“O muthu u kamba ku loloka akuâ, u bula o mulonde kua-nda bhitila muéne.” O izuelu íii, a i tumbula ku hama 17 ku mukua musoso, Edward Herbert mukua Grã-bretanha, ilondekesa se mukonda diahi tua tokala ku loloka akuâ: Lelu mba mungu, tua-nda mesena o muloloki ua akuetu. (Matesu 7:12) Maji, saí dingi kima kia beta-kota ki tu bhangesa ku loloka akuetu. Tala ia zuela poxolo Phaulu mu divulu dia Kolose 3:13.—Tanga.

Mukonda etu oso tu akua ituxi, saí ithangana tu tena ku bhangesa akuetu ku divua kia iibha mba ku xinga akuetu, ene nange kiene uá kia tu bhanga. (Loma 3:23) Kiebhi ki tu tena ku kala ni kutululuka ni akuetu akua ituxi kála etu? Phaulu ua tendelesa ku di loloka mudietu. O kitendelesu kiki, kiala ni valolo ia dikota lelu kala kia kexile midi jiiadi ja mivu ku dima kioso kia ki soneka. Tu xinganeke dingi kiambote mu izuelu ia Phaulu.

‘Mu di lendukile mudienu.’ O kizuelu, ‘ku di lendukila’ mu Ngeleku, kilombolola ku tululuka ni ku kala ni muanhu mu ku dibhana ni akuetu. Saí divulu diambe kuila, o Jikidistá alondekesa o ídifua íii mu ku kala ni “muanhu mu ku dibhana ni athu kala ni ifua iambote.” O kizuelu, “mudienu” ki tu londekesa kuila tua tokala ku dilondekesa muanhu mudietu. Kioso ki tu lembalala kuila tuala ni ifua i bhangesa akuâ ku luuala, ki tua-nda kuehela kuila o ifua ia iibha ia akuetu, ku tu katula o kutululuka mudietu. Maji ihi i tu bhanga se akuetu a tu luualesa?

“Mu di loloka.” Kala kia zuela o diiala mukua ku tokuesa, uambe kuila o kizuelu ku “di loloka” mu velusu íii, mu Ngeleku, “ki kilombolola ku jima o kituxi . . . maji kilondekesa o ukexilu uambote ua ku loloka.” Divulu dia mukuá dizuela ué kuila, o kizuelu kiki ki tena kulombolola, “ku bhanga favolo mba ku bhanga mbote ku akuetu.” Tu di bhangela mbote mu ku loloka akuetu mu vondadi ietu, né muene “se bhuala muthu ua di kuata ni mukuá.” Mukonda diahi-phe tua tokala ku kala ni vondadi ia ku bhanga favolo ku akuetu? Mukonda lelu mba mungu, etu ué tua-nda mesena kuila akuetu, a tu bhangela uá favolo mu ku tu loloka.

“Kala kioso Nzambi kia mi loloka enu, kiene ue ki mu bhanga jinga.” Kiki kiene ki tu bhangesa ku mesena ku loloka akuetu: Jihova Nzambi u tu loloka ni muxima uoso. (Mikeia 7:18) Xinganeka mu favolo ia dikota i bhanga Jihova ku athu a diela o ituxi iâ. Jihova ki mukua ituxi kala etu. Maji né kiki, muéne ni vondadi ioso u loloka o athu a diela o ituxi iâ, né muene ni kuijiia kuila muéne nuka ua-nda bhinga kuila o akua ituxi a mu bhangela favolo mu ku mu loloka. Mu kidi, Jihova phangu ia dikota ia ku loloka o athu a diela o ituxi iâ!

O henda ia Jihova i tu zukamesa dingi kua muene, ni ku bhangesa ku kaiela o phangu iê. (Efezo 4:32–5:1) Tua tokala o ku dibhudisa: ‘Jihova mu henda iê u ngi loloka, mukonda diahi ki ngi loloka o athu akua ituxi kala eme, a diela mu ku ngi luualesa?’—Luka 17:3, 4.