Ujitu uebhi u ueji sanguluka kiavulu o ku u tambula? Sé phata, tueji sanguluka ku tambula ujitu ua muthu ua mu tu bhana ni muxima uoso, kana mukonda a mu mu jijidika. O ku bhana kua tokala ku kala ku muxima ua muthu. Kiki kima kia beta o kota phala etu, bhenge-bhenge phala Jihova. Tala o izuelu ia poxolo Phaulu io soneke mu divulu dia 2 Kolindo 9:7.

Mukonda diahi Phaulu ua soneka o izuelu íii? Muéne ua mesenene ku suínisa o Jikidistá akua Kolindo ku kuatekesa o phange jâ mu nzumbi akexile mu mbanza ia Juda. O kuila muéne ua a jijidika o ku kuatekesa? Kana, muéne ua soneka: ‘Kala muthu a bhane uila kia mu kala ku muxima uê, ka bhane ni ku luuala, mba mu ku mu jijidika. Mukonda Nzambi ua zolo o mukua ku bhana ni ngalasa ioso.’ Tu mone kiambote ihi ilombolola o kitendelesu kiki.

“Kala muthu a bhane uila kia mu kala ku muxima uê.” Phaulu ua londekesa kuila, o Kidistá ua kidi, u bhana mukonda ua ki banze “ku muxima” uê o ku bhana. Kienhiki, o Kidistá u banza kiambote mu ibhindamu ia phange jê. Saí diiala, mukuá ku tokuesa o Bibidia, uambe: O kizuelu “uila kia mu kala ku muxima” “kilombolola ku dianga ku ki banza ande dia ku ki bhanga.” Kienhiki, o Kidistá u dianga ku xinganeka mu ibhindamu ia phange jê anga u di bhuidisa kiebhi kia tena ku a kuatekesa.—1 Nzuá 3: 17.

“Ka bhane ni ku luuala, mba mu ku mu jijidika.” Phaulu ua londekesa maukexilu a iiadi a ku bhana ka tokala ku kala nau o Jikidistá ja kidi—O ku bhana ni ku luuala mba ni kijijidiku. Saí divulu dijimbulula kuila, o muthu u bhana kima ni ku luuala, “ka bhana o kima ni muxima uoso mba ka mesena ku ki bhana.” O muthu u bhana kima mu ku mu jijidika, u bhana mukonda a mu mu jijidika ku bhanga kiki. Nanhi mudietu, u uabhela ku tambula ujitu ua muthu u bhana ni ku luuala mba mukonda a mu mu jijidika?

‘Nzambi u zola akua ku bhana ni ngalasa.’ Phaulu uambe kuma se o Kidistá u mesena ku bhana, muéne ua tokala u ki bhana ni ngalasa ioso. Kienhiki, o ku zediua k’ijila mu ku bhana ni muxima ua sanguluka. (Ikalakalu 20:35) O athu a tena ku mona o kisangusangu bhu pholo ia mukua ku bhana. Kienhiki, o kizuelu “ngalasa” ki tena kulondekesa kiebhi kia mu divua o muthu ku muxima ni bhu kanga. O mukua ku bhanga ni ngalasa ioso, u sangulukisa o muxima uetu. Muéne u sangulukisa o muxima ua Nzambi. Saí Bibidia ia mukuá i zuela: “Nzambi u zola o athu a zolo o ku bhana.”—Versão em Inglês Contemporâneo.

O izuelu ia poxolo Phaulu, kijila ki kuatekesa kiavulu o Jikidistá a uabhela o ku bhana. Né muene se tua mu bhana o kithangana kietu, o nguzu ietu, mba o ima i tuala na-iu, tua tokala ku ki bhanga mu vondadi ietu muene, mukonda tua uabhela o ku bhana ni ngalasa ku akuetu, bhenge-bhenge o athu a bhindamena. O ku bhanga kiki, kia-nda tu sangulukisa mukonda Nzambi, u ‘zola o akua ku bhana ni ngalasa.’