa kuila ua tokala ku “kondoloka—Ndé ku kiasu.” O xiku dia ngoji u mu imanesa ni ku bhingi multa. Maji o muthu ua mu kuendesa o dikalu u mateka o ku di zokela mu kuila ka mono o kijimbuete. Maji o xiku dia ngoji, ka mu loloka kana mukonda o kijimbuete a tena ku ki mona kiambote ni kuila o muendexi ua dikalu ua mu mona muene kiambote. Kikalakalu ué kia muendexi ku tala o kijimbuete ni ku ki belesela. Kiene kimoxi ué, o ibhangelu i tu londekesa kuila kuene muene Nzambi. O “kijimbuete” kiki, a tena ku ki mona kiambote ku athu. Kuma a tu bhange ni uhete ua ku xinganeka, tu tena ku mona o kijimbuete kiki. Ki tu tena ku dituna o ima i tu mona kuila kia kidi muene.

Sé phata, o ibhangelu i tu longa ima iavulu ia lungu ni Mubhangi. Maji saí kima kia mukuá kia beta ku tu longa ia lungu ni muéne—o Bibidia. Bhu kaxi ka Bibidia, tu tena ku sanga o itambuijilu ia ibhuidisu ia beta o kota ku muenhu: Iebhi o vondadi ia Nzambi phala o ixi ni athu ala-mu? O kuijiia o kitambuijilu kia kibhuidisu kiki, ki tena ku tu kuatekesa ku zukama dingi kua Nzambi uala ni “ídifua a tena ku i mona kiambote.”